༧གོང་ས་མཆོག་ནས་བོད་དོན་རྒྱབ་སྐྱོར་བ་ཞིག་འདས་གྲོངས་སུ་ཕྱིན་པར་ཐུགས་གསོ་སྩལ།

༧གོང་ས་རྒྱལ་བ་རིན་པོ་ཆེ་མཆོག་དང་སྲིད་སྐྱོང་སྤེན་པ་ཚེ་རིང་ལགས་གཉིས་ནས་བོད་དོན་རྒྱབ་སྐྱོར་བ་རྙིང་ཤོས་ཀྱི་གྲས་ཤིག་འདས་གྲོངས་སུ་ཕྱིན་པར་ནང་མིར་ཐུགས་གསོའི་འཕྲིན་ཡིག་སྩལ་འདུག

ཟླ་འདིའི་མགོར་ཨ་མེ་རི་ཁའི་ཨིལ་སཱ་ཝ་ཌོར་ (El savador) སྤྱི་མཐུན་རྒྱལ་ཁབ་ནས་ཡིན་པའི་བོད་དོན་རྒྱབ་སྐྱོར་བ་དང་བོད་ཀྱི་གྲོགས་པོ་རྙིང་གྲས་སྐུ་ཞབས་མའོ་རེ་ནཱ་ (Alfredo Martinez Morena ) ལགས་འདས་གྲོངས་སུ་ཕྱིན་པའི་ཐད། ཕྱི་ཚེས་ ༤ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་འདས་པོ་དམ་པ་ཁོང་གི་བཟའ་ཟླ་ཨ་ལེ་ཤི་ཡའི་ ( Alicia Martinez ) མཚན་ཐོག་ཏུ། ཤུལ་ལུས་ནང་མི་སྤུན་ཉེ་ཡོངས་ལ་ཐུགས་གསོ་སྩལ་གནང་ཡོད་འདུག

ཐུགས་གསོའི་ཕྱག་བྲིས་ནང་༧གོང་ས་རྒྱལ་བ་རིན་པོ་ཆེ་མཆོག་གིས། ངོས་ཀྱི་གྲོགས་པོ་སྐུ་ཞབས་མའོ་རེ་ནཱ་ ( Alfredo Martinez Morena ) ལགས་དགུང་ལོ་ ༩༨ ཐོག་འདས་གྲོངས་སུ་ཕྱིན་པའི་གནས་ཚུལ་ཐོས་པར་བློ་ཕམ་ཆེན་པོ་བྱུང་། ངོས་ནས་སྐུ་ཉིད་དང་ཁྱེད་ཀྱི་ནང་མི་ཡོངས་ལ་སེམས་གསོ་ཞུ་རྒྱུ་ཡིན། ཁྱེད་རང་གིས་མཁྱེན་གསལ་བཞིན། ཕྱི་ལོ་  ༡༩༥༠ ལོར་རྒྱལ་སྤྱིའི་མཉམ་འབྲེལ་རྒྱལ་ཚོགས་སུ་བོད་དོན་རྒྱབ་སྐྱོར་བྱེད་མཁན་གྱི་རྒྱལ་ཁབ་ཐོག་མ་ནི་ ( El Savador) ཡིན་པ་དང་། ཉིད་ཀྱི་སྐུ་ཟླ་ནི་སྐབས་དེ་དུས་ (El Savador) མཉམ་འབྲེལ་རྒྱལ་ཚོགས་སུ་ཕེབས་པའི་སྐུ་ཚབ་ཚོགས་མི་ཞིག་ཡིན་པ་རེད། ཅེས་གསུངས།

ཡང་མགོན་པོ་གང་ཉིད་མཆོག་གིས། འདས་པའི་ལོ་ཤས་ཀྱི་ཁྲོད། ངོས་དང་སྐུ་ཞབས་མའོ་རེ་ནཱ་ལགས་ཐེངས་ཁ་ཤས་ཐུགས་འཕྲད་བྱུང་ཡོད་ཅིང་། ཁོང་གིས་བོད་མིའི་རང་དབང་དང་ཆེ་མཐོང་ལ་རྒྱབ་སྐྱོར་ཐུགས་ཁུར་གནང་བར་ཡི་རངས་བསྔགས་བརྗོད་བྱ་རྒྱུ་ཡིན་པ་མ་ཟད། ཁོང་ཉིད་ང་ཚོ་དང་བྲལ་ཟིན་ནའང་ཁོང་གིས་གཞན་ཕན་གྱི་ལས་ལ་བརྩོན་ནས་དོན་སྙིང་ལྡན་པའི་མི་ཚེ་ཞིག་བསྐྱལ་ཡོད་སྟབས། ང་ཚོས་ཡིད་སེམས་ཞུམ་དོན་མེད། ཅེས་གསུངས།

གཞན་ཡང་། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་། སྐུ་ཞབས་ཁོང་ཉིད་འདས་གྲོངས་སུ་ཕྱིན་པའི་གནས་ཚུལ་དང་འབྲེལ། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་བྱས་ཏེ། དམ་པ་ཁོང་གི་སྐུ་ཟླ་གཙོས་ཤུལ་ལུས་ནང་མི་ཡོངས་ལ་གདུང་སེམས་མཉམ་སྐྱེད་ཞུ་ཡི་ཡོད་པའི་འཕྲིན་ཡིག་ཅིག་གནང་བའི་ནང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཀྱིས་དབུས་པའི་ནང་མི་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན། ཨིལ་སཱ་ཝ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་མའོ་རེ་ནཱ་མཆོག་དང་རྒྱལ་ཁབ་ཀྱི་སྐུ་ཚབ་ཚོགས་ཆུང་ངོས་ནས་ཕྱི་ལོ་ ༡༩༥༠ ཟླ་ ༡༡ ཚེས་ ༧ ཉིན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་བོད་དུ་ཕྱི་རྒྱལ་གྱི་དམག་ཤུགས་བཙན་འཛུལ་བྱུང་བར་སྐྱོན་བརྗོད་ཀྱིས་བོད་ལ་རྒྱབ་སྐྱོར་གནང་བ་དེ་བོད་མི་ཚོས་དྲན་གསོ་དང་བཀའ་དྲིན་བླ་ལྷག་ཏུ་ཆེ་ཞུ་གི་ཡོད། ཅེས་གསུངས་འདུག

རང་ལོ་༩༨ ཡིན་པའི་སྐུ་ཞབས་མའོ་རེ་ནཱ་ལགས་ནི་བོད་ཀྱི་དོན་རྒྱབ་སྐྱོར་བ་རྙིང་ཤོས་ཀྱི་གྲས་ཤིག་ཡིན་པ་མ་ཟད། ༧གོང་ས་སྐྱབས་མགོན་ཆེན་པོ་མཆོག་གི་གྲོགས་པོ་ཞིག་ཀྱང་ཡིན་པ་དང་། ཁོང་ཕྱི་ལོ་ ༡༩༢༣ ལོར་ཨིལ་སཱ་ཝ་ཌོར་སྤྱི་མཐུན་རྒྱལ་ཁབ་ནང་སྐུ་འཁྲུངས་ཤིང་། ཁོང་གིས་རྒྱལ་ཁབ་ཀྱི་གཞུང་འཛིན་མི་སྣ་དང་ཁྲིམས་རྩོད་པ་གཅིག་ལྕོགས་ཀྱི་ལས་གནས་གཉེར་གྱི་ཡོད་ཅིང་། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། བོད་མི་ཚོར་མནར་གཅོད་གཏོང་མུས་ཡིན་པར་སྐྱོན་བརྗོད་བྱས་ནས། བོད་ཀྱི་རྩ་དོན་ལ་རོགས་རམ་དང་རྒྱབ་སྐྱོར་བྱེད་མཁན་རྙིང་ཤོས་ཤིག་ཡིན་པ་རེད་འདུག

དཔལ་ལྡན།