རྒྱ་ནག་གཞུང་གི་ཏང་ལ་དགའ་ཞེན་དང་བདེ་འཇགས་ལས་འགན་སློབ་གསོ་ཟེར་བའི་ནང་མཉམ་ཞུགས་མ་བྱས་པའི་ཉེས་མིང་གཡོགས་ཏེ་རྔ་བ་སྤྲོ་ཚིགས་ཡུལ་ཚོའི་གཞོན་ནུ་ཤེས་རབ་རྡོ་རྗེ་ཞུ་བ་ཞིག་འཛིན་བཟུང་བྱས་ནས་བཀག་ཉར་འོག་བཞག་འདུག
Tibetan youth Sherab Dorjee arrested for not participating in a Political meeting Held in Trotseg Town Ngaba, Tibet. Image: Tibet Times Source(Tibet)
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༤ ཉིན་རྔ་བ་རྫོང་སྤྲོ་ཚིགས་ཡུལ་ཚོ་རུ། རྒྱ་ནག་གཞུང་གིས་བོད་རིགས་ན་གཞོན་ཚོར་ཏང་ལ་དགའ་ཞེན་དང་བདེ་འཇགས་ལས་འགན་སློབ་གསོ་ཟེར་བའི་ཆབ་སྲིད་དྲིལ་བསྒྲགས་ཀྱི་ཚོགས་འདུ་བསྡུས་ཡོད་པ་དང་། ཚོགས་འདུ་དེ་ན་གཞོན་ཚོར་ཆེད་དུ་དམིགས་པ་ཞིག་ཡིན་སྐོར་བརྗོད་དེ་སྔ་ས་ནས་བརྡ་ཐོ་བཏང་ཡོད་ཀྱང་། ས་གནས་བོད་རིགས་ན་གཞོན་ཤེས་རབ་རྡོ་རྗེ་ཞུ་བ་ཞིག་ཚོགས་འདུར་མ་ཕྱིན་པར་བརྟེན། སྲིད་གཞུང་གི་བཀའ་དྭང་ལེན་མ་བྱས་པ་དང་སྲིད་གཞུང་བྱ་བར་གཞོགས་འདེགས་མ་བྱས་པའི་ཉེས་མིང་འོག ཟླ་འདིའི་ཕྱི་ཚེས་ ༡༦ ཉིན། ཉེན་རྟོག་པས་ཁོང་རང་ཁྱིམ་ནས་འཛིན་བཟུང་བྱས་ཏེ་བཀག་ཉར་ཁང་དུ་བཅུག་ཡོད་འདུག
རྒྱ་ནག་གཞུང་གིས་རྔ་བ་ཕྱོགས་སུ་ན་གཞོན་ཚོར་ཆབ་སྲིད་སློབ་གསོའི་ཚོགས་འདུ་ཟེར་བ་མང་པོ་བསྡུ་བཞིན་ཡོད་པ་མ་ཟད། སྐད་གཉིས་སློབ་ཁྲིད་ཐབས་ལམ་ཟེར་བའི་མིང་ཐོག་ནས་རྔ་བ་ཁུལ་གྱི་སློབ་གྲྭ་ཆུང་འབྲིང་ནང་རྒྱ་བསྒྱུར་སློབ་གསོའི་སྲིད་ཇུས་ལག་བསྟར་བྱེད་ཐུབ་པར་ཕྱོགས་ཀུན་ནས་ཤུགས་སྣོན་རྒྱག་གི་ཡོད་འདུག་ལ། དབྱར་གནང་སྐབས་སུ་སློབ་ཕྲུག་ཚོས་སྲིད་གཞུང་གི་ལམ་སྟོན་རིམ་པར་དོ་ཁུར་ཆེན་པོ་བྱེད་དགོས་པ་མ་ཟད། བདེ་འཇགས་ལས་འགན་སློབ་གསོ་ཟེར་བ་སོགས་ལ་གང་མང་མཉམ་ཞུགས་བྱེད་དགོས་པ་ལས། དགོན་པ་དང་སྒེར་གཉེར་བོད་ཀྱི་རིག་གནས་ཟབ་སྦྱོང་སོགས་ལ་མཉམ་ཞུགས་བྱེད་མི་ཆོག་པའི་བཀའ་རྒྱ་བཏང་ཡོད་འདུག
རང་ལོ་ ༡༩ ཙམ་ཡིན་པའི་ཤེས་རབ་རྡོ་རྗེ་ལགས་ནི་སློབ་འབྲིང་སློབ་མ་ཞིག་ཡིན་ཞིང་། འདི་ལོར་རྨ་ཆུ་རྫོང་བོད་ཡིག་སློབ་འབྲིང་ནས་སློབ་མཐར་ཕྱིན་རྗེས་དབྱར་ཁའི་གུང་གསེང་ལ་ཕྱིར་ཁྱིམ་དུ་ལོག་ཡོད་འདུག ཁོང་གི་ཕ་མིང་ལ་ཚེ་དབང་དང་། ཨ་མ་ལགས་སྔོན་མ་ནས་འདས་གྲོངས་སུ་ཕྱིན་ཡོད་འདུག ཕྱི་ལོ་ ༢༠༢༠ ལོར་རྔ་བ་ཁུལ་གྱི་སློབ་གྲྭ་ཆུང་འབྲིང་ནང་རྒྱ་ནག་གཞུང་གིས་རྒྱ་བསྒྱུར་སློབ་གསོའི་སྲིད་ཇུས་འདོན་སྐབས། སློབ་ཕྲུག་མང་པོ་མཉམ་འབྲེལ་ཐོག་སྲིད་གཞུང་ལ་སྲིད་ཇུས་དེ་ལག་བསྟར་བྱས་ན་རྒྱལ་ཁབ་ཀྱི་བཅའ་ཁྲིམས་དང་འགལ་གྱི་ཡོད་པའི་རེ་སྐུལ་ཞུ་ཡིག་ཅིག་སྤྲད་ཡོད་པ་དང་། ཤེས་རབ་རྡོ་རྗེ་ལགས་རེ་སྐུལ་ཞུ་མཁན་གྲས་ཀྱི་གཙོ་བོ་ཞིག་ཀྱང་ཡིན་སྐོར་བརྗོད་ཀྱི་འདུག
Around 400 Tibetan students from Minzu University protest against imposing Chinese language as a primary medium in October 2010
འདས་ལོར་དཔྱིད་དུས་ཀྱི་སློབ་མགོ་ཚུགས་སྐབས་རྔ་བ་ཁུལ་སྲིད་གཞུང་ནས་བོད་སྐད་ཡིག་གཙོ་འཛིན་གྱི་སློབ་འཁྲིད་ལ་གྲུབ་འབྲས་ཞན་པ་དང་། སློབ་མའི་རིག་རྩལ་དང་སྦྱང་འབྲས་སོགས་རྗེས་ལུས་ཐེབས་ཀྱི་ཡོད་ཚུལ་བརྗོད་དེ་སྐད་གཉིས་སློབ་ཁྲིད་ཐབས་ལམ་ཟེར་བའི་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་བཏོན་ཡོད་ཀྱང་། རྔ་བ་ཁུལ་གཙོ་བོར་གྱུར་བའི་བོད་ཁུལ་གྱི་དགེ་རྒན་དང་རྩོམ་པ་པོ། མི་མང་འཐུས་མི་སོགས་ཀྱིས་ཡིག་ངག་གཉིས་ཀྱི་ལམ་ནས་སྲིད་ཇུས་དེས་བོད་ཀྱི་སྐད་ཡིག་རིག་གཞུང་མི་རིགས་དང་བཅས་པ་རྩ་བརླག་ཏུ་གཏོང་ཉེན་ཆེ་བའི་བསམ་འཆར་ཤུགས་ཆེན་འདོན་སྐབས། རྒྱ་ནག་གཞུང་གིས་བསམ་ཚུལ་རིགས་ཐད་ཀར་མགོ་འཁྲིད་ལ་ཞུ་རྒྱུ་ལས་དྲ་ལམ་ཁག་ཏུ་བརྒྱུད་སྤེལ་མི་ཆོག་པའི་བཙན་བཀའ་བཏང་། དེ་བཞིན་ལོ་འདིའི་སློབ་མགོ་ཚུགས་པ་དང་བསྟུན་བོད་གཙང་ཁུལ་གྱི་སློབ་གྲྭ་ཆུང་འབྲིང་ནང་ཨང་རྩིས་དང་དངོས་ཁམས་སོགས་རྒྱ་ཡིག་ནང་སློབ་འཁྲིད་བྱེད་མགོ་བརྩམས་ཡོད་འདུག ཕྱི་ལོ་ ༢༠༡༠ ལོར་མཚོ་སྔོན་ཞིང་ཆེན་སྲིད་གཞུང་གིས་རྒྱ་བསྒྱུར་སློབ་གསོའི་སྲིད་ཇུས་ལག་བསྟར་གྱི་ཡིག་ཆ་བསྒྲགས་རྗེས། སློབ་གྲྭ་ཆེ་འབྲིང་ཆུང་གསུམ་གྱི་དགེ་སློབ་སྟོང་ཕྲག་མང་པོས། མི་རིགས་འདྲ་མཉམ་དང་། སྐད་རིག་རང་དབང་། ཞེས་པའི་འབོད་ཚིག་འོག་ངོ་རྒོལ་ཤུགས་ཆེན་བྱས་རྐྱེན་སྲིད་ཇུས་ཇི་བཞིན་ལག་བསྟར་ཐུབ་མེད་ཀྱང་། ཕྱི་ལོ་ ༢༠༡༡ ལོའི་སློབ་མགོ་ཚུགས་པ་དང་བསྟུན་ས་ཁུལ་ཁག་ཅིག་ནང་སྲིད་ཇུས་དེ་དངོས་སུ་ལག་བསྟར་བྱེད་པའི་མགོ་བརྩམས་ཡོད་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
