རྒྱ་ནག་གཞུང་གིས་མུ་མཐུད་དུ་རྫ་སྨད་དབོན་པོ་ཁུལ་དུ་དམ་དྲག་ཤུགས་ཆེན་བྱེད་མུས་ཡིན་པ་མ་ཟད་ཁུལ་དེའི་བོད་མི་ཚོ་སྐད་འཕྲིན་ཚོགས་པ་ཁག་ནས་ཕྱིར་འབུད་དགོས་པའི་བཙན་བཀའ་བཏང་ཡོད་འདུག
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་ ༡༤ ཉིན་རྒྱ་ནག་གཞུང་གིས་རྫ་སྨད་དབོན་པོ་ཁུལ་གྱི་བོད་མི་ཚོ་ཕ་སྐད་ཚོགས་པ་དང་། མཎི་དུང་སྒྲུབ་ཚོགས་པ་སོགས་སྐད་འཕྲིན་ཚོགས་པ་ཁག་གི་ནང་དུ་མཉམ་ཞུགས་བྱ་མི་ཆོག་པའི་སྲིད་ཇུས་ལག་བསྟར་བྱེད་བཞིན་ཡོད་པ་དང་། རྗེས་མ་སྲིད་གཞུང་གིས་ཞིབ་འཇུག་བྱེད་དུས་སྐད་འཕྲིན་ཚོགས་པའི་ཁོངས་སུ་ཁུལ་དེའི་བོད་མི་ཡོད་ཚེ་འཛིན་བཟུང་བཀག་ཉར་བྱ་རྒྱུ་དང་ཁ་པར་སོགས་བཙན་འཕྲོག་བྱ་རྒྱུ་ཡིན་པའི་ཉེན་བརྡ་བཏང་ཡོད་འདུག
ཡང་གནས་ཚུལ་མཁོ་སྤྲོད་པས། ཉེ་སྔོན་རྒྱ་ནག་གཞུང་གིས་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་བྱས་པ་དང་། ཕྱི་རྒྱལ་དུ་ཡོད་པའི་བོད་མི་རྣམས་ལ་འབྲེལ་འདྲིས་བྱས་པའི་ཉེས་མིང་འོག་འཛིན་བཟུང་བྱས་པའི་བོད་རིགས་བུད་མེད་སྐལ་སྒྲོན་ཞེས་པ་ལ་བཀག་ཉར་ཁང་དུ་ནད་གཞི་ལྕི་མོ་ཞིག་ཕོག་སྟེ་སེར་ཤུལ་རྫོང་གི་སྨན་ཁང་དུ་བསྟེན་གཏུགས་བྱས་ནས་དྲག་སྐྱེད་བྱུང་མེད་ཀྱང་། སྨན་ཁང་གཞན་དུ་བསྟེན་གཏུགས་བྱ་རྒྱུའི་ཆོག་མཆན་སྤྲད་མེད་འདུག དེ་བཞིན་རྫ་སྨད་དབོན་པོ་ནས་སྔ་གཞུག་ཏུ་འཛིན་བཟུང་བཀག་ཉར་བྱས་ཡོད་པ་རྣམས་ལ་ཉིན་ལྟར་འདྲི་རྩད་ཚ་ནན་བྱས་པ་དང་ཆབ་སྲིད་སློབ་གསོ་སྤྲོད་བཞིན་ཡོད་པ་མ་ཟད། ཉིན་རེའི་ཟ་མ་དང་གྱོན་ཆས་སོགས་ཡག་པོ་མ་སྤྲད་པར་མནར་གཅོད་གཏོང་བཞིན་ཡོད་སྐོར་བརྗོད་བྱུང་།
འདི་ལོའི་ཕྱི་ཟླ་ ༨ ཚེས་ ༢༥ ནས་ ༢༩ བར་དུ། རྒྱ་ནག་གཞུང་གིས་རྫ་དབོན་པོ་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་བོད་མི་རྣམས་ལ་འབྲེལ་འདྲིས་བྱས་པའི་ཉེས་མིང་འོག བསྐྱར་དུ་བོད་མི་ ༥༣ ཙམ་འཛིན་བཟུང་བཀག་ཉར་བྱས་ཡོད་པ་དང་། ཕྱི་ཟླ ༨ ཚེས་ ༢༢ ནས་བཟུང་སྔ་གཞུག་ཏུ་ཉེས་མིང་དེའི་འོག རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་སེར་ཤུལ་རྫོང་དུ་བཙན་འཁྲིད་བྱས་ཡོད་པ་ལྟར། དེ་རིང་བར་དུ་རྫ་སྨད་དབོན་པོ་སྡེ་དགོན་གཉིས་ནས་ཁྱོན་སྐྱ་སེར་གྲངས་ ༡༢༡ ཙམ་ཞིག་འཛིན་བཟུང་བཙན་འཁྲིད་བྱས་ཡོད་འདུག་ལ། རྒྱ་ནག་གཞུང་གིས་མུ་མཐུད་དུ་རྫ་དབོན་པོ་དགོན་སྡེ་གཉིས་སུ་དམ་དྲག་ཤུགས་ཆེན་བྱེད་མུས་ཡིན་འདུག
དཔལ་ལྡན།
