སྲིད་སྐྱོང་མཆོག་ནས་སྲིད་སྐྱོང་གཟེངས་རྟགས་ཆེད་ད་ལྟའི་ཆར་སྔོན་རྩིས་བཀའ་འཁྲོལ་འབུམ་ ༡༠ ཡས་མས་མེད་ཀྱང་སྒྲིག་གཞི་ལྟར་སློབ་ཕྲུག་ ༢༧ ལ་གཟེངས་རྟགས་གནང་འཆར་ཡོད་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༡༡ སྟེང་། བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་དབུས་བོད་མིའི་སྒྲིག་འཛུགས་ཀྱི་ཏོག་དབྱིབས་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། དེ་བཞིན་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་དང་། བདེ་ལེགས་སྨན་ཁང་གི་འཛིན་འཛིན་སྤྱི་འཐུས་ཟླ་བ་ཕུན་སྐྱིད་ལགས་བཅས་ལྷན་བཞུགས་ཐོག འདས་པའི་ཟླ་བ་གཉིས་ལྷག་རིང་བཀའ་ཤག་སྐབས་ ༡༦ པས་ཏོག་དབྱིབས་གཉན་རིམས་དང་འབྲེལ་བའི་འཛིན་སྐྱོང་གི་བྱེད་སྒོ་ཁག་གི་ཐོག་གསར་འགོད་གསལ་བསྒྲགས་ཤིག་སྤེལ་གནང་སོང་།
གསར་འགོད་གསལ་བསྒྲགས་སྟེང་རྒྱ་གར་དང་བལ་ཡུལ་ནང་གནས་སྡོད་བོད་མི་རྣམས་ལ་ཏོག་དབྱིབས་སྔོན་འགོག་སྨན་ཁབ་བརྒྱབ་པའི་གནས་སྟངས་སྐོར་ནས་སྲིད་སྐྱོང་སྤེན་པ་ཚེ་རིང་མཆོག་གིས། ད་ལྟའི་ཆར་རྒྱ་གར་ནང་ཁྱོན་ཡོངས་ནས་ཁབ་བརྒྱབ་ཟིན་པ་དེ་བརྒྱ་ཆ་ ༩༡ ཆགས་ཀྱི་ཡོད་ཅིང་། དེའི་ཁྲོད་ནས་ཁབ་གཉིས་ཀ་བརྒྱབ་པ་དེ་བརྒྱ་ཆ་ ༣༨།༥ དང་། ཁབ་གཅིག་བརྒྱབ་པ་ཟིན་པ་དེ་བརྒྱ་ཆ་ ༥༢།༦༧ ཆགས་ཀྱི་ཡོད། དེའི་ནང་སོ་སོས་ཁབ་བརྒྱབ་སྟེ་ལན་མ་སྤྲད་པ་དང་ཡང་འགའ་ཤས་ཀྱིས་ཁབ་རྩ་བ་ནས་བརྒྱབ་ཀྱི་མིན་ཟེར་མཁན་ཡོད་སྲིད་པ་དང་། ཡང་བརྒྱ་ཆ་ ༤།༥ ལྷག་ཅིག་ལོ་ ༡༨ མན་གྱི་སློབ་གྲྭའི་སློབ་ཕྲུག་ཁག་ཡོད་སྟབས། ཁྱོན་ཡོངས་ནས་ཡར་ཐོན་ཅན་གྱི་རྒྱལ་ཁབ་ཀྱི་གནས་བབ་དང་མཚུངས་པ་ལྟ་བུ་ཞིག་ཆགས་ཡོད་པ་རེད། བལ་ཡུལ་ནང་མཚོན་ན། ང་ཚོར་དཀའ་ངལ་ཕྲན་བུ་ཕྲད་པ་རེད། བོད་མིའི་སྒྲིག་འཛུགས་ངོས་ནས་གཞུང་འགའ་ཤས་ལ་འབྲེལ་བ་བྱས་ཡིན་ཏེ་དོན་ཕན་ལྡན་པ་བྱུང་མ་སོང་། དེ་ང་ཚོས་འབད་བརྩོན་མ་བྱས་པའི་རྐྱེན་གྱིས་མིན་པར་རྒྱལ་ཁབ་སོ་སོའི་སྲིད་ཇུས་དང་ལངས་ཕྱོགས། ཁབ་འདང་མི་འདང་སོགས་ཀྱི་རྐྱེན་པས་ཁབ་བཏང་ཐུབ་ཡོད་པ་མ་རེད་དེ། ཕྱིས་སུ་ཉི་ཧོང་དང་ཨ་རིའི་གཞུང་གིས་རོགས་པ་བྱས་ཏེ་ད་ལྟའི་ཆར་བལ་ཡུལ་ནང་ཁབ་ཚ་ཚ་འུར་འུར་ཐོག་རྒྱག་བཞིན་པ་རེད། ཅེས་དང་། ད་ཐེངས་བལ་གཞུང་ངོས་ནས་བོད་རིགས་དང་བལ་ཡུལ་གྱི་མི་སེར་དབར་ལ་དབྱེ་འབྱེད་མེད་པ་དང་། ལྷག་པར་དུ་བོད་མིའི་ཁྲོད་དུའང་ཡིག་ཆ་ཡོད་མེད་ཀྱི་དབྱེ་བ་མེད་པར་ཁབ་ཀྱི་མཐུན་འགྱུར་གནང་བ་དེར་ཐུགས་རྗེ་ཆེ་ཞུ་འབྲེལ། ད་ལྟའི་ཆར་བལ་ཡུལ་ནང་གི་བོད་མིའི་ཁྲོད་ནས་བརྒྱ་ཆ་ ༢༥ ལ་འགོག་ཁབ་དང་པོ་དེ་བརྒྱབ་ཟིན་པ་དང་། བརྒྱ་ཆ་ ༡༠།༥ ལ་འགོག་ཁབ་གཉིས་ཀ་བརྒྱབ་ཟིན་སྐོར་དང་། ཏོག་དབྱིབས་འགོག་ཁབ་ཐད་ལ་དགོན་སྡེ་ཁག་དང་ཚོགས་པ་སྐྱིད་སྡུག མི་སྒེར་བཅས་ཚང་མས་མཉམ་རུབ་ཀྱི་ཐོག་ནས་རོགས་འདེགས་གནང་བར་ཐུགས་རྗེ་ཆེ་ཞུ་ཡི་ཡོད་སྐོར་གསུངས་སོང་།
དེ་བཞིན་སྲིད་སྐྱོང་མཆོག་གིས་ད་ལྟའི་ཆར་བོད་མིའི་སྒྲིག་འཛུགས་ངོས་ནས་རྒྱ་གར་ནང་ནད་རླབས་གསུམ་པ་སླེབས་ཉེན་ཡོད་པའི་གནས་སྟངས་ལ་གྲ་སྒྲིག་བྱེད་བཞིན་ཡོད་པ་དང་། དེ་ཡང་མི་རིང་བར་དབུས་ཀྱི་ཏོག་དབྱིབས་ལས་དོན་ཚོགས་ཆུང་གི་ཚོགས་མི་ཁག་ཅིག་ས་གནས་ལ་དངོས་སུ་ཕེབས་ཏེ་ས་གནས་ཀྱི་ཏོག་དབྱིབས་གནས་སྟངས་སོགས་ལ་རྟོག་ཞིབ་བྱ་རྒྱུ་ཡིན་སྐོར་དང་། དེ་བཞིན་འགོག་ཁབ་གཉིས་པའི་རྗེས་སུ་ཁབ་སྣོན་མ་རག་ཐབས་ལའང་གྲ་སྒྲིག་བྱེད་བཞིན་ཡོད་སྐོར་དང་། གཞན་ཡང་ནད་ཡམས་ཀྱི་རྐྱེན་པས་འཚོ་བ་ལ་དཀའ་ངལ་འཕྲད་མཁན་ཚོར་རོགས་སྐྱོར་བྱ་རྒྱུའི་ཐད། ས་གནས་མགོ་འཛིན་བརྒྱུད་རྒྱ་གར་དང་བལ་ཡུལ་ནང་གྲངས་ཐོ་བསྡུས་པའི་ནང་གྲངས་ཐོ་ ༣༠༠༠༠ ཡས་མས་བྱུང་ཡོད་པ་དང་། ཚོགས་སྒེར་ནས་ཞལ་འདེབས་ཐོབ་པ་ལྟར་མི་རེར་སྒོར་ཁྲི་གཅིག་རེ་བགོ་འགྲེམ་བྱས་ཏེ་ཁྱོན་བསྡོམས་འབུམ་ ༣༠༠ ལྷག་བཏང་ཐུབ་ཡོད་སྐོར་འགྲེལ་བརྗོད་གནང་བྱུང་།
དེ་ནས་བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས་ཀྱིས། ན་ནིང་ལོར་བོད་མི་ཚོར་རྒྱ་གར་གྱི་ས་གནས་ཁག་ལ་དགུན་ཚོང་དུ་མི་འགྲོ་རྒྱུའི་རེ་སྐུལ་ཞུས་པ་བཞིན། བོད་མི་ཚོས་རང་རང་གི་འཕྲོད་བསྟེན་དང་ལྷག་པར་ཏོག་དབྱིབས་རིམས་ནད་མི་འགོས་སླད། རང་གནས་སུ་བཞུགས་ནས་ནད་ཡམས་ཀྱི་དཀའ་ཁག་བྱུང་མེད་པ་རེད། འོན་ཀྱང་། ད་ལོར་དགུན་ཚོང་དུ་མ་འགྲོ་ཞེས་བརྗོད་མི་ཐུབ་ནའང་། རྒྱ་གར་ས་གནས་འདྲ་མིན་ལ་དགུན་ཚོང་དུ་ཕེབས་མཁན་བོད་མི་ཚོས་རང་རང་གི་འཕྲོད་བསྟེན་གལ་ཆེར་བཟུང་ནས། རྒྱུན་དུ་ནས་ཁ་རས་གྱོན་རྒྱུ་དང་། ལག་པ་སོགས་དུག་སེལ་བྱ་དགོས་པ། གལ་ཏེ་དགུན་ཚོང་ལ་འགྲོ་དགོས་བྱུང་ཚེ་མི་རྒན་པ་དང་ནད་གཞི་ཡོད་མཁན། བྱིས་པ་བཅས་མི་འཁྲིད་རྒྱུའི་རེ་སྐུལ་ཞུས་ཡོད་པ་དང་། དགུན་ཚོང་ལ་ཕེབས་མཁན་ཚོས་ས་གནས་ནས་ཏོག་དབྱིབས་ཀྱི་ནད་གཞི་ཕོག་མིན་དང་བརྟག་བྱ་དགོས་པ་དང་། དགུན་ཚོང་གྲུབ་ནས་རང་གནས་སུ་ལོག་སྐབས། གཞིས་ཆགས་ཁག་གི་ཏོག་དབྱིབས་ཛ་དྲག་ཚོགས་ཆུང་གི་སྒྲིག་གཞི་དང་ལམ་སྟོན་ཁག་ལ་བརྩི་སྲུང་དང་། ས་གནས་ཁག་གི་ཟུར་བཀག་ཁང་དུ་ཟུར་བཀག་ལ་བསྡད་དགོས་སྐོར་དང་། ཉེ་ཆར་བདེ་ལེགས་སྨན་ཁང་གིས་བོད་མི་ཚོར་ཆེད་དམིགས་ཀྱིས་ཧིན་སྒོར་འབུམ་ ༢༠ འགྲོ་གྲོན་བཏང་ནས་ད་ལྟ་འགོག་ཁབ་ ༣༠༠༠ ལག་སོན་བྱུང་ཡོད་པས། བཞུགས་སྒར་དྷ་ས་ཁུལ་གྱི་བོད་མི་ཚོར་ཏོག་དབྱིབས་འགོག་ཁབ་ཀྱི་དཀའ་ཁག་མེད་སྐོར་བརྗོད་བྱུང་། དེ་བཞིན་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། བཙན་བྱོལ་ནང་གི་ཤེས་ཡོན་བསྟི་གནས་ཁག་ཏུ་ཚང་མས་མཉམ་རུབ་ཀྱིས་ད་བར་མ་དངུལ་འབུམ་ ༡༥༠ ལྷག་འགྲོ་གྲོན་བཏང་ནས། སློབ་གྲྭ་དང་དགོན་སྡེ་ཁག་གི་སློབ་མ་དང་དགེ་འདུན་པ་ཚོར་ཏོག་དབྱིབས་རིམས་ནད་ཀྱི་སྔོན་འགོག་དང་བརྟག་དཔྱད་ལ་མཁོ་བའི་ཡོ་ཆས་མང་པོ་ཞིག་མཁོ་སྤྲོད་བྱས་ཡོད་སྐོར་བརྗོད་སོང་།
སྨན་རྩིས་ཁང་གི་འགན་འཛོན་བཀྲིས་ཚེ་རིང་ལགས་ཀྱིས། ད་བར་དབུས་སྨན་རྩིས་ཁང་དང་ས་གནས་སོ་སོར་ཡོད་པའི་སྨན་རྩིས་ཁང་གི་ཡན་ལག་སྨན་ཁང་ཚོས། ཏོག་དབྱིབས་རིམས་ནད་ཀྱི་སྔོག་འགོག་སྨན་དང་ལུས་སེམས་ནུས་གསོའི་སྨན་སོགས་བགྲོ་འགྲེམས་བྱས་ཡོད་པ་དང་། མུ་མཐུད་ཚོགས་སྡེ་ཁག་དང་དགུན་ཚོང་ལ་སྐྱོད་མཁན་ཚོར་སྔོན་འགོག་སྨན་དང་ནུས་གསོའི་སྨན་སོགས་སྦྱིན་འཆར་ཡོད་སྐོར་བརྗོད་བྱུང་།
གསར་འགོད་གསལ་བསྒྲགས་སྟེང་གསར་འགོད་པས་འདི་ལོར་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བརྒྱ་ཆ་ ༩༥ ཡན་ལོངས་མཁན་སློབ་མ་ ༢༧ བྱུང་ཡོད་སྟབས། བོད་མིའི་སྒྲིག་འཛུགས་ངོས་ནས་སློབ་མ་ཚང་མར་སྲིད་སྐྱོང་གི་གཟེངས་རྟགས་དེ་འབུལ་ཐུབ་ཀྱི་ཡོད་མེད་སོགས་བཀའ་འདྲི་ཞུས་པར་སྲིད་སྐྱོང་མཆོག་གིས། སྲིད་སྐྱོང་གཟེངས་རྟགས་ཆེད་ད་ལྟའི་ཆར་སྔོན་རྩིས་བཀའ་འཁྲོལ་འབུམ་ ༡༠ ཡས་མས་མ་གཏོགས་མེད་ཀྱང་། སྒྲིག་གཞི་གཞིར་བཟུང་སློབ་མ་རེར་ཧིན་སྒོར་འབུམ་གཅིག་རེ་སྤྲོད་དགོས་ཀྱི་ཡོད་སྟབས་འདང་གི་མེད་པ་རེད། དེར་བརྟེན་རོགས་ཚོགས་གསར་པ་དེ་འདྲ་རག་གི་ཡོད་ན། སྔོན་རྩིས་བཀའ་འཁྲོལ་གྱི་སྒྲིག་གཞི་དོན་ཚན་ ༧ པའི་ལྔ་པ་གཞིར་བཟུང་བཀའ་འཁྲོལ་ཞུ་རྒྱུ་ཡོད་པ་རེད། དེར་བརྟེན་ད་ལྟའི་ཆར་ཁྲིམས་སྒྲིག་དང་མཐུན་གྱི་ཡོད་ན་མ་དངུལ་འབུམ་ ༡༠ ཡས་མས་ཡོད་པ་དེ་སློབ་ཕྲུག་རྣམས་ལ་བགོ་བཤའ་བརྒྱབ་རྒྱུ་དང་། གལ་ཏེ་དེ་ལྟར་མེད་ཚེ་གྲོས་ཚོགས་མ་འཚོག་བར་དུ་སྒུག་སྟེ་གཟེངས་ཐོན་སློབ་མ་རྣམས་ལ་གཟེངས་རྟགས་འབུལ་འཆར་ཡོད་སྐོར་གསུངས་སོང་།
གཞན་ཡང་། སྤྱི་འཐུས་ལྷན་ཚོགས་ཀྱི་དཀའ་རྙོག་དང་འབྲེལ་ནས་ད་བར་སྤྱི་འཐུས་ཐུང་མོང་ནས་འཛིན་སྐྱོང་བཀའ་ཤག་ལ་གནས་སྟངས་ཞི་འགྲིག་ཡོང་རྒྱུའི་རེ་སྐུལ་ཞུས་ཡོད་མེད་དྲིས་པར་སྲིད་སྐྱོང་མཆོག་ནས། ད་ལྟའི་ཆར་འཛམ་གླིང་སྤྱི་ཡོངས་ཀྱིས་རྒྱ་ནག་ལ་ལྟ་སྟངས་གང་འདྲ་ཆགས་ཡོད་མེད་དང་། གནས་སྟངས་དེའི་འོག་ནས་བོད་དོན་ཁྱབ་སྤེལ་དང་རྒྱབ་སྐྱོར་ཐོབ་རྒྱུའི་གོ་སྐབས་བཟང་པོ་ཡོད་སྟབས། བཀའ་ཤག་དང་གྲོས་ཚོགས་གཉིས་ཀ་འཚོགས་ཐུབ་ན། འཛིན་སྐྱོང་ངོས་ནས་གྲོས་ཚོགས་དང་གྲོས་ཚོགས་དབར་ལ་འབྲེལ་ལམ་འཛུགས་ཐབས་སོགས་ཀྱི་ཐད་ལ་ཤུགས་ཆེ་རུ་གཏོང་འདོད་ཡོད་སྐོར་དང་། དེ་སྔ་བརྗོད་ཟིན་པ་ལྟར་སྤྱི་འཐུས་ཐུན་མོང་ནས་བཀའ་ཤག་ལ་གནས་དོན་ཐག་གཅོད་བྱ་རྒྱུའི་འགན་བསྐུར་ཚེ་བཀའ་ཤག་ངོས་ནས་ཁྲིམས་སྒྲིག་དང་མཐུན་མིན་ལ་མ་ལྟོས་པར་དྲང་པོ་དྲང་བཞག་གི་ཐོག་ནས་ཐག་གཅོད་གནང་རྒྱུ་ཡིན་སྐོར་བརྗོད་ཡོད་ནའང་། དེ་སྔོན་བྱང་ཨ་རིའི་སྤྱི་འཐུས་གཅིག་དང་དབུས་གཙང་གི་སྤྱི་འཐུས་གཅིག་བཀའ་ཤག་ལ་བཅར་བ་ལས། དེའི་རྗེས་ལ་དམིགས་སུ་བཀར་ནས་བཅར་མཁན་སུ་ཡང་བྱུང་མེད་སྐོར་གསུངས་སོང་།
གསར་འགོད་པ། པ་སངས་ཚེ་རིང་། དཔལ་ལྡན།
བཙན་བྱོལ་མི་མང་གི་འཚོ་བའི་ལས་གཞི་ལ་གནོད་སྐྱོན་ཚབ་ཆེན་མ་ཕོག་པའི་ཆེད་སྐབས་བཅུ་བདུན་གྱི་འདམས་ཐོན་སྤྱི་འཐུས་རྣམས་ནས་བཅའ་ཁྲིམས་དགོང་དོན་སྔར་ལམ་བཞིན་ཕྱག་ལས་གནང་དགོས་པ་དེ་མི་མང་གི་སྐུ་ཚབ་ཡིན་པ་ནས་འཐུས་མིའི་ལས་འགན་ཁྱེར་ཐུབ་པའི་རེ་བ་དང་ཡིད་ཆེས་ཞུ་གི་ཡོད་།
Great ?