གྲོས་ཚོགས་འཐུས་མིའི་མནའ་འབྲེལ་ཚོགས་པའི་ཚོགས་ཆེན་སྟེང་སྲིད་སྐྱོང་མཆོག་གིས་རྒྱ་ནག་ལ་སྲིད་དང་དཔལ་འབྱོར། དམག་བཅས་ཀྱི་སྟོབས་ཤུགས་ལྡན་ནའང་། བཟང་སྤྱོད་ཀྱི་སྟོབས་ཤུགས་མེད་པར་བརྟེན། ད་ལྟ་རྒྱ་ནག་གཞུང་ངོས་ནས་འགྱུར་བཅོས་གཏོང་བའི་དུས་ཚོད་ཡིན་པ་མ་ཟད། གལ་ཏེ་འཛམ་གླིང་གི་མགོ་ཁྲིད་བྱ་འདོད་ན་རྒྱལ་སྤྱིའི་སྤྱི་ཚོགས་ཀྱི་ཡིད་ཆེས་ཐོབ་དགོས་སྐོར་གསུངས་ཡོད་འདུག
དེ་རིང་ནས་ཉིན་གྲངས་གཉིས་རིང་ཨི་ཊ་ལིའི་རྒྱལ་ས་རོམ་དུ། ཨ་རི་དང་རྒྱ་ནག་ཚུད་པའི་སྟོབས་ཆེན་རྒྱལ་ཁབ་ ༢༠ (G20 Summit) ཡི་ཚོགས་འདུ་ཐེངས་ ༡༦ པ་དེ་འཚོག་གི་ཡོད་པ་དང་བསྟུན། ཁ་སང་ཕྱི་ཚེས་ ༢༩ ཉིན་གྲོང་ཁྱེར་རོམ་དུ་འཛམ་གླིང་གི་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་ ༢༠༠ ལས་གྲུབ་པའི་རྒྱ་ནག་གཞུང་ལ་ཁ་གཏད་ཀྱི་གྲོས་ཚོགས་འཐུས་མིའི་མནའ་འབྲེལ་ཚོགས་པས་ (Inter-Parliamentary Alliance on China) གོ་སྒྲིག་ཞུས་པའི་ཚོགས་འདུའི་སྟེང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གནད་ཞུ་གནང་བ་ལྟར་མཉམ་ཞུགས་ཀྱིས། རྒྱ་ནག་གཞུང་གིས་བོད་མི་དང་ཡུ་གུར། ཐའེ་ཝན་དང་ཧོང་ཀོང་བ་རྣམས་ཀྱི་ཐོག་དྲག་གནོན་བྱེད་བཞིན་པར་སྐྱོན་བརྗོད་དང་འབྲེལ། ད་ལྟའི་དུས་རབས་འདིར་འཛམ་གླིང་ནང་སྒེར་གཅོད་རིང་ལུགས་གནས་ཐབས་མེད་པའི་སྐོར་ནས་གླེང་སློང་གནང་ཡོད་འདུག
དེ་ཡང་སྲིད་སྐྱོང་མཆོག་གིས་ཚོགས་ཐོག་ཏུ། གྲོས་ཚོགས་འཐུས་མིའི་མནའ་འབྲེལ་ཚོགས་པ་དེ་ཉིད་གསར་འཛུགས་གནང་མཁན་གྱི་གྲོས་ཚོགས་འཐུས་མི་རྣམས་ལ་ཐུགས་རྗེ་ཆེ་ཞུ་ཡི་ཡོད་པ་དང་། ད་བར་བོད་མི་དང་ལྷོ་སོག་མི་མང་། དེ་བཞིན་ཧོང་ཀོང་དང་ཡུ་གུར་མི་མང་རྣམས་ཀྱིས་མཉམ་འབྲེལ་ཐོག་ནས་རྒྱ་ནག་གཞུང་གི་དབང་ཆ་གཅིག་བསྡུས་རིང་ལུགས་ལ་ཁ་གཏད་གཅོག་རྒྱུའི་སྡིངས་ཆ་དེ་ཙམ་བྱུང་མེད་པ་རེད། ད་ལྟ་ང་ཚོ་དུས་རབས་ཉེར་གཅིག་ནང་སླེབས་ཡོད། འགྲོ་བ་མི་རྣམས་སྐྱེ་བའི་དུས་ནས་རང་དབང་ཡོད་ལ། ཁོང་ཚོར་བསམ་བློ་དང་སྨྲ་བརྗོད་རང་དབང་ཆ་ཚང་ཡོད་པ་རེད། དེར་བརྟེན་དུས་རབས་ཉེར་གཅིག་འདིར་འཛམ་གླིང་ནང་སྒེར་གཅོད་རིང་ལུགས་ཡོང་ཐབས་མེད་པ་རེད། རྒྱལ་ཁབ་ ༢༠ ཡི་ཚོགས་ཁོངས་གྲས་སུ་ཡོད་པའི་དམངས་གཙོའི་རྒྱལ་ཁབ་རྣམས་ཀྱིས་རང་གི་རྒྱལ་ཁབ་ཁོ་ན་རང་དབང་ཡོད་པས་ཆོག་གི་མེད། འཛམ་གླིང་འདི་འགྲོ་བ་མི་རྣམས་གཅིག་ལ་གཅིག་བརྟེན་གྱི་ཐོག་ནས་གནས་པའི་སྤྱི་ཚོགས་ཤིག་རེད། ཁྱེད་ཚོས་རང་གི་རྒྱལ་ཁབ་ནང་མཐོང་ཆེན་བྱེད་བཞིན་པའི་འགྲོ་བ་མིའི་རིན་ཐང་རྣམས་རྒྱ་ནག་གི་དབང་ཆ་གཅིག་བསྡུས་རིང་ལུགས་ཀྱི་བཙན་འོག་ཏུ་ཡོད་པའི་མི་མང་རྣམས་ལའང་དགོས་མཁོ་ཡོད། ཅེས་གསུངས་འདུག
ཡང་བོད་ནང་གི་ཁོར་ཡུག་གནས་སྟངས་ཀྱི་སྐོར་ལ་སྲིད་སྐྱོང་མཆོག་གིས། རྒྱལ་ཁབ་ ༢༠ ཡི་ཚོགས་འདུའི་སྟེང་གོ་ལའི་གནམ་གཤིས་འགྱུར་ལྡོག་སྐོར་གླེང་སློང་བྱ་འཆར་ཡོད་སྟབས། རྒྱ་ནག་གི་ཁོར་ཡུག་ཚན་རིག་པ་ཚོས་བོད་མཐོ་སྒང་འདི་འཛམ་གླིང་གི་སྣེ་གསུམ་པར་ངོས་འཛིན་བྱེད་ཀྱི་ཡོད་པ་རེད། དེ་ལྟར་བྱེད་དོན་ཡང་བོད་ནང་ས་འོག་དར་ཁ་ཕོན་ཆེན་ཡོད་པའི་རྐྱེན་གྱིས་ཡིན་ཞིང་། ས་འོག་དར་ཁ་དེ་ཉིད་ཨེ་ཤ་ཡའི་ནང་གི་ཆུ་མོ་ཕལ་ཆེ་བའི་འབྱུང་ཁུངས་ཆགས་ཡོད་དུས། རྒྱ་ནག་ངོས་ནས་ཁོར་ཡུག་གི་གནད་དོན་དང་གནམ་གཤིས་འགྱུར་ལྡོག་ཐད་སྟངས་འཛིན་ཇི་ལྟར་བྱེད་ཀྱི་ཡོད་མེད་སྔར་བས་ཕྱི་གསལ་ནང་གསལ་དགོས་པ་ཡིན། དེ་བཞིན་ཕྱོགས་གཅིག་ནས་རྒྱ་ནག་གིས་རང་ཉིད་གོ་ལའི་གནམ་གཤིས་འགྱུར་ལྡོག་གི་སྣེ་ཁྲིད་པ་ཞིག་ཆགས་འདོད་བྱེད་ཀྱི་ཡོད་ནའང་། ཕྱོགས་གཞན་ནས་ཁོ་ཚོས་བོད་དང་ས་ཁུལ་གཞན་ནང་བྱ་བ་ག་རེ་སྤེལ་གྱི་ཡོད་མེད་ཁ་གསལ་མེད་པ་རེད། ཅེས་དང་། རྒྱ་ནག་གཞུང་གིས་རྒྱལ་ཡོངས་ཀྱི་གྲངས་ཉུང་མི་རིགས་རྣམས་ཀྱི་ངོ་བོ་རྩ་བརླག་གཏོང་གི་ཡོད་པ་དང་། རྒྱ་ནག་གཞུང་གིས་དུས་རྒྱུན་སྤྱི་ཚོགས་འཆམ་མཐུན་ཞེས་བཤད་ཀྱི་ཡོད་ནའང་། རྒྱུ་མཚན་གང་ཡང་མེད་པར་རྒྱ་གར་གྱི་ས་མཚམས་དང་ལྷོ་རྒྱ་ནག་རྒྱ་མཚོ་ནས་ཐའེ་ཝན་བར་རྩོད་རྙོག་སློང་བཞིན་པ་དེར་ངོས་ལེན་བྱེད་ཐབས་མེད་པ་མ་ཟད། གལ་ཏེ་རྒྱ་ནག་འཛམ་གླིང་གི་མགོ་ཁྲིད་བྱ་འདོད་ཡོད་ཚེ་བྱ་སྤྱོད་དེ་རིགས་ངེས་པར་མཚམས་འཇོག་དགོས་པ་དང་། རྒྱ་ནག་ལ་སྲིད་དོན་དང་། དམག་དོན། དཔལ་འབྱོར་བཅས་ཀྱི་སྟོབས་ཤུགས་ལྡན་ནའང་། བཟང་སྤྱོད་ཀྱི་སྟོབས་ཤུགས་མེད་པར་བརྟེན། ད་ལྟ་རྒྱ་ནག་གཞུང་ངོས་ནས་འགྱུར་བཅོས་གཏོང་བའི་དུས་ཚོད་ཡིན་པ་མ་ཟད། གལ་ཏེ་འཛམ་གླིང་གི་མགོ་ཁྲིད་བྱ་འདོད་ན། རྒྱལ་སྤྱིའི་སྤྱི་ཚོགས་ཀྱི་ཡིད་ཆེས་ཐོབ་དགོས་སྐོར་གསུངས་ཡོད་འདུག
ཁ་སང་གི་ཚོགས་འདུ་དེ་བཞིན་རྒྱལ་ཁབ་ ༢༠ ཡི་ཚོགས་ཁོངས་རྒྱལ་ཁབ་ཀྱི་མགོ་ཁྲིད་རྣམ་པས་རྒྱ་ནག་གཞུང་ལ་སྲིད་ཇུས་མཁྲེགས་པོ་འཛིན་དགོས་པའི་རེ་འདུན་འདོན་ཆེན་ཡིན་པ་ལྟར། ཚོགས་ཐོག་དེར་གྲོས་ཚོགས་འཐུས་མིའི་མནའ་འབྲེལ་ཚོགས་པའི་ཚོགས་མི་ཙམ་དུ་མ་ཟད། ཡུ་གུར་མི་མང་གི་སྐུ་ཚབ་དང་ད་ལྟ་དབྱིན་ཡུལ་ནང་སྐྱབས་བཅོལ་དུ་ཡོད་པའི་ཧོང་ཀོང་ཉི་གདུགས་གསར་བརྗེའི་སྣེ་ཁྲིད་པ་དང་གྲོས་ཚོགས་འཐུས་མི་ནཱ་ཐན་ལའོ་ (Nathan Law) སོགས་ཀྱིས་གཏམ་བཤད་སྤེལ་སོང་ལ། གྲོས་ཚོགས་འཐུས་མིའི་མནའ་འབྲེལ་མཐུན་ཚོགས་ངོས་ནས་ཕྱིའི་རྒྱལ་ཁབ་རྣམས་ཀྱིས་བོད་མི་དང་ཡུ་གུར་བ། ཧོང་ཀོང་བ། རྒྱའི་མི་སེར་རྣམས་ཀྱི་ཆབ་སྲིད་ཀྱི་ངོ་བོ་དང་བྱ་འགུལ་ལ་བརྟེན་ནས་དོགས་ཡོད་ཉེས་ཅན་རྩིས་སྤྲོད་ཀྱི་མིང་ཐོག་ནས་རྒྱ་ནག་གཞུང་ལ་རྩིས་སྤྲོད་མི་བྱ་རྒྱུའི་རེ་སྐུལ་ཞུས་འདུག་པ་མ་ཟད། བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་དང་། ཚོགས་གཙོ། སྲིད་སྐྱོང་ཚུད་པའི་ཡུ་གུར་བའི་ལས་འགུལ་བ་བཅས་ལའང་དོགས་ཡོད་ཉེས་ཅན་རྩིས་སྤྲོད་མི་བྱ་རྒྱུའི་ལག་ཁྱེར་ (DO NOT EXTRADITE CARDS) ཡང་ཕུལ་ཡོད་འདུག
ཁ་སང་གི་ཚོགས་འདུ་དང་འབྲེལ་འཛམ་གླིང་གི་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་སྐོར་ཞིག་གིས་མཉམ་འབྲེལ་གྱིས་རྒྱ་ནག་གཞུང་ལ་སྐྱོན་བརྗོད་ཀྱི་བརྙན་ཐུང་ཞིག་སྤེལ་བའི་ནང་། ལོ་གཅིག་གོང་ལ་རྒྱལ་སྤྱིའི་གྲོས་ཚོགས་འཐུས་མིའི་མནའ་འབྲེལ་ཚོགས་པ་འདི་བཞིན་དམངས་གཙོའི་རྒྱལ་ཁབ་རྣམས་ཀྱིས་རྒྱ་ནག་གཞུང་ལ་ལྟ་ཕྱོགས་འགྱུར་བ་གཏོང་ཆེད་བཙུགས་པ་ཞིག་ཡིན་ལ། ད་ལྟ་ཚོགས་པ་འདི་གཞི་འཛམ་གླིང་ཡོངས་ལ་ཁྱབ་བཞིན་ཡོད། ཚོགས་པ་འདིའི་དམིགས་ཡུལ་ནི་ད་ལྟ་ཁ་ཚ་དགོས་གཏུག་ཆགས་ཡོད་སྟབས། ཚང་མས་གཅིག་སྒྲིལ་གྱིས་སྲུང་སྐྱོབ་དང་སྣེ་ཁྲིད་ཀྱི་ཕྱོགས་སུ་བསྐྱོད་དགོས། འདི་ནི་དོན་དམ་པའི་མགོ་ཁྲིད་ཅིག་ཡིན། ང་ཚོས་རྒྱལ་ཁབ་ ༢༠ ཡི་ལྷན་ཚོགས་ངོས་ནས་དེ་ལྟར་བྱ་རྒྱུའི་རེ་བ་བྱེད་དགོས་ལ། རེ་བ་བཞིན་ལེགས་གྲུབ་མ་བྱུང་བར་དུ་ང་ཚོས་ལས་འགུལ་མཚམས་འཇོག་བྱ་རྒྱུ་མིན། ཞེས་དང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གྱི་མཚོན་པའི་བྱ་སྤྱོད་དེ་དག་ནི་འགྲོ་བ་མིའི་རིགས་སྤྱི་ལ་ཉེན་ཁ་ཞིག་ཆགས་ཡོད་པ་དང་། རྒྱ་ནག་གཞུང་གིས་ཡུ་གུར་གནས་སྡོད་ས་ཁུལ་ནས་བོད་དང་། ཧོང་ཀོང་བཅས་ནང་འགྲོ་བ་མིའི་ཐོབ་ཐང་རྡོག་རོལ་གྱི་བྱ་འགུལ་གཞི་རྒྱ་ཆེན་པོ་སྤེལ་བཞིན་ཡོད་ལ། རྒྱལ་སྤྱིའི་སྡིངས་ཆའི་ཐོག་བཙན་བཀོལ་གྱི་ཕྱི་འབྲེལ་སྲིད་ཇུས་ལག་བསྟར་གྱིས་ཐའེ་ཝན་དང་རྒྱ་ནག་གཞུང་ལ་སྐྱོན་བརྗོད་བྱེད་མཁན་ཚོར་འཇིགས་སྐུལ་བྱེད་བཞིན་ཡོད་སྐོར་དང་། རྒྱལ་ཁབ་ ༢༠ ཡི་ཚོགས་ཁོངས་དམངས་གཙོའི་རྒྱལ་ཁབ་རྣམས་ཀྱིས་དམངས་གཙོའི་རིན་ཐང་སྲུང་སྐྱོབ་བྱ་དགོས་པ་མ་ཟད། རྒྱ་ནག་གཞུང་ལ་མེག་ནི་སི་ཀིའི་འགྲོ་བ་མིའི་ཐོབ་ཐང་གི་དཔལ་འབྱོར་ཉེས་ཆད་ (Magnitsky-Style Human Rights Sanction) གཅོད་དགོས་སྐོར་སོགས་ཀྱི་སྐུལ་འདེད་བྱས་ཡོད་འདུག
གསར་འགོད་པ། དཔལ་ལྡན། པ་སངས་ཚེ་རིང་།
