སྲིད་སྐྱོང་སྤེན་པ་ཚེ་རིང་མཆོག་གིས་ལྡི་ལིའི་གནད་ཡོད་མི་སྣར་མཇལ་འཕྲད་གནང་།

སྲིད་སྐྱོང་མཆོག་གིས་རྒྱ་གར་དབུས་གཞུང་ནས་རྩིས་སྤྲོད་གཏན་འཁེལ་བའི་བོད་སློབ་ལྷག་མ་དྲུག་གི་གནས་སྟངས་ལ་རྟོག་ཞིབ་བྱས་ཏེ་རྒྱལ་ས་ལྡི་ལིར་འབྱོར་ཡོད་པ་རེད།

Sikyong Penpa Tsering of CTA pays a courtesy call on Honourable Minister of Law and Justice, Shri Kiren Rijiju. Photo (Tibet.netFB)

ཟླ་འདིའི་ཕྱི་ཚེས་ ༦ ནས་ ༡༤ བར་ཉིན་གྲངས་ ༨ རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུས་བོད་སློབ་འཛིན་ཚོགས་ཀྱི་ཁྱབ་ཁོངས་སིམ་ལ་དང་། ཧར་སྤུར། མ་སུ་རི། རྡོར་གླིང་། ཀ་སྦུག་བཅས་ཀྱི་གཏན་སློབ་དང་། དེ་བཞིན་བོན་གཞིས་ཌོ་ལན་ཇི་དང་ལྡི་ལི་བཅས་སུ་གཞུང་འབྲེལ་ཕྱོགས་ཕེབས་གནང་མུས་ཡིན་པ་ལྟར། དེ་རིང་ཕྱི་ཚེས་ ༡༣ ཉིན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལིར་འབྱོར་ཏེ། སྲིད་སྐྱོང་མཆོག་དང་ལྡི་ལི་དོན་གཅོད་སྐུ་ངོ་འབྲོང་ཆུང་དངོས་གྲུབ་ལགས་གཉིས་ནས་རྒྱ་གར་དབུས་ཁྲིམས་ཆེན་སྐུ་ཞབས་ཀི་རེན་རི་ཇི་ཇུ་ (Shri Kiren Rijiju Ji) མཆོག་དང་ཐུག་འཕྲད་གནང་ཡོད་པ་རེད།

ད་རེས་སྲིད་སྐྱོང་མཆོག་གི་ཉིན་གྲངས་ ༨ རིང་གི་མཛད་འཆར་གྱི་ཐོག་མར། ཕྱི་ཚེས་ ༦ དང་ ༧ བཅས་ཉིན་གཉིས་རིང་སིམ་ལ་ཁུལ་དུ་ཕྱོགས་ཕེབས་གནང་སྟེ། སིམ་ལ་སྦྱི་ཁྱབ་ཀྱི་ཁོངས་གཏོགས་ས་གནས་མང་ཚོགས་དང་དམིགས་བསལ་སིམ་ལ་གཏན་སློབ་ཀྱི་དགེ་ལས་ཡོངས་དང་ཐུག་འཕྲད་ཀྱིས། གཏན་སློབ་ཀྱི་གནས་སྟངས་རྒྱུས་ལོན་དང་འབྲེལ་བའི་གསུང་བཤད་གནང་ཡོད་ཅིང་། བོན་གཞིས་ཌོ་ལན་ཇིར་འཚམས་གཟིགས་སུ་ཕེབས་ཏེ། ཌོ་ལན་ཇི་སམ་བྷོ་ཊ་སློབ་གྲྭ་དང་དབུས་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དང་དགོན་པའི་རིན་པོ་ཆེ་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་བཞི་པ་རིན་པོ་ཆེ་མཆོག་སོགས་ལ་མཇལ་འཕྲད་ཀྱིས་གསུང་བཤད་གནང་ཡོད་ལ། བོན་གཞིས་ཌོ་ལན་ཇི་ས་གནས་མགོ་འཛིན་ལས་ཁུངས་ཀྱིས་གཙོས་སམ་བྷོ་ཊའི་དགེ་ལས་སློབ་ཕྲུག་དང་མི་མང་ཡོངས་ནས་དཔལ་ལྡན་སྲིད་སྐྱོང་མཆོག་ཐེངས་དང་པོར་བོན་གཞིས་སུ་ཕེབས་པར་དགའ་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།

ཕྱི་ཚེས་ ༨ ཉིན་སྲིད་སྐྱོང་མཆོག་གི་དབུས་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་རྣམ་གཉིས་ལྡེ་རུ་རྡུན་ཁུལ་དུ་ཕྱོགས་ཕེབས་ཀྱིས། རྒྱ་གར་དབུས་གཞུང་ནས་རྩིས་སྤྲོད་གནང་གཏན་འཁེལ་བའི་ཧར་སྤུར་གཏན་སློབ་ཀྱི་དགེ་ལས་སློབ་ཕྲུག་ཡོངས་དང་ཐུག་འཕྲད་ཀྱིས། རྒྱ་གར་དབུས་གཞུང་ནས་ཧར་སྤུར་གཏན་སློབ་དེ་སཾ་བྷོ་ཊ་བོད་སློབ་ཚོགས་པར་རྩིས་སྤྲོད་རྩིས་གནང་གཏན་འཁེལ་ཡོད་པའི་སྐོར་ནས་གསུང་བཤད་གནང་ཡོད་ལ། སྐབས་དེར་སྲིད་སྐྱོང་མཆོག་གིས་དབུས་བོད་སློབ་འཛིན་ཚོགས་ཀྱི་ཁྱབ་ཁོངས་བཙན་བྱོལ་བོད་མིའི་སློབ་གྲྭ་ཁག་དྲུག་སྟེ། ཌལ་ཧོར་གཏན་སློབ་དང་། སིམ་ལ་གཏན་སློབ། ཧར་སྤུར་གཏན་སློབ། མ་སུ་རི་གཏན་སློབ། རྡོར་གླིང་གཏན་སློབ། ཀ་སྦུག་གཏན་སློབ་རྣམས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁྱབ་ཁོངས་སཾ་བྷོ་ཊ་བོད་སློབ་ཚོགས་པར་རྩིས་སྤྲོད་དང་འབྲེལ་བའི་སྐོར་ལྡི་ལིར་དབུས་བོད་སློབ་འཛིན་ཚོགས་ཀྱི་གནད་ཡོད་མི་སྣ་དང་། དེ་བཞིན་རྒྱ་གར་དབུས་གཞུང་གི་ཤེས་རིག་ཟུང་དྲུང་སོགས་དང་མཇལ་འཕྲད་གནང་རྒྱུ་ཡིན། ཞེས་གསུངས་ཡོད་པ་རེད།

གཞན་ཡང་ཕྱི་ཚེས་ ༨ ཉིན་སྲིད་སྐྱོང་མཆོག་མ་སུ་རི་བོད་ཁྱིམ་དང་ཕྱི་ཚེས་ ༩ ཉིན་སྔ་དྲོར་མ་སུ་རི་གཏན་སློབ་ཏུ་འཚམས་གཟིགས་གནང་སྟེ་གཏན་སློབ་ཀྱི་སློབ་སྤྱི་དང་རེག་ཊར་གྱིས་གཙོས་དགེ་ལས་ཡོངས་ལ་གསུང་བཤད་གནང་ཡོད་པ་དང་། ཕྱི་ཚེས་ ༡༠ དང་ ༡༡ བཅས་ཉིན་གཉིས་རིང་ཀ་སྦུག་དང་རྡོར་གླིང་དུ་ཕེབས་འབྱོར་གྱིས། ས་ཁུལ་གྱི་གཏན་སློབ་གཉིས་ཀྱི་གནས་སྟངས་རྒྱུས་དང་སྦྲགས། འབྲེལ་ཡོད་དགེ་ལས་ཚོར་ཐུག་འཕྲད་དང་གསུང་བཤད་གནང་ཡོད་པ་རེད།

ད་རེས་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ཀྱི་དགོས་འདུན་གཙོ་བོ་ནི་རྒྱ་གར་དབུས་བོད་སློབ་འཛིན་ཚོགས་ཀྱི་ཁོངས་ལྷག་སློབ་གྲྭ་དྲུག་བོད་མིའི་སྒྲིག་འཛུགས་ཀྱི་སམ་བྷོ་ཊ་བོད་སློབ་འཛིན་ཚོགས་ལ་རྩིས་སྤྲོད་གནང་གཏན་འཁེལ་བར། སློབ་གྲྭ་དེ་དག་གི་དགེ་ལས་སློབ་ཕྲུག་སོགས་རྒྱབ་ལྗོངས་ཀྱི་གནས་སྟངས་ཡོངས་ལ་རྟོག་ཞིབ་གནང་སླད་ཡིན་པ་ལྟར། དེ་རིང་སྲིད་སྐྱོང་མཆོག་རྒྱལ་ས་ལྡི་ལིར་འབྱོར་ཏེ། དེ་སྔ་ནས་བོད་སློབ་རྩིས་སྤྲོད་དང་འབྲེལ་བའི་རྒྱལ་ས་ལྡི་ལིའི་གནད་ཡོད་མི་སྣ་ཁག་དང་ཐུག་འཕྲད་རྒྱུ་ཡིན་གསུངས་པ་ལྟར་དངོས་སུ་ཐུག་འཕྲད་དབུ་འཛུགས་ཞུས་ཡོད་འདུག

གསར་འགོད་པ། སྐལ་བཟང་སྦྱིན་པ།