རྒྱ་ནག་གཞུང་གིས་བོད་ཀན་སུའུ་ཞིང་ཆེན་གྱི་ཁོངས་སུ་ཡོད་པའི་གཡོག་མོ་མཁར་རྫོང་གི་མཁར་དམར་དགོན་པ་སྒོ་བརྒྱབ་སྟེ་གྲྭ་བཙུན་རྣམས་སྐྱ་སར་འབབ་དགོས་པའི་བཙན་བཀའ་བཏང་བའི་རྐྱེན་གྱིས་དགོན་པའི་གྲྭ་བཙུན་མང་པོས་ངུ་ངག་འདོན་བཞིན་ཞི་བའི་ངོ་རྒོལ་བྱས་ཡོད་འདུག
རྒྱ་ནག་པེ་ཅིན་དུ་ཡོད་པའི་བོད་རིགས་བུད་མེད་རྩོམ་པ་པོ་ཚེ་རིང་འོད་ཟེར་ལགས་ཀྱི་གཙོས་པའི་རྒྱ་རིགས་མང་པོས་ཊེ་ཝི་ཊར་སོགས་ཀྱི་སྟེང་དུ་བོད་ནང་གི་དགོན་པ་ཞིག་སྒོ་བརྒྱབ་ཡོད་སྐོར་གྱི་བརྙན་ཐུང་དང་གནས་ཚུལ་མང་པོ་བརྒྱུད་སྐུར་ཤུགས་ཆེན་པོ་བྱེད་ཀྱི་འདུག་པས། འདི་གའི་གསར་འགོད་པས་བོད་ཕྱི་ནང་གཉིས་ཀྱི་ཉམས་ཞིབ་པ་སོགས་མི་ཁག་ཅིག་ལ་འབྲེལ་བ་ཞུས་ཏེ་རྒྱུས་ལོན་བྱུང་བ་ལྟར་ན། རྒྱ་ནག་གིས་སྒོ་རྒྱག་དགོས་ཟེར་བའི་བོད་པའི་དགོན་པ་དེ་ནི། ཀན་སུའུ་ཞིང་ཆེན་ཁ་ཆེ་མི་རིགས་རང་སྐྱོང་ཁུལ་ཟེར་བའི་ཁོངས་ཀྱི་མཁར་དམར་དགོན་པ་ཞེས་པ་དེ་ཡིན་ཞིང་། དགོན་པ་དེ་ནི་དུས་རབས་བཅུ་གཉིས་པའི་ནང་ས་སྐྱ་འགྲོ་མགོན་ཆོས་རྒྱལ་འཕགས་པས་ཕྱག་བཏབས་པའི་བཀའ་མ་མཆོད་རྟེན་ཡོད་སར་གསར་བཞེངས་རྒྱ་སྐྱེད་གནང་བ་ཞིག་ཡིན་འདུག
གསར་འགོད་པས་རྒྱུས་ལོན་བྱུང་བ་ལྟར་ན། མཁར་དམར་དགོན་པ་སྒོ་རྒྱག་དོན་ནི་འདས་ལོར་རྒྱ་ནག་ནང་ཏོག་དབྱིབས་གཉན་རིམས་ཀྱི་ཛ་དྲག་དཀའ་ངལ་འཕྲད་སྐབས། མཁར་དམར་དགོན་པའི་བླ་མ་ཀུན་བཟང་འཕྲིན་ལས་ཆོས་ཀྱི་རྒྱལ་མཚན་མཆོག་ནས་བྱམས་བརྩེའི་རོགས་རམ་ཆེད་ཕྱོགས་བཞི་གང་སར་ཡོད་པའི་ཁོང་གི་སློབ་ཕྲུག་རྣམས་ཀྱི་ས་ནས་རྒྱ་སྒོར་ཁྲི་ ༣༠ ལྷག་ཞལ་འདེབས་སུ་བསྡུས་ཡོད་པར་བརྟེན། ས་གནས་སྲིད་གཞུང་གིས་དགོན་པ་ལ་སྒོར་མོ་འབོར་ཆེན་དེ་འདྲ་ཡོད་དོན་གང་ཡིན་སོགས་ཀྱི་འདྲི་རྩད་བྱས་རྗེས། ལོ་རེའི་དགོན་པའི་ཡོང་འབབ་དང་ས་ཁང་ཕྱེད་ཀ་ས་གནས་སྲིད་གཞུང་ལ་སྤྲོད་དགོས་པའི་བཀའ་བཏང་བ་དེ་དགོན་པས་ཞལ་བཞེས་གནང་མེད་སྟབས། སྲིད་གཞུང་གི་འབྲེལ་ཡོད་སྡེ་ཁག་ནས་སྔར་ལྷག་ཞིབ་འཇུག་བྱས་པ་བརྒྱུད་དགོན་པ་སྒོ་བརྒྱབ་སྟེ་གྲྭ་བཙུན་རྣམས་སྐྱ་སར་བབ་དགོས་པའི་བཙན་བཀའ་བཏང་ཡོད་འདུག
སྤྱི་ཚོགས་བརྒྱུད་ལམ་ཁག་ཏུ་ཐོན་པའི་བརྙན་ཐུང་ཁག་གི་ནང་། རྒྱའི་ལས་བྱེད་པས་བཙན་གྱིས་གྲྭ་བཙུན་རྣམས་དགོན་པ་ནས་ཕྱིར་འབུད་གཏོང་ཐབས་བྱེད་བཞིན་ཡོད་པ་དང་། བཙུན་མ་མང་པོ་དགོན་པའི་འདུ་ཁང་མདུན་དུ་འཛོམས་ཏེ་ཐང་ལ་འགྱེལ་ནས་ངུ་ངག་འདོན་གཔ་དང་། ཁག་ཅིག་ས་ལ་བསྡད་དེ་ཞལ་འདོན་སྐྱོར་བཞིན་ཡོད་པ་མཐོང་རྒྱུ་འདུག་པ་མ་ཟད། དམིགས་བསལ་དགེ་འདུན་པ་གཉིས་ནས་དགོན་པའི་འདུ་ཁང་ཐོག་ནས་མར་མཆོངས་རྩིས་བྱེད་ཀྱི་ཡོད་པ་མཐོང་གི་འདུག་ལ། དེའི་སྐོར་ཊུ་ཝི་ཊར་སྟེང་བརྒྱུད་སྐུར་གནང་མཁན་གྱི་རྒྱ་རིགས་ཁག་ཅིག་གིས་གྲྭ་བཙུན་ཁག་ཅིག་ཁང་ཐོག་ནས་མར་མཆོངས་ཏེ་རང་ཤི་བརྒྱབ་ཡོད་སྐོར་བརྗོད་འདུག
ཡང་མཁར་དམར་དགོན་པ་སྒོ་རྒྱག་གིན་ཡོད་པའི་གནས་ཚུལ་དང་འབྲེལ་ནས་དགོན་པ་དེ་བོད་ཀྱི་དགོན་སྡེ་ཞིག་དང་ཆོས་བརྒྱུད་གང་གི་ཁོངས་གཏོགས་ཡིན་མིན་སོགས་ཀྱི་སྐོར་ལ་དོགས་སློང་སྣ་ཚོགས་ཡོང་གི་ཡོད་སྟབས། འདི་གའི་གསར་འགོད་པས་མིང་བརྗོད་འདོད་མེད་པའི་འབྲེལ་ཡོད་བོད་མི་ཞིག་ལ་སྐད་ཆ་དྲིས་སྐབས། དགོན་པ་དེ་ནི་དཔལ་ས་སྐྱ་བའི་དུས་སྐབས་སུ། འགྲོ་མགོན་ཆོས་རྒྱལ་འཕགས་པས་ཕྱག་བཏབས་པའི་མཆོད་རྟེན་ཞིག་ཡོད་པ་དེའི་ཤུལ་རེད། འགྲོ་མགོན་ཆོས་རྒྱལ་འཕགས་པ་རྒྱ་ནག་ལ་མཆི་སྐབས་ལམ་བར་ནས་ས་ཆ་དེ་ནས་སྤས་སྐོང་བྱས་ཡོད་པ་དང་། སྐབས་དེར་རྒྱ་ནག་གོང་མས་བཀའ་བཏང་བ་ལ་བརྟེན་ནས་བཀའ་མ་མཆོད་རྟེན་ཞེས་པ་བཞེངས་པ་རེད། ད་ལྟ་རྒྱ་ཡིག་ནང་(Yongjing) ཟེར་བའི་ས་ཆ་དེ་བོད་བཙན་པོའི་སྐབས་བོད་རྒྱའི་ས་མཚམས་ལས་བོད་ཀྱི་ས་ཁོངས་ཤིག་ཡིན། དེ་ལ་གཡོག་མོ་མཁར་རྫོང་ཟེར་གྱི་ཡོད། ཆོས་བརྒྱུད་ཐད་ནས་སྔོན་མ་ས་སྐྱའི་དགོན་པ་ཡིན་པ་དང་རྒྱ་ཡིག་གི་ཡིག་ཆ་མང་པོའི་ནང་ས་སྐྱ་རེད་ཅེས་བྲིས་ཡོད། འོན་ཀྱང་། རྗེས་སུ་གཡོག་མོ་མཁར་རྫོང་གི་དགོན་པ་མང་པོ་ཞིག་དགེ་ལུགས་པར་གྱུར་ཡོད་ལ། ན་ནིང་ཀན་སུ་ནས་བོད་ཀྱི་དགོན་པ་མང་པོའི་ལོ་རྒྱུས་དཔེ་དེབ་ཅིག་དཔར་སྐྲུན་གནང་བའི་ནང་མཁར་དམར་དགོན་དགེ་ལུགས་པའི་དགོན་པ་ཞིག་ཡིན་པར་བཤད་འདུག འོན་ཀྱང་། ཆོས་བརྒྱུད་གང་གི་ཁོངས་གཏོགས་ཡིན་ངས་གསལ་བོ་ཞིག་མི་ཤེས། ཞེས་བརྗོད་བྱུང་།
ད་ལྟ་དགོན་པ་དེར་འདུ་ཁང་བཞི་ཙམ་ཡོད་པའི་ནང་གི་གཅིག་གི་ནང་དུ་འགྲོ་མགོན་ཆོས་རྒྱལ་འཕགས་པས་ཕྱག་བཏབས་གནང་བའི་བཀའ་མ་མཆོད་རྟེན་ཡོད་པ་དང་། མཁར་དམར་དགོན་པ་རིག་གནས་གསར་བརྗེ་སྐབས་རྒྱ་ནག་གིས་གཏོར་བཤིག་བཏང་བ་ནས་ཕྱི་ལོ་ ༢༠༠༦ བར་ལྷག་ཡོད་པ་དང་། ཕྱི་ལོ་ ༢༠༠༦ ནས་མགོ་འཛུགས་ཀྱིས་ཕྱི་ལོ་ ༢༠༡༡ ལོར་དགོན་པ་གསར་སྐྲུན་གྱི་ད་ལྟའི་གནས་བབ་འདི་བྱུང་བ་དང་། བར་སྐབས་ཤིག་ལ་མཁར་དམར་དགོན་པར་གྲྭ་བཙུན་ཁྱོན་ ༣༠༠༠ ལྷག་ཡོད་པར་བཤད་ལ། དགོན་པ་རྒྱ་སྐྱེད་ཀྱི་ལས་གཞིའི་ཁྲོད་ས་གནས་སྲིད་གཞུང་དང་དགོན་པའི་བར་ས་ཆའི་དཀའ་ངལ་ཞིག་ཀྱང་འཕྲད་ཡོད་འདུག
གསར་འགོད་པ། སྐལ་བཟང་སྦྱིན་པ།
