ཕོ་ལེ་བསམ་འཕེལ་གླིང་གི་བོད་མི་གཙང་མའི་དུད་ཁྱིམ་བཅུ་ཡིས་རྒྱ་ནག་གཞུང་གི་སྐྱོབ་གསོ་བླངས་མེད་སྐོར་འགྲེལ་བརྗོད་གནང་བྱུང་།

བོད་བལ་མཐའ་མཚམས་ཀྱི་ཡུལ་མི་དང་བོད་རིགས་ཁྲོད་རྒྱ་ནག་གཞུང་གི་སྐྱོབ་གསོ་ལེན་མཁན་ཡོད་ཀྱང་ཕོ་ལེ་བསམ་འཕེལ་གླིང་གི་བོད་པ་གཙང་མའི་དུད་ཁྱིམ་ ༡༠ དེས་རྒྱ་གཞུང་གི་སྐྱོབ་གསོ་ལེན་མྱོང་མེད་སྐོར་འགྲེལ་བརྗོད་གནང་བྱུང་།

རྒྱ་ནག་གཞུང་གིས་བོད་བལ་ས་མཚམས་ཁག་གཙོ་བོར་གྱུར་བའི་བལ་ཡུལ་ནང་སྐྱོབ་གསོའི་རིགས་མང་པོ་སྤྲོད་བཞིན་ཡོད་པ་དང་། འདི་ལོའི་ཕྱི་ཟླ་ ༦ པའི་ཟླ་མཇུག་ཙམ་དུ་རྒྱ་ནག་ཕྱི་འབྲེལ་ལྷན་ཁང་གི་ས་མཚམས་དང་རྒྱ་མཚོའི་ཚན་པས། བལ་ཡུལ་ཤར་རྒྱུད་ཀྱི་མཐའ་འཁོབ་ཞིང་ཆེན་ཏབ་ལེ་ཇུང་ (Taplejung) གི་ཁོངས་གཏོགས་ཝ་ལུང་ཁུལ་གྱི་མི་མང་ལ་སྐམ་ཟས་རིགས་ཀྱི་རོགས་སྐྱོར་སྤྲད་ཡོད་པ་དང་། སྐབས་དེར་ཕོ་ལེ་བསམ་འཕེལ་གླིང་བོད་མིའི་གཞིས་ཆགས་ཀྱི་ཁྱིམ་ཚང་འགའ་ཤས་ནས་ཀྱང་སྐྱོབ་གསོ་དེ་བླངས་ཡོད་པའི་གནས་ཚུལ་ས་གནས་གཞིས་མི་ཞིག་གིས། བོད་མི་མང་སྤྱི་འཐུས་ཤིག་བརྒྱུད་དེ་འདི་གར་མཁོ་སྤྲོད་གནང་བྱུང་། སྤྱིར་བཏང་ཕོ་ལེ་བསམ་འཕེལ་གླིང་གཞིས་ཆགས་ཁུལ་དུ་བོད་རིགས་གཙང་མའི་དུད་ཁྱིམ་ ༡༠ དང་ཡུལ་མིའི་དུད་ཁྱིམ་ ༥ བཅས་ཁྱོན་དུད་ཁྱིམ་ ༡༥ ཙམ་ཡོད་འདུག

ཕྱིས་སུ་ཕོ་ལེ་བསམ་འཕེལ་གླིང་རང་བདེན་ཚོགས་ཆུང་གི་ཚོགས་མི་དགེ་ལེགས་ཆོས་འཕེལ་ལགས་ནས་ས་གནས་བོད་མིའི་འཐུས་ཚབ་བཅུས་མིང་རྟགས་བཀོད་པའི་ཡི་གེ་དང་བཅས་ཡིག་ངག་གཉིས་ཐོག་ནས་འདི་གར་གནས་ཚུལ་དེའི་སྐོར་ལ་འགྲེལ་བཤད་གནང་བ་ལྟར། དེ་རིང་འདི་གའི་གསར་འགོད་པས་ཞལ་པར་བརྒྱུད་རྒྱ་ནག་གཞུང་གི་སྐྱོབ་གསོ་དེའི་སྐོར་སྐད་ཆ་དྲིས་པར་ཁོང་གིས། རྒྱ་ནག་གཞུང་གིས་སྐྱོབ་གསོ་དེ་བལ་ཡུལ་གྱི་ཝ་ལུང་དང་། ཡང་དམག དགུན་ས་སོགས་ལ་སྤྲད་ཡོད་པ་ལས་བོད་མིའི་གཞིས་ཆགས་ལ་སྤྲད་ཡོད་པ་མ་རེད། སྤྲོད་ས་དེ་ཚོའང་བལ་ཡུལ་གྱི་མི་སེར་རང་ཆགས་ཀྱི་ཡོད་པ་རེད། ཕོ་ལེ་བསམ་འཕེལ་གླིང་ནང་བོད་མི་གཙང་མའི་ཁྱིམ་ཚང་ ༡༠ མ་གཏོགས་མེད་ཅིང་། གཞན་རྣམས་བལ་ཡུལ་གྱི་ཡུལ་མི་ཡིན་སྟབས་ཁོ་ཚོས་སྐྱོབ་གསོ་དེ་བླངས་ཡོད་པ་རེད། ཅེས་བརྗོད་བྱུང་ལ། བོད་མིའི་སྒྲིག་འཛུགས་ལའང་དེ་བཞིན་འགྲེལ་བརྗོད་ཞུས་ཡོད་འདུག

འདི་གར་ཐོག་མར་གནས་ཚུལ་དེ་མཁོ་སྤྲོད་གནང་མཁན་གཞིས་མི་དེས། རྒྱ་ནག་གཞུང་གིས་སྐྱོབ་གསོ་ལེན་མཁན་གྱི་མིང་གཞུང་ཞིག་བསྡུས་ཡོད་སྐོར་བརྗོད་པ་ལྟར། དགེ་ལེགས་ཆོས་འཕེལ་ལགས་སུ་ཐོ་གཞུང་དེ་རག་ཐབས་ཡོད་མེད་དྲིས་པར་ཁོང་གིས། ང་ཚོར་མིང་གཞུང་དགོས་ལབ་མཁན་བྱུང་མེད་ལ། ང་ཚོས་ཀྱང་མིང་གཞུང་སྤྲད་མེད་ཅེས་བརྗོད་བྱུང་། ཡང་ཁོང་གིས་ཡང་དམག་དང་དགུན་ས་ཁུལ་དུ། བལ་ཡུལ་གྱི་ཡུལ་མི་དང་གཉེན་སྒྲིག་བྱེད་མཁན་གྱི་བོད་རིགས་བུད་མེད་དེ་འདྲ་ཁ་ཤས་ཡོད་པ་དང་། ཁོ་ཚོའི་ཕྲུ་གུ་རྣམས་བོད་པའི་སློབ་གྲྭར་འཇུག་ཆེད་ཁོ་ཚོར་ལག་དེབ་ལྗང་ཁུ་སྤྲད་ཡོད་པ་རེད། འོན་ཀྱང་ཁོ་ཚོ་ཕོ་ལེ་བསམ་འཕེལ་གླིང་གི་གཞིས་མིའི་ཁོངས་སུ་ཚུད་ཀྱི་མེད་པར་བལ་ཡུལ་གྱི་མི་སེར་ཆགས་ཀྱི་ཡོད་སྟབས། རྒྱ་ནག་གི་སྐྱོབ་གསོ་དེ་བླངས་ཡོད་པ་རེད། ཅེས་འགྲེལ་བརྗོད་གནང་བྱུང་།

སྔོན་ཆད་བོད་མི་རྣམས་ཡུལ་དེར་གསར་དུ་འབྱོར་སྐབས་བསམ་འཕེལ་གླིང་གཞིས་ཆགས་དེ་ཝ་ལུང་ནང་ཆགས་ཡོད་ནའང་། ཕྱི་ལོ་ ༡༩༦༧ ལོར་ཝ་ལུང་ནས་མི་རྐྱང་འགྲོ་ན་ཉིན་གཉིས་དང་། ཁལ་མ་དེད་ན་ཉིན་གསུམ་ཙམ་འགོར་བའི་ཕོ་ལེ་ཞེས་པའི་ས་དེར་གནས་སྤོས་བྱས་ཡོད་འདུག་ལ། སྐྱེས་པ་ཚོ་དབྱར་ཁ་བོད་ནང་ཚོང་རྒྱག་པར་འགྲོ་བ་དང་རི་འཛེག་པ་ཚོའི་ཅ་ལག་དབོར་འདྲེན་བྱེད་པ་སོགས་ཀྱི་ཚོང་ལས་ཙག་ཙིག་གཉེར་ནས་སྡོད་ཀྱི་ཡོད་འདུག

དེ་སྔ་ཡང་དམག་དང་དགུན་ས། ཐུགས་དམ་བཅས་ནང་བོད་མི་གཙང་མ་གནས་སྡོད་བྱེད་མཁན་ཡོད་ཀྱང་། རིམ་པས་ཁོ་ཚོ་ཡང་རྒྱ་གར་དང་བལ་ཡུལ་གྱི་རྒྱལ་ས་སོགས་ལ་གནས་སྤོས་བྱས་ཏེ། ད་ལྟའི་ཆར་ས་ཁུལ་དེ་དག་ནང་བོད་པ་གཙང་མ་གཅིག་རྐྱང་མེད་འདུག

འབྲེལ་ཡོད་གསར་འགྱུར། https://tibettimes.net/2021/07/02/213676/

གསར་འགོད་པ། པ་སངས་ཚེ་རིང་།