ཟླ་འདིའི་ཕྱི་ཚེས་ ༡༩ ཉིན་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཤར་ཁུལ་གྱི་བོད་མི་འདུས་སྡོད་ཀ་རྡོར་སྒང་གསུམ་དུ་གཞུང་འབྲེལ་ཕྱོགས་ཕེབས་གནང་གི་ཡོད་ཡོད་པ་ལྟར། དེ་རིང་གཞུང་འབྲེལ་ཕྱོགས་ཀྱི་ཉིན་བརྒྱད་པའི་སྔ་དྲོར་སྲིད་སྐྱོང་མཆོག་གིས། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པེ་རམ་སིགྷ་ཏཱང་མཱང་ (Prem Singh Tamang) མཆོག་དང་ནགས་ཚལ་བློན་ཆེན་སོགས་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་ཡོད་པ་རེད།
སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ཀྱི་མཛད་རིམ་ལྟར་ན། ཀ་རྡོར་སྒང་གསུམ་གྱི་ཕྱོགས་ཕེབས་ཁྲོད། ཟླ་འདིའི་ཕྱི་ཚེས་ ༢༣ ཉིན་གྱི་ཕྱི་དྲོར་སྲིད་སྐྱོང་མཆོག་སྒང་ཏོག་ཁུལ་དུ་ཕེབས་འབྱོར་བྱུང་ཡོད་པ་དང་། ཕྱི་ཚེས་ ༢༤ ཉིན་སྲིད་སྐྱོང་མཆོག་གིས་ལ་ཆེན་དང་། ལྷོ་ནག འབྲོང་མགོ ཐང་མགོ ཚ་སྟེང་། མི་ཤིས་ཐང་བཅས་ཀྱི་མང་ཚོགས་ལ་མཇལ་འཕྲད་དང་བཀའ་སློབ་གནང་ཡོད་པ་དང་། ཉིན་དེའི་ཕྱི་དྲོར་་ལ་ཆེན་ཚ་སྟེང་ནས་ལ་ཆུང་ལ་ཕེབས་ཐོན་གྱིས་ལ་ཆུང་གི་གཅུང་ཐང་དང་། སྦ་གོང་། མན་གྷན་བཅས་ཀྱི་མི་མང་ལ་བཀའ་སློབ་གནང་ཡོད་པ་རེད།
ཁ་སང་ཕྱི་ཚེས་ ༢༥ ཉིན་སྲིད་སྐྱོང་མཆོག་གིས་འབྲས་ལྗོངས་ཀྱི་རྒྱལ་ས་སྒང་ཏོག་ཁུལ་དུ་གནས་སྡོད་བྱེད་བཞིན་པའི་བོད་མི་སྤྱི་དང་བྱེ་བྲག་ཏུ། སྒང་ཏོག་གི་བོད་བརྒྱུད་ནང་བསྟན་གྱི་རུམ་སྟེག་དགོན་པ་དང་གུ་རུ་སྐུ་འབུམ་སྟག་ལུང་སངྒ་ཆོས་འཁོར་གླིང་། ངོར་དགོན་པ། བཀའ་དགོན་ཚེ་མཆོག་གླིང་། རྒྱ་གར་ལྷོ་ཕྱོགས་བྱེས་ཀྱི་གདན་ས་ཆེན་པོ་སེར་བྱེས་མཁས་སྙན་གྲྭ་ཚང་གི་ཡན་ལག་འགྲོ་ཕན་གླིང་དགོན་པ་བཅས་དང་། ལ་ཆེན་དང་ལ་ཆུང་ས་གནས། དེ་བཞིན། རྒྱལ་ས་སྒང་ཏོག་ཏུ་རྟེན་གཞི་བྱས་པའི་རྣམ་རྒྱལ་བོད་རིག་པའི་ཉམས་ཞིབ་ཁང་དུ་ཕེབས་ཏེ། དགོན་ས་གཉིས་ཀྱི་མང་ཚོགས་ཀྱི་བདེ་སྡུག་ལ་གཟིགས་ཞིབ་དང་རྒྱུས་ལོན་གནང་ཡོད་འདུག་ལ། དེ་རིང་ཉིན་རྒྱབ་སྲིད་སྐྱོང་མཆོག་ཕྱིར་རྒྱལ་ས་ལྡི་ལིར་ཕེབས་འབྱོར་བྱུང་ཡོད་པ་དང་སང་ཉིན་ནས་ཡུ་རོབ་ཁུལ་དུ་ཕེབས་རྒྱུ་ཡིན་འདུག
བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་བའི་གནས་ཚུལ་ལྟར་ན། སྲིད་སྐྱོང་མཆོག་གིས་སོ་ན་ཌ་དང་ཁར་ཤངས་ཁུལ་གྱི་མི་མང་རྣམས་ལ། བོད་མིའི་སྒྲིག་འཛུགས་ཀྱི་བསྒྲུབ་བྱ་གཉིས་ཏེ། གཉིས་ཕན་དབུ་མའི་ལམ་བརྒྱུད་ནས་བོད་རྒྱའི་དཀའ་རྙོག་སེལ་ཐབས་དང་བཙན་བྱོལ་བོད་མིའི་བདེ་སྡུག་ལ་ལྟ་རྟོག་བྱེད་ཐབས་སྐོར་དང་། བོད་མི་གཞོན་སྐྱེས་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་རྟོགས་པའི་ཆེད་དུ་ཁོང་གི་བཀའ་སློབ་ལ་སློབ་སྦྱོང་བྱེད་དགོས་པ། དེ་བཞིན་ད་ལྟ་རྒྱ་གར་ནང་བོད་དོན་ཐད་རྒྱབ་སྐྱོར་སྔར་ལྷག་ཡོང་གཞི་དེ་རྒྱ་དཀར་ནག་དབར་འཕགས་བོད་ས་མཚམས་ཐད་དཀའ་རྙོག་བྱུང་བ་དེས་ཡིན་པ་དང་། རྒྱ་ནག་གཞུང་གིས་བོད་ས་ཁྱོན་དུ་བོད་མི་རིགས་ཀྱི་སྐད་ཡིག་དང་ངོ་བོ་རྩ་བརླག་གཏོང་ཆེད་བོད་ཕྲུག་རྣམས་ལ་རྒྱའི་སྐད་ཡིག་གི་ལམ་ནས་སློབ་ཁྲིད་བྱེད་ཀྱི་ཡོད་པའི་བོད་ནང་གི་གནས་སྟངས་སྐོར་ངོ་སྤྲོད་གནང་ཡོད་འདུག་ལ། གཞན་ཡང་རྒྱ་གར་ནང་ཡོད་པའི་བོད་སློབ་འཛིན་ཚོགས་ཁྱབ་ཁོངས་ཀྱི་སློབ་གྲྭ་ཁག་ཏུ་སློབ་མ་འཛུལ་ཞུགས་བྱེད་མཁན་ཇེ་ཉུང་དུ་འགྲོ་བཞིན་པའི་གནས་སྟངས་དང་འབྲེལ། བོད་སློབ་ཁག་རྒྱ་གར་གཞུང་གིས་བོད་མིར་གཡར་པོ་གནང་བ་ཞིག་ཡིན་སྟབས། ཅི་སྟེ་བོད་མིར་དགོས་གལ་མ་བྱུང་ཚེ་རྒྱ་གར་གཞུང་ལ་ཕྱིར་སློག་བྱ་དགོས་སྐོར་སོགས་གསུངས་ཡོད་འདུག
གསར་འགོད་པ། སྐལ་བཟང་སྦྱིན་པ།
