༧གོང་ས་མཆོག་ནས་ཨ་རིའི་རྒྱལ་ཡོངས་མགོ་འཁྲིད་སྐྱེད་སྲིང་ཚོགས་པར་བཀའ་སློབ་སྩལ་སྐབས་ངོས་ཚིག་ཐག་ཆོད་པོའི་ཐོག་ནས་བཤད་ཐུབ་པ་དེ་གལ་སྲིད་མི་རེ་ངོ་རེ་ཡིས་རང་རྒྱུད་ལ་བྱམས་སྙིང་རྗེའི་བསམ་པ་སྐྱེས་ན་རང་བཞིན་གྱིས་འགྲོ་བ་མིའི་རིགས་ཡོངས་རྫོགས་སྔར་བས་བདེ་སྐྱིད་ལྡན་པ་ཞིག་ཡོང་ངེས་རེད་ཅེས་གསུངས་འདུག
ཨ་རིར་རྟེན་གཞི་བྱས་པའི་རྒྱལ་ཡོངས་མགོ་འཁྲིད་སྐྱེད་སྲིང་ཚོགས་པ་(National Society of Leardership and Success) ཡིས་གསོལ་འདེབས་ཞུས་དོན་ལྟར། ཁ་སང་ཕྱི་ཚེས་ ༢༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་བརྙན་ལམ་བརྒྱུད་ཨ་རིའི་སློབ་ཆེན་སློབ་མ་སྐོར་ཞིག་ལ་མགོ་འཁྲིད་དང་ཉིན་རེའི་འཚོ་བའི་སྤྱོད་ལམ་སོགས་ཀྱི་སྐོར་ནས་བཀའ་སློབ་སྩལ་བའི་ནང་། མི་རེ་ངོ་རེ་ནས་རང་རྒྱུད་ལ་བྱམས་སྙིང་རྗེའི་བསམ་པ་སྐྱེས་ན་རང་བཞིན་གྱིས་མིའི་རིགས་ཡོངས་རྫོགས་སྔར་བས་བདེ་སྐྱིད་ལྡན་པ་ཞིག་ཡོང་ངེས་ཡིན་སྐོར་སོགས་ཀྱི་བཀའ་སློབ་སྩལ་གནང་འདུག
ཐེངས་འདིའི་ལས་རིམ་གཙོ་སྐྱོང་བས་༧གོང་ས་མཆོག་ལ་རང་གཞན་གཉིས་ཀྱི་མི་ཚེ་དོན་སྙིང་ལྡན་ཞིང་འཛམ་གླིང་ལ་བཟང་ཕྱོགས་ཀྱི་འགྱུར་བའམ་ཤུགས་རྐྱེན་གཏོང་ཐབས་ཅི་ཡོད་སྐོར་བཀའ་འདྲི་ཞུས་པའི་བཀའ་ལན་དུ། རྩ་བའི་ཆ་ནས་ང་ཚོ་འགྲོ་བ་མིའི་རིགས་འདི་སྤྱི་ཚོགས་ཀྱི་སེམས་ཅན་ཞིག་རེད། མི་སྒེར་སུ་འདྲ་ཞིག་ཡིན་ནའང་མིའི་སྤྱི་ཚོགས་ལ་མ་བརྟེན་པར་འཚོ་ཐུབ་ཐབས་མེད། དེར་བརྟེན་ཁྱེད་རང་མི་སྒེར་ཞིག་ཡིན་པའི་ཆ་ནས་ཁྱེད་ཀྱི་འཚོ་གནས་དེ་མིའི་རིགས་ཀྱི་སྤྱི་ཚོགས་ལ་བརྟེན་ནས་བསྡད་ཡོད། མིའི་སྤྱི་ཚོགས་ནང་ལ་མཚོན་ནའང་ཕན་ཚུན་དབར་འཆམ་མཐུན་དང་ཁྱེད་ལ་ཡིད་ཆེས་སླེབས་པར། ཁྱེད་རང་གི་ངོས་ནས་མི་གཞན་ལ་ཁ་ཞེ་གཉིས་མེད་ཀྱི་བྱམས་བརྩེའི་འདུ་ཤེས་སླེབ་དགོས་པ་རེད། མི་ལྟར་ཀླད་པའི་བྱ་ལས་རྙོག་འཛིང་མེད་པའི་སེམས་ཅན་དུད་འགྲོ་ལའང་ཁ་ཞེ་གཉིས་མེད་ཀྱི་བྱམས་བརྩེ་བསྟན་ཚེ་ཁོ་ཚོས་དེར་དགའ་མོས་བྱེད་ཀྱི་རེད། དེར་བརྟེན་ང་ཚོ་མིའི་རིགས་འདི་ཕན་ཚུན་འཆམ་མཐུན་ཡོང་ཐབས་དང་། རང་གཅེས་འཛིན་གྱི་ལྟ་ཕྱོགས་ཀྱི་ཐོག་ནས་བཤད་ན། སོ་སོ་ལ་ཡིད་ཆེས་བློ་འཁེལ་གྱི་གྲོགས་པོ་ཞིག་ཐོབ་པར། ཁྱེད་ཀྱིས་ངེས་པར་དུ་བྱམས་སྙིང་རྗེའི་བསམ་པ་བཅང་དགོས་པ་རེད། ཅེས་གསུངས་སོང་།
མུ་མཐུད་བྱམས་བརྩེ་སྐོར་ལ་༧གོང་ས་མཆོག་གིས། ང་ཚོ་ཚང་མར་བཙས་མ་ཐག་པ་ནས་རང་གི་ཨ་མའི་ས་ནས་བྱམས་བརྩེ་མང་ཤོས་ཐོབ་ཡོད་པར་བརྟེན། ང་ཚོ་ཚང་མའི་རྒྱུད་ལ་བྱམས་བརྩེའི་ས་བོན་ཡོད་པ་རེད། དེར་བརྟེན་ད་ལྟ་ང་ཚོས་བྱམས་བརྩེ་དང་གཞན་ཕན་གྱི་བསམ་བློ་ལ་དོ་སྣང་ཤུགས་ཆེ་བ་བྱེད་དགོས་ཀྱི་འདུག སྐབས་རེར་ངོས་ལ་ཚོར་སྣང་འདི་འདྲ་ཞིག་འབྱུང་གི་འདུག ང་ཚོ་ལོ་ན་ཆུང་བའི་སྐབས་སུ་རང་ལ་གཞན་གྱི་བརྩེ་བ་འཐོབ་རྒྱུར་རེ་སྨོན་དང་དགའ་མོས་ཆེན་པོ་བྱེད་ཀྱི་ཡོད་པ་རེད། རང་གི་ཕ་མ་དང་མིང་སྲིང་སྤུན་མཆེད་དབར་བརྩེ་བ་ཆེན་པོ་ཡོད་པ་རེད། འོན་ཀྱང་རིམ་པས་ང་ཚོ་ལོ་ཆེ་རུ་འགྲོ་བ་དང་བསྟུན། ང་ཚོའི་བསམ་བློའི་ནང་རང་ཉིད་གཅིག་པུས་འགྲིག་གི་འདུག གཞན་གྱི་བརྩེ་བ་དགོས་ཀྱི་མི་འདུག་ཅེས་པའི་ཚོར་བ་དེ་སླེབས་ཀྱི་ཡོད་པ་རེད། དེ་ལྟ་བུའི་མིག་རྒྱང་ཐུང་བའི་བསམ་བློ་གཏོང་ཕྱོགས་དང་། ཕྱོགས་གཞན་ནས་ང་ཚོའི་ད་ཡོད་ཀྱི་ཤེས་ཡོན་ལམ་སྲོལ་གྱིས་ཕྱི་དངོས་པོའི་ཤེས་བྱ་ལས་ནང་སེམས་ཀྱི་བྱམས་བརྩེའི་རིན་ཐང་ལ་དོ་སྣང་བྱེད་ཀྱི་མེད་པ་རེད། དེར་བརྟེན་ང་ཚོས་ད་ལྟའི་དེང་རབས་ཤེས་ཡོན་ལམ་སྲོལ་ནང་ཚན་རིག་གི་འགྲོས་དང་མཐུན་པའི་ཐོག་ནས་རྒྱུད་ལ་བྱམས་སྙིང་རྗེ་ཡོད་ན་རང་བཞིན་གྱིས་བསམ་བློར་ཞི་བདེ་ཡོང་གི་ཡོད་པ་དང་། རང་གཅེས་འཛིན་གྱི་བསམ་པ་ཆེ་དྲགས་ན་རང་གི་བསམ་བློ་དེ་ཡང་གུ་དོག་པོ་ཆགས་ཏེ་ཞེད་སྣང་དང་། ཁོང་ཁྲོ། དོགས་པ་བཅས་ཀྱི་བསམ་བློ་སྐྱེ་ཡི་ཡོད་སྐོར་གྱི་འགྲེལ་བརྗོད་རྣམས་བསྣན་རྒྱུ་གལ་ཆེན་པོ་རེད། ཆོས་དད་ཡོད་མིན་དེ་མི་སྒེར་གྱི་གནད་དོན་ཞིག་རེད། མིའི་རིགས་དང་སྤྱི་ཚོགས་སེམས་ཅན་ཞིག་ཡིན་པའི་ཆ་ནས་ང་ཚོར་བྱམས་སྙིང་རྗེ་དགོས་ཀྱི་ཡོད་པ་རེད། ནང་སེམས་ཀྱི་རིན་ཐང་དེ་དག་ནི་བདེ་སྐྱིད་ལྡན་པའི་མི་ཚེ་དང་ཁྱིམ་ཚང་། ཆེ་ས་ནས་བཤད་ན་བདེ་སྐྱིད་ལྡན་པའི་སྤྱི་ཚོགས་ཞིག་ཡོང་ཐབས་ཀྱི་རྩ་བའི་ཆ་རྐྱེན་ལྟ་བུ་ཞིག་ཡིན་པ་རེད། ངས་ཚིག་ཐག་ཆོད་པོའི་ཐོག་ནས་བཤད་ཐུབ་པ་དེ། གལ་ཏེ་མི་རེ་ངོ་རེ་ཡིས་རང་རྒྱུད་ལ་བྱམས་སྙིང་རྗེའི་བསམ་པ་སྐྱེས་ན། རང་བཞིན་གྱིས་འགྲོ་བ་མིའི་རིགས་ཡོངས་རྫོགས་སྔར་བས་བདེ་སྐྱིད་ལྡན་པ་ཞིག་ཡོང་ངེས་རེད། ཅེས་བཀའ་སློབ་སྩལ་གནང་སོང་།
ཡང་གཉན་འཕྲང་གི་དུས་སྐབས་སུ་མགོ་འཁྲིད་རྣམས་ཀྱི་རེ་བ་བརླག་མི་ཉན་པའི་སྐོར་ལ་༧གོང་ས་མཆོག་གིས། དེང་སང་སྒེར་གཅོད་རིང་ལུགས་ཀྱི་རྒྱལ་ཁབ་རེ་ཟུང་ལས་འཛམ་གླིང་ཀུན་དམངས་གཙོའི་ལམ་སྲོལ་ཐོག་སྐྱོད་ཀྱི་ཡོད་པ་རེད། རང་ཉིད་མགོ་འཁྲིད་ཅིག་བྱ་རྒྱུར་མི་མང་གི་རྒྱབ་སྐྱོར་དགོས་ཀྱི་ཡོད་པ་རེད་ལ། འོས་འདེམས་བྱུང་ཟིན་པའི་རྗེས་ལའང་མི་མང་གི་དོན་དམ་པའི་རྒྱབ་སྐྱོར་དགོས་ཀྱི་ཡོད་པ་རེད། དེར་བརྟེན། མགོ་འཁྲིད་རྣམས་ཀྱིས་རང་ལ་མི་མང་གི་ཡིད་ཆེས་མུ་མཐུད་ཡོང་བའི་ཆེད་དུ་དྲང་པོ་དྲང་བཞག་བྱེད་དགོས་པ་རེད། དྲང་པོ་དྲང་བཞག་དེ་ཡང་བྱམས་སྙིང་རྗེ་དང་ཧ་ཅང་འབྲེལ་བ་ཆེན་པོ་རེད། བྱམས་སྙིང་རྗེ་དེས་རང་ལ་ནང་སེམས་ཀྱི་སྟོབས་ཤུགས་དང་རང་ཉིད་ལ་གདེང་ཚོད་སྐྲུན་ཐུབ་ཀྱི་རེད། མི་ཞིག་ཡིན་པའི་ཆ་ནས་མགོ་འཁྲིད་རྣམས་ཀྱིས་རང་གི་རྣམ་དཔྱོད་དང་བྱམས་སྙིང་རྗེ་གཉིས་ཟུང་སྦྲེལ་ཐོག་ནས་མི་མང་གི་ཡིད་ཆེས་རག་ཐབས་བྱེད་དགོས་པ་ལས། རྣམ་དཔྱོད་གཅིག་པུ་བེད་སྤྱོད་གཏོང་རྒྱུ་དེ་ངོས་ཀྱི་བསམ་པར་དུས་ཚོད་ཡོལ་ཟིན་པ་ཞིག་རེད། ད་ལྟ་ང་ཚོས་དྲང་པོ་དྲང་བཞག་བྱ་དགོས་ཀྱི་ཡོད་པ་རེད། དེ་ནི་གཞན་ཕན་དང་འགྲོ་བ་མིའི་རིགས་གཅིག་གྱུར་གྱི་འདུ་ཤེས་སྐྱེད་ཐབས་དང་འབྲེལ་བ་ཤུགས་ཆེན་པོ་ཡོད་པ་རེད། ཅེས་གསུངས་འདུག
སློབ་མ་ཞིག་གིས་མགོན་པོ་མཆོག་ལ་ཐུགས་ཁྲོ་མྱོང་ཡོད་མེད་དང་། ཁོང་ཁྲོའི་བློ་ལ་ཇི་ལྟར་ཁ་གཏད་གཅོག་དགོས་མིན་བཀའ་འདྲི་ཞུས་པའི་ལན་དུ། སྐབས་རེར་ངོས་ལ་ཁོང་ཁྲོའི་བློ་སྐྱེས་མྱོང་ཡང་རིམ་པས་ངོས་ནས་བློ་སྦྱོང་བྱས་ཏེ་གཏིང་ཟབ་པའི་གོ་རྟོགས་སྐྱེ་ཐུབ་སོང་། ཁོང་ཁྲོ་ལ་དོན་སྙིང་ཡོད་མ་རེད། དཀའ་ངལ་ཞིག་ལ་མཚོན་ན་ཁོང་ཁྲོས་དཀའ་ངལ་དེ་སྔར་བས་ཚབས་ཆེར་གཏོང་གི་ཡོད་པ་རེད། དེར་བརྟེན་དཀའ་ངལ་གང་འདྲ་ཞིག་ཡིན་ནའང་གཞན་ཕན་དང་བྱམས་སྙིང་རྗེའི་ཐོག་ནས་སེལ་དགོས་པ་རེད། དགེ་རྒན་འགའ་ཤས་ཀྱིས་དགྲ་བོ་ནི་རང་གི་གྲོགས་པོ་བཟང་ཤོས་དེ་རེད་ཅེས་གསུང་གི་ཡོད། དགྲ་བོ་ལ་བརྟེན་ནས་ཁོང་ཁྲོ་སྐྱེ་ཡི་ཡོད་ནའང་། དགྲ་བོར་བརྟེན་ནས་བཟོད་སྒོམ་བྱ་རྒྱུའི་སྦྱོང་བརྡར་ཐོབ་ཀྱི་ཡོད་པ་རེད། ངོས་རང་རྒྱ་གར་དུ་བཙན་བྱོལ་དུ་འབྱོར་རྗེས། ངའི་མཐའ་འཁོར་གྱི་མི་རྣམས་ཀྱིས་བྱམས་སྙིང་རྗེའི་བསམ་པའི་ཐོག་ནས་ངོས་ལ་འཛུམ་མདངས་སྟོན་གྱི་ཡོད། གནས་སྟངས་དེ་འདྲའི་དབང་གིས་དུས་དེང་སང་ངོས་ལ་ཁོང་ཁྲོའི་བློ་ཕལ་ཆེར་སླེབས་ཀྱི་མི་འདུག འོན་ཀྱང་སྐབས་རེར་ངོས་རང་གཉིད་ཁུག་བཞིན་པའི་ཁ་ཐུག་དེར་དུག་སྦྲང་ཡོང་ནས་ཁོང་ཁོ་སློང་གི་འདུག ཅེས་བཞད་མོ་བཞད་ཀྱིན་གསུངས་གནང་སོང་།
དེ་བཞིན་མགོན་པོ་མཆོག་ནས་མི་ཚེའི་དོན་སྙིང་ཅི་ཡིན་གྱི་བཀའ་འདྲིར་བཀའ་ལན་སྩལ་སྐབས། དུད་འགྲོ་སེམས་ཅན་གཞན་དང་མི་འདྲ་བར་མི་ལ་རྣམ་དཔྱོད་ཅིག་ཡོད་པའི་རྐྱེན་གྱིས་གཞན་ལ་ཕན་བདེ་སྒྲུབ་རྒྱུའི་ནུས་པ་ཆེ་བ་ཡོད་སྟབས། རྣམ་དཔྱོད་དང་བྱམས་བརྩེ་ཟུང་དུ་སྦྲེལ་ནས་གཞན་ཕན་སྒྲུབ་རྒྱུ་གལ་ཆེན་པོ་ཡིན་པ་དང་། འཛམ་གླིང་གི་ཞི་བདེ་སྐྲུན་རྒྱུའི་འགན་འཁྲི་དེ་འགྲོ་བ་མི་ལ་ཡོད་པ་དང་། དེ་ཡང་ནང་སེམས་ཀྱི་ཞི་བདེ་བསྐྲུན་མིན་ལ་རག་ལས་པ་ཞིག་ཡིན་སྐོར་གསུངས་སོང་། ཡང་མགོན་པོ་མཆོག་གིས་བོད་མི་རྣམས་བཙན་བྱོལ་དུ་འབྱོར་ནས་བཟུང་དཀའ་ངལ་ཆེན་པོ་ཕྲད་ཡོད་ནའང་། རང་ལ་བཙན་གནོན་གཏོང་མཁན་ཚོར་བྱམས་སྙིང་རྗེ་སྒོམ་ཐབས་བྱས་ཡོད་སྐོར་དང་། ཆབ་སྲིད་ཐོག་ནས་ང་ཚོས་རྒྱ་ནག་སྤྱི་མཐུན་རྒྱལ་ཁབ་དང་ཁ་བྲལ་འདོད་ཀྱི་མེད། དེ་བས་ང་ཚོ་རྒྱ་ནག་གི་ཁོངས་སུ་བསྡད་འདོད་བྱེད་ཀྱི་ཡོད་པ་རེད། དེར་ངོས་ཀྱིས་དབུ་མའི་ལམ་ཞེས་རྗོད་ཀྱི་ཡོད། རང་བཙན་རྩོད་ཀྱི་མེད་པར་རྒྱ་ནག་སྤྱི་མཐུན་རྒྱལ་ཁབ་དང་དམིགས་བསལ་གྱི་འབྲེལ་བ་ཞིག་འདོད་ཀྱི་ཡོད་པ་རེད། དེའི་ཐོག་ང་ཚོར་རང་དབང་དགོས་ཀྱི་ཡོད་པ་རེད། དེ་ནི་གཙོ་བོ་བོད་ཀྱི་རིག་གཞུང་ཉར་ཚགས་བྱ་ཆེད་རེད། རིག་གཞུང་ནི་ངོ་བོ་མཚོན་བྱེད་གཙོ་བོ་དེ་རེད། ང་ཚོར་སྐད་ཡིག་ཚུད་པའི་ཐུན་མིན་རིག་གཞུང་ཞིག་ཡོད་པ་རེད། དེང་སང་ནང་བསྟན་གྱི་ལྟ་གྲུབ་རྣམས་འགྲེལ་བརྗོད་བྱེད་པའི་སྐད་ཡིག་ལེགས་ཤོས་དེ་བོད་ཀྱི་སྐད་ཡིག་ཡིན་བཟོ་འདུག ནང་བསྟན་དང་ལྷག་པར་དུ་ན་ལེནྜའི་ཆོས་བརྒྱུད་ཀྱི་རྙོག་འཛིང་ཆེ་ཞིང་གོ་བ་ཟབ་པའི་ནང་བསྟན་གྱི་གཞུང་ལུགས་རྣམས་བོད་ཀྱི་སྐད་ཡིག་ཐོག་ནས་འགྲེལ་བརྗོད་ཡག་ཤོས་བྱེད་ཐུབ་ཀྱི་འདུག ཅེས་གསུངས་སོང་།
གསར་འགོད་པ། པ་སངས་ཚེ་རིང་།
