ཆབ་སྲིད་བཙོན་ཟུར་དང་ན་གཞོན་སྙན་ངག་པ་རྭ་ཚེ་རིང་དོན་གྲུབ་ལགས་སི་ཁྲོན་ཁྲིན་ཏུའུ་གྲོང་ཁྱེར་གྱི་སྨན་ཁང་ཞིག་ཏུ་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པར་ཤེལ་དགེ་འདུན་ཚེ་རིང་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། མདང་དགོང་སི་ཁྲོན་ཁྲིན་ཏུའུ་གྲོང་ཁྱེར་གྱི་སྨན་ཁང་ཞིག་ཏུ་སྨྱུག་མིང་ལ་ཤིང་ལོ་དམར་པོ་ཞེས་པའི་ན་གཞོན་སྙན་ངག་པ་རྭ་ཚེ་རིང་བཀྲིས་དོན་གྲུབ་ལགས་མཆིན་པའི་ནད་གཞི་ཡི་རྐྱེན་པས་འདས་གྲོངས་སུ་ཕྱིན་ཡོད་པ་རེད་འདུག རྭ་ཚེ་རིང་དོན་གྲུབ་ལགས་ལ་ལོ་ཤས་གོང་ནས་བཟུང་མཆིན་ནད་ཀྱིས་མནར་ཏེ་ཉེ་སྔོན་བདུན་ཕྲག་གཉིས་ཀྱི་གོང་དུ་ཁྲིན་ཏུའུ་གྲོང་ཁྱེར་གྱི་སྨན་ཁང་དེར་ཕྱིན་ཡོད་ཀྱང་། གཤག་བཅོས་ལམ་ལྷོངས་མ་བྱུང་བར་འདས་གྲོངས་སུ་ཕྱིན་ཡོད་འདུག
ཡང་གནས་ཚུལ་མཁོ་སྤྲོད་པས། རཱ་ཚེ་རིང་དོན་གྲུབ་ལགས་ཀྱིས་གསོན་མིག་དུས་དེབ་ཀྱི་རྩོམ་སྒྲིག་པ་དང་དེ་དཔར་སྐྲུན་བྱས་པའི་ཉེས་མིང་འོག ཕྱི་ལོ་ ༢༠༡༠ ཟླ་ ༢ པའི་ནང་རྒྱ་ནག་གཞུང་གིས་ཁོང་འབར་ཁམས་ནས་འཛིན་བཟུང་བྱས་ཏེ་མེན་ཡཱང་བཙོན་ཁང་དུ་ལོ་གསུམ་རིང་བཙོན་འཇུག་བྱས། ཕྱི་ལོ་ ༢༠༡༣ ལོར་བཙོན་གྲོལ་ཐོབ་ཡོད་ཀྱང་། རྒྱ་གཞུང་གིས་བོད་ཀྱི་ཆབ་སྲིད་བཙོན་པ་རྣམས་ལ་བཙོན་འོག་ནས་མནར་གཅོད་ཚད་མེད་གཏོང་མུས་ཡིན་པ་ལྟར། ཁོང་གི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ནས་མཆིན་པའི་ནད་གཞི་ལྕི་མོ་ཞིག་ཕོག་ཡོད་པའི་ཁར། ཉེན་རྟོག་པས་ཁོང་གི་ཉིན་རེའི་འགྲོ་འདུག་སོགས་ལ་ལྟ་རྟོག་དང་ཉུལ་ཞིབ་ནན་མོ་བྱེད་ཀྱི་ཡོད་སྐོར་བརྗོད་བྱུང་།
གྲྭ་རྭ་ཚེ་རིང་དོན་གྲུབ་བམ་ཤིང་ལོ་དམར་པོ་ལགས་ནི་ད་ལྟ་དགུང་ལོ་ ༣༤ ཡིན་ཞིང་། རྔ་བ་ཁུལ་ཁྱུང་མཆུ་རྫོང་གསེར་དེའུ་རོང་ཐ་དགོན་པའི་གྲྭ་པ་ཡིན་འདུག ཁོང་གིས་དེ་སྔོན་རྔུལ་ཁྲག་ཅེས་པའི་སྒེར་དེབ་ཅིག་བཏོན་ཡོད་འདུག་ལ། དུས་རྒྱུན་རྩོམ་འབྲིའི་ལས་ལ་གཞོལ་བའི་ན་གཞོན་ཞིག་ཡིན་འདུག
དཔལ་ལྡན།
