ཧི་མ་ཅལ་མངའ་སྡེའི་ཁུ་ནུ་རྫོང་གི་ཆ་ར་གྲོང་ཚོ་(Chaura village)ཉེ་འགྲམ་དུ་རི་ཉིལ་དོན་རྐྱེན་བྱུང་རྗེས་མི་ ༡༣ བསྐྱབས་ཐུབ་ཡོད་ཀྱང་ད་དུང་མི་གྲངས་ ༡༥ ཙམ་ཞིག་གར་ཡོད་ཆ་མེད་དུ་གྱུར་ཏེ་འཚོལ་བཞིན་པའི་སྒང་ཡིན་འདུག
ཁེ་ཉིན་རྒྱ་གར་གྱི་ཧི་མ་ཅལ་མངའ་སྡེའི་ཁུ་ནུ་རྫོང་ཁོངས་སུ་རི་ཉིལ་བ་དང་རྦབ་རྡོ་འགྲིལ་ནས་སྤྱི་སྤྱོད་རླངས་འཁོར་དང་དོ་སྐྱེལ་རླངས་འཁོར་སོགས་ས་འོག་ཏུ་ཤོར་ཡོད་པ་མ་ཟད། མི་ ༡༣ རྐྱེན་འདས་དང་། ཚོད་དཔག་བྱས་ན་མི་ ༥༠ ལྷག་ས་འོག་ཏུ་མནན་ནས་ཛ་དྲག་མྱུར་སྐྱོབ་བྱེད་བཞིན་ཡོད་པ་ལྟར། རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། དེ་རིང་འགྲུལ་བ་ ༡༥ ཡི་ཕུང་པོ་རྙེད་དེ་ད་བར་ཕུང་པོ་ ༣༠ རག་པ་དང་། མི་ ༡༣ བསྐྱབས་ཐུབ་ཡོད་ཀྱང་། ད་དུང་མི་ ༡༥ ཡི་རྙེད་ཐུབ་མེད་འདུག
ཟླ་འདིའི་ཕྱི་ཚེས་ ༡༡ ཉིན་ཧི་མ་ཅལ་མངའ་སྡེའི་ཁུ་ནུ་རྫོང་ (Kinnaur)གི་ཆ་ར་གྲོང་ཚོ་(Chaura village)ཉེ་འགྲམ་དུ་གློ་བུར་རི་ཉིལ་དང་རྦབ་རྡོ་འགྲིལ་ཏེ། གཞུང་ལམ་གྱི་སྤྱི་སྤྱོད་རླངས་འཁོར་དང་དོལ་སྐྱེལ་རླངས་འཁོར་སོགས་རླངས་འཁོར་ཁ་ཤས་ས་འོག་ཏུ་མནན། རྐྱེན་ངན་བྱུང་རྗེས་ཀང་ར་རྫོང་གི་རང་བྱུང་གོད་ཆག་སྲུང་སྐྱོབ་ལས་ཁུངས་ཀྱི་དཔོན་རིགས་དང་ཉེན་རྟོག་པ། མྱུར་སྐྱོབ་རླངས་འཁོར་བཅས་ཆེད་གཏོང་གིས་མྱུར་སྐྱོབ་བྱས་ཡོད་ཀྱང་། ཆར་ཞོད་ཆེ་བ་དང་སྨུག་པ་འཐིབས་རྐྱེན་ཐད་འཕུར་གནམ་གྲུ་ ༤ བཏང་ཡོད་ཀྱང་ཡུལ་དངོས་སུ་བསླེབས་ཐུབ་མེད་འདུག
ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐཱ་ཀོར་(Jairam Thakur)མཆོག་གིས། མངའ་སྡེ་གཞུང་ནས་གནོད་འཚེ་ཕོག་པའི་ནང་མི་རེ་རེ་ལ་ཧིན་སྒོར་འབུམ་ ༤ དང་རྨས་སྐྱོན་ཚབས་ཆེན་ཕོག་པའི་མི་དེ་ལ་ཧིན་སྒོར་ཁྲི་ ༥ གནང་རྒྱུ་དང་། རྨས་སྐྱོན་ཆུང་རིགས་ཕོག་མཁན་ལ་རིན་མེད་སྨན་བཅོས་གནང་ཡིན་པ་མ་ཟད། གཞུང་གི་སྤྱི་སྤྱོད་རླངས་འཁོར་ནང་རྐྱེན་འདས་ཕྱིན་པའི་ནང་མི་ལ་ཧིན་སྒོར་འབུམ་ ༡ གནང་རྒྱུ་ཡིན་སྐོར་གསལ་བསྒྲགས་གནང་འདུག
ཡང་ཁོང་གིས། ས་ཁུལ་དེར་ (Geological Survey) ས་གཤིས་རིག་པའི་ལྟ་ཞིབ་བྱ་ཡི་ཡིན་སྐོར་བརྗོད་འདུག སྤྱི་སྤྱོད་རླངས་འཁོར་གྱི་ཁ་ལོ་བས། ངས་ཕ་བོང་ཟགས་པ་མཐོང་ཡོད་ཀྱང་ཕྱི་དྲགས་པས། རླངས་འཁོར་ནས་མཆོངས་ཏེ་རྨས་སྐྱོན་འགའ་ཕོག་ཡོད། ཅེས་བརྗོད་འདུག ད་ལྟ་བར་དུ་ས་རུད་བྱུང་ནས་མི་ ༤༠ ལྷག་ཕ་བོང་གི་འོག་ཏུ་མནན་ཡོད་པའི་ཞེད་སྣང་བྱེད་ཀྱི་ཡོད་པ་རེད། དེ་ཡང་མྱུར་སྐྱོབ་རོགས་སྐྱོར་ཕྱིན་ཏེ་མི་ ༡༥ ཕུང་པོ་རྙེད་ཡོད་འདུག མངའ་སྡེའི་གཞུང་ནས་ཟླ་འདིའི་ཕྱི་ཚེས་ ༡༡ ཉིན་ (Helicopter) ཐད་འཕུར་གནམ་གྲུ་ ༤ ཉེན་སྐྱོབ་ཀྱི་ཆེད་དུ་བཏང་ཡོད་ཀྱང་། གནམ་གཤིས་ཡག་པོ་མེད་པའི་རྐྱེན་གྱིས་གོད་ཆག་བྱུང་བའི་ས་ཁུལ་དུ་འབྱོར་ཐུབ་མི་འདུག
འདི་ལྟར་ཕྱི་ཟླ་ ༧ པའི་ནང་ནས་བཟུང་རྒྱ་གར་བྱང་ཤར་ཁུལ་དུ་ཆར་དུས་བསླེབས་རྐྱེན་ཆར་པ་འབབ་ཡུན་རིང་པོ་ཡིན་པ་མ་ཟད། རི་ཁུལ་གྱི་མངའ་སྡེ་རྣམས་ལ་རི་ཉིལ་དང་ས་རུད་ཀྱི་ཆག་སྒོ་བསྟུད་མར་ཡོང་བཞིན་ཡོད་པ་ལྟར། འདི་ལོའི་ཕྱི་ཟླ་ ༧ ཚེས་ ༢༥ ཉིན་ཁུ་ནུ་རྫོང་གི་ (Batseri village) གྲོང་གསེབ་ཏུ་ས་རུད་དང་རྦབ་རྡོ་འགྲིལ་ཏེ་མི་ ༩ རྐྱེན་འདས་སུ་ཕྱིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
