འདི་ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་ནས་བོད་ཀྱི་སྐད་ཡིག་ཆེད་སྦྱོང་གཙུག་ལག་རབ་འབྱམས་པའི་སློབ་མ་ ༦ དང་བོད་ཀྱི་རྩོམ་རིག་གཙུག་ལག་རབ་འབྱམས་པ་ ༩ བཅས་ཁྱོན་སློབ་མ་ ༡༥ བསླབ་པ་མཐར་ཕྱིན་ཡོད་ཅིང་འདི་ལོ་མཐར་ཕྱིན་སློབ་མ་མང་ཤོས་ཆགས་འདུག
འདི་གའི་གསར་འགོད་པས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་རྩོམ་རིག་སློབ་དཔོན་ཆེན་མོ་ཨ་འབྲུག་དཀོན་མཆོག་ལགས་སུ་འདི་ལོའི་མཐར་ཕྱིན་སློབ་མའི་སློབ་ཐོན་དཔྱད་རྩོམ་གྱི་སྤུས་ཚད་སོགས་ཀྱི་སྐོར་དྲིས་པར་ཁོང་གིས། སྤྱིར་གཙུག་ལག་རབ་འབྱམས་པའི་རིམ་པ་ནི་ལོ་གཉིས་དང་རྒྱུགས་དུས་བཞི་ཡི་དུས་ཡུན་ཡིན་པ་དང་། མགོ་བརྩམས་པ་ནས་བཟུང་སྟེ་རྒྱུགས་དུས་སོ་སོར་སློབ་ཚན་མང་པོ་ཡོད་པ་དང་། སློབ་ཚན་མི་འདྲ་བའི་བྱེད་སྒོའི་ཁྲོད་ཞིབ་འཇུག་གི་རྣམ་པ་ཅན་གྱི་དཔྱད་རྩོམ་འབྲི་རྒྱུ་ནི་དེའི་ཆ་ཤས་གལ་ཆེན་ཞིག་ཆགས་ཡོད་པ་དང་། ད་ལོའི་མཐར་ཕྱིན་དཔྱད་རྩོམ་ནི་སློབ་མ་རེ་རེར་ལམ་སྟོན་དགེ་རྒན་གཉིས་རེ་ཡིས་ལམ་སྟོན་དང་མཛུབ་ཁྲིད་ཀྱི་འོག་ནས་གྲུབ་ཡོད་པ་ཞིག་རེད། སྐབས་དང་པོའི་ཞིབ་འཇུག་དཔྱད་རྩོམ་རྣམས་ཡག་པོ་ཡོད་ཀྱང་། རྩོམ་ཡིག་གི་ཁ་གཏད་ས་ནི་གནའ་རབས་ཀྱི་རྩོམ་ཡིག་གི་ལྟ་བའི་སྐོར་ལ་ཆགས་ཡོད། ད་ལོའི་དཔྱད་རྩོམ་རྣམས་ཀྱི་དམིགས་བསལ་གྱི་ཁྱད་ཆོས་ནི་གང་ཐུབ་ཀྱིས་བཙན་བྱོལ་སྤྱི་ཚོགས་ཁྲོད་ཀྱི་ང་རང་ཚོའི་ཁ་ཡོད་ལག་ཡོོད་ཀྱི་དངོས་ཡོད་གནས་སྟངས་དང་། སྤྱི་ཚོགས་ཀྱི་གནས་ཚུལ་ལ་གང་ཉེ་ཉེ་བྱས་ཡོད། ཅེས་དང་ཡང་ཁོང་གིས། གཞི་རྩའི་བཙན་བྱོལ་བོད་ཀྱི་ཕ་སྐད་གཞིར་བཞག་གི་སློག་གསོའི་བྱུང་རིམ་གྱི་ཁྲོད་དུ། སྐད་ཡིག་དང་རྩོམ་རིག་སོགས་རང་སྐྱ་འཕེར་བར། རྒྱ་གར་གྱི་མཐོ་སློབ་ཀྱིས་ངོས་འཛིན་ཡོད་པ་དང་། རང་སྐྱ་འཕེར་བའི་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་སྦྱོང་གི་འཕེལ་རྒྱས་ཀྱི་ནང་དུ་གོམ་པ་དང་པོ་སྤོ་མཁན་ཞིག་གི་ཐོག་ནས་བཤད་ན། རྩོམ་རིག་གི་ནང་དོན་དང་ཕྱོགས་ཡོངས་ནས་ཡག་པོ་འདུག ཅེས་བརྗོད་བྱུང་།
བོད་ཀྱི་སྐད་ཡིག་གཙུག་ལག་རབ་འབྱམས་པའི་མཐར་ཕྱིན་སློབ་མ་བཀྲིས་ཚེ་རིང་གིས་འདི་གའི་གསར་འགོད་པར། ངས་སྲིད་དོན་རྒྱལ་རབས་སུ་གསལ་བའི་དབྱིན་སྐད་ཟུར་ཆག་དང་སྒྲ་གདངས་སྐད་དོད་ལ་དཔྱད་པ། ཞེས་པའི་བརྗོད་གཞིའི་ཐོག་མཐར་ཕྱིན་དཔྱད་རྩོམ་བྲིས་པ་ཡིན། ངས་བྲིས་པའི་དཔྱད་རྩོམ་དེ་ནི་གཞིས་བྱེས་གཉིས་སུ་གནས་པའི་ཤེས་ཡོན་པ་སུ་གང་གིས་ཕལ་ཆེར་བྲིས་མེད་པ་དང་། ངས་སྲིད་དོན་རྒྱལ་རབས་སུ་གསལ་བའི་དབྱིན་སྐད་ཀྱི་ཐ་སྙད་དག་གི་ཟུར་ཆག་དང་། སྒྲ་གདངས། སྐད་དོད་བཅས་ལ་ཞིབ་འཇུག་བགྱིས་ནས་ཐ་སྙད་ཀྱི་གྲངས་འབོར་གཏན་འབེབ་བྱས་ཡོད་ཅེས་དང་། ངས་མི་ལོ་ལྔ་ཙམ་གྱི་རིང་ལ་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བོད་ཀྱི་སྐད་ཡིག་ཆེད་སྦྱོང་བྱས་པ་དང་། ལྷག་པར་ད་ཐེངས་ཀྱི་མཐར་ཕྱིན་དཔྱད་རྩོམ་ནི་ངའི་མི་ཚེའི་ནང་གི་གྲུབ་འབྲས་ཆེ་ཤོས་དེ་ཡིན་ཞིང་། མ་འོངས་པ་ཡང་མུ་མཐུད་དུ་དེའི་སྐོར་ལ་ཞིབ་འཇུག་དང་སློབ་གཉེར་བྱ་རྒྱུ་ཡིན། ཞེས་བརྗོད་བྱུང་།
