༧གོང་ས་མཆོག་གིས་སངས་རྒྱས་ཀྱི་ཆོས་ཟེར་བ་དེ་ཚན་རིག་དང་མཐུན་པ་ཞིག་ཡིན་པས་དེ་དངོས་གནས་དྲང་གནས་ཀྱིས་ལག་ལེན་བསྟར་ན་ཁ་ཡོད་ལག་ཡོད་ཀྱིས་འབྲས་བུ་ལག་མཐིལ་དུ་བསླེབས་པ་ཞིག་ཡོང་གི་ཡོད་རེད་ཅེས་ཨུ་རུ་སུའི་དད་ལྡན་དོན་གཉེར་ཅན་རྣམས་ལ་བཀའ་སློབ་གནང་སོང་།
དེ་རིང་ཨུ་རུ་སུའི་དད་ལྡན་དོན་གཉེར་ཅན་རྣམས་གཙོ་བོར་དམིགས་པའི་དྲ་ལམ་གསུང་ཆོས་ཉིན་གཉིས་པར༧གོང་ས་མཆོག་གིས། ཉོན་མོངས་དུག་གསུམ་དེ་ང་ཚོའི་སེམས་སུ་རང་ཆས་སུ་ཡོད་པ་མ་རེད། དཔེར་ན། ང་རང་ཚོའི་དུག་གསུམ་གྱི་འགལ་ཟླའི་བློ་དེ་དག་ལ་ང་ཚོས་བསམ་བློ་བཏང་ནས་བློ་ལ་ཉམས་མྱོང་བསྐྱེད་རྒྱུ་འདུག བློ་ཁག་གཉིས་པོ་འདི་གཅིག་གི་གཅིག་ལ་འགལ་བ་ཡོད་པ་ཞིག་ཡིན་དུས། སྡུག་བསྔལ་གྱི་རྒྱུ་ཀུན་འབྱུང་ཟེར་བ་དེའི་ལྡོག་ཕྱོགས་ཀྱི་བློ་ཡོད་པ་དང་། ལྡོག་ཕྱོགས་ཀྱི་བློ་དེ་ལ་བསམ་བློ་གཏང་ན། ཉོན་མོངས་ལ་རྒྱུ་མཚན་མེད་པ་ཞིག་དང་གློ་བུར་དུ་ཆགས་སྡང་གི་བློ་བསྐྱེད་པ་རེད་མ་གཏོགས་ཉོན་མོངས་ཀྱིས་ཆགས་སྡང་སྐྱེས་པར་རྒྱུ་མཚན་ཁྱོན་ནས་མེད་པ་ཞིག་ཡིན་པར་བརྟེན། ཉོན་མོངས་ཟེར་བ་འདིར་བསམ་བློ་བཏང་ན་ཁུངས་སྐྱེལ་མེད་ཅིང་གློ་བུར་དུ་ཚེ་རབས་ནས་ཚེ་རབས་སུ་གོམས་པའི་དབང་གིས་ཉོན་མོངས་བསླེབས་པ་ཞིག་རེད། དེ་ལ་གཉེན་པོ་ཞིག་ཡོད་རེད་ལ་གཉེན་པོ་བསྟེན་པ་ཡིན་ན་ཉོན་མོངས་ཀྱི་ཤུགས་ཆུང་དུ་ཆུང་དུ་འགྲོ་རྒྱུ་ཡོད་པ་དེ་ང་ཚོས་གང་ལ་གང་འཚམས་ཤེས་ཐུབ་ཀྱི་འདུག དེར་བརྟེན། ལས་ཀྱི་ཀུན་འབྱུང་དང་གཙོ་བོ་ཉོན་མོངས་པའི་ཀུན་འབྱུང་ཟེར་བ་དེ་ལ་གཉེན་པོ་སྟོབས་ལྡན་ཡོད་པ་དང་གཉེན་པོའི་ཕྱོགས་ལ་གོམས་ན་ཉོན་མོངས་པའི་བློ་འདི་རིམ་གྱིས་ཤུགས་ཆུང་དུ་འགྲོ་རྒྱུ་ཡོད་པ་རེད། འགོག་པ་སྔོན་དུ་བྱ་ཟེར་བ་དེར་བསམ་བློ་གཏིང་ཟབ་པོ་གཏོང་དགོས་ཀྱི་ཡོད་རེད། དེ་ཡང་སྡུག་བསྔལ་གྱི་རྒྱུ་ཀུན་འབྱུང་ཡིན་པ་དང་དེའི་རྩ་བ་ཉོན་མོངས་པའི་ཀུན་འབྱུང་དེ་མ་རིག་པ་ཡིན་པ་ཤེས་ཡོང་དུས། དེ་ལ་གཉེན་པོ་བསྟེན་ནས་སྤོང་རྒྱུ་ཡོད་པའི་བསམ་བློ་དེ་བློ་ལ་ཤར་ཡོང་དུས་ལམ་སྒོམ་པར་བྱ་བ་དེ་ཆགས་ཀྱི་ཡོད་རེད། ཅེས་གསུངས་སོང་།
ཡང་༧གོང་ས་མཆོག་གིས། ཆོས་ལུགས་ཚང་མས་བྱམས་བརྩེ་གསུང་གི་ཡོད་པ་དང་ང་རང་ཚོ་མི་ཚང་མར་བྱམས་བརྩེ་འཕེལ་གྱི་ཡོད་པ་རེད། སངས་རྒྱས་པའི་ཆོས་འདི་དཀོན་མཆོག་ལ་སྨོན་ལམ་བཏབ་པ་གཅིག་པུ་མིན་པར་སེམས་ལ་བཟོ་བཅོས་བརྒྱག་རྒྱུ་ཡོད་པ་དེ་ཞིབ་ཚགས་པོའི་ཐོག་ནས་གསུང་གི་འདུག དེའི་རྗེས་སུ་འབྲངས་ནས་རྒྱ་གར་གྱི་ནཱ་ལེནྜའི་ཆོས་སུ་བསམ་བློ་བཏང་ནས་ཀུན་འབྱུང་སྤང་པའི་འགོག་བདེན་སྒྲུབ་པའི་སྐོར་ལ་ཞིབ་ཚགས་པོ་དང་གསལ་པོ་གསུང་གི་འདུག ལྷག་པར་དུ་འཕགས་པ་ཀླུ་སྒྲུབ་ཀྱི་དབུ་མ་རིག་མཛོད་དང་རྩ་བ་ཤེས་རབ་དེ་དག་ཞེ་དྲགས་གལ་ཆེན་པོ་ཡིན་སྐོར་དང་། ང་ཚོ་ནང་པ་སངས་རྒྱས་པའི་བཀའ་དང་བསྟན་བཅོས་ཡོངས་རྫོགས་བདེན་བཞིའི་སྒོ་ནས་གསུང་ཡོང་གི་འདུག དེར་བརྟེན་ང་རང་ཚོས་སྨོན་ལམ་འདེབས་པ་ཙམ་མིན་པར་སློབ་སྦྱོང་བྱ་རྒྱུ་དེ་གལ་ཆེན་པོ་རེད། སློབ་སྦྱོང་བྱེད་དུས་ཐོག་མར་ཐོས་བྱུང་གི་ཤེས་རབ་བསྐྱེད། དེ་ནས་བསམ་བྱུང་གི་ཤེས་རབ་བསྐྱེད། སེམས་བྱུང་གི་ཤེས་རབ་བསྐྱེད་ནས་སེམས་ལ་ངེས་པ་ཐོབ་པ་དེ་ཡང་ནས་ཡང་དུ་གོམས་པར་བྱས་ནས་སྒོམ་བྱུང་གི་ཉམས་མྱོང་བསྐྱེད་པ་སོགས་ཐོས་བསམ་སྒོམ་གསུམ་གྱི་འགྲོ་སྟངས་དེ་འདྲ་རེད། ངོས་རང་གིས་ཆུང་བྱིས་པའི་དུས་ནས་དཔེ་ཆ་བསླབས་ཏེ་བསམ་བློ་བཏང་ཡོད་རེད། བསམ་བློ་གཏོང་དུས་དངོས་གནས་དྲང་གནས་ཀྱིས་ངོས་རང་ལོ་ ༦༠ དང་ ༧༠ གོང་གི་བསམ་བློ་གཏོང་སྟངས་དང་ད་ལྟའི་བསམ་བློ་གཏོང་སྟངས་ལ་འགྱུར་བ་ཆེན་པོ་འགྲོ་བ་གསལ་པོ་འདུག དེར་བརྟེན་ངོས་ཀྱིས། ཁྱེད་རང་ཚོ་ཨུ་རུ་སུའི་ཆོས་གྲོགས་ཚོས་ཐོས་བསམ་སྒོམ་གསུམ་གྱི་སྒོ་ནས་ནང་ཆོས་ལ་སློབ་སྦྱོང་སྦྱང་དགོས་ཤིང་། སངས་རྒྱས་ཀྱི་ཆོས་ཟེར་བ་དེ་ཚན་རིག་དང་མཐུན་པ་ཞིག་ཡིན་པ་དང་དེ་ལ་དངོས་གནས་ཀྱིས་ལག་ལེན་བསྟར་ན་ཁ་ཡོད་ལག་ཡོད་ཀྱིས་འབྲས་བུ་ལག་མཐིལ་དུ་བསླེབས་པ་ཞིག་ཡོང་གི་ཡོད་པ་རེད། ཅེས་གསུངས་སོང་།
དེ་ནས་ཨུ་རུ་སུའི་རྒྱལ་ཁབ་ཀྱི་མོ་སི་ཁོར་རྟེན་གཞི་བྱས་ཡོད་པའི་ཡེ་ཤེས་འཁོར་ལོའི་ཆོས་ཚོགས་ནས་ཆོས་ཞུ་བ་ (Iiya Bershin) ལགས་ཀྱིས་རྣམ་གཡེང་དང་འདོད་ཆགས་ཤུགས་ཆེ་བའི་སྤྱི་ཚོགས་འདིའི་ནང་དུ་བསམ་བློ་ཆོས་ཀྱིས་འཛིན་པར་བྱས་ནས་ཉམས་སུ་ལེན་ཚུལ་གང་འདྲ་ཡིན་སྐོར་བཀའ་འདྲི་ཞུས་པར་༧གོང་ས་མཆོག་གིས། སོ་ཐར་ནས་ཁྱིམ་ནས་ཁྱིམ་དུ་རབ་ཏུ་བྱུང་སྟེ་འགྲོ་སྟངས་བྱས་ནས་གཅིག་གསུང་གི་ཡོད་རེད། བྱང་ཆུབ་སེམས་པའི་སྡེ་སྣོད་ནས་ཀྱང་ཁྱིམ་ཚང་ཡོད་པ་བྱས་ནས་འགྲོ་མཁན་ཡོད་པ་རེད། དེ་སྔ་བོད་ཀྱི་ཉམས་ལེན་པ་མང་པོ་ཞིག་དཔེར་ན། མར་པ་ལོ་ཙ་བ་ཁོང་རང་གི་ཁྱིམ་ཚང་རྫིག་པོ་ཞིག་ལ་བཞུགས་ཀྱི་འདུག ཁོང་གིས་གཙོ་བོ་ནང་བསམ་བློའི་ཐོག་ནས་བསམ་བློ་བཏང་སྟེ་རྣམ་གཡེང་དང་ཞེན་ཆགས་རྩ་བ་ནས་མེད་པར་འཚོ་བ་བརྟེན་སྟངས་དེ་འདྲ་བྱས་ནས་འགྲོ་ཡི་ཡོད་པ་རེད། དེར་བརྟེན། ཆོས་དེ་གཙོ་བོ་བསམ་བློའི་ཐོག་ནས་འགྲོ་དགོས་པ་ཞིག་ཡིན་དུས་རིགས་གཅིག་གིས་ཁྱིམ་ནས་ཁྱིམ་དུ་རབ་ཏུ་བྱུང་སྟེ་འགྲོ་བ་གཅིག་དང་། ཡང་རིགས་གཅིག་གིས་སོ་སོའི་ལས་ཀ་ག་རེ་བྱེད་ཀྱི་ཡོད་རུང་ཁོ་རང་གིས་མུ་མཐུད་དུ་ལས་ཀ་བྱས་པའི་ཐོག་ལ་གཙོ་བོ་སེམས་ཀྱི་སྦྱོང་བརྡར་བྱས་ནས་འགྲོ་བ་ཞིག་རེད། ཅེས་སོགས་བཀའ་ལན་གནང་སྟེ་ཉིན་གཉིས་རིང་གི་གསུང་ཆོས་ལེགས་པར་གྲུབ་སོང་།
མཛད་འཆར་ལྟར་ན། ཟླ་འདིའི་ཕྱི་ཚེས་ ༡༠ ཉིན་༧གོང་ས་མཆོག་གིས་ཉི་ཧོང་གི་ཕྱི་རྒྱལ་བའི་གསར་འགོད་ལྷན་ཚོགས་ (The Foreign Correspondents Club) ཞེས་པའི་ཚོགས་པ་དང་ཉི་ཧོང་བོད་ཀྱི་སྐུ་ཚབ་དོན་གཅོད་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར། དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་སེམས་བཟང་གི་བློ་སྦྱོང་ཚུལ་ (Cultivating a Good Heart) སྐོར་ལ་བཀའ་སློབ་དང་དྲི་བར་བཀའ་ལན་སྩལ་རྒྱུ་ཡིན་འདུག
ཡང་ཟླ་འདིའི་ཕྱི་ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་དབུས་གཞུང་ནང་སྲིད་ལས་ཁུངས་ཀྱི་རྒྱལ་ཡོངས་རང་བྱུང་གནོད་སྐྱོན་འགོག་སྲུང་ལྷན་ཁང་ (The National Institute of Disaster Management, MHA, GOI) གིས་ཇི་ལྟར་གསོལ་བ་བཏབ་པ་ལྟར། དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་སྙིང་རྗེ་དང་བརྩེ་བ་ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བར་བཀའ་ལན་སྩལ་རྒྱུ་ཡིན་འདུག
གཞན་ཡང་། ཟླ་འདིའི་ཕྱི་ཚེས་ ༢༤ ཉིན་༧གོང་ས་༧སྐྱབས་མགོན་ཆེན་པོ་མཆོག་གིས་སྦིར་རྫལ་གྱི་གཞུང་འབྲེལ་མ་ཡིན་པའི་ཚོགས་པ་པཱ་ལ་སི་ཨ་ཐེ་ན་ (Palas Athena) ནས་ཇི་ལྟར་གསོལ་འདེབས་ཞུས་དོན་ལྟར་སྟོང་ལོ་གསར་པར་སེམས་ཀྱི་ཤེས་ཡོན་ (Educating the Heart in the New Millennium) ཞེས་པའི་བརྗོད་གཞིའི་ཐོག་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་དྲ་ལམ་བརྒྱུད་བཀའ་སློབ་སྩལ་གནང་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
ང་ཚོ་ནང་པ་སངས་རྒྱས་པའི་བཀའ་དང་བསྟན་བཅོས་ཡོངས་རྫོགས་བདེན་བཞིའི་སྒོ་ནས་གསུང་ཡོང་གི་འདུག དེར་བརྟེན་ང་རང་ཚོས་སྨོན་ལམ་འདེབས་པ་ཙམ་མིན་པར་སློབ་སྦྱོང་བྱ་རྒྱུ་དེ་གལ་ཆེན་པོ་རེད། སློབ་སྦྱོང་བྱེད་དུས་ཐོག་མར་ཐོས་བྱུང་གི་ཤེས་རབ་བསྐྱེད། དེ་ནས་བསམ་བྱུང་གི་ཤེས་རབ་བསྐྱེད། སེམས་བྱུང་གི་ཤེས་རབ་བསྐྱེད་ནས་སེམས་ལ་ངེས་པ་ཐོབ་པ་དེ་ཡང་ནས་ཡང་དུ་གོམས་པར་བྱས་ནས་སྒོམ་བྱུང་གི་ཉམས་མྱོང་བསྐྱེད་པ་སོགས་ཐོས་བསམ་སྒོམ་གསུམ་གྱི་འགྲོ་སྟངས་དེ་འདྲ་རེད། ངོས་རང་གིས་ཆུང་བྱིས་པའི་དུས་ནས་དཔེ་ཆ་བསླབས་ཏེ་བསམ་བློ་བཏང་ཡོད་རེད། བསམ་བློ་གཏོང་དུས་དངོས་གནས་དྲང་གནས་ཀྱིས་ངོས་རང་ལོ་ ༦༠ དང་ ༧༠ གོང་གི་བསམ་བློ་གཏོང་སྟངས་དང་ད་ལྟའི་བསམ་བློ་གཏོང་སྟངས་ལ་འགྱུར་བ་ཆེན་པོ་འགྲོ་བ་གསལ་པོ་འདུག དེར་བརྟེན་ངོས་ཀྱིས། ཁྱེད་རང་ཚོ་ཨུ་རུ་སུའི་ཆོས་གྲོགས་ཚོས་ཐོས་བསམ་སྒོམ་གསུམ་གྱི་སྒོ་ནས་ནང་ཆོས་ལ་སློབ་སྦྱོང་སྦྱང་དགོས་ཤིང་། སངས་རྒྱས་ཀྱི་ཆོས་ཟེར་བ་དེ་ཚན་རིག་དང་མཐུན་པ་ཞིག་ཡིན་པ་དང་དེ་ལ་དངོས་གནས་ཀྱིས་ལག་ལེན་བསྟར་ན་ཁ་ཡོད་ལག་ཡོད་ཀྱིས་འབྲས་བུ་ལག་མཐིལ་དུ་བསླེབས་པ་ཞིག་ཡོང་གི་ཡོད་པ་རེད།