བོད་ཞི་བས་བཅིངས་གྲོལ་བཏང་སྟེ་ལོ་ངོ་ ༧༠ འཁོར་ཟེར་བའི་མིང་འོག་ནས་བོད་ཀྱི་རྒྱལ་ས་ལྷ་སའི་ཁུལ་དུ་སྟོན་པའི་སྐྱེས་རབས་དང་བོད་ཀྱི་རྣམ་ཐར་ཁག་བརྗོད་སྙིང་དུ་གྱུར་བའི་ཞོ་སྟོན་གྱི་རིག་གཞུང་འཁྲབ་སྟོན་རིགས་སྤེལ་མི་ཆོག་པའི་བཀའ་བཏང་ཡོད་འདུག
དེ་རིང་ནས་སྟོན་པའི་སྐྱེས་རབས་དང་བོད་ཀྱི་རྣམ་ཐར་ཆེ་གྲས་ཁག་ཚུད་པའི་ཡུན་རིང་ལོ་རྒྱུས་ལྡན་པའི་ལྷ་སའི་ཞོ་སྟོན་དུས་ཆེན་དབུ་འཛུགས་གནང་གི་ཡོད་པ་ལྟར། ཁ་སང་ལྷ་ས་གྲོང་ཁྱེར་གྱི་ཏོག་དབྱིབས་ནད་དུག་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་ཟེར་བའི་བརྡ་ཁྱབ་ཅིག་བཏང་སྟེ། རྒྱ་ནག་གིས་བོད་ཞི་བའི་བཅིངས་གྲོལ་བཏང་ནས་ལོ་ངོ་ ༧༠ འཁོར་ཟེར་བའི་དུས་ཆེན་གྱི་བྱེད་སྒོའི་བདེ་འཇགས་སོགས་ལ་འགན་ལེན་ཐུབ་ཆེད། ཕྱི་ལོ་ ༢༠༢༡ ལོའི་ལྷ་སའི་ཞོ་སྟོན་དབུ་འཛུགས་ཀྱི་མཛད་སྒོ་དང༌ལྷ་མོའི་འཁྲབ་གཞུང་གཙོས་པའི་བོད་ཀྱི་སྲོལ་རྒྱུན་རིག་རྩལ་འཁྲབ་སྟོན་དང་གོས་སྐུ་ཞལ་མཇལ་སོགས་མི་མང་འདུ་འཛོམས་ཀྱི་བྱེད་སྒོ་རིགས་ཚང་མ་མཚམས་འཇོག་བྱ་རྒྱུ་ཡིན་པ་བསྒྲགས་འདུག
ལྷ་ས་གྲོང་ཁྱེར་གྲོང་ཁྱེར་ཏོག་དབྱིབས་ནད་དུག་ལ་ཁ་གཏད་གཅོག་པའི་ལས་དོན་མགོ་ཁྲིད་ཚོགས་ཆུང་གི་བརྡ་ཁྱབ་ཨང་ལྔ་བ་ཟེར་བའི་ནང་། རྒྱ་ནག་གི་ཞིང་ཆེན་དང་གྲོང་ཁྱེར་ ༡༧ དང་ས་ཁུལ་དང་རྫོང་ཁག་ ༢༨ ལ་ངོ་བོ་འགྱུར་བའི་ཏོག་དབྱིབས་ནད་འབུ་གསར་བ་ཌལ་ཊ་ (Delta Variant) འགོས་ཁྱབ་བྱུང་སྟེ། རྒྱ་ནག་ཏུ་ཏོག་དབྱིབས་འགོས་ཁྱབ་ཀྱི་ཉེན་ཁ་ཆེ་བའི་ཁུལ་ ༥ དང་ཉེན་ཁ་འབྲིང་བའི་ཁུལ་ ༡༦༠ ཡོད་རབས་སོགས་བཀོད་ཡོད་ཀྱང་། རྒྱལ་ས་ལྷ་སའི་ཞོ་སྟོན་གྱི་བྱེད་སྒོ་མཚམས་འཇོག་བྱེད་དོན་ནི་བོད་ཞི་བས་བཅིངས་གྲོལ་བཏང་སྟེ་ལོ་ངོ་ ༧༠ འཁོར་ཟེར་བའི་དུས་དྲན་གྱི་བྱེད་སྒོའི་བདེ་འཇགས་འགན་ལེན་སྲུང་སྐྱོབ་ཐུབ་ཆེད་ཡིན་སྐོར་བསྒྲགས་འདུག
ཡང་ཕྱི་ཚེས་ ༣ ཉིན་བོད་ཞི་བས་བཅིངས་གྲོལ་བཏང་སྟེ་ལོ་ངོ་ ༧༠ འཁོར་བའི་དུས་དྲན་ཟེར་བའི་འོག ཕོ་བྲང་པོ་ཏ་ལའི་དོ་དམ་ལས་ཁུངས་ཟེར་བས་བརྡ་ཁྱབ་ཅིག་སྟེ་ཕོ་བྲང་པོ་ཏ་ལའི་ནང་བོད་ཞི་བས་བཅིངས་གྲོལ་བཏང་སྟེ་རིག་དངོས་འགྲེམས་བྱས་པའི་རྐྱེན་གྱིས། ཚེས་ ༣ ནས་བཟུང་པོ་ཏ་ལའི་དབྱིག་ནོར་ཁང་ཕྱི་ཕྱོགས་སུ་སྒོ་འབྱེད་བྱ་རྒྱུ་མཚམས་འཇོག་གི་གསལ་བསྒྲགས་སྤེལ་འདུག་ལ། ཉེ་བའི་ལོ་བསྟུད་མར་རྒྱ་ནག་གཞུང་གིས་ཞོ་སྟོན་སྐབས། འབྲས་སྤུངས་དགོན་པ་དང་གཙུག་ལག་ཁང་། པོ་ཏ་ལ་སོགས་སུ་དམག་མི་འབོར་ཆེན་འགྲེམས་འཇོག་གིས་བོད་མིའི་སྲོལ་རྒྱུན་དུ་གྲུབ་པའི་རིག་གཞུང་འཁྲབ་སྟོན་འདི་ལ་དམ་དྲག་ཤུགས་ཆེན་བྱེད་ཀྱི་ཡོད། སྟོན་པའི་སྐྱེས་རབས་དང་བོད་ཀྱི་རྣམ་ཐར་ཆེ་གྲས་ཁག་ཚུད་པའི་ཡུན་རིང་ལོ་རྒྱུས་ལྡན་པའི་ལྷ་སའི་ཞོ་སྟོན་དུས་ཆེན་དེ་རིང་ནས་དབུ་འཛུགས་གནང་གི་ཡོད་འདུག
སྤྱིར་ད་སྐབས་རྒྱ་ནག་ནང་ཌལ་ཊ་ཏོག་དབྱིབས་འགོས་ཁྱབ་འབྱུང་གི་ཡོད་པ་གསལ་བོ་ཡིན་པ་དང་། ཉེ་ལམ་ནས་རྒྱ་ནག་གི་མི་དམངས་དྲ་བ་དང་ཤིན་ཧྥ་གསར་ཁང་སོགས་ནས། རྒྱ་ནག་ནང་ངོ་བོ་འགྱུར་བའི་ཏོག་དབྱིབས་འགོས་ཁྱབ་བྱུང་བའི་གནས་ཚུལ་རིམ་པ་སྤེལ་ཏེ། འགོས་སླ་ཞིང་བཅོས་དཀའ་བའི་ཏོག་དབྱིབས་ན་ཚར་ཡིད་གཟབ་བྱ་དགོས་སྐོར་བསྒྲགས་འདུག་ལ། ཏོག་དབྱིབས་འགོས་ཁྱབ་ཀྱི་གནས་ཚུལ་དང་འབྲེལ་ནས། རྒྱ་ནག་གི་ཆཱང་ཆིན་གྲོང་སྡེའི་ཝན་ཀྲའོ་གྲོང་ཁྱེར་གྱི་གསོལ་མགྲོན་ཁང་ཞིག་ཏུ། མི་གྲངས་ ༢༠༠༠ ལྷག་ནས་སྟོན་མོ་ཞིག་ལ་མཉམ་ཞུགས་བྱེད་སྐབས། གློ་བུར་དུ་ཉེན་རྟོག་པ་འབོར་ཆེན་སྟོན་ཐོག་ཏུ་འབྱོར་ཏེ། གསོལ་མགྲོན་ཁང་སྒོ་བརྒྱབ་པ་དང་བསྟུན། དེར་ཡོད་པའི་མི་ཚང་མར་བཙན་གྱིས་བརྟག་དཔྱད་དང་འགོག་ཁབ་བརྒྱབ་བཅུག་ཡོད་པ་རེད། དེ་བཞིན། སློབ་འབྲིང་ཞིག་གི་སློབ་མ་ཡོངས་ལ་ཕ་མའི་ཆོག་མཆན་དང་སློབ་མའི་བདེ་འཇགས་ལ་འགན་སྲུང་གང་ཡང་མེད་པར་ཏོག་དབྱིབས་འགོག་ཁབ་བརྒྱབ་ཡོད་པའི་གནས་ཚུལ་རིགས་རྒྱ་རིགས་ཚོས་བརྙན་ལམ་ནས་བརྒྱུད་སྐུར་བྱས་ཏེ་རྒྱ་ནག་གཞུང་ལ་སྐྱོན་བརྗོད་ཤུགས་ཆེན་བྱེད་ཀྱི་འདུག
གསར་འགོད་པ། སྐལ་བཟང་སྦྱིན་པ།
