བདུན་ཕྲག་འདིའི་ནང་རྒྱ་གར་གྱི་བོད་མིའི་ཁྲོད་གསར་དུ་ཏོག་དབྱིབས་ནད་པ་ ༡༧༨ ཐོན་པའི་ཁྲོད་སྐྱེས་པ་ ༩༠ དང་བུད་མེད་༨༨ ཡོད་པ་དང་མི་ ༣ རྐྱེན་འདས་སུ་ཕྱིན་ཡོད་འདུག
ཨ་རིའི་གཞུང་གི་རོགས་རམ་འོག་ཟླ་འདིའི་ཕྱི་ཚེས་ ༡༩ ནས་བཟུང་བལ་ཡུལ་ནང་གི་བོད་མི་ཚོར་ཨ་རིའི་ཇོན་སན་ (Johnson & Johnson)ཞེས་པའི་ཏོག་དབྱིབས་འགོག་ཁབ་རྒྱག་བཞིན་ཡོད་པ་ལྟར། ད་ལྟའི་ཆར་བལ་ཡུལ་ནང་གི་བོད་མི་མང་ཤོས་གནས་སྡོད་ཀྱི་ས་ཆ་མཆོད་འཇོར་དང་འཕགས་ཤིང་སོགས་གཙོ་བོར་གྱུར་བའི་སྦོག་ར་ཁུལ་གྱི་གཞིས་ཆགས་ཁག་ནང་མང་ཆེ་བར་འགོག་ཁབ་རྒྱག་ཚར་གྱི་ཡོད་པ་དང་། དེ་བཞིན་ཤར་ཁུམ་བུ་སོགས་སུའང་འགོག་ཁབ་རྒྱག་པའི་ལས་མགོ་རྩོམ་གྱི་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད། བལ་ཡུལ་གྱི་རྒྱལ་ས་ཀ་ཐི་མན་ཌུ་ཡི་མཆོད་འཇོར་ས་གནས་མགོ་འཛིན་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས་སུ་ས་གནས་ཀྱི་འགོག་ཁབ་གནས་སྟངས་སྐོར་དྲིས་པར་ཁོང་གིས། ཟླ་འདིའི་ཕྱི་ཚེས་ ༡༩ ཙམ་ནས་བལ་ཡུལ་གྱི་བོད་མི་སེར་སྐྱ་གྲངས་སུམ་སྟོང་མ་ཟིན་ཙམ་ལ་མཆོད་འཇོར་ས་གནས་མགོ་འཛིན་ལས་ཁུངས་ཀྱིས་རྒྱབ་གཉེར་ཡིག་ཆ་གནང་ཡོད་པ་དང་། མང་པོ་ཞིག་ལ་ཐད་ཀར་དཔྱ་ཁྲལ་ལག་དེབ་ཀྱི་ཐོག་ནས་བལ་ཡུལ་གཞུང་གི་ཏོག་དབྱིབས་འགོག་ཁབ་ཐོབ་ཡོད་པ་དང་། དེ་བཞིན་ཟླ་འདིའི་ཕྱི་ཚེས་ ༢༦ ཉིན་ཟུར་དུ་བོད་མི་གྲངས་ ༩༡༠ དང་ཚེས་ ༢༧ ཉིན་མི་གྲངས་ ༧༨༠ ལ་ཨ་རིའི་ཇོན་སན་ (Johnson & Johnson) ཏོག་དབྱིབས་འགོག་ཁབ་བརྒྱབ་ཡོད་པ་དང་། ཨ་རིའི་སྨན་ཁབ་དེ་ཐེངས་གཅིག་མ་གཏོགས་རྒྱག་དགོས་ཀྱི་མེད་སྐོར་དང་། ད་ལན་བོད་མིར་དམིགས་བསལ་གྱི་རོགས་སྐྱོར་ཐོབ་པ་དེ་སྤྱིར་ནོར་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་བོད་མིའི་སྒྲིག་འཛུགས་ཀྱི་ལམ་སྟོན་འོག་བྱུང་བ་ཡིན་སྐོར་བརྗོད་བྱུང་།
དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་ཏོག་དབྱིབས་ལས་དོན་ཚོགས་ཆུང་ལ་ཞལ་པར་བརྒྱུད་འབྲེལ་བ་ཞུས་ཏེ། བལ་ཡུལ་གྱི་བོད་མི་སྤྱི་ཡོངས་ཀྱི་འགོག་ཁབ་ཐོབ་པའི་གནས་སྟངས་ག་འདྲ་ཡིན་མིན་བཀའ་འདྲི་ཞུས་པར་ད་ལྟའི་ཆར་དབུས་ལ་གནས་ཚུལ་ཞིབ་ཕྲ་འབུལ་འབྱོར་བྱུང་མེད་སྐོར་བརྗོད་བྱུང་ལ། ཟླ་འདིའི་ཕྱི་ཚེས་ ༢༢ ཉིན་གྱི་ཚོགས་ཆུང་གི་གསལ་བསྒྲགས་སྐབས་བལ་ཡུལ་ནང་དུ་བརྒྱ་ཆ་ ༩།༤༤ ལ་འགོག་ཁབ་དང་པོ་ཐོབ་ཡོད་པ་དང་བརྒྱ་ཆ་ ༡༢།༩༤ ལ་འགོག་ཁབ་གཉིས་པ་ཐོབ་སྐོར་བརྗོད་འདུག དེ་རིང་ཕྱི་ཚེས་ ༢༩ ཉིན་གྱི་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༠ པའི་ཐོག བདུན་འདིའི་ནང་རྒྱ་གར་ནང་གསར་དུ་ཏོག་དབྱིབས་ནད་པ་ ༡༧༨ བྱུང་ཡོད་པ་དང་། དེའི་ཁྲོད་སྐྱེས་པ་ ༩༠ དང་བུད་མེད་༨༨ ཡོད་འདུག བོད་མི་ ༣ རྐྱེན་འདས་སུ་ཕྱིན་ཡོད་འདུག
བལ་ཡུལ་གཞུང་གིས་རྒྱ་གར་གྱི་འགོག་ཁབ་(Astrazeneca)དང་རྒྱ་ནག་གི་འགོག་ཁབ་(Vero Cell)གཉིས་རྒྱག་མུས་ཡིན་ཡང་འགོག་ཁབ་མ་རག་པའི་དཀའ་ངལ་འཕྲད་མུས་ཡིན་འདུག ཁ་སང་འདི་གའི་གསར་འགོད་པས བལ་ཡུལ་དུ་གནས་སྡོད་བོད་མི་ཞིག་དང་ལྷན་དུ་ཁ་བརྡ་བྱེད་སྐབས། བལ་ཡུལ་ནང་ཏོག་དབྱིབས་འགོག་ཁབ་རག་རྒྱུ་ཁག་པོ་ཆགས་ཡོད་པ་དང་དམིགས་བསལ་བལ་ཡུལ་གྱི་ཡུལ་མི་རང་ལ་འདང་ངེས་ཤིག་རག་གི་མེད་དུས་བོད་མི་ཚོར་རག་ཁག་པོ་ཆགས་འདུག ཅེས་བརྗོདབྱུང་། བལ་ཡུལ་གཞུང་གིས་ཏོག་དབྱིབས་འགོག་ཁབ་འདང་ངེས་གྲ་སྒྲིག་མ་ཐུབ་པའི་དཀའ་ངལ་འོག རྒྱ་དཀར་ནག་གཉིས་ཀྱི་ལག་ནས་འགོག་ཁབ་ཀྱི་རོགས་སྐྱོར་བླངས་ཏེ་ནང་ཁུལ་ཆབ་སྲིད་དང་མི་མང་གི་འཕྲོད་བསྟེན་སོགས་ཀྱི་ཐོག་དཀའ་ངལ་ཆེན་པོ་འཕྲད་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
