སྲིད་སྐྱོང་མཆོག་ནས་བོད་རྒྱའི་དཀའ་རྙོག་སེལ་ཐབས་ཀྱི་འཆར་སྣང་དང་ལས་གཞིའི་སྐོར་ཞུས་པ་དང་འབྲེལ་ཨ་རིས་མུ་མཐུད་བོད་མིར་རྒྱབ་སྐྱོར་ཡོང་བའི་འབོད་སྐུལ་ཞུས་ཡོད་པ་རེད།
Sikyong Penpa Tsering with the leaders of the Bureau of Democracy, Human Rights, and Labor.
ཕྱི་ཟླ་ ༧ ཚེས་ ༣༡ ཉིན་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་བའི་སྟེང་གནས་ཚུལ་ཐོན་པ་ལྟར་ན། ཟླ་དེའི་ཕྱི་ཚེས་ ༣༠ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ཐོག་བརྙན་ལམ་བརྒྱུད་ཨ་རིིའི་ཕྱི་སྲིད་ལྷན་ཁང་གི་ཁོངས་གཏོགས་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་ (Bureau of Democracy, Human Rights, and Labor) འགན་འཛིན་རྣམ་པ་དང་ལྷན་དུ་ཚོགས་འདུ་ཞིག་ཚོགས་ཡོད་འདུག
དྲ་ལམ་གྱི་ཚོགས་འདུའི་སྟེང་སྲིད་སྐྱོང་སྤེན་པ་ཚེ་རིང་མཆོག་གིས། བོད་རྒྱའི་དཀའ་རྙོག་སེལ་ཐབས་ཀྱི་འཆར་སྣང་དང་ལས་གཞིའི་སྐོར་དང་། བཙན་བྱོད་བོད་མི་རྣམས་ལ་ད་ལྟ་འཕྲད་མུས་ཡིན་པའི་དཀའ་ངལ་སྐོར་གསུངས་ཡོད་འདུག དེ་བཞིན་རྒྱ་གར་དང་ཨ་རིའི་གཞུང་གིས་གཏོང་ཕོད་ཆེན་པོའི་སྒོ་ནས་མཐུན་འགྱུར་རོགས་རམ་གནང་མེད་ཚེ། བོད་མིའི་གནས་སྟངས་དེ་ད་ལྟ་ནང་བཞིན་སྲ་བརྟན་གནས་ཐུབ་ཐབས་མེད་པས་རྒྱ་གར་དང་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུས་པ་དང་སྦྲགས། མ་འོངས་པར་མུ་མཐུད་རོགས་འདེགས་གནང་རྒྱུའི་འབོད་སྐུལ་ཞུས་འདུག་ལ། ཏོག་དབྱིབས་གཉན་རིམས་ཀྱི་གནས་སྟངས་ཞི་འཇགས་བྱུང་བ་དང་བསྟུན། སྲིད་སྐྱོང་མཆོག་ཨ་རིའི་ཆེད་ཕེབས་ཀྱིས་ཕྱི་སྲིད་ལྷན་ཁང་གི་ལས་བྱེད་ཚོར་ཐུག་འཕྲད་ཞུ་རྒྱུའི་རེ་བ་ཡོད་སྐོར་སོགས་གསུངས་འདུག
ད་ལྟའི་ཆར་ཨ་རིའི་གཞུང་གིས་བདུན་ཕྲག་ཁ་ཤས་ནང་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་བསྐོ་གཞག་གནང་ཐུབ་པའི་ཚོད་དཔག་གནང་བཞིན་ཡོད་པ་ལྟར། ཚོགས་འདུའི་ཐོག་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་འབྲེལ་ཡོད་ལས་བྱེད་རྣམ་པས་བོད་དོན་སླད་ཐུགས་ཁུར་ཆེ་བཞེས་ཀྱིས་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་དང་། མ་འོངས་པར་མུ་མཐུད་བོད་དོན་སླད་དེ་ལྟར་རྒྱབ་སྐྱོར་གནང་བའི་རེ་སྐུལ་ཞུས་གནང་ཡོད་པ་རེད།
དྲ་ལམ་གྱི་ཚོགས་འདུ་དེར་ཨ་རིའི་གཞུང་གི་ཚན་པ་དེའི་དྲུང་ཆེ་ལས་རོགས་ལི་ས་པི་ཊར་སན་ (Lisa Peterson) ལགས་དང་། དྲུང་གཞོན་ལས་རོགས་ལས་ཚབ་གཙོ་བོ་སི་ཁོ་ཊི་བྷུ་སི་བྷི་ (Scott Busby) ལགས། དམིགས་བསལ་ཕྱག་རོགས་ཨན་ཊོན་ཇོང་གྷེ་ནིལ་ (Anton Jongeneel) ལགས། སི་ཊེ་ཕེ་ནེ་སན་ཌི་བྷེག་ (Stephanie Sandbeck) ལགས། ཌེ་ཝིཌ་ཨེལ་བྷར་ (David Elber) ལགས། མར་གྷི་རེ་ཊི་ཊར་ལེ་ (Margreet Turley) ལགས་བཅས་དང་། བོད་མིའི་སྒྲིག་འཛུགས་ཀྱི་ཕྱོགས་ནས་ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་དང་། དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་མཉམ་ཞུགས་གནང་ཡོད་འདུག
གསར་འགོད་པ། པ་སངས་ཚེ་རིང་།
