༧གོང་ས་མཆོག་གི་བྱམས་སྙིང་རྗེའི་བཀའ་སློབ་ཁག་བརྗོད་སྙིང་དུ་གྱུར་བའི་བགྲོ་གླེང་ཞིག་འཚོག་འཆར་འདུག

འཛམ་གླིང་ནང་སྙན་གྲགས་ཆེ་བའི་རྩོམ་པ་པོ་དང་ཚན་རིག་པ། ཆོས་ལུགས་ཀྱི་དབུ་ཁྲིད་སོགས་གནད་ཡོད་མི་སྣ་གང་མང་མཉམ་ཞུགས་ཀྱིས་༧གོང་ས་མཆོག་བྱམས་སྙིང་རྗེའི་བཀའ་སློབ་ཁག་བརྗོད་སྙིང་དུ་གྱུར་བའི་གོ་ལ་རང་བཞིན་གྱི་བགྲོ་གླེང་འཚོག་འཆར་འདུག

ཁེ་ན་ཌར་རྟེན་གཞི་བྱས་པའི་སེངྒེའི་གད་རྒྱངས་(Lion’s Roar) ཞེས་པའི་ཐེབས་རྩ་ཚོགས་པ་དང་ཨ་རིའི་བོད་ཁང་གཉིས་ཀྱིས་མཉམ་སྦྲེལ་ཐོག ཕྱི་ཟླ་ ༡༠ ཚེས་ ༡༤ ནས་ཉིན་ལྔའི་རིང་༧གོང་ས་མཆོག་གི་གོ་ལའི་དགོངས་བཞེད་ (2nd Annual Dalai Lama Global Vision Summit) ཞེས་པའི་ལོ་འཁོར་ཚོགས་འདུ་ཐེངས་གཉིས་པ་འཚོགས་འཆར་ཡོད་པ་དང་བགྲོ་གླེང་གི་བརྗོད་གཞི་ནི་༧གོང་ས་མཆོག་ནས་སྩལ་བའི་བྱམས་སྙིང་རྗེའི་བཀའ་སློབ་ཁག་དང་དེའི་འཛམ་གླིང་ནང་ཕན་ཐོགས་ཅི་ཙམ་ཡོང་གི་ཡོད་པ་སོགས་ཀྱི་སྐོར་རེད་འདུག

འདི་ལོའི་བགྲོ་གླེང་སྟེང་ཨ་མེ་རི་ཁའི་ནང་པའི་རྩོམ་པ་པོ་དང་ཁའོ་ལིམ་བྷེ་ཡ་གཙུག་ལག་སློབ་གྲྭ་ཆེན་མོའི་རྗེ་ཙོང་ཁ་པའི་སློབ་དཔོན་རོ་བྷར་ཊི་ཐཱར་མན་(Robert Thurman) ལགས་དང་སྐུའི་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས། དེ་བཞིན་ནེའུ་ཡོག་དུས་བབ་ཀྱི་དཔེ་དེབ་བྲིན་ཤོས་ཀྱི་རྩོམ་པ་པོ་དང་ནུབ་ཕྱོགས་སུ་སྒོམ་སྒྲུབ་ཉམས་ལེན་གྱི་དགེ་རྒན་ཤཱ་རོན་ (Sharon Salzberg)། ཨ་རིའི་བརྩམས་སྒྲུང་མཁན་ཨན་ནེ་ལཱ་མོ་ཊི་ (Anne Lamott)བཅས་ཀྱི་གཙོས་སེམས་ཁམས་ཀྱི་སློབ་དཔོན་དང་ཚན་རིག་པ། ལས་འགུལ་བ། ད་དུང་ཆོས་ལུགས་ཀྱི་དབུ་ཁྲིད་སོགས་རྒྱལ་སྤྱིའི་ཐོག་སྙན་གྲགས་ཆེ་བའི་མི་སྣ་ ༢༠ ལྷག་གིས་མཉམ་ཞུགས་གནང་སྟེ། ༧གོང་ས་མཆོག་གིས་བྱམས་སྙིང་རྗེའི་ཐོག་བཀའ་སློབ་གནང་བ་དང་། དེས་མི་སྒེར་གྱི་མི་ཚེའི་འཕྲོད་བསྟེན་ནས་གོ་ལའི་བདེ་ཐང་ལ་ཕན་ཐོགས་གང་འདྲ་བྱུང་གི་ཡོད་པ་སོགས་ཀྱི་སྐོར་ལ་བགྲོ་གླེང་དང་བསམ་ཚུལ་བརྗེ་ལེན་གནང་འཆར་འདུག  དེ་བཞིན་བགྲོ་གླེང་འདིར་མི་ཚང་མས་རིན་མེད་ཐོག་མཉམ་ཞུགས་བྱེད་ཆོག་གི་ཡོད་པ་སོགས་གོ་ལ་རང་བཞིན་གྱི་བགྲོ་གླེང་ཞིག་ཆགས་ཀྱི་ཡོད་འདུག

བགྲོ་གླེང་འདི་༧གོང་ས་མཆོག་གིས་ཐུགས་སྨོན་དང་བཀའ་འཁྲོལ་ཡོད་པའི་ཐོག་ནས་དབུ་འཛུགས་ཞུས་པ་ཞིག་ཡིན་ཞིང་། ད་ལན་བགྲོ་གླེང་གི་བརྗོད་གཞི་གཙོ་བོ་ཁག་ནི་སྙིང་རྗེའི་འགྱུར་ལྡོག་གི་སྟོབས་ཤུགས་ (The Transformative Power of Compassion) དང་སྙིང་རྗེའི་ཚན་རིག་ (The Science of Compassion)། ཉིན་རེའི་འཚོ་བའི་ཁྲོད་ཀྱི་སྙིང་རྗེ་ (Compassion in Our Daily Lives)། སྙིང་རྗེ་ལྡན་པའི་སྤྱི་ཚོགས།  (The Compassionate Society)། སའི་གོ་ལར་སྙིང་རྗེ་སྐྱེད་པ་(Compassion for the Earth) བཅས་ཀྱི་བརྗོད་གཞི་ལྔའི་ཐོག་བགྲོ་གླེང་གནང་འཆར་ཡོད་འདུག

༧གོང་ས་མཆོག་གི་གོ་ལའི་དགོངས་བཞེད་ཞེས་པའི་བགྲོ་གླེང་དེ། འདས་ལོའི་ཕྱི་ཟླ་ ༡༠ ཚེས་ ༢༢ ནས་ཉིན་དྲུག་གི་རིང་སེངྒེའི་གད་རྒྱངས་ཐེབས་རྩ་ཚོགས་པ་དང་ཨ་རིའི་བོད་ཁང་གཉིས་མཉམ་སྦྲེལ་གྱིས་གོ་སྒྲིག་འོག ནང་ཆོས་དང་སེམས་ཁམས་ཀྱི་སློབ་དཔོན།  སྙན་གྲགས་ཆེ་བའི་རྩོམ་པ་པོ་དང་སློབ་གཉེར་བ་སོགས་མི་གྲངས་ཁྲི་དགུ་ལྷག་གི་མཉམ་ཞུགས་འོག་བརྗོད་གཞི་དྲུག་གི་ཐོག་བགྲོ་གླེང་ཐོག་དང་པོ་གནང་ཡོད་འདུག

གཞན་ཡང་། རྒྱལ་བ་རིན་པོ་ཆེའི་དྲ་ཐོག་གི་མཛད་འཆར་ལྟར་ན། ཕྱི་ཟླ་ ༡༠ ཚེས་ ༩ ནས་ཉིན་གཉིས་རིང་༧གོང་ས་མཆོག་གིས་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་རྗེ་ཙོང་ཁ་པ་ཆེན་པོས་མཛ་པའི་རྟེན་འབྲེལ་བསྟོད་པའི་གསུང་ཆོས་དང་དྲི་བར་བཀའ་ལན་སྩལ་རྒྱུ་ཡིན་པ་དང་། དེ་བཞིན་ཕྱི་ཟླ་ ༡༠ ཚེས་ ༢༦ ཉིན་༧གོང་ས་མཆོག་གིས་རྦོལ་ཌར་ས་གནས་ཀྱི་ཀོ་ལོ་ར་ཌོོ་གཙུག་ལག་སློབ་ཆེན་གྱི་རི་ནི་ཁི་རའོན་བདེ་གནས་སློབ་གྲྭ་ (The Renee Crown Wellness Institute at the University of Colorado Boulder) དང་། སེན་ཌི་འེ་གོའི་ཁ་ལི་ཕོ་ཉའི་གཙུག་ལག་སློབ་ཆེན་གྱི་བྱམས་བརྩེའི་སློབ་ཁང་ (The Compassion Institute at the University of California San Diego) གཉིས་ནས་ཇི་ལྟར་གསོལ་བ་བཏབ་པ་ལྟར་དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་བྱམས་བརྩེའི་སྐོར་ལ་བཀའ་སློབ་དང་དྲི་བར་བཀའ་ལན་སྩལ་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ།