སེམས་འཁྲུགས་པ་དང་མ་སྐྱིད་པའི་སྐབས་སུ་བྱམས་དང་སྙིང་རྗེ་ནི་སྨན་ལྟ་བུ་ཞིག་ཡིན།

༧གོང་ས་མཆོག་ནས་ཨ་རིའི་གཙུག་ལག་སློབ་ཆེན་གཉིས་ཀྱི་དགེ་སློབ་ཚོར་བཀའ་སློབ་གནང་སྐབས་ཤེས་ཡོན་དེ་འགྲོ་བ་མིའི་ཆེད་དུ་ཡིན་པ་མ་ཟད་བདེ་སྐྱིད་ལྡན་པ་ཞིག་ཡོང་ཐབས་ལ་དམིགས་པ་ཞིག་ཡིན་དུས། ད་ལྟའི་ཤེས་ཡོན་དེ་བྱམས་སྙིང་རྗེའི་ཤེས་ཡོན་དང་མཉམ་འབྲེལ་བྱ་དགོས་སྐོར་གསུངས་སོང་།

དེ་རིང་རྒྱ་གར་གྱི་སྔ་དྲོའི་ཆུ་ཚོད་ ༩ པའི་ཐོག་༧གོང་ས་མཆོག་གིས་རྦོལ་ཌར་ས་གནས་ཀྱི་ཀོ་ལོ་ར་ཌོ་གཙུག་ལག་སློབ་ཆེན་གྱི་རི་ནི་ཁི་རོན་བདེ་གནས་སློབ་གྲྭ་ (The Renee Crown Wellness Institute at the University of Colorado Boulder) དང་སེན་ཌི་སྒོ་ཁ་ལི་ཧྥོར་ནི་ཡའི་གཙུག་ལག་སློབ་ཆེན་གྱི་བྱམས་བརྩེའི་སློབ་ཁང་ (The Compassion Institute at the University of California San Diego) གཉིས་ནས་ཇི་ལྟར་གསོལ་བ་བཏབ་པ་ལྟར་དྲ་ལམ་བརྒྱུད་བྱམས་བརྩེའི་སྐོར་ལ་བཀའ་སློབ་གནང་སོང་།

ཐོག་མར་རྦོལ་ཌར་ས་གནས་ཀྱི་ཀོ་ལོ་ར་ཌོ་གཙུག་ལག་སློབ་ཆེན་གྱི་རིག་བདག་ (Chancellor Philip P. DiStefano) ལགས་ཀྱིས། ང་ཚོའི་སློབ་གྲྭའི་དམིགས་ཡུལ་གཙོ་བོ་ནི་བྱམས་བརྩེ་དང་ལྡན་པའི་སྒོ་ནས་མིའི་ཆེ་མཐོང་ཡོད་པའི་སློབ་སྦྱོང་སྤྲོད་རྒྱུ་དེ་ཆགས་ཀྱི་ཡོད་པ་རེད། དེང་དུས་ཀྱི་གཞོན་སྐྱེས་ཚོའི་སོ་སོའི་མི་ཚེའི་ནང་སེམས་ཀྱི་ཚོར་བ་དང་འཕྲོད་བསྟེན་དེ་དག་ཡག་པོ་ཡོང་སླད་དུ། དེ་རིང་༧གོང་ས་མཆོག་དང་ལྷན་དུ་བཀའ་མོལ་ཞུ་ཡི་ཡོད་པས། དེ་རིང་༧གོང་ས་མཆོག་ཆིབས་སྒྱུར་གནང་བར་ཐུགས་རྗེ་ཆེ་ཞུ་རྒྱུ་དང་། སློབ་ཁྲིད་བྱེད་མཁན་གྱི་དགེ་རྒན་ཆེན་མོ་མང་པོས་མཉམ་ཞུགས་གནང་བར་ཐུགས་རྗེ་ཆེ་ཞུ་ཡི་ཡིན། དེ་སྔ་ ༢༠༡༦ ལོར་༧གོང་ས་མཆོག་ང་ཚོའི་གཙུག་ལག་སློབ་གཉེར་དུ་ཆིབས་སྒྱུར་གནང་སྟེ་བྱམས་བརྩེ་དང་འབྲེལ་བའི་སློབ་སྦྱོང་སྤྲོད་རྒྱུ་དང་ཁི་རོན་བདེ་གནས་སློབ་གྲྭའི་ (Crown Institute) ནང་བྱམས་བརྩེའི་སློབ་སྟོན་བྱེད་རྒྱུའི་རྩ་བ་དེ་བཙུགས་པ་དང་མི་ཆ་ཚང་གི་བདེ་སྡུག་ལ་ཕན་པའི་སློབ་སྦྱོང་སྤྲོད་ཀྱི་ཡོད་པ་རེད། དེ་ཡང་འཕྲལ་སེལ་མིན་པར་མི་ཚེ་ཡོངས་རྫོགས་ལ་འདང་ཆེད་དང་རང་གི་སྤྱི་ཚོགས་དང་སྤྱི་ཚོགས་གཞན་ལ་ཁྱབ་ཐུབ་པ་བྱེད་ཀྱི་ཡོད་པ་རེད། ང་ཚོ་མཉམ་དུ་ཟུང་འབྲེལ་བྱམས་བརྩེ་བསྟི་གནས་ཁང་ཡོད་པ་རེད། སོ་སོའི་མི་ཚེ་ཚད་དང་ལྡན་པ་ཡོང་བ་དང་འབྱུང་འགྱུར་གྱི་མི་རབས་ཚད་དང་ལྡན་པ་ཡོང་བའི་དོན་དུ། དེ་རིང་༧གོང་ས་མཆོག་གིས་བཀའ་སློབ་ལམ་སྟོན་གནང་བ་ལས་ཐུགས་ཕན་གསོ་རོགས་ཞུ་ཡི་ཡོད་སྐོར་སོགས་འགྲེལ་བརྗོད་གནང་སོང་།

དེ་ནས་དྲི་བ་དྲིས་ལན་གྱི་ལས་རིམ་ནང་། ལོ་རིམ་བརྒྱད་པའི་དབྱིན་ཡིག་དགེ་རྒན་བྷེན ( Benjamin Inouye )  ལགས་ཀྱིས་ང་ཚོའི་རང་རྒྱུད་ལ་ཡོད་པའི་ཀུན་སློང་བཟང་པོ་དེ་མ་བརྗེད་པར་རྒྱུན་འཁྱོངས་བྱེད་ཐབས་དང་། ཀུན་སློང་དང་སྙིང་རྗེའི་ཉམས་ལེན་བར་གྱི་འབྲེལ་བ་སོགས་ཀྱི་སྐོར་ལ་བཀའ་འདྲི་ཞུས་པར་མགོན་པོ་གང་ཉིད་ཀྱིས། བཟོད་པ་དང་སྙིང་རྗེ་གཉིིས་ཀྱི་རྩ་བ་དེ་བྱམས་བརྩེ་གཙོ་བོར་བཞག་གིན་ཡོད་དུས།  དེ་གཉིས་ཁ་ཡོད་ལག་ཡོད་ཀྱི་འབྲེལ་བ་ཆགས་ཡོད། དཀའ་ངལ་གང་ཡང་མེད་པའི་སྐབས་སུ་ལྷོད་ལྷོད་བྱས་ཏེ་ཉི་མ་འདེ་བ་དང་། ཆུ་སོགས་བརྐྱལ་ནས་སྡོད་ཀྱི་ཡོད་པ་རེད། སྐབས་དེའི་དུས་སུ་བྱམས་དང་སྙིང་རྗེ་ཞེས་པར་དམིགས་བསལ་འབྲེལ་བ་གང་ཡང་མེད་པ་རེད། བྱམས་དང་བརྩེ་བ་ངོ་མ་དེ་རང་ཉིད་ལ་དཀའ་ངལ་འཕྲད་བའི་སྐབས་སུ་དགོས་ཀྱི་ཡོད་པ་རེད། ལྷག་པར་སོ་སོའི་སེམས་ཁམས་འཁྲུགས་པ་དང་། སོ་སོ་མ་སྐྱིད་པའི་སྐབས་སུ་བྱམས་དང་སྙིང་རྗེ་ནི་སྨན་ལྟ་བུ་ཞིག་ཡིན་པ་རེད། སྤྱིར་ང་ཚོའི་གཟུགས་པོ་བདེ་ཐང་ཡིན་དུས་སྨན་སོགས་གང་ཡང་མི་དགོས་ཀྱང་། སོ་སོའི་གཟུགས་པོ་མི་བདེའི་སྐབས་སུ་སྨན་སོགས་དགོས་པ་བཞིན། ང་ཚོའི་མི་ཚེའི་ནང་དཀའ་ངལ་འཕྲད་ཚེ། བྱམས་དང་སྙིང་རྗེའི་ཉམས་ལེན་ཡག་པོ་ཡོད་ན། སེམས་ཀྱི་ཞི་བདེ་དང་སེམས་ཁམས་ཞི་བདེ་བག་ཕེབས་ལ་གནས་ཐུབ་པར་ཕན་ཐོགས་ཆེན་པོ་ཡོད་པ་རེད། ངོས་ནས་ཉམས་མྱོང་ཞིག་བཤད་པ་ཡིན་ན། ངོས་རང་བཙན་བྱོལ་དུ་མ་ཡོང་བར་ཕོ་བྲང་པོ་ཏ་ལར་བསྡད་པ་ཡིན་ན། བྱམས་སྙིང་རྗེ་དང་འབྲེལ་བའི་ཉམས་ལེན་ཞན་པོ་ཡོད་སྲིད་ཀྱང་། ངོས་ཀྱི་མི་ཚེའི་ནང་དུ་དཀའ་ངལ་ཆེན་པོ་འཕྲད་སྟབས། དེའི་སྟབས་ཀྱིས་བྱམས་དང་སྙིང་རྗེའི་ཉམས་ལེན་གོང་འཕེལ་དུ་ཕྱིན་པས། སོ་སོ་ལ་དགྲ་ལྟར་འཛིན་མཁན་རྣམས་ལ་བྱམས་དང་སྙིང་རྗེ་སྐྱེས་པར་ཕན་ཐོགས་ཆེན་པོ་འདུག བྱས་ཙང། བྱམས་དང་སྙིང་རྗེའི་ཉམས་ལེན་དེ་སོ་སོ་ལ་དངོས་སུ་དཀའ་ངལ་འཕྲད་དུས་ཕན་ཐོགས་ཆེན་པོ་འདུག དེ་ལྟ་བུའི་བྱམས་དང་སྙིང་རྗེ་ཚད་ལྡན་སྐྱེས་བར་རྒྱུ་མཚན་གྱི་ཐོག་ནས་བསམ་བློ་གཏང་རྒྱུ་དང་། གོམས་གཤིས་བརྟན་པོ་ཚུགས་པ། རིག་པས་དཔྱད་ཞིབ་བྱ་དགོས་པ་རེད། དེ་འདྲའི་གོམས་གཤིས་ཤིག་ཡོད་ན་རང་རང་ལ་དཀའ་ངལ་འཕྲད་པའི་སྐབས་སུ་བྱམས་དང་སྙིང་རྗེའི་བྱམས་ལེན་མ་བརླག་པར་བརྟན་པོ་འཛིན་ཐུབ་པའི་ཕན་ཐོགས་ཆེན་པོ་ཡོད་པ་རེད། ཅེས་གསུངས་སོང་།

ཡང་སློབ་གྲྭའི་སློབ་སྤྱི་ཞིག་གིས་སློབ་གྲྭའི་ནང་བྱམས་བརྩེའི་སློབ་གསོ་སྤེལ་ཐབས་ཇི་འདྲ་ཡོད་མེད་སྐོར་བཀའ་འདྲི་ཞུས་པའི་བཀའ་ལན་དུ། དོན་དངོས་ཐོག་ནས་བཤད་ན་ད་ལྟའི་ཤེས་ཡོན་སློབ་གསོ་དེ་ཕྱི་དངོས་པོའི་སྟེང་ལ་ཕྱོགས་ཡོད་པ་རེད། དེར་བརྟེན་ད་ལྟ་ང་ཚོར་འཛམ་གླིང་གི་ཕན་བདེ་དང་བྱམས་བརྩེའི་འདུ་ཤེས་དགོས་གལ་ཆེ། ངོས་ནས་དུས་རྒྱུན་དུ་ང་ཚོའི་ཤེས་ཡོན་ནང་བྱམས་སྙིང་རྗེའི་སྐོར་གྱི་སློབ་ཚན་འཇོག་དགོས་སྐོར་བཤད་ཀྱི་ཡོད། དེ་ཡང་ཆོས་ལུགས་ཀྱི་གནད་དོན་སྟེང་ནས་མིན་པར། དགེ་སློབ་གཉིས་ཀྱི་འཕྲོད་བསྟེན་ཆེད་དུ་བཤད་ཀྱི་ཡོད། ནང་སེམས་ལ་བྱམས་སྙིང་རྗེའི་བློ་སྐྱེ་བའི་ཚེ་ན་རང་བཞིན་གྱིས་སེམས་ལ་ཞི་བདེ་ཡོང་གི་ཡོད་པ་དང་། ནང་སེམས་ཀྱི་ཞི་བདེ་ནི་འཕྲོད་བསྟེན་ཡོང་རྒྱུའི་རྐྱེན་གཙོ་བོ་ཞིག་ཡིན་པ་རེད། དེར་བརྟེན་ངོས་ཀྱི་བསམ་པར་ང་ཚོས་སློབ་གསོའི་སྒྲོམ་གཞི་གསར་པ་ཞིག་ལ་བསམ་བློ་གཏོང་དགོས་ཀྱི་འདུག ཅེས་གསུངས་གནང་འདུག་ལ། ཡང་མགོན་པོ་མཆོག་གིས་གལ་ཏེ་ཁྱེད་ཀྱིས་ཆོད་སེམས་བརྟན་པོ་དང་སྙིང་སྟོབས་བསྐྱེད་དེ། ཁ་ཞེ་གཉིས་མེད་ཀྱི་བྱམས་སྙིང་རྗེའི་བློ་བསྒོམས་ཚེ། དེར་དཀའ་ངལ་གང་ཡང་ཡོང་རྒྱུ་མེད་ལ། ལྷག་ཏུ་དཀའ་ངལ་ཆེན་པོ་འཕྲད་བཞིན་པའི་སྐྱེ་འགྲོ་རྣམས་ལ་བྱམས་སྙིང་རྗེ་བསྒོམས་ན་དེས་རང་ཉིད་ལ་གོ་བ་གཏིང་ཟབ་སྐྱེ་རུ་འཇུག་གི་རེད། དེ་བས་དཀའ་ངལ་བྱུང་བའི་ཚེ་ན་དཀའ་ངལ་གྱི་འབྱུང་ཁུངས་གང་ཡིན་སོགས་ལ་བརྟག་དཔྱད་བྱས་ཏེ་དཀའ་ངལ་སེལ་ཐབས་བྱས་ན། དེ་ནི་ཤེས་རབ་ཟུང་དུ་སྦྲེལ་བའི་བྱམས་སྙིང་རྗེ་ཡིན་པ་རེད། ཅེས་དང་། སྤྱིར་སློབ་ཁྲིད་ཁོ་ན་བྱེད་མཁན་གྱི་དགེ་རྒན་དང་། སློབ་མའི་ཤེས་ཡོན་དང་མ་འོངས་མདུན་ལམ་སོགས་ལ་སེམས་ཁུར་བྱེད་མཁན་གྱི་དགེ་རྒན་དབར་ལ་ཁྱད་པར་ཆེན་པོ་ཡོད་ཅིང་། དགེ་རྒན་ཕྱི་མ་དེས་སློབ་མར་ཐུགས་ཕན་ཆེན་པོ་གསོ་ཡི་ཡོད་སྐོར་སོགས་བཀའ་སློབ་སྩལ་གནང་མཛད་འདུག

མཇུག་ཏུ་༧གོང་ས་མཆོག་གིས། ད་ཡོད་ཀྱི་ཤེས་ཡོན་ལམ་ལུགས་ཀྱིས་རྣམ་དཔྱོད་ཁོ་ནར་ཤུགས་བསྐྱོན་གྱི་ཡོད་པ་དང་། ཤེས་ཡོན་དེ་ཉིད་འགྲོ་བ་མིའི་ཆེད་དུ་ཡིན་པ་མ་ཟད། བདེ་སྐྱིད་ལྡན་པའི་འགྲོ་བ་མིའི་རིགས་ཡོང་ཐབས་ལ་དམིགས་པ་ཞིག་ཡིན་དུས། ད་ལྟའི་ཤེས་ཡོན་དེ་བྱམས་སྙིང་རྗེའི་ཤེས་ཡོན་དང་མཉམ་འབྲེལ་བྱ་དགོས་པ་རེད། བྱམས་སྙིང་རྗེ་ཟེར་བ་དེ་ཆོས་དད་པ་ཡོད་མེད་ཀྱི་སྐད་ཆ་མ་རེད། དེ་ནི་ཞི་ཞིང་བདེ་བའི་བསམ་བློ་བསྐྱེད་ཐབས་ཆེད་དུ་རེད། ཅེས་དང་། ཁོང་ཁྲོ་ནི་སེམས་ཀྱི་ཞི་བདེ་དཀྲུག་པའི་རྒྱུ་རྐྱེན་གཙོ་བོ་ཡིན་ལ། བྱམས་སྙིང་རྗེ་ནི་སེམས་ལ་ཞི་བདེ་ཡོང་བའི་རྒྱུ་གཙོ་བོ་དེ་ཡིན་སྐོར་སོགས་གསུངས་གནང་སོང་།

གསར་འགོད་པ། བསྟན་འཛིན་ཕུར་བུ། དཔལ་ལྡན། པ་སངས་ཚེ་རིང་།