ཁེ་ན་ཌའི་སྲིད་བློན་མཆོག་ལ་བོད་རྒྱ་འབྲེལ་མོལ་མཐུད་ཐབས་གནང་དགོས་པའི་ཡོངས་ཁྱབ་ཞུ་ཡིག་ཕུལ།

ཁེ་ན་ཌའི་སྲིད་བློན་སྐུ་ཞབས་ཇ་སི་ཊན་ཊུ་རུ་ཌོ་ (Justin Trudeau) མཆོག་གིས་བོད་རྒྱ་འབྲེལ་མོལ་བསྐྱར་གསོ་ཡོང་བའི་འབོད་སྐུལ་བསྒྲགས་གཏམ་སྤེལ་གནང་དགོས་པ་མ་ཟད། རྒྱ་ནག་གཞུང་གི་མགོ་འཁྲིད་ཚོར་བོད་རྒྱ་གྲོས་མོལ་བསྐྱར་གསོ་དགོས་པའི་སྐུལ་འདེད་གནང་དགོས་པའི་ཞུ་ཡིག་ཅིག་ཕུལ་ཡོད་འདུག

ཡོངས་ཁྱབ་ཞུ་ཡིག་དེ་ནི་ཁེ་ན་ཌའི་དབུས་སའི་གྲོས་ཚོགས་འཐུས་མི་དང་ཤེས་ཡོན་པ། འགྲོ་བ་མིའི་ཐོབ་ཐང་གི་ཚོགས་སྡེའི་སྐུ་ཚབ་དང་། བོད་དོན་ལས་འགུལ་བའི་ཚོགས་པ་བཅས་ཐུན་མོང་ནས་ཟླ་འདིའི་ཕྱི་ཚེས་ ༣ ཉིན་ཕུལ་ཡོད་ཅིང་། ཞུ་ཡིག་དེའི་ནང་། བོད་མི་དང་ཁེ་ན་ཌར་ཡོད་པའི་བོད་དོན་རྒྱབ་སྐྱོར་བ་རྣམས་ཀྱིས་འདས་པའི་ལོ་མང་རིང་ནས་བོད་རྒྱ་འབྲེལ་མོལ་བསྐྱར་གསོ་ཡོང་ཐབས་གཙིགས་ཆེར་འཛིན་མུས་རེད། འདས་ལོའི་ཕྱི་ཟླ་ ༨ པའི་ནང་ཁེ་ན་ཌའི་གྲོས་ཚོགས་འོག་མའི་དམིགས་བསལ་ཁེ་ན་ཌ་དང་རྒྱ་ནག་འབྲེལ་ལམ་ཚོགས་ཆུང་ (Special Committee on Canada-China Relations) ནང་བོད་རྒྱ་འབྲེལ་མོལ་སྐོར་གྱི་གྲོས་འཆར་ཞིག་ལ་སྤྱི་མོས་ཐོབ་ཡོད། འོན་ཀྱང་བློ་ཕམ་པ་ཞིག་ལ། འདི་ལོའི་ཕྱི་ཟླ་ ༦ པའི་ནང་གྲོས་ཚོགས་འཐུས་མི་སྐུ་ཞབས་སི་ཊི་ཧྥན་བྷེར་གྷེ་རོན་ (Stephane Bergeron) ལགས་ཀྱིས་གྲོས་འཆར་དེ་ཉིད་གྲོས་ཚོགས་འོག་མར་འདོན་སྐབས་རྒྱབ་སྐྱོར་ཐོབ་མེད། འཛམ་གླིང་གི་མགོ་འཁྲིད་རྣམས་དང་མཚུངས་པར་ཁེ་ན་ཌའི་ངོས་ནས་ཀྱང་བོད་ཀྱི་དཀའ་རྙོག་སེལ་བར་འཚེ་མེད་ཞི་བའི་གྲོས་མོལ་དགོས་པའི་བསམ་ཚུལ་འདོན་དགོས། ཞེས་བཀོད་ཡོད་འདུག

དེ་བཞིན། རྒྱལ་ཕྱི་ནང་གཉིས་སུ་འགྲོ་བ་མིའི་ཐོབ་ཐང་ལ་བརྩི་བཀུར་དང་སྲུང་སྐྱོབ་བྱེད་མཁན་གྱི་དམངས་གཙོའི་སྟོབས་ཆེན་རྒྱལ་ཁབ་ཅིག་ཡིན་པའི་ཆ་ནས། ཁེ་ན་ཌ་ལ་བོད་རྒྱའི་དཀའ་རྙོག་སེལ་བར་འགན་ནུས་ཁྱད་པར་ཅན་ཞིག་ཡོད། ང་ཚོའི་རྒྱལ་ཁབ་ཀྱི་ས་ཁུལ་ཆུ་གྷེག་(Quebec) དང་ནུ་ན་ཝུཊ་ (Nunavut) གཉིས་ནི་དངོས་ཡོད་རང་སྐྱོང་གི་དཔེ་མཚོན་ཞིག་ཡིན་པས། དེ་ཉིད་བོད་ཀྱི་མིང་དོན་མཚུངས་པའི་རང་སྲིད་རང་སྐྱོང་གི་གྲོས་མོལ་གྱི་གཞི་འཛིན་ས་དང་མིག་དཔེ་བལྟ་ས་ཞིག་ཏུ་སྤྱད་ཆོག་པ་ཡིན། དེར་མཚུངས་ང་ཚོ་ལ་བཟང་སྤྱོད་ཀྱི་ཐོག་ནས་བོད་ནང་གི་གནས་སྟངས་ལ་ལྟ་ཞིབ་དང་། རྒྱལ་སྤྱིའི་ཁྲིམས་སྒྲིག་གི་ཐོག་ནས་རྒྱ་ནག་གི་བྱས་ཉེས་ལ་ཉེས་ཆད་གཅོག་རྒྱུའི་འགན་འཁྲི་ཡོད་པ་རེད། དེ་བཞིན་ང་ཚོས་ཕྱི་ལོ་ ༡༩༧༠ ནས་བཟུང་ཁེ་ན་ཌར་གསར་དུ་འབྱོར་བའི་བཙན་བྱོལ་བོད་མི་སྟོང་ཕྲག་མང་པོའི་འགན་འཁུར་བླང་དགོས་པ་ཞིག་ཡིན། ཞེས་བཀོད་འདུག

ཡོངས་ཁྱབ་ཀྱི་ཞུ་ཡིག་དེར་ཁེ་ན་ཌའི་གྲོས་ཚོགས་གོང་མའི་འཐུས་མི་ལྕམ་སྐུ་མོ་བྷི་ན་ཇ་ཧྥེར་(Mobina S.B. Jaffer) ལགས་དང་། སྐུ་ཞབས་ཌེ་ནི་སི་པེ་ཊེར་སན་ (Dennis Patterson)ལགས། ཐེན་ཧའེ་ངོ་(Thanh Hai Ngo)ལགས། གྲོས་ཚོགས་འོག་མའི་འཐུས་མི་སྐུ་ཞབས་གྷེ་རི་ཨ་ནནྜ་སང་གྷ་རི་ (Gary Anandasangaree)ལགས། དེ་བཞིན་ཨོ་ཊེ་རི་ཡོ་ཡི་གྲོས་ཚོགས་འཐུས་མི་བུ་འཁྲིད་དཀར་པོ་ཆེ་ལགས་ཚུད་པའི་དབུས་སའི་གྲོས་ཚོགས་འཐུས་མི་ལས་ཐོག་ ༡༢ དང་ཟུར་པ་ ༣ བཅས་དང་། གཞན་ཡང་ཁེ་ན་ཌར་རྟེན་གཞི་བྱས་པའི་འགྲོ་བ་མིའི་ཐོབ་ཐང་གི་ཚོགས་སྡེ་ ༣ གྱི་གནད་ཡོད་མི་སྣ་དང་། གཙུག་ལག་སློབ་གྲྭ་ཆེན་མོའི་སློབ་དཔོན། བོད་དོན་དང་ཧོང་ཀོང་། ཡུ་གུར་བཅས་ཀྱི་ཚོགས་པ། གཞན་ཡང་ཁེ་ན་ཌར་ཡོད་པའི་བོད་མིའི་ཚོགས་སྡེ་ཁག་བཅས་ཀྱིས་མཚན་རྟགས་བརྒྱབ་ཡོད་འདུག

དེ་བཞིན་ཞུ་ཡིག་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་དང་བཙན་བྱོལ་བོད་གཞུང་། བོད་མི་ཁྱོན་ཡོངས་ནས་བོད་རྒྱའི་དཀའ་རྙོག་དེ་འཚེ་མེད་ཞི་བའི་ལམ་ནས་སེལ་ཐབས་དང་། རྒྱ་ནག་གཞུང་གི་འཐུས་ཚབ་དང་བོད་མིའི་འཐུས་ཚབ་དབར་གྲོས་མོལ་ཡོང་རེ་བྱས་ཡོད་ཀྱང་། ཕྱི་ལོ་ ༢༠༡༠ ལོར་བོད་རྒྱ་འབྲེལ་མོལ་ཆད་དེ་ད་བར་བསྐྱར་གསོ་ཐུབ་མེད་སྐོར་དང་། འདི་ལོའི་རང་དབང་ཁང་པའི་འཛམ་གླིང་གི་རང་དབང་སྙན་ཐོའི་ནང་བོད་དེ་དཀྱིལ་ཤར་ཨེ་ཤ་ཡའི་རྒྱལ་ཁབ་སི་རི་ཡ་དང་གྲལ་གཅིག་ཏུ་བསྒྲིགས་ཏེ། འཛམ་གླིང་ནང་གི་རང་དབང་ཆེས་ཉུང་བའི་རྒྱལ་ཁབ་ཏུ་ངོས་འཛིན་བྱས་ཡོད་པ་དང་། ཡང་ཞིབ་འཇུག་གི་སྙན་ཐོ་ཞིག་ནང་རྒྱ་ནག་གིས་བོད་ནང་བོད་མི་ཁྲི་ ༥ ལྷག་བཙན་བཀོལ་ངལ་རྩོལ་ལ་གཏོང་གིན་ཡོད་པ་དང་། ཆབ་སྲིད་སློབ་གསོ་བརྒྱུད་བོད་མིའི་བསམ་བློ་བཅོས་བསྒྱུར་གཏོང་ཐབས་དང་། བོད་ཀྱི་བུད་མེད་རྣམས་ལ་བཙན་གཡེམ་དང་མནར་གཅོད་བཏང་བའི་གནས་ཚུལ་ཐོན་བཞིན་པ་དེ་དག་ནི། རྒྱ་ནག་གཞུང་གིས་བོད་ནང་མི་རིགས་རྩ་མེད་གཏོང་བའི་སྲིད་ཇུས་སྤེལ་བཞིན་པའི་དཔེ་མཚོན་གསར་པ་ཞིག་ཡིན་སྐོར་བརྗོད་འདུག་ལ། ད་ལྟ་༧གོང་ས་མཆོག་དགུང་གྲངས་མཐོན་པོར་ཕེབས་བཞིན་པའི་སྐབས་དང་། རྒྱ་ནག་གཞུང་གིས་༧པཎ་ཆེན་རིན་པོ་ཆེ་ལྟར་༧གོང་ས་མཆོག་གི་ཡང་སྲིད་ལའང་ཐེ་བྱུས་བྱ་རྒྱུའི་བྱུས་ངན་འཐེན་བཞིན་ཡོད། བོད་ཀྱི་དཀའ་རྙོག་དེ་ཉིད་ཞི་བའི་ངང་སེལ་རྒྱུ་དེ་༧གོང་ས་མཆོག་གི་སྐུ་ཚེའི་ཧྲིལ་པོའི་ཐུགས་རེ་ཡིན་པས། ད་ལྟ་ཐུགས་རེ་དེ་སྒྲུབ་རྒྱུའི་དུས་ལ་བབས་ཡོད་སྐོར་བཀོད་འདུག

གསར་འགོད་པ། པ་སངས་ཚེ་རིང་།