༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་པ་དང་ཕྱི་ལོག་ཏུ་ཡོད་པའི་བོད་མི་རྣམས་ལ་འབྲེལ་བ་བྱས་པའི་ཉེས་མིང་འོག་རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་སེར་ཤུལ་རྫོང་དུ་བཙན་འཁྲིད་བྱས་ཡོད་འདུག
དེ་རིང་འདི་གའི་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༢ ཀྱི་སྔ་དགོང་གཉིས་ལ་རྫ་དབོན་པོ་དགོན་དུ་དམག་མི་ཕོན་ཆེན་འབྱོར་ཏེ་འདྲི་རྩད་སྔོག་བཤེར་བྱས་པ་བརྒྱུད། ༧གོང་ས་རྒྱལ་བ་རིན་པོ་མཆོག་གི་སྐུ་པར་སྒྲིག་གཤོམ་དང་སྐུ་པར་ཉར་ཚགས་བྱས་པའི་ཉེས་མིང་འོག ཕྱི་ཚེས་ ༢༣ ཉིན་རྫ་དབོན་པོ་དགོན་གྱི་དགེ་འདུན་པ་ ༡༨ འཛིན་བཟུང་བཙན་འཁྲིད་བྱས་ཡོད་པ་དང་། ཕྱི་ཚེས་ ༢༤ ཉིན་གྱི་ཞོགས་པར་ཡང་དགེ་འདུན་པ་གཅིག་བཙན་འཁྲིད་བྱས་ཡོད་འདུག འཛིན་བཟུང་བྱས་པའི་དགེ་འདུན་པའི་ཁྲོད་བློ་ལྡན་ཆུང་ལམ་དང་དཔལ་སྐྱབས། བསྟན་འཛིན་བློ་གསལ། པད་རྡོ། བློ་ཤེར། ཆོས་མཆོག དགའ་ལྡན། ཤེས་རབ། འཇམ་དཔལ། རྡ་ལོ། གཅོད་པ། བསོད་ནམས་དགའ་ལེགས། རྟ་མགྲིན་ནོར་བུ་སོགས་ཡོད་འདུག
ཡང་གནས་ཚུལ་མཁོ་སྤྲོད་པས། ཁ་སང་རྫ་དབོན་པོ་ཁུལ་དུ་རྒྱ་ནག་གཞུང་གིས་མི་མང་ཚོགས་འདུ་ཞིག་བསྐོངས་ཡོད་པ་དང་། ཚོགས་འདུ་དེར་ལོ་བཅུ་དགུ་ཡན་ཆད་ཚང་མས་མཉམ་ཞུགས་བྱ་དགོས་ཤིང་། གལ་ཏེ་ཚོགས་འདུ་དེར་མཉམ་ཞུགས་མ་བྱས་ཚེ་ཁྲིམས་ཆད་གཅད་རྒྱུ་ཡིན་པའི་འཇིགས་སྐུལ་བྱས་ཡོད་འདུག ཚོགས་ཐོག་དེར་བོད་མི་ཚོས་༧གོང་ས་མཆོག་གི་སྐུ་པར་སྒྲིག་གཤོམ་བྱེད་མི་ཆོག་པ་དང་། ཁ་པར་དང་བརྒྱུད་ལམ་ཁག་ནས་པར་དང་གནས་ཚུལ་རིགས་དྲིལ་བསྒྲགས་བྱ་མི་ཆོག་པའི་ཉེན་བརྡ་ནན་པོ་བཏང་ཡོད་པ་ལྟར། ཁ་སང་ནས་བཟུང་རྫ་དབོན་པོ་ཁུལ་གྱི་གྲོང་ཚོ་དང་པོའི་ཡུལ་མི་རྣམས་ཀྱི་ཁྱིམ་དང་ཁ་པར་སོགས་སྔོག་གཤེར་བྱེད་མགོ་བཙུགས་ཡོད་པ་རེད། ཅེས་བརྗོད་བྱུང་།
འདི་ལོའི་ཕྱི་ཟླ་ ༣ ཚེས་ ༡༧ ཉིན་རྒྱ་གཞུང་གིས་བོད་མི་ཚོར་སྤྲད་པའི་ཁས་ལེན་ཡི་གེ་ཟེར་བ་དེ་མཁོ་སྤྲོད་གནང་བའི་ནང་། ཏང་གི་བཀའ་དྲིན་ཚོར་བ་དང་མེས་རྒྱལ་ལ་དགའ་ཞེན། ཁྲིམས་ལུགས་སྲུང་བའི་འདུ་ཤེས་ཟབ་ཏུ་གཏོང་ཆེད། རང་ཁྱིམ་དུ་བཀག་སྡོམ་ལས་འགལ་བའི་ཏཱ་ལའི་སྐུ་བྲིས་བཞག་མི་ཆོག་པ་དང་། རང་ཉིད་ཀྱི་གཉེན་ཉེ་ཁྱིམ་ཚང་ལ་བཀག་སྡོམ་ལས་འགལ་བའི་ཏཱ་ལའི་སྐུ་པར་བཞག་མི་ཆོག་པའི་སྐུལ་སློང་བྱེད་དགོས་པ། བཀག་སྡོམ་ལས་འགལ་བའི་ཏཱ་ལའི་སྐུ་པར་སྒེར་ཉར་དང་། བརྒྱུད་སྤྲོད། པར་འགྲེམ་བཅས་བྱེད་མི་ཆོག དེ་བཞིན་དྲ་ཐོག་ནས་ཏཱ་ལའི་སྐུ་པར་དང་རི་མོ། དེ་བཞིན་ཁྲིམས་འགལ་གྱི་གཏམ་བརྗོད། རྩོམ་སྒྲིག་དང་བརྒྱུད་སྤེལ་བྱ་རྒྱུ་གཏན་འགོག་བྱེད་དགོས་དང་། རང་ཉིད་ཆབ་སྲིད་ཀྱི་ལམ་ལ་ཕྱོགས་ནས། ཏང་ལ་མིག་དཔེ་བལྟས་ཏེ་ཏང་གི་རྗེས་སུ་འབྲང་ནས། ཁྲིམས་འགལ་གྱི་རིགས་དབྱེ་བར་འཐབ་རྩོད་བྱས་ནས་དྲང་བདེན་གྱི་ལམ་ལ་བསྒྱུར་དགོས། ཟེར་བའི་དོན་ཚན་ ༥ བཀོད་ཡོད་པའི་ཐོག གལ་ཏེ་བོད་མི་སུ་རུང་དོན་ཚན་དེ་དག་དང་འགལ་ཚེ། རྒྱལ་ཁབ་ཀྱི་འཚོ་བའི་རོགས་དངུལ་ཡོངས་རྫོགས་དང་རོགས་སྐྱོར་གཅིག་ཀྱང་མེད་པར་བྱ་རྒྱུ་ཡིན་པའི་དྲིལ་བསྒྲགས་བྱས་ཡོད་འདུག
ཕྱི་ལོ་ ༢༠༡༩ ཟླ་ ༡༡ ཚེས་ ༧ ཉིན་རྫ་དབོན་པོ་ཡུལ་ཚོའི་གྲོང་རྡལ་གྱི་ས་གནས་རྒྱ་ནག་གཞུང་གི་ལས་ཁུངས་མདུན་དུ་བོད་རང་བཙན་གྱི་དོན་དུ་འཐབ་རྩོད་བྱེད་དགོས་ཞེས་པའི་ཡིག་ཆ་མང་པོ་འགྲེམས་སྤེལ་བྱས་པའི་གནས་ཚུལ་བྱུང་རྗེས། དབོན་པོ་དགོན་གྱི་དགེ་འདུན་པ་ལྔ་དང་མི་སྐྱ་གཉིས་སྔ་གཞུག་ཏུ་འཛིན་བཟུང་བྱས་ཏེ་ཁག་ཅིག་ལ་ལོ་གཅིག་ནས་ལྔ་བར་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་འཛིན་བཟུང་བཙོན་འཇུག་བྱས་པའི་གྲྭ་བསྟན་འཛིན་ཉི་མ་ལགས་ལ་བཙོན་ཁང་དུ་མནར་གཅོད་ཚད་མེད་བཏང་རྐྱེན་འདི་ལོའི་ཕྱི་ཟླ་ ༡ ཚེས་ ༡༩ ཉིན་འདས་གྲོངས་སུ་ཕྱིན་ཡོད་འདུག སྐབས་དེར་སྤྱི་ཚོགས་དྲ་ལམ་དུ་གྲྭ་བསྟན་འཛིན་ཉི་མ་ལགས་ཀྱི་གནས་ཚུལ་སྤེལ་བའི་ཉེས་མིང་འོག ས་གནས་བོད་མི་འགའ་ཡང་འཛིན་བཟུང་བྱས་པའི་གནས་ཚུལ་ཐོན་ཡོད་ཀྱང་། ཕྱིས་སུ་གནས་སྟངས་ག་འདྲ་ཆགས་ཡོད་མེད་གསལ་ཁ་མེད་པ་རེད།
རྫ་དབོང་པོ་དགོན་དགའ་ལྡན་མདོ་སྔགས་བཤད་སྒྲུབ་དར་རྒྱས་གླིང་ནི་མཁས་གྲུབ་ཆེན་མོ་ཀོ་རྒྱལ་དགེ་བ་ཚུལ་ཁྲིམས་མཆོག་གིས། ཕྱི་ལོ་ ༡༦༩༠ ཡས་མས་ཤིག་ཏུ་ཕྱག་བཏབ་ཡོད་པ་དང་། ད་ལྟ་རྒྱ་ནག་གཞུང་གིས་དབྱེ་བགོས་བྱས་པའི་སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་གི་རྫ་སྨད་ཡུལ་འཚོ་རུ་ཆགས་ཡོད་ཅིང་། ད་ལྟ་དགེ་འདུན་པ་ ༣༠༠ ཡས་མས་ཤིག་ཡོད་འདུག
དཔལ་ལྡན།
