དབྱིན་ཡུལ་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་འཚོག་ལ་ཉེ་བ་དང་བསྟུན་༧གོང་ས་རྒྱལ་བ་རིན་པོ་ཆེ་མཆོག་ནས་སའི་གོ་ལ་འདི་ནི་ང་ཚོའི་ཁྱིམ་གཞི་གཅིག་པུ་དེ་ཡིན་པས་སོ་སོའི་ཁྱིམ་ཚང་ངམ་སྡོད་ཤག་ལ་བདག་པོ་རྒྱག་བཞིན་པ་ལྟར་འཁུར་འཁུར་ལེན་དགོས་སྐོར་གསུངས་འདུག 
ཟླ་འདིའི་ཕྱི་ཚེས་ ༣༡ ནས་ཟླ་ ༡༡ ཚེས་ ༡༢ བར་ཉིན་གྲངས་ ༡༣ རིང་དབྱིན་ཇིའི་མངའ་ཁོངས་སི་ཁོ་ཊི་ལན་ཌིའི་གྲོང་ཁྱེར་གྷ་ལ་སི་ཁོ་ (Glasgow) རུ་འཚོག་གཏན་ཁེལ་བའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ཚོགས་ཆེན་ COP26 ཞེས་པ་དང་བསྟུན། དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་བརྙན་ལམ་བརྒྱུད་འཛམ་གླིང་འདིའི་མ་འོངས་པ་ཇི་ལྟར་འགྱུར་མིན་དེ་ང་ཚོའི་ལག་པར་ཡོད་པས་གནམ་གཤིས་འགྱུར་ལྡོག་གི་དཀའ་ངལ་སེལ་དགོས་པའི་བརྙན་ལམ་གསུང་འཕྲིན་ཞིག་ཡོངས་ཁྱབ་ཏུ་གནང་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གཞུང་འབྲེལ་སྤྱི་ཚོགས་བརྒྱུད་ལམ་སྟེང་སྤེལ་བའི་བརྙན་ལམ་གསུང་འཕྲིན་ནང་མགོན་པོ་མཆོག་གིས། གོ་ལའི་ཚ་དྲོད་འཕེལ་བ་དེ་གནས་ཚུལ་ཛ་དྲག་པོ་ཞིག་རེད། ང་ཚོས་དེར་དོ་སྣང་ཆེ་ཙམ་བྱེད་དགོས། དུས་ཚོད་ནི་ནམ་ཡང་འགག་རྒྱུ་མེད་པ་ཞིག་ཡིན་པས། ང་ཚོ་ཡང་རང་བཞིན་གྱིས་དེའི་ཆ་ཤས་སུ་གཏོགས་པ་ཡིན། འདས་པ་ནི་གལ་ཆེན་པོ་ཡིན་ནའང། དེ་ནི་འདས་ཟིན་པ་ཞིག་ཡིན་པས། ང་ཚོས་འདས་པ་ལས་བློ་སྐྱེད་བླང་རྒྱུ་ཙམ་ལས་འདས་པར་འགྱུར་གཏོང་བའི་ནུས་པ་གང་ཡང་མེད། ཡིན་ནའང་། མ་འོངས་པ་ཇི་ལྟར་འགྱུར་མིན་དེ་ང་ཚོའི་ལག་ཏུ་ཡོད་པ་རེད། ཅེས་གསུངས་འདུག
ཡང་༧གོང་ས་མཆོག་གིས། བོད་ནི་མ་མཐར་ཡང་ཨེ་ཤ་ཡའི་གླིང་ཆེན་གྱི་ཆུའི་འབྱུང་ཁུངས་ལྟེ་བ་དེ་ཡིན། དཔེར་ན་པ་ཀི་སི་ཐན་ནང་གི་སེངྒེ་གཙང་པོ་ནས་བཟུང་སྟེ་རྒྱ་གར་གྱི་ཆུ་བོ་གངྒཱ་ནས་ཡར་ཀླུང་གཙང་པོ་དང་། རྒྱ་ནག་ཏུ་བཞུར་བཞིན་པའི་རྨ་ཆུ་དང་། ཝི་ཐི་ནམ་དུ་བཞུར་གྱིན་པའི་རྫ་ཆུ་བཅས་ཨེ་ཤ་ཡའི་ཆུ་བོ་ཆེ་ཁག་ཚང་མའི་འབྱུང་ཁུངས་བོད་རེད། དེར་བརྟེན་ང་ཚོས་བོད་ཀྱི་ཁོར་ཡུག་སྲུང་སྐྱོབ་ཐད་ལ་དོ་སྣང་ཆེ་བ་སྤྲོད་དགོས་ཀྱི་འདུག འདི་ནི་བོད་མི་ས་ཡ་ ༦ ནས་ ༧ བར་ཡོད་པ་དེ་དག་རྐྱང་པའི་དོན་དུ་མ་ཡིན་པར། ཨེ་ཤ་ཡའི་ས་ཁུལ་དེ་དག་གི་མི་ཡོངས་རྫོགས་ཀྱི་ཆེད་དུ་ཡིན། ཞེས་དང་། ཆ་སྙོམས་བྱས་ན་ང་ཚོའི་ཚེ་ཚད་ནི་ལོ་བརྒྱ་སྐོར་ཞིག་ཡིན་པས། ང་ཚོའི་དུས་རབས་འདི་ལ་དོ་ཁུར་ནན་པོ་ཞིག་བྱེད་དགོས་ངེས་རེད། ང་རང་ནི་དགེ་སློང་ཞིག་ཡིན་པས་ང་ལ་བུ་ཕྲུག་མེད་རུང་། སོ་སོའི་བུ་རབས་ཚ་བརྒྱུད་ཡོད་པའི་མི་རྣམས་ཀྱིས། ཁོང་ཚོའི་མ་འོངས་པའི་ཆེད་དུ་གཟབ་ནན་གྱིས་འགན་ཁུར་ཆེན་པོ་ལེན་དགོས། དེར་བརྟེན་སོ་སོའི་ཁྱིམ་ཚང་ངམ་སྡོད་ཤག་ལ་བདག་པོ་རྒྱག་པ་བཞིན། ང་ཚོ་ཚང་མར་འགན་ཁུར་ཞིག་ཡོད་པ་རེད། འཕྲུལ་རིག་ལ་བརྟེན་ནས་ང་ཚོ་ཟླ་བའི་ནང་ལས་སླ་པོ་བྱས་ནས་འགྲོ་ཐུབ་ཀྱི་ཡོད་ལ། གཟའ་སྐར་མིག་དམར་དང་དེ་མིན་གྱི་གཟའ་སྐར་གཞན་དུའང་འགྲོ་ཐུབ་ཀྱི་ཡོད། འོན་ཀྱང་གཟའ་སྐར་དེ་དག་ནང་ང་ཚོ་འཚོ་སྡོད་བྱེད་ཐབས་མེད་པ་ཧ་ལམ་མངོན་གསལ་རེད། དེར་བརྟེན། འཛམ་གླིང་འདི་ནི་ང་ཚོའི་ཁྱིམ་གཞི་གཅིག་པུ་དེ་ཡིན་པ་རེད། ཅེས་གསུངས་གནང་འདུག
ད་ཐེངས་༧གོང་ས་རྒྱལ་བ་རིན་པོ་ཆེ་མཆོག་གི་གོ་ལའི་གནམ་གཤིས་འགྱུར་ལྡོག་གི་གསུང་འཕྲིན་ནང་བོད་ཀྱི་སྣོད་བཅུད་ཁོར་ཡུག་དེ་ཉིད་གལ་འགངས་ཆེ་བའི་བཀའ་སློབ་སྩལ་གནང་ཡོད་པ་ལྟར། འདས་པའི་བདུན་ཕྲག་འགའ་ཤས་ནང་བོད་ཀྱི་གཞུང་འབྲེལ་མིན་པའི་ཚོགས་པ་རྣམས་ཀྱིས་མཉམ་འབྲེལ་ཐོག་ནས་བོད་ཀྱི་ཁོར་ཡུག་གནས་ཚུལ་དེ་ཉིད། རྒྱལ་ཚོགས་ཀྱི་ཚོགས་ཆེན་ལྟ་བུའི་སྡིངས་ཆའི་ཐོག་གླེང་སློང་དགོས་པ་དང་། གོ་ལའི་གནམ་གཤིས་འགྱུར་ལྡོག་གི་བགྲོ་གླེང་གི་གནད་དོན་ལྟེ་བར་འཛིན་དགོས་པའི་རེ་འདུན་འདོན་བཞིན་ཡོད་པ་རེད།
གསར་འགོད་པ། པ་སངས་ཚེ་རིང་།
