རྒྱ་ནག་གཞུང་གིས་འགྲོ་གྲོན་ཕོན་ཆེན་བཏང་སྟེ་ལན་ཀྲོའུ་གྲོང་ཁྱེར་ནས་གཙོས་བར་ལྕགས་ལམ་འཛུགས་སྐྲུན་གྱིས། སི་ཁྲོན་དང་དབུས་ཀྱི་ས་མཚམས་དང་ཐག་ཉེ་བའི་ཉིང་ཁྲིའི་ལྕགས་ལམ་བར་མཐུད་ཀྱི་ཡོད་འདུག
རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། རྒྱ་ནག་གཞུང་གིས་བོད་ལ་བཙན་འཛུལ་བྱས་པ་དང་འབྲེལ་ནས། བོད་ཡུལ་རྒྱ་སྒྱུར་གྱི་བྱུས་ངན་སྣ་ཚོགས་འཐེན་པ་བརྒྱུད། བོད་དེ་མི་སེར་སྤེལ་ཡུལ་གྱི་ལྟེ་བར་བཟུང་སྟེ། བོད་ནང་གནམ་ཐང་དང་མེ་འཁོར་ལྕགས་ལམ། རྐང་ལམ་སོགས་འཛུགས་སྐྲུན་གྱི་ལས་གཞི་རྒྱ་ཆེ་སྤེལ་མུས་ཡིན་པ་ལྟར། ད་ལོ་ནས་རྩིས་པའི་འབྱུང་འགྱུར་ ༦ རིང་ལོ་རྒྱུས་ནང་བོད་ཀྱིས་དབང་སྒྱུར་མྱོང་བའི་ལན་ཀྲོའུ་གྲོང་ཁྱེར་ནས་ཀན་སུའུ་ཞིང་ཆེན་ཀན་ལྷོ་ཁུལ་གྱི་གཙོས་གྲོང་ཁྱེར་བར་མི་འཁོར་ལྕགས་ལམ་བསྐྲུན་གཏན་ཁེལ་ཡོད་འདུག
ལན་ཀྲོའུ་ནས་གཙོས་བར་གྱི་མེ་འཁོར་ལྕགས་ལམ་དེ། ཐང་དཀར་ནང་དང་ཀ་ཆུ། ལོའུ་ཇཱ་འགག་ཁུལ་སོགས་གྲོང་ཁྱེར་ ༥ ཡི་མཚམས་སུ་འབབ་ཚུགས་རེ་དང་རིང་ཚད་ལ་ཀེ་ལོ་མེ་ཊར་ ༡༢༧།༤༢ ཙམ་ཡོད་པ་དང་། འགྲོ་གྲོན་རྒྱ་སྒོར་དུང་ཕྱུར་ ༡༢༧།༩ གཏོང་གི་ཡོད་པ་མ་ཟད། ད་ལན་ལན་ཀྲོའུ་ནས་གཙོས་གྲོང་ཁྱེར་བར་ལྕགས་ལམ་བསྐྲུན་པ་བརྒྱུད། གཙོས་ནས་སི་ཁྲོན་གྱི་ལྕགས་ལམ་གཙོས་པའི་རྒྱ་ནག་གིས་བསྐྲུན་པའི་མི་འཁོར་ལྕགས་ལམ་བཞི་ལྷག་མཐུད་ཀྱི་ཡོད་འདུག
ད་རེས་ལན་ཀྲོའུ་ནས་གཙོས་བར་ལྕགས་ལམ་འཛུགས་སྐྲུན་གྱི་ལས་གཞི་དེ་ནི། རྒྱ་ནག་གིས་ཟེར་བཞིན་པའི་ཀན་སུའུ་ཞིང་ཆེན་འཕེལ་སྒྱུར་ལས་ཁུངས་ཀྱི་འགན་ཁུར་འོག རྒྱ་ནག་གི་ལྕགས་ལམ་ཚོགས་པ་དང་མཉམ་འབྲེལ་གྱིས་སྒྲུབ་བཞིན་པ་ཞིག་ཡིན་པ་མ་ཟད། ད་ལྟའི་ཆར་ལས་མགོ་རྩོམ་པར་ཆོག་མཆན་ཐོབ་ནས་རྨང་གཞིའི་གལ་ཆེན་བཏིང་ཡོད་སྐོར་བསྒྲགས་འདུག
གཙོས་གྲོང་ཁྱེར་ནི་བསང་ཆུ་ཕྱོགས་ཀྱི་གྲོང་ཁྱེར་ཆེ་ཤོས་ཀྱི་གྲས་ཡིན་པ་དང་། གྲོང་ཁྱེར་གྱི་གཡས་གཡོན་གང་སར་བོད་པའི་ཞིང་གྲོང་གཉིས་ཀྱི་ཁེངས་ཡོད་པ་མ་ཟད། གྲོང་ཁྱེར་གྱི་ཉེ་འཁྲིས་སུ་གསེར་ཁང་དགུ་ཐོགས་ཀྱི་གཙོས་བླ་བྲང་བཀྲ་ཤིས་འཁྱིལ་དང་། འབོ་ར་ཨ་མཆོག་དང་རྒྱལ་མོ་དགོན་སོགས་བོད་ཀྱི་ཞིང་དགོན་མང་པོར་ཐག་ཉེ་བ་ཡོད་པས། མ་འོངས་པར་གཙོད་དང་དེའི་འཁྲིས་ཀྱི་བོད་ཀྱི་དགོན་སྡེ་ཁག་དང་བོད་མི་རྣམས་ལ་རྒྱ་ནག་གི་ཤན་ཤུགས་ཐེབས་ཐབས་ཀྱི་སྲིད་ཇུས་ཤིག་ཀྱང་ཡིན་མི་སྲིད་པ་ཞིག་རེད་མི་འདུག
འདས་ལོའི་ཕྱི་ཟླ་ ༡༡ པའི་ནང་རྒྱ་ནག་གཞུང་གིས་སི་ཁྲོན་གཡག་རྔ་ནས་ཉིང་ཁྲིའི་བར་ཁྲོན་བོད་ལྕགས་ལམ་ཟེར་བ་འཛུགས་སྐྲུན་བྱེད་མགོ་བརྩམས་ཏེ། འདི་ལོའི་ཕྱི་ཟླ་ ༦ ཚེས་ ༢༦ ཉིན་དངོས་སུ་ཤར་གཏོང་བྱས་ཡོད་པ་དང་། ད་ཐེངས་ལན་ཀྲོའུ་ནས་གཙོས་བར་གྱི་ལྕགས་ལམ་དེ་ཁྲོན་བོད་ལྕགས་ལམ་ལ་མཐུད་ཀྱི་ཡོད་སྟབས། བོད་ཀྱི་ཤར་ཕྱོགས་བསང་ཆུ་ནས་དབུས་ཀྱི་ས་མཚམས་སུ་ཉེ་བའི་ཉིང་ཁྲིའི་བར་མེ་འཁོར་ལྕགས་ལམ་མཐུད་ཀྱི་ཡོད་པའི་གནས་སྟངས་ཤིག་ཆགས་ཀྱི་ཡོད་འདུག
གསར་འགོད་པ། སྐལ་བཟང་སྦྱིན་པ།
བོད་ཀྱི་དུས་བབ་ཟེར་བ་འདི་ནིདར་ནག་ཚོགས་པའ་དང་རྒྱ་གཞུང་མཉམ་འབྲེལ་གྱིས་གཙོ་སྐྱོང་བྱེད་གཞིན་པའི་གཞོག་ཕྱེད་cancelགྱིས་ན་ཚ་ཕོག་པའི་གསར་ཁང་བརྫུན་མ་ཁག་གི་ནང་ནས་གཅིག་རེད་བ་་་་་་ཡིས་ཆེས་བྱེད་ས་ཞིག་ག་བ་ཡོད།
རྒྱུས་ལོན་དར་ཙམ་མེད་པར་བྲིས་པའི་གསར་འགྱུར་རིགས་ནི་ཀློག་མཁན་རྒྱུས་མངའ་མེད་པ་ཞིག་ལ་གོ་ལོག་སྤྲད་པའོ།།