རྒྱ་ནག་གཞུང་ཚབ་པ་དབྱིན་ཡུལ་གྲོས་ཚོགས་གོང་འོག་ནང་འཛུལ་མི་ཆོག་པའི་ཐག་གཅོད་གནང་།

དབྱིན་ཡུལ་གྱི་གྲོས་ཚོགས་གོང་འོག་གཉིས་ཀྱི་ཚོགས་གཙོ་རྣམ་པ་གཉིས་ཀྱིས་དབུས་པའི་གྲོས་ཚོགས་འཐུས་མི་མང་པོས་རྒྱ་ནག་གཞུང་ནས་དཔལ་འབྱོར་ཉེས་ཆད་ཕྱིར་འཐེན་མ་བྱས་བར་དུ་དབྱིན་ཡུལ་གྱི་རྒྱ་ནག་གཞུང་ཚབ་པ་གྲོས་ཚོགས་ཁང་དུ་འཛུལ་མི་ཆོག་པའི་ཐག་གཅོད་གནང་འདུག

China’s ambassador to Britain Zheng Zeguang was barred from the country’s parliament in Westminster over Chinese sanctions on British lawmakers. Photo: AP

དེ་རིང་ཕྱི་ཚེས་ ༡༥ ཉིན། དབྱིན་ཡུལ་གྲོས་ཚོགས་ཀྱི་རྒྱ་ནག་ལས་དོན་ལྷན་ཚོགས་(All Party Group on China) ཀྱིས་གྲོས་ཚོགས་ཁང་གི་ཐོག་ཁང་དུ་གོ་སྒྲིག་བྱ་གཏན་འཁེལ་བའི་དབྱར་དུས་ཀྱི་འདུ་འཛོམས་སྟེང་། དབྱིན་ཡུལ་དུ་བཅའ་སྡོད་རྒྱ་ནག་གི་གཞུང་ཚབ་ཀྲིན་ཙེ་ཀང་ (Zheng Zeguang) ཟེར་བ་དེ་གཏམ་བཤད་བྱ་བར་མགྲོན་འབོད་གནང་ཡོད་པར་བརྟེན། དབྱིན་ཡུལ་གྱི་གྲོས་ཚོགས་གོང་འོག་གི་ཚོགས་གཙོ་གཉིས་ཀྱིས་གཙོས་གྲོས་ཚོགས་འཐུས་མི་མང་པོས་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། རྒྱ་ནག་གཞུང་གིས་དབྱིན་ཡུལ་གྱི་གྲོས་ཚོགས་འཐུས་མིའི་ཐོག་བཀལ་བའི་དཔལ་འབྱོར་ཉེས་ཆད་དག་ཕྱིར་འཐེན་མ་བྱས་བར་དུ། རྒྱ་ནག་གི་གཞུང་ཚབ་པ་གྲོས་ཚོགས་ཁང་ནང་འཛུལ་མི་ཆོག་པ་དང་། ད་ལན་གྱི་འདུ་འཛོམས་དེ་གྲོས་ཚོགས་ཀྱི་འཁོར་ཡུག་ནང་འཚོག་མི་ཆོག་པའི་བཀའ་བཏང་ཡོད་འདུག

དབྱིན་ཡུལ་གྱི་གསར་ཁང་གྲགས་ཅན་ཊེ་ལེ་གྷ་རབ་ (The Telegraph) ཀྱིས་དེ་འབྲེལ་གནས་ཚུལ་ཐོག་མར་སྤེལ་བའི་ནང་། དབྱིན་ཡུལ་གྱི་སྲིད་དོན་ཚོགས་པ་ཁྱད་མེད་ཀྱི་གྲོས་ཚོགས་འཐུས་མིས་རྒྱ་ནག་ལས་དོན་ཚོགས་ཆུང་གི་མགྲོན་འབོད་དེར་གྲོས་ཚོགས་འཐུས་མི་མི་ཉུང་བས་དགག་བྱ་ཤུགས་ཆེན་བྱས་པ་མ་ཟད། གྲོས་ཚོགས་ཀྱི་ཚོགས་གཙོ་རྣམ་གཉིས་ལ་ལས་རིམ་དེ་ཉིད་ཕྱིར་འཐེན་དགོས་པའི་རེ་སྐུལ་འཕྲིན་ཡིག་བསྐུར་ཡོད་པ་ལྟར། མཐའ་མཇུག་དེར་གྲོས་ཚོགས་གོང་འོག་གི་ཚོགས་གཙོ་རྣམ་གཉིས་ཀྱིས་མཉམ་འབྲེལ་ཐོག་ནས་རྒྱ་ནག་གི་གཞུང་ཚབ་པ་གྲོས་ཚོགས་ཁང་ནང་ཡོང་རྒྱུར་བཀག་སྡོམ་བྱ་རྒྱུའི་ཐག་གཅོད་བྱུང་ཡོད་ཅིང་། གྲོས་ཚོགས་འོག་མའི་ཚོགས་གཙོ་སྐུ་ཞབས་ལིན་ཛི་ཧོ་ཡལ་ (Lindsay Hoyle)ལགས་ཀྱིས་ཊེ་ལེ་གྷ་རབ་གསར་ཁང་ལ། ངས་དུས་རྒྱུན་འཛམ་གླིང་ས་ཕྱོགས་འདྲ་མིན་གྱི་གཞུང་ཚབ་དང་ཚོགས་འདུ་ཚོགས་ཏེ་རྒྱལ་ཁབ་དང་གྲོས་ཚོགས་ཕན་ཚུན་དབར་གྱི་ཕུགས་རྒྱང་རིང་པོའི་འབྲེལ་བ་འཛུགས་ཐབས་བྱེད་ཀྱི་ཡོད་ཀྱང་། རྒྱ་ནག་གིས་ང་ཚོའི་གྲོས་ཚོགས་འཐུས་མི་སྐོར་ཞིག་ལ་དཔལ་འབྱོར་ཉེས་ཆད་བཀལ་ཡོད་པའི་སྐབས་འདིར། ངས་རྒྱ་ནག་གི་གཞུང་ཚབ་ང་ཚོའི་གྲོས་ཚོགས་ཁང་དང་ང་ཚོའི་བྱ་བ་སྒྲུབ་སར་སླེབས་རྒྱུ་དེ་རན་འཚམ་ཞིག་ལ་མཐོང་གི་མི་འདུག ཅེས་དང་། གལ་ཏེ་རྒྱ་ནག་གཞུང་གིས་དཔལ་འབྱོར་ཉེས་ཆད་དེ་དག་རྩིས་མེད་བཏང་ཟིན་ན། རྒྱ་ནག་གཞུང་ཚབ་པ་གྲོས་ཚོགས་ཁང་ནང་སླེབས་རྒྱུར་དཀའ་ངལ་གང་ཡང་མེད། ངས་འདུ་འཛོམས་དེ་མི་ཆོག་ཟེར་གྱི་མེད། རྒྱ་ནག་གི་དཔལ་འབྱོར་ཉེས་ཆད་དེ་དག་ཕྱིར་འཐེན་མ་བྱེད་བར་དུ་འདུ་འཛོམས་དེ་གྲོས་ཚོགས་ཁང་ནང་འཚོག་མི་ཆོག་ཟེར་གྱི་ཡོད། ཅེས་བརྗོད་ཡོད་འདུག

Sir Lindsay Hoyle asked China to reconsider the sanctions against MPs and peers. Photo: PA MEDIA

གྲོས་ཚོགས་གོང་མའི་མགྲིན་ཚབ་པ་ཞིག་གིས། གྲོས་ཚོགས་ཀྱི་ཚོགས་གཙོ་རྣམ་གཉིས་ཀྱིས་འདུ་འཛོམས་དེ་གྲོས་ཚོགས་ནང་འཚོག་མི་ཆོག་པའི་ཐག་གཅོད་གནང་ཡོད་སྐོར་གསལ་བཤད་བྱས་ཡོད་འདུག་ལ། དབྱིན་ཡུལ་གྱི་ཕྱི་སྲིད་ལས་ཁུངས་ཀྱིས་ད་ཐེངས་ཀྱི་གནད་དོན་དེར་ཐག་གཅོད་ཅི་བྱེད་ཀྱི་དབང་ཚད་དེ་གྲོས་ཚོགས་ལ་ཡོད་པའི་གསལ་བཤད་བྱས་རྗེས་ཚོགས་གཙོ་རྣམ་གཉིས་ཀྱིས་ཐག་གཅོད་གནང་བ་ཞིག་ཡིན་འདུག ཚོགས་གཙོ་རྣམ་གཉིས་ཀྱི་ཐག་གཅོད་དེར་རྒྱ་ནག་གཞུང་ཚབ་ཁང་གིས། དབྱིན་ཡུལ་གྱི་གྲོས་ཚོགས་འཐུས་མི་རེ་ཟུང་གིས་སྒེར་གྱི་ཆབ་སྲིད་ཁེ་ཕན་ཆེད་དུ། རྒྱ་ནག་དང་དབྱིན་ཡུལ་དབར་གྱི་རྒྱུན་ལྡན་གྱི་འབྲེལ་ལམ་ལ་འགོག་རྐྱེན་བཟོ་བའི་སྡར་མའི་བྱ་སྤྱོད་ནོར་འཁྲུལ་ཅན་དེ་ནི། ཡུལ་གཉིས་ཀྱི་མི་མང་འདོད་པ་དང་འགལ་ཞིང་མང་ཚོགས་ཀྱི་ཁེ་ཕན་ལ་གནོན་གཞིར་གྱུར་ཡོད། ཅེས་བརྗོད་ཡོད་འདུག

འདི་ལོའི་ཕྱི་ཟླ་ ༣ པའི་ཚེས་ ༢༢ ནང་དབྱིན་ཡུལ་དང་། ཨ་རི། ཁེ་ན་ཌ། ཡུ་རོབ་མཐུན་ཚོགས་བཅས་ཀྱིས་མཉམ་འབྲེལ་ཐོག་ནས། རྒྱ་ནག་གཞུང་གིས་ཤར་ཊུར་ཀི་སི་ཐན་ (ཤིན་ཅང་) ཁུལ་གྱི་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་རྣམས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པའི་ངོས་འཛིན་འོག ཤར་ཊུར་ཀི་སི་ཐན་གྱི་ཆེས་མཐོའི་མགོ་འཁྲིད་བཞི་དང་ལས་ཁུངས་ཤིག་ལ་དཔལ་འབྱོར་གྱི་ཉེས་ཆད་བཅད་ཅིང་། ཉིན་ཤས་རྗེས་རྒྱ་ནག་གཞུང་གིས་དེར་ཡ་ལན་གྱི་ཚུལ་དུ་ནུབ་གླིང་གི་རྒྱལ་ཁབ་བཞིའི་གྲོས་ཚོགས་འཐུས་མི་དང་ཤེས་ཡོན་པ། ཞིབ་འཇུག་པ། འགྲོ་བ་མིའི་ཐོབ་ཐང་གི་ཚོགས་སྡེ་ཁག་ཅིག་ལ་དེར་མཚུངས་ཀྱི་དཔལ་འབྱོར་ཉེས་ཆད་བཅད་ཡོད་པ་རེད།

Iain Duncan Smith, Nusrat Ghani and Tom Tugendhat have been banned from entering China. Photo: GETTY IMAGES

རྒྱ་ནག་གཞུང་གིས་དབྱིན་ཡུལ་གྱི་གྲོས་ཚོགས་གོང་འོག་གི་འཐུས་མི་དང་ཤེས་ཡོན་པ་བཅས་མི་སྒེར་ ༩ ལ་དཔལ་འབྱོར་ཉེས་ཆད་བཅད་པ་ལྟར། ཁོང་རྣམས་རྒྱ་ནག་དང་། ཧོང་ཀོང་། ཨོ་མན་(Macau) བཅས་ནང་འཛུལ་ཆོག་གི་མེད་ཅིང་། ས་ཁུལ་དེ་དག་ནང་ཡོད་པའི་སྒེར་གྱི་མཁར་དབང་རྣམས་གཞུང་བཞེས་བྱས་ཡོད་པ་རེད། རྒྱ་ནག་གཞུང་གི་ཉེས་ཆད་ཕོག་པའི་མི་སྒེར་རྣམས་ནི། རྒྱ་ནག་ལ་ཁ་གཏད་ཀྱི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ (Inter-Parliamentray (Alliance of China) ཚོགས་མི་ཡིན་པའི་གྲོས་ཚོགས་འོག་མའི་འཐུས་མི་སྐུ་ཞབས་ཨི་ཡན་ཌན་ཁེན་སི་མི་ཐི་ (Iain Duncan Smith) དང་། ལྕམ་ན་སི་རཌ་གྷ་ནི་ (Nusrat Ghani)། སྐུ་ཞབས་ཊིམ་ལའོ་ཊན་ (Tim Loughton)། སྐུ་ལྕམ་བྷ་རོ་ནེ་སི་ཁེ་ནི་ཌི་ (Baroness Kennedy)། གྲོས་ཚོགས་གོང་མའི་འཐུས་མི་སྐུ་ཞབས་ཌེ་ཝིཌ་ཨལ་ཊོན་ (David Alton) བཅས་དང་། རྒྱ་ནག་ཞིབ་འཇུག་ཚོགས་པ་ (China Research Group) ཞེས་པ་གསར་འཛུགས་དང་སྣེ་ཁྲིད་གནང་མཁན་གྲོས་ཚོགས་འོག་མའི་འཐུས་མི་སྐུ་ཞབས་ཊོམ་ཊུ་གྷན་ཌ་ཏི་ (Tom Tugendhat) དང་སྐུ་ཞབས་ནིལ་ཨོ་བྷེ་རན་ (Neil O’Brien) རྣམ་གཉིས་བཅས་དང་། དེ་བཞིན་ཡུ་གུར་མང་ཚོགས་རྣམས་ཀྱི་གནས་སྟངས་ལ་ཞིབ་འཇུག་བྱེད་པའི་ཚོགས་པ་ Uighur Tribunal གྱི་ཚོགས་གཙོ་ཁྲིམས་རྩོད་པ་ཇོ་ཧྥེ་རི་ནའེ་སི་ (Geoffrey Nice QC) དང་། ཡུ་གུར་སྐོར་ལ་ཞིབ་འཇུག་བྱེད་མཁན་སྐུ་ཞབས་ཇོ་སི་མི་ཐི་ཧྥིན་ལེ་ (Jo Smith Finley) བཅས་ཡོད་པ་རེད།

བདུན་ཕྲག་སྔོན་མར་རྒྱ་ནག་གི་ཉེས་ཆད་ཕོག་པའི་གྲོས་ཚོགས་འོག་མའི་འཐུས་མི་ལྔ་ཐུན་མོང་གིས་གྲོས་ཚོགས་ཀྱི་ཚོགས་གཙོ་ལ་རྒྱ་ནག་གི་གཞུང་ཚབ་གྲོས་ཚོགས་ཁང་ནང་ཡོང་རྒྱུར་བློ་འཚབ་ཡོད་པའི་རེ་སྐུལ་འཕྲིན་ཡིག་ཅིག་བསྐུར་བའི་ནང་། རྒྱ་ནག་གཞུང་གིས་བཀལ་བའི་ཉེས་ཆད་དེ་ནི་འཐུས་མི་སྒེར་ལ་བཀལ་བ་ཞིག་མིན་པར། དབྱིན་ཡུལ་གྱི་གྲོས་ཚོགས་དང་། གྲོས་ཚོགས་འཐུས་མི་ཐམས་ཅད། གྲོས་ཚོགས་ཀྱི་ཆེ་མཐོང་བཅས་པར་བཀལ་བ་ཞིག་ཡིན་སྐོར་དང་། ད་ལན་གྱི་རྒྱ་ནག་གི་གཞུང་ཚབ་པ་གྲོས་ཚོགས་ཁང་དུ་གདན་དྲངས་ཏེ་རྒྱ་ནག་གི་ཉེས་ཆད་དེ་དག་ཡིན་ལུགས་ཚུལ་མཐུན་ཡིན་པ་ར་སྤྲོད་བྱ་རྒྱུ་མེད་པ་དང་། རྒྱ་ནག་གིས་གྲོས་ཚོགས་འཐུས་མི་རྣམས་ཀྱི་རང་དབང་ལ་ཚད་བཀག་བཟོ་བཞིན་པའི་སྐབས་འདིར། རྒྱ་ནག་གཞུང་གི་འཐུས་ཚབ་དེ་རང་དབང་གི་ཐོག་ནས་གྲོས་ཚོགས་ཁང་ནང་སླེབས་ཏེ། གྲོས་ཚོགས་ཀྱི་མཐུན་རྐྱེན་དག་རྒྱ་ནག་གཞུང་གི་དྲིལ་བསྒྲགས་ཀྱི་ལག་ཆར་བཀོལ་དུ་འཇུག་རྒྱུ་དེ་ནི་བསམ་མི་ཕོད་པ་ཞིག་ཡིན་སྐོར་བརྗོད་ཡོད་འདུག

དབྱིན་ཡུལ་གྱི་སྲིད་བློན་བྷོ་རི་སི་ཇོན་སོན་མཆོག་གིས་ཀྱང་། བརྙས་བཅོས་རིགས་ལ་ཁ་གཏད་ཀྱི་སྐྱོན་བརྗོད་བྱེད་པ་ནི་གཞི་རྩའི་སྨྲ་བརྗོད་རང་དབང་ཡིན་པས། ངོས་ཀྱིས་དེར་ནམ་ཡང་རྒྱབ་སྐྱོར་བྱ་རྒྱུ་ཡིན། ཞེས་བརྗོད་འདུག་ལ། གྲོས་ཚོགས་འཐུས་མི་སྐུ་ཞབས་ཨི་ལན་ལགས་ཀྱིས་ཚོགས་གཙོ་རྣམས་གཉིས་ཀྱི་ཐག་གཅོད་ལ་ཐུགས་རྗེ་ཆེ་ཞུས་པ་དང་སྦྲགས། འདུ་འཛོམས་དེ་ཉིད་ཐོག་མ་ཉིད་ནས་འཛམ་གླིང་གི་གྲོས་ཚོགས་ཀྱི་ཕྱིས་མོར་གྲགས་པའི་དབྱིན་ཡུལ་གྱི་གྲོས་ཚོགས་ཁང་ནང་འཚོག་རྒྱུའི་འཆར་གཞི་འཐེན་མི་ཉན་སྐོར་དང་། ཡང་དུས་རྒྱུན་བོད་དོན་ལ་རྒྱབ་སྐྱོར་ཤུགས་ཆེར་གནང་མཁན་སྐུ་ཞབས་ཊིམ་ལའོ་ཊན་ལགས་ཀྱིས་རང་གི་ཊི་ཝི་ཊར་དྲ་ལམ་སྟེང་། གལ་ཏེ་མི་རིགས་རྩ་མེད་གཏོང་མཁན་གྱི་རྒྱ་ནང་གཞུང་གིས་དམངས་གཙོའི་རྒྱལ་ཁབ་ཅིག་གི་གྲོས་ཚོགས་འཐུས་མི་རྣམས་ཀྱི་སྨྲ་བརྗོད་རང་དབང་འགོག་ཐུབ་ཀྱི་ཡོད་སྙམ་པ་ཡིན་ན་དེར་མཇུག་འབྲས་ཡོད་ངེས་རེད། ད་ལྟ་བུར་མཚོན་ན་མཇུག་འབྲས་ནི་རྒྱ་ནག་གཞུང་ལ་འཛམ་གླིང་གི་གྲོས་ཚོགས་ཀྱི་ཨ་མར་འབོད་པའི་དབྱིན་ཇིའི་གྲོས་ཚོགས་ནང་སྡིངས་ཆ་མི་སྤྲོད་རྒྱུ་དེ་རེད། ཅེས་གསུངས་ཡོད་འདུག

འདི་ལོའི་ཕྱི་ཟླ་ ༣ པའི་ནང་དབྱིན་ཇིའི་གཞུང་གིས་ཨ་རི་སོགས་དང་མཉམ་འབྲེལ་བྱས་ཏེ་རྒྱ་ནག་ལ་དཔལ་འབྱོར་གྱི་ཉེས་ཆད་བཀལ་བ་དེ་ནི། ཕྱི་ལོ་ ༡༩༨༩ ལོར་རྒྱ་ནག་གཞུང་གིས་པེ་ཅིན་གྱི་གནམ་བདེ་སྒོ་མོ་ཆེའི་མདུན་ཐང་དུ་དམངས་གཙོ་དོན་གཉེར་བའི་གཞོན་སྐྱེས་སྟོང་ཕྲག་མང་པོ་གམར་གསོད་བཏང་བའི་དོན་རྐྱེན་དེར་ཡལ་ན་གྱི་ཚུལ་དུ། དབྱིན་གཞུང་གིས་རྒྱ་ནག་ཐོག་དཔལ་འབྱོར་ཉེས་ཆད་བཀལ་བའི་རྗེས་ཀྱི་ཐོག་མ་དེ་ཆགས་ཀྱི་ཡོད་ཅིང་། འདས་པའི་ལོ་ཤས་ནང་དབྱིན་ཡུལ་དང་། ཡུ་རོབ་མཐུན་ཚོགས། ཁེ་ན་ཌ། ཨ་རི་བཅས་ནུབ་གླིང་རྒྱལ་ཁབ་དང་། ཨོ་གླིང་གིས་མཚོན་པའི་འཛམ་གླིང་དམངས་གཙོའི་སྟོབས་ཆེན་རྒྱལ་ཁབ་ཁྲོད་དུ། དངུལ་ཤུགས་གཉིས་ཀྱི་ཐོག་ནས་རྒྱ་ནག་གཞུང་ལ་མི་འདོད་པའི་རྣམ་པ་ཤུགས་ཆེར་ཐོན་བཞིན་པ་ལྟར། འདི་ལོར་རྒྱ་ནག་གི་མགོ་འཁྲིད་ཚོར་དཔལ་འབྱོར་ཉེས་ཆད་བཅད་པའི་ཐོག ད་དུང་དབྱིན་ཡུལ་དང་། ཨ་རི། ཁེ་ན་ཌ། ནེ་ཐར་ལེན་ཌི (Netherlands)། ལི་ཐུ་ནི་ཡ (Lithuania) བཅས་ཀྱི་གྲོས་ཚོགས་ཀྱིས་རྒྱ་ནག་གིས་ཤར་ཊུར་ཀི་སི་ཐན་ཁུལ་དུ་མི་རིགས་རྩ་མེད་ཀྱི་སྲིད་ཇུས་སྤེལ་བཞིན་ཡོད་པའི་ངོས་འཛིན་བྱས་ཡོད་པ་རེད།