༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་དམག་ཆེན་དང་པོ་དང་གཉིས་པའི་སྐབས་སུ་ཕམ་ཉེས་བྱུང་ཞིང་དཀའ་ངལ་ཆེན་པོ་ཕྲད་པའི་འཇར་མན་དང་ཉི་ཧོང་གཉིས་ཀྱིས་འཛམ་གླིང་ཞི་བདེའི་ཐོག་སེམས་ཁུར་ཆེན་པོ་བླངས་ཡོད་པ་ལྟར་ཞི་བདེར་ལེགས་སྐྱེས་འབུལ་བའི་ནུས་པ་ཆེན་པོ་ཡོད་སྐོར་གསུངས།
འཇར་མན་བོད་དོན་རྒྱབ་སྐྱོར་ཚོགས་པ་ ( Tibet Initiative deutschland ) ཡིས་ཇི་ལྟར་གསོལ་བ་བཏབ་པ་ལྟར། དེ་རིང་སྔ་དྲོར་བཞུགས་སྒར་རྒྱལ་བའི་ཕོ་བྲང་ནས་ཐད་གཏོང་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་གིས། འཇར་མན་གྱི་དད་ལྡན་དོན་གཉེར་ཅན་རྣམས་ལ་བོད་ཀྱི་རིག་གཞུང་གིས་འཛམ་གླིང་ཞི་བདེ་ལ་ཞབས་འདེགས་ཀྱི་ནུས་པའི་སྐོར་ལ་བཀའ་སློབ་སྩལ་ཡོད་པ་དང་། སྐབས་དེར་༧གོང་ས་མཆོག་གིས། དེ་རིང་ངོས་རང་འཇར་མན་གྱི་ཆོས་གྲོགས་ཚོ་དང་ལྷན་དུ་བགྲོ་གླེང་བྱ་རྒྱུ་བྱུང་བར་ཧ་ཅང་དགའ་བོ་བྱུང་། འཇར་མན་མི་རིགས་དེ་དམག་ཆེན་དང་པོའི་སྐབས་ཨ་རི་ལ་སོགས་པས་ཕམ་ཉེས་བཏང་ཡོད་པ་རེད། དམག་ཆེན་གཉིས་པའི་སྐབས་སུ་ཡང་ཨ་རི་ལ་སོགས་པས་དམག་དྲངས་ནས་ཕམ་ཉེས་བཏང་ཡོད་པ་རེད། ངོས་ཀྱིས་བསམས་ན་འཇར་མན་དང་ཉི་ཧོང་གཉིས་ཀྱིས་དམག་ཆེན་དང་པོ་དང་གཉིས་པའི་རྗེས་སུ་འཛམ་གླིང་ཞི་བདེ་ཡི་ཐོག་ལ་སེམས་ཁུར་ཆེན་པོ་བཞེས་ཡོད་པ་དང་། ཉི་ཧོང་ལ་ཆ་བཞག་ན་རྡུལ་ཕྲན་མཚོན་ཆའི་རྐྱེན་པས་དཀའ་ངལ་ཆེན་པོ་འཕྲད་ཡོད། དམག་ཆེན་གྱི་སྐབས་སུ་དམིགས་བསལ་གྱི་དཀའ་ངལ་ཆེན་པོ་བྱུང་བས། སེམས་བསམ་པའི་གཏིང་ནས་འཛམ་གླིང་ཞི་བདེ་འདོད་མཁན་ཞིག་ཏུ་གྱུར་ཡོད། དེར་བརྟེན། འཇར་མན་དང་ཉི་ཧོང་གཉིས་ལ་འཛམ་གླིང་ཞི་བདེའི་ལེགས་སྐྱེས་འབུལ་བའི་ནུས་པ་ཆེན་པོ་ཡོད་པ་རེད། ཅེས་གསུངས་སོང་།
ཡང་མགོན་པོ་མཆོག་གིས། བོད་བརྒྱུད་ནང་བསྟན་དུ་ཐོས་བསམ་སྒོམ་གསུམ་ཟུང་འབྲེལ་གྱི་ཐོག་ནས་ཉམས་ལེན་བྱེད་ཀྱི་ཡོད་པ་དང་། ལེགས་སྦྱར་ལྟར་ན་ཞི་ལྷག་ཟུང་འབྲེལ་གྱི་རྣལ་འབྱོར་གྱི་ཐོག་ནས་ཉམས་ལེན་བྱེད་ཀྱི་ཡོད་པ་རེད། གང་ལྟར་དཔྱད་འཇོག་ཟུང་འབྲེལ་གསུང་གི་ཡོད་པ་རེད། དེ་དག་ནི་བོད་པའི་ཉམས་ལེན་ལ་གཙོ་བོ་ཡིན་པ་དང་། བོད་པས་ཉམས་ལེན་བྱེད་སྐབས་བྱམས་སྙིང་རྗེ་ཁོ་ན་ཉམས་ལེན་བྱེད་པ་མ་ཡིན་པར། ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་པའི་བྱམས་དང་སྙིང་རྗེ་ཉམས་ལེན་བྱེད་ཀྱི་ཡོད་པས། འཛམ་གླིང་ཞི་བདེ་ལ་ལེགས་སྐྱེས་ཕུལ་བའི་ནུས་པ་ཆེན་པོ་ཡོད། ང་ཚོའི་ཉམས་ལེན་ནི་ལུང་དང་ཡིད་ཆེས་ལ་བརྟེན་པ་མ་ཡིན་པ་དང་། རིག་པ་ལ་བརྟེན་པ་ཡིན་དུས་རིག་པར་བརྟེན་ནས་རྒྱུ་མཚན་ལ་བསམ་བློ་བཏང་སྟེ། ནང་སེམས་སུ་བྱམས་བརྩེ་ཡི་བློ་ཞིག་སྐྱེས། དེའི་དབང་གིས་སེམས་ཀྱི་ཞི་བདེ་བདེ་བླག་དུ་སྐྱེས། རིག་པ་གཙོ་བོར་བརྟེན་པ་ཡིན་དུས་གཞན་ལ་ཡང་རིག་པའམ་རྒྱུ་མཚན་གཙོ་བོ་བྱས་ནས་འགྲེལ་བཤད་བྱེད་ཀྱི་ཡོད། ཆོས་ནང་གསུངས་པའི་ལྟ་སྒྲུབ་ཀྱི་གནད་དོན་རྣམས་ཐུན་མོང་གི་བསླབ་བྱ་ཡིན་དུས། ཆོས་ཁས་མི་ལེན་ཡང་ནང་སེམས་ཀྱི་ཞི་བདེ་འདོད་ཀྱི་ཡོད་པས། ནང་སེམས་མ་འདུལ་བའི་རྐྱེན་གྱིས་ཕྱིའི་བྱ་སྤྱོད་ངན་པའི་རིགས་མངོན་ཡོང་གི་ཡོད་པ་རེད། འགྲོ་བ་སེམས་ཅན་ཞིག་ཡིན་ཕྱིར་མ་ཡི་བརྩེ་བས་མ་སྐྱོང་ཚེ། སྲོག་འཚོ་ཐབས་གཏན་ནས་མེད། དེར་བརྟེན་མིའི་རྒྱུད་ལ་བྱམས་བརྩེའི་ས་བོན་ཡོད་ཅེས་བཤད་དོན་དེ་ཡིན། གཟུགས་པོའི་འཕྲོད་བསྟེན་ལ་ཆགས་བཞག་ན་ཡང་། ནང་སེམས་ཀྱི་ཞི་བདེ་ནི་གལ་ཆེན་ཡིན་པ་ལྟར། དེང་རབས་སློབ་གསོའི་ཁོངས་སུ་ནང་སེམས་ཀྱི་ཞི་བདེ་བསྐྲུན་ཐབས་སྐོར་གྱི་སློབ་ཚན་བསླབ་དགོས་པ་གལ་ཆེན་པོ་རེད། ཅེས་སོགས་གསུངས་སོང་།
སུད་སིར་གནས་སྡོད་བཀྲིས་མཚོ་མོ་ཞེས་པ་ཞིག་གིས། རྒྱ་ནག་གི་བཙན་གནོན་འོག་ཏུ་ལུས་པའི་བོད་མི་ཚོས་བོད་ཀྱི་ཆོས་དང་རིག་གཞུང་སོགས་ཇི་ལྟར་ཉར་ཚགས་དགོས་སྐོར་བཀའ་འདྲི་ཞུས་པར། ༧གོང་ས་སྐྱབས་མགོན་པོ་ཆེན་པོ་མཆོག་གིས། ཐོག་མར་རྒྱ་ནག་གིས་བོད་ལ་བཙན་འཛུལ་བྱེད་སྐབས་དང་། ད་ལྟའི་གནས་སྟངས་གཉིས་བསྡུར་བ་ཡིན་ན་ཧེ་བག་ཆེན་པོ་ཡོད་པ་རེད། སྐབས་དེའི་རྒྱ་ནག་གི་དཔོན་རིགས་ཚོ་ལྟ་བ་མཁྲེགས་པོ་ཡོད་པ་དང་། ཁོང་ཚོས་ཆོས་ནི་དུག་ཏུ་རྩི་ཡི་ཡོད་པ་རེད། ངོས་དང་མའོ་ཙི་ཏུང་གི་ཆེས་མཐའ་མཇུག་གི་ཐུག་འཕྲད་སྐབས། མའོ་ཡིས་ཏཱ་ལའི་བླ་མ་ཁྱེད་རང་གི་བསམ་བློ་ནི་ཚན་རིག་དང་མཐུན་གྱི་ཡོད་ཀྱང་། ཆོས་ནི་དུག་རེད་ཅེས་ལབ་བྱུང་། འོན་ཀྱང་། དེང་གི་ཆར་ཆོས་དུག་ཏུ་རྩི་བའི་ལྟ་སྟངས་ལ་འགྱུར་འགྲོས་ཆེན་པོ་ཕྱིན་ནས་རྒྱ་ནག་ནང་གི་རྒྱ་རིགས་མང་པོས་ཆོས་ལ་དོ་སྣང་བྱེད་ཀྱི་ཡོད་པ་དང། ལྷག་པར་བོད་བརྒྱུད་ནང་བསྟན་ལ་དོ་སྣང་ཤུགས་ཆེན་བྱེད་ཀྱི་ཡོད་པ་རེད། རྒྱ་ནག་ཏུ་ཆོས་ཕྱོགས་ཀྱི་སློབ་གསོ་སྤྲོད་མཁན་ངོས་ཀྱི་ངོ་ཤེས་ཁ་ཤས་ཀྱིས་རྒྱ་ནག་གི་མཐོ་སློབ་ཁག་གི་སློབ་དཔོན་ཚོས། ཐོག་མར་རྒྱ་གར་ནས་དཔར་སྐྲུན་བྱས། དེ་ནས་རྒྱ་ཡིག་དུ་བསྒྱུར་ནས་ཕྱོགས་སྒྲིག་བྱས་བཞག་པའི་ཕྱག་དེབ་རྣམས་གཟིགས་ཡོང་དུས། ཁོང་ཚོས་བོད་བརྒྱུད་ནང་བསྟན་ནི་ནལེནྜའི་ཆོས་བརྒྱུད་གཙང་མ་ཡིན་པ་དང་། དེ་ཡང་ཚན་རིག་དང་རིག་པར་མཐུན་པའི་ཆོས་ཤིག་རེད་ཅེས་གསུང་མཁན་བྱུང་ཡོད། དེ་བདེན་པ་རེད། ང་ཚོའི་བོད་བརྒྱུད་ནང་བསྟན་འདི་ལུང་གཙོ་བོ་ལ་བརྟེན་པ་མ་ཡིན་པར་རིག་པ་ལ་གཙོ་བོ་བརྟེན་གྱི་ཡོད་པ་རེད། བོད་ནང་གི་མཁས་དབང་མང་པོ་ཞིག་གིས་ལྟ་ཚུལ་ལ་ཆབ་སྲིད་ཀྱི་ཐོག་ནས་རྒྱ་ནག་གིས་བཙན་འཛུལ་བྱས་ཡོད་པ་དངོས་གནས་ཡིན་ན་ཡང་། ཆོས་ཕྱོགས་ཀྱི་ཐོག་ནས་ཕར་ཕན་ཐོགས་བྱ་ཐུབ་པའི་དགོངས་པ་ཡོད་པ་རེད། དེ་དངོས་གནས་གཏན་གཏན་བདེན་པ་རེད་བསམ་གྱི་ཡོད། དེང་གི་ཆར་རྒྱ་ནག་ཏུ་ནང་ཆོས་བྱེད་མཁན་གྱི་གྲངས་འབོར་འཕར་གྱི་ཡོད་པ་རེད། ཕྱོགས་གཅིག་ནས་མ་ཁེ་སི་རིང་ལུགས་དེ་ལམ་ལྷོངས་མ་བྱུང་བ་ལྟ་བུ་ཞིག་ཆགས་བསྡད་ཡོད། འདས་པའི་ལོ་རྒྱུས་ལ་ཆ་བཞག་ན། རྒྱ་ནག་ནི་ནང་པའི་རྒྱལ་ཁབ་ཅིག་ཆགས་ཡོད། རྒྱ་ནག་གི་གཞོན་སྐྱེས་མང་པོ་ཞིག་གིས་ནང་ཆོས་ལ་དོ་སྣང་དང་། ལྷག་པར་བོད་བརྒྱུད་ནང་བསྟན་ལ་དོ་སྣང་བྱེད་མུས་ཡིན་དུས། ཕྱོགས་ཡོངས་ནས་བསམ་བློ་ཞིག་བཏང་པ་ཡིན་ན་འགྱུར་འགྲོས་ཆེན་པོ་ཞིག་འགྲོ་མུས་ཡིན་པ་རེད། རྒྱ་ནག་གི་དཔོན་རིགས་ཚོས་ནང་ཆོས་དེ་སྣུབ་ཐབས་ལན་མང་བྱས་ཀྱང་ལམ་ལྷོངས་དུ་མ་ཕྱིན་པ་རེད། བོད་བརྒྱུད་ནང་བསྟན་དེ་ཨེ་ཤི་ཡ་གཅིག་པུ་མ་ཡིན་པར། ནུབ་ཕྱོགས་ཀྱི་རྒྱལ་ཁབ་མང་པོའི་ནང་དར་ཁྱབ་བྱུང་ཡོད་པ་དང་། ཚན་རིག་པ་དང་དེང་དུས་ཀྱི་མཁས་པ་མང་པོས་བོད་བརྒྱུད་ནང་བསྟན་ལ་ཐུགས་སྣང་བྱེད་མུས་ཡིན། ང་ཚོ་ཐོག་མར་བཙན་བྱོལ་ལ་འབྱོར་སྐབས། རྒྱ་གར་གྱི་སྲིད་བློན་དམ་པ་ནེ་རུ་མཆོག་ལ་བོད་ཀྱི་ཆོས་རིག་སོགས་ཉར་ཚགས་ཀྱི་སླད་བོད་པ་གཅིག་པུའི་སློབ་གྲྭ་ཞིག་དགོས་པའི་རེ་སྐུལ་ཞུས་པ་བཞིན། སྲིད་བློན་དམ་པ་ཁོང་གིས་ཞལ་བཞེས་གནང་ཡོད་དུས། བོད་པའི་གཞོན་སྐྱེས་ཚོ་ལ་བོད་ཀྱི་ཆོས་རིག་ལ་སློབ་སྦྱོང་བྱ་རྒྱུའི་གོ་སྐབས་ཡོད་པ་རེད། རྒྱ་གར་དུ་སློབ་གྲྭ་དང་། དགོན་སྡེ། བཤད་གྲྭ་སོགས་གསར་འཛུགས་གནང་སྟེ། གྲྭ་པ་སྟོང་ཕྲག་མང་པོས་སློབ་གཉེར་བྱེད་ཀྱི་ཡོད་པ་དང་། དེང་སང་སོག་པོ་དང་རྒྱ་རིགས་ཁ་ཤས་ཀྱིས་ཀྱང་བོད་བརྒྱུད་ནང་བསྟན་སློབ་གཉེར་བྱེད་ཀྱི་འདུག བོད་ཀྱི་སྐད་ཡིག་དང་རིག་གཞུང་སྦྱང་སའི་བསྟི་གནས་མང་པོ་ཞིག་ཡོད་དུས། བོད་པའི་གཞོན་སྐྱེས་ཚོས་བོད་པའི་སྐད་དང་ཡི་གེ་སློབ་གཉེར་བྱ་རྒྱུ་གལ་ཆེན་པོ་ཡིན་པ་རེད། ཅེས་གསུངས་སོང་།
དེ་ནས་བོད་དོན་རྒྱབ་སྐྱོར་བ་སྐུ་ཞབས་ཝོལ་ཀིར་ ( Volker Stanzel )ལགས་ཀྱིས། རྒྱ་ནག་གིས་ཧན་མི་རིགས་ཀྱི་ཁྲོད་དུ་གྲངས་ཉུང་མི་རིགས་རྣམས་སིམ་ཐབས་བྱེད་མུས་ཡིན་སྟབས། གྲངས་འབོར་མང་བའི་ཧན་མི་རིགས་ཀྱི་ཁྲོད་དུ་བོད་བརྒྱུད་ནང་བསྟན་ཇི་ལྟར་དར་སྤེལ་ཐུབ་མིན་སྐོར་བཀའ་འདྲི་ཞུས་པར། ༧གོང་ས་སྐྱབས་མགོན་ཆེན་པོ་མཆོག་གིས། བོད་ཀྱི་རིག་གཞུང་དང་གོམས་གཤིས་ཀྱི་རྩ་བ་ནི་ནང་ཆོས་ལ་གཞི་བཞག་པ་དང་། དེ་ཡང་གཏན་ཚིགས་རིག་པའི་སྒོ་ནས་རྒྱུ་མཚན་ལ་གཙོ་བོ་བརྟེན་པའི་ཆོས་ཀྱི་འཛིན་སྐྱོང་སྐོར་ལ་ཞུ་ཡི་ཡོད་པ་རེད། སྤྱིར་བཏང་ཆོས་ལ་ཡིད་ཆེས་མེད་མཁན་ཡིན་ན་ཡང་། རིམ་པས་ནང་ཆོས་ལ་དོ་དབྱིངས་ཆེ་རུ་འགྲོ་ཡི་ཡོད་པ་དང་། རྒྱ་ནག་ལ་མཚོན་ན་ལོ་རྒྱུས་ཁྲོད་དུ་ནང་པའི་རྒྱལ་ཁབ་ཅིག་ཡིན་པ་དང་། དེང་གི་ཆར་རྒྱ་ནག་ནང་དུ་ནང་ཆོས་བྱེད་མཁན་གྱི་གྲངས་འབོར་འཕར་མུས་ཡིན་དུས། རྒྱ་ནག་ཏུའང་ནང་ཆོས་བསྐྱར་གསོ་ཡོང་རྒྱུའི་འབད་བརྩོན་བྱེད་མུས་རེད། ནང་ཆོས་ཀྱི་འགྲོ་སྟངས་ནི་ཚན་རིག་དང་མཐུན་པ་ཡིན་པས་ཚང་མས་དགའ་མོས་བྱེད་ཀྱི་ཡོད་པ་རེད། ནང་ཆོས་ནང་ཞུ་བའི་སྐྱེ་བ་སྔ་ཕྱིའི་རྣམ་གཞག་དང་། དག་ཞིང་། ཐར་པ་དང་ཐམས་ཅད་མཁྱེན་པའི་གོ་འཕང་སོགས་དམིགས་མཁན་ནི་ཆོས་ཁོ་ནར་ཡིད་ཆེས་བྱེད་མཁན་ཡིན། གཙོ་བོ་རྒྱུ་མཚན་རྩ་བར་བརྟེན་པའི་དངོས་པའི་གནས་ཚུལ་ལ་དཔྱད་པ་བྱ་དགོས། ཚན་རིག་པས་ཕྱིའི་གཟུགས་ཅན་དངོས་པོར་དཔྱད་པ་བྱས་པའི་གྲུབ་དོན་དང་། ནང་ཆོས་ནས་གསུང་པའི་དངོས་པའི་ཡིན་ལུགས་མཐར་ཐུག་སྐོར་ལ་འགྲེལ་བཤད་རྒྱག་དུས་མཚུངས་པ་ལྟ་བུ་ཞིག་ཆགས་ཀྱི་འདུག ནང་པའི་གཏན་ཚིགས་རིག་པ་དང་ལྟ་གྲུབ་ཀྱི་སྐོར་ལ་ཆགས་བཞག་ན། དེའི་འཛིན་སྐྱོང་བྱེད་ཐུབ་མཁན་ནི་བོད་པ་ཆགས་ཡོད། དེའི་ཕྱིར་ནང་ཆོས་དང་ནང་པའི་ལྟ་གྲུབ། ནང་པའི་གཏན་ཚིགས་རིག་པའི་སྐོར་ལ་དོ་སྣང་བྱེད་མཁན་ཞིག་ཡིན་ན། བོད་པའི་ཐད་ལ་རང་བཞིན་གྱི་དོ་སྣང་བྱུང་གི་ཡོད་པ་རེད། ཅེས་གསུངས་སོང་།
དཔལ་ལྡན།
