བོད་རིགས་བུ་མོ་གཉིས་ལ་མེ་སེར་མཐོ་སློབ་ནས་གསེར་ཀྱི་རྟགས་མ་ཐོབ།

རྒྱ་གར་གྱི་མེ་སོར་མཐོ་སློབ་ཀྱི་སྤྱི་དམངས་འཛིན་སྐྱོང་རིག་པའི་ཐོག་གཙུག་ལག་རམ་འབྱམས་པ་ཐོན་མཁན་བོད་རིགས་བུ་མོ་བདེ་སྐྱིད་དཔལ་མོ་ལགས་དང་ལོ་རྒྱུས་རིག་པའི་གཙུག་ལག་རབ་འབྱམས་པ་ཐོན་མཁན་བསྟན་འཛིན་ཚེ་དབྱངས་ལགས་གཉིས་ལ་གསེར་གྱི་རྟགས་མ་ཐོབ་ཡོད་འདུག

ཁ་སང་མེ་སོར་མཐོ་སློབ་ཀྱི་རྒྱུགས་འབྲས་གཟེངས་བསྟོད་བྱ་དགའ་སྩལ་བའི་མཛད་སྒོ་ཞིག་འཚོགས་ཏེ། མཐོ་སློབ་དེར་ལོ་ངོ་གཉིས་རིང་སྤྱི་དམངས་འཛིན་སྐྱོང་ ( Public Administration ) གི་ཐོག་གཙུག་ལག་རབ་འབྱམས་པའི་སློབ་གཉེར་བྱས་ཏེ། རྒྱུགས་དུས་བཞི་ཡི་ཕྱོགས་བསྡོམས་བརྒྱ་ཆ་མཐོ་ཤོས་ལེན་མཁན་བོད་རིགས་བུ་མོ་བདེ་སྐྱིད་དཔལ་མོ་ལགས་ལ་གསེར་གྱི་རྟགས་མ་ཐོབ་ཡོད་པ་དང་། དེ་བཞིན་མཐོ་སློབ་དེའི་སློབ་ཚན་བྱེ་བྲག་པའི་གཟེངས་བསྟོད་བྱ་དགའི་ཁྲོད་བོད་རིགས་བུ་མོ་བསྟན་འཛིན་ཚེ་དབྱངས་ཀྱིས་ལོ་རྒྱུས་སློབ་ཚན་ཐོག་བརྒྱ་ཆ་མཐོ་ཤོས་བླངས་ཡོད་སྟབས། མཐོ་སློབ་ཀྱི་སློབ་དཔོན་(B Sheik Ali )ཡི་རྗེས་དྲན་གསེར་གྱི་རྟགས་མ་ཐོབ་ཡོད་འདུག

འདི་གའི་གསར་འགོད་པར་བདེ་སྐྱིད་དཔལ་མོ་ལགས་ཀྱིས། ཁོང་མོར་བྱ་དགའ་དེ་འདྲ་ཞིག་ཐོབ་པར་དགའ་སྤོབས་ཆེ་ཞིང་། ལྷག་པར་ཁོང་མོ་ནི་གཟེངས་བསྟོད་བྱ་དགའ་དེ་ཐོབ་མཁན་གྱི་བོད་མི་ཐོག་མ་དེ་ཡིན་སྟབས། རང་ཉིད་བོད་པ་ཞིག་ཡིན་པའི་དགའ་སྤོབས་ཆེན་པོ་བྱུང་བ་ཡོད་སྐོར་དང་། ཁོང་མོ་གཙུག་ལག་རབ་འབྱམས་པའི་སློབ་མཐར་ཕྱིན་ཡོད་ཀྱང། ད་ལྟ་ཏོག་དབྱིབས་རིམས་ནད་ཀྱི་རྐྱེན་གྱིས་འགྲིམ་འགྲུལ་སོགས་ལ་དཀའ་ཁག་ཡོད་ནའང་། རྗེས་སུ་མུ་མཐུད་སློབ་གཉེར་བྱ་རྒྱུའི་འདུན་པ་ཡོད་ལ།  བོད་པའི་སྤྱི་ཚོགས་ཁྲོད་ཞབས་ཞུ་བསྒྲུབ་འདོད་ཡོད་པ་དང་།  ཏོག་དབྱིབས་རིམས་ནད་ཀྱི་རྐྱེན་གྱིས་གཟེངས་བསྟོད་བྱ་དགའ་སྤྲོད་སའི་མཛད་སྒོར་ཞུགས་ཐུབ་མེད་སྐོར་སོགས་བརྗོད་བྱུང་།

 བདེ་སྐྱིད་དཔལ་མོ་ལགས་ནི་ ༢༠༠༣ ལོར་བོད་ནས་རྒྱ་གར་དུ་འབྱོར་ཞིང་། སུ་ཇ་བོད་ཁྱིམ་སློབ་གྲྭར་གཞི་རིམ་གྱི་སློབ་གཉེར་བྱས། ཕྱི་ལོ་ ༢༠༡༨ ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་ནས་དབྱིན་ཡིག་དང་། སྤྱི་དམངས་འཛིན་སྐྱོང་། གསར་འགོད་རིག་པ། སྤྱི་ཚོགས་འབྲེལ་མཐུད་བཅས་ཀྱི་ཐོག་རིག་གནས་རབ་འབྱམས་པའི་ལག་ཁྱེར་ཐོབ། ༢༠༢༠ ལོར་མེ་སོར་མཐོ་རིམ་སློབ་གཉེར་ཁང་ནས་གཙུག་ལག་རབ་འབྱམས་པའི་སློབ་མཐར་ཕྱིན་ཡོད་ཀྱང་། ནད་ཡམས་རྐྱེན་གྱིས་ཁ་སང་བར་དུ་གཟེངས་རྟགས་འབུལ་བའི་མཛད་སྒོ་ཚོགས་ཐུབ་མེད་འདུག

བསྟན་འཛིན་ཚེ་དབྱངས་ལགས་ནི་སྦེལ་ཀོབ་ལུགས་བསམ་གཞིས་ཆགས་སུ་སྐྱེས་འཚར་བྱུང་ཞིང་། ཕྱི་ལོ་ ༢༠༡༤ ལོར་དགའ་ལྡན་ཕོ་བྲང་གི་བྱ་དགའ་ཐོབ་ཡོད་པ་དང་།  ཕྱི་ལོ་ ༢༠༡༤ ནས་  ༢༠༡༨ བར་བྷུམ་ཏར་དགེ་འོས་སློབ་གཉེར་ཁང་དུ་སློབ་སྦྱོང་བྱས་ཏེ། དགེ་འོས་རབ་འབྱམས་པའི་ལག་ཁྱེར་ཐོབ། ཕྱི་ལོ་ ༢༠༡༨ ནས་ ༢༠༢༠   བར་མེ་སོར་མཐོ་རིམ་སློབ་གཉེར་ཁང་དུ་ལོ་རྒྱུས་ཐོག་སློབ་གཉེར་བྱས་ནས་གཙུག་ལག་རབ་འབྱམས་པ་ཐོན་ཡོད་འདུག

དཔལ་ལྡན།