༧གོང་ས་མཆོག་གིས་བྱམས་སྙིང་རྗེ་ཞེས་པ་དེ་ནི་མི་སྒེར་སོ་སོའི་མི་ཚེ་ཞི་བདེ་བག་ཕེབས་དང་སེམས་པ་བདེ་ཞིང་སྐྱིད་པ་ཡོང་རྒྱུ་དང་སྤྱི་ཚོགས་ལ་ཕན་རླབས་ཆེན་པོ་ཡོད་པར་བརྟེན་འཛམ་བུ་གླིང་གི་འགྲོ་བ་མིའི་རིགས་སྤྱི་དང་སེམས་ཅན་ཐམས་ཅད་ལ་དགོས་མཁོ་ཡོད་པ་ཞིག་ཡིན་སྐོར་བཀའ་སློབ་གནང་སོང་།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཉི་ཧོང་གི་ཕྱི་རྒྱལ་བའི་གསར་འགོད་ལྷན་ཚོགས་ (The Foreign Correspondents Club) ཞེས་པའི་ཚོགས་པ་དང་ཉི་ཧོང་བོད་ཀྱི་སྐུ་ཚབ་དོན་གཅོད་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར། དྲ་ལམ་ཐད་གཏོང་བརྒྱུད་སེམས་བཟང་གི་བློ་སྦྱོང་ཚུལ་ (Cultivating a Good Heart) ཞེས་པའི་བརྗོད་གཞིའི་ཐོག་ལ་བཀའ་སློབ་དང་དྲི་བར་བཀའ་ལན་སྩལ་གནང་སོང་། ཐོག་མར་༧གོང་ས་མཆོག་གིས། གཞི་རྩའི་ཐོག་ནས་བྱམས་སྙིང་རྗེ་དང་གཞན་ཕན་ཐོག་བརྩེ་བ་དང་སྙིང་རྗེ་ཟེར་བ་ནི་རང་ཆས་སུ་ཡོད་པའི་ཡོན་ཏན་ཆགས་ཀྱི་ཡོད་པ་རེད། འགྲོ་བ་སེམས་ཅན་གྱི་རིགས་ཁ་ཤས་ཤིིག་སྐྱེ་གནས་ཀྱི་རང་བཞིན་གྱིས་མའི་བྱམས་བརྩེ་ཡིས་བསྐྱངས་པ་མ་ཡིན་པ་དེ་འདྲ་ཡིན་ན་ཏོག་ཙམ་དམིགས་བསལ་ལྟ་བུ་ཆགས་ཀྱི་ཡོད་རེད། སྤྱིར་བཏང་དེ་མིན་པའི་ང་རང་ཚོའི་འཛམ་བུ་གླིང་འདིའི་ནང་སྐྱེས་པའི་འགྲོ་བ་ཕལ་མོ་ཆེ་ནི་མ་ལ་བརྟེན་ནས་སྐྱེས་པ་ཤ་སྟག་ཆགས་ཀྱི་ཡོད་པ་རེད། དེར་བརྟེན་ཕུང་པོའི་འགྲོ་སྟངས་ཀྱི་ཆ་ནས་བརྩེ་བའི་རང་བཞིན་དེ་དག་ཡོད་པ་རེད། དཔེར་ན། ཐོག་མར་སོ་སོ་བཙས་པ་ནས་བཟུང་མའི་བརྩེ་བས་མ་བསྐྱངས་པ་ཡིན་ན། ཧ་ལམ་སྲོག་འཚོ་ཐུབ་རྒྱུ་མེད་པ་ཞིག་རེད། དེར་བརྟེན། སོ་སོ་བཙས་པ་ནས་བཟུང་མའི་བརྩེ་བས་བསྐྱངས་པ་ཞིག་ཆགས་ཀྱི་ཡོད་པ་རེད། ཚན་རིག་པ་རིགས་ཁ་ཤས་ཤིག་གིས། སྤྱི་ཚོགས་ལ་བརྟེན་པའི་སེམས་ཅན་གང་ཡིན་པ་དེ་དག་རང་འཚོ་བ་གཞན་ལ་བརྟེན་ནས་འཚོ་དགོས་ཀྱི་ཡོད་སྐོར་གསུང་གི་ཡོད་རེད། འདི་ནི་ང་རང་ཚོའི་རང་བཞིན་ཆགས་ཀྱི་ཡོད་པ་རེད།གཞན་ལ་ལྟོས་དགོས་ཀྱི་ཡོད་པར་བརྟེན་རང་བཞིན་ལྷན་སྐྱེས་ལ་གཞན་ཕན་གྱི་བརྩེ་བ་ཞིག་ཡོང་གི་ཡོད་རེད། འགྲོ་བ་མིའི་རིགས་ནི་སྤྱི་ཚོགས་ལ་བརྟེན་པའི་སེམས་ཅན་གྱི་ནང་ཚན་ཆགས་ཀྱི་ཡོད་པར་བརྟེན། ང་ཚོ་འགྲོ་བ་མི་ཡིན་པའི་ཆ་ནས། ཐོག་མར་མའི་མངལ་དུ་གནས་བཞིན་པའི་ཕྲུ་གུ་ཞིག་ཡིན་ནའང། མའི་བསམ་པའི་ལྷོད་གཡང་དང་ཞི་བདེ་བག་ཕེབས་དེ་པུ་གུ་དེའི་འབྱུང་འགྱུར་གྱི་བསམ་བློའི་གནས་སྟངས་ལ་འབྲེལ་བ་ཏན་ཏན་ཡོད་རེད། དེར་བརྟེན་བྱམས་སྙིང་རྗེ་ཟེར་བ་དེ། ང་རང་ཚོ་རང་ཉིད་འཚོ་བའི་གཞི་རྟེན་ཆགས་ཀྱི་ཡོད་པ་རེད། འདི་ནི་ཆོས་ལུགས་དང་དམིགས་བསལ་གྱི་འབྲེལ་བ་མེད་པ་རེད། ཅེས་གསུངས་སོང་།
ཡང་༧གོང་ས་མཆོག་གིས། ང་རང་ཚོ་སོ་སོའི་ཉམས་མྱོང་ལ་གཞི་བཞག་པ་ཡིན་ན། མའི་མངལ་ནས་སྐྱེས་ཚར་བའི་ཕྲུ་གུ་ལོ་ ༥ དང་ ༦ ཟིན་པའི་སྐབས་སུ། རང་བཞིན་གྱིས་སོ་སོ་སྡོད་སའི་ཁོར་ཡུག་དེའི་ནང་སྐྱིད་སྣང་གི་འཚོ་བ་བསྐྲུན་ཐུབ་རྒྱུའི་ཐབས་ཤེས་བྱེད་ཀྱི་ཡོད་པ་རེད། གལ་སྲིད་ཕྲུ་གུ་ལོ་ ༦ དང་ ༧ ཟིན་པ་གཅིག་གི་ངོ་གདོང་ལ་འཛུམ་མདངས་མེད་ཅིང་ཁྲོས་བསྡད་པའི་རྣམ་འགྱུར་ཞིག་ཡོད་ན། ཕྲུ་གུ་དེའི་ཁོར་ཡུག་ལ་བརྟེན་ནས་གདོང་པའི་རྣམ་འགྱུར་མི་ལེགས་པ་ཡོད་པ་འདི་རང་བཞིན་གྱིས་མིའི་གྲས་ནས་ཕར་འབུད་པ་དང་ཟུར་དུ་ལྷག་པ་ཞིག་ཆགས་ཀྱི་ཡོད་པ་རེད། དེར་བརྟེན། ང་རང་ཚོ་རང་ཉིད་ཀྱི་སྲོག་འཚོ་བ་དང་མི་ཚེ་བདེ་སྐྱིད་དང་ལྡན་པ་ཡོང་རྒྱུ་དེ་རང་གང་དུ་སྡོད་སའི་སྤྱི་ཚོགས་ལ་བརྟེན་ནས་ཡོང་གི་ཡོད་རེད། ང་རང་ཚོའི་གཞི་རྩའི་རང་བཞིན་ཞིག་ཡིན་ཙང་ང་ཚོ་ཚང་མ་ལ་བརྩེ་བ་སྙིང་རྗེ་དགོས་ཀྱི་ཡོད་རེད། དེ་འདྲ་སོང་ཙང་། འཛམ་གླིང་གི་ཆོས་ལུགས་ཆེ་ཁག་ཆ་ཚང་གིས་བྱམས་སྙིང་རྗེའི་བསླབ་བྱ་གསུང་གི་ཡོད་རེད། ལྟ་གྲུབ་ཀྱི་ཆ་ནས་ཆོས་ལུགས་མི་འདྲ་བ་འདི་དག་ལ་ལྟ་གྲུབ་སོ་སོར་ཡོད་ཀྱང་། ལྟ་གྲུབ་ཀྱི་སྒྲུབ་དོན་བསླབ་བྱ་དེ་བྱམས་སྙིང་རྗེའི་བསླབ་བྱ་གསུངས་པ་གཅིག་གྱུར་ཆགས་ཀྱི་ཡོད་པ་རེད། དེར་བརྟེན། ང་རང་ཚོ་འགྲོ་བ་མི་རྣམས་ཀྱིས་བསླབ་བྱ་དེ་དག་ལག་ལེན་བསྟར་རྒྱུ་གལ་ཆེན་པོ་ཆགས་ཀྱི་ཡོད་རེད་ལ། བསླབ་བྱ་དེ་ང་རང་ཚོར་ཕན་རླབས་ཆེན་པོ་ཡོད་པར་བརྟེན། ཆོས་ལུགས་ཚོས་བསླབ་བྱ་དེ་དག་གསུང་གི་ཡོད་པ་རེད། ཅེས་གསུངས་སོང་།
ཆོས་ལུགས་ཀྱི་ལྟ་གྲུབ་རྩ་བ་ཉིད་ནས་མེད་མཁན་གྱི་མི་ལ་བྱམས་སྙིང་རྗེ་ལ་འབྲེལ་བ་ཡོད་མེད་སྐོར་༧གོང་ས་མཆོག་གིས། ཆོས་ལུགས་ཀྱི་ལྟ་གྲུབ་རྩ་བ་ཉིད་ནས་མེད་མཁན་གྱི་འགྲོ་བ་དེ་དག་གི་མི་ཚེའི་ནང་བྱམས་སྙིང་རྗེར་འབྲེལ་བ་ཏན་ཏན་ཆགས་ཀྱི་ཡོད་རེད། རྒྱུ་མཚན་ནི། ཁོ་རང་ཚོའང་སྲོག་འཚོ་དགོས་མཁན་ཞིག་ཡིན་པ་དང་བརྩེ་བར་བརྟེན་དགོས་པ་ཞིག་ཆགས་ཀྱི་ཡོད་པ་རེད། དེ་ཡང་བྱམས་སྙིང་རྗེ་ཟེར་བ་ནི་ང་རང་ཚོ་སོ་སོའི་བདེ་སྐྱིད་དང་སྲོག་འཚོ་བའི་གཞི་རྟེན་ཆགས་ཀྱི་ཡོད་པར་བརྟེན་འབྲེལ་བ་ཏན་ཏན་ཡོད་རེད། དེ་ལྟར་ཞུས་ན་ལེན་པོ་ཡོད་ཀྱི་མ་རེད། འོན་ཀྱང་། དངོས་ཡོད་གནས་ཚུལ་ལ། ངོས་རང་ལ་གྲོགས་པོ་དང་གྲོགས་མོ་ངོ་ཤེས་པ་མང་པོ་ཡོད། ཤར་ཕྱོགས་པ་དང་ནུབ་ཕྱོགས་པ། ད་དུང་ལྷོ་ཕྱོགས་པ་དང་བྱང་ཕྱོགས་པ་ལ་སོགས་པའི་ས་ཁུལ་གང་དུ་ཕྱིན་ནའང་ངོས་རང་གིས་དབྱེ་བ་ཕྱེ་ཡི་མེད། ད་དུང་མི་རིགས་ཀྱི་དབྱེ་བ་མི་འདྲ་བ་དང་མི་རིགས་ཀྱི་མདོག་མི་འདྲ་བ། དེ་བཞིན་ཆོས་ལུགས་མི་འདྲ་བ་ལ་སོགས་པ་གང་འདྲ་ཞིག་ཡོད་ནའང་། ངའི་ངོས་ནས་དབྱེ་བ་རྩ་བ་ཉིད་ནས་ཕྱེ་ཡི་མེད་ཅིང་ཆ་ཚང་གཅིག་གྱུར་ཡིན་པའི་འདུ་ཤེས་འཛིན་གྱི་ཡོད། དེར་བརྟེན། ངོས་རང་གིས་སོ་སོའི་ཉམས་མྱོང་གི་ངོས་ནས་ཞུས་ན། ས་ཆ་ག་པར་ཕྱིན་ནའང་མི་མང་པོ་ཞིག་གིས་འཛུམ་མདངས་ཀྱི་རྣམ་འགྱུར་དང་བརྩེ་བའི་རྣམ་འགྱུར་སོགས་ཉེ་བོ་ཡོད་པའི་བྱམས་བརྩེའི་རྣམ་འགྱུར་ཞིག་སྟོན་ཡོང་གི་འདུག གལ་སྲིད་ཏཱ་ལའི་བླ་མའི་ཞལ་རས་ཁྲོ་གཉེར་ཅན་ཞིག་ཡོད་ན་དེ་འདྲའི་གྲོགས་པོ་གྲོགས་མོ་མང་པོ་ཡོང་གི་རེད་བསམ་གྱི་མི་འདུག འོན་ཀྱང་། ད་ལྟ་ངོས་ཀྱི་གདོང་ལ་དུས་རྟག་ཏུ་འཛུམ་མདངས་ཀྱི་རྣམ་པ་ཡོད་པ་དང་གཞན་ལའང་གད་མོ་འཚེར་འཚེར་བྱས་ནས་རྣམ་འགྱུར་སྟོན་གྱི་ཡོད་པར་བརྟེན། ཆོས་ལུགས་ཡོད་མེད་སུ་འདྲ་ཞིག་ཡིན་རུང་་ངོས་ལ་དགའ་མོས་ཞེ་དྲགས་བྱེད་ཀྱི་འདུག་པར་བརྟེན། གཞན་ཕན་གྱི་བརྩེ་བ་དང་སྙིང་རྗེ་ཟེར་བ་འདི་ཞེ་དྲགས་གལ་ཆེན་པོ་རེད། བྱམས་སྙིང་རྗེ་ཟེར་བ་འདི་ཆོས་ཁས་ལེན་མཁན་ལ་འབྲེལ་བ་ཡོད་པ་དང་ཆོས་ཁས་མི་ལེན་མཁན་ལ་འབྲེལ་བ་མེད་པ་དེ་འདྲ་མ་རེད། ཆ་ཚང་ལ་འབྲེལ་བ་ཡོད་རེད། ལྷག་པར་དུ་དུད་འགྲོ་སེམས་ཅན་ལ་ཡིན་ནའང་འབྲེལ་བ་ཆགས་ཀྱི་ཡོད་པ་རེད། དཔེར་ན། ཁྱི་ལྟ་བུར་ཆ་བཞག་ན། ང་ཚོས་བརྩེ་བའི་རྣམ་པ་བསྟན་ན་ཁྱིའི་མཇུག་མ་གཡུག་ཡོང་གི་འདུག ཁྱི་ལྟ་བུ་ལའང་གདོང་པ་ནག་པོ་དང་ཁོང་ཁྲོ་བསྟན་པ་ཡིན་ན། མཇུག་མ་བཀུམ་ནས་སྐྲག་འགྲོ་མཁན་ཆགས་འགྲོ་ཡི་འདུག དེར་བརྟེན། ཆོས་ལུགས་ལ་འབྲེལ་བ་གང་ཡང་ཆགས་ཀྱི་ཡོད་པ་མ་རེད། ང་རང་ཚོ་སྤྱི་ཚོགས་ལ་བརྟེན་པའི་སེམས་ཅན་ཡིན་པར་བརྟེན་སོ་སོའི་དགོས་མཁོ་ཆགས་ཀྱི་ཡོད་པ་རེད། ཅེས་དང་། བྱམས་སྙིང་རྗེ་གལ་ཆེན་པོ་ཡིན་པའི་སྐོར་དང་དེའི་ལག་ལེན་སྐོར་སློབ་གྲྭའི་སློབ་ཚན་ནང་ཡོང་གི་མེད་པས་སྤྱི་ཚོགས་ལ་དཀའ་ངལ་དང་འཐུས་ཤོར་ཡོང་གི་ཡོད་སྟབས། བྱམས་སྙིང་རྗེའི་སྐོར་སློབ་ཚན་ཁག་གི་ནང་ཡོད་དགོས་པ་དེ་ཧ་ཅང་གལ་ཆེན་པོ་ཡིན་སྐོར་གསུངས་སོང་།
དེ་ནས་བཀའ་འདྲི་བཀའ་ལན་གནང་སྐབས། ཉི་ཧོང་གི་ཕྱི་རྒྱལ་བའི་གསར་འགོད་ལྷན་ཚོགས་ (Foreign Correspondents Club of Japan, Tokyo)ཀྱི་ཚོགས་མི་ཞིག་གིས། ཧོང་ཀོང་ནང་དུ་གསར་འགོད་པ་མང་པོ་ཞིག་ཡོད་པ་རེད། དེང་སང་ཧོང་ཀོང་དུ་ལས་འགུལ་སྤེལ་ཡོང་དུས་ཁོ་རང་ཚོའི་སྲོག་ལ་ཉེན་ཁ་དང་བཙོན་ཁང་དུ་བཅུག་པ་ལ་སོགས་པའི་དཀའ་ངལ་ཡོད་པ་དང་། དེ་བཞིན་ཧོང་ཀོང་ནང་དུ་སྤྱི་ཚོགས་ཁ་ཡོད་ལག་ཡོད་ཀྱིས་དངངས་སྐྲག་ཆེན་པོ་ཆགས་བཞིན་ཡོད་པའི་གནས་སྟངས་འོག་བདེ་སྐྱིད་དང་ལྡན་པའི་ཐོག་ནས་ག་འདྲ་གནས་དགོས་སྐོར་བཀའ་འདྲི་ཞུས་པར་༧གོང་ས་མཆོག་གིས། ང་རང་ཚོའི་སློབ་སྦྱོང་གི་ནང་དུ་ང་ཚོའི་སེམས་པ་ཞི་བདེ་བག་ཕེབས་དང་ལྡན་པ་ཡོང་རྒྱུའི་སློབ་སྦྱོང་གི་བརྒྱུད་རིམ་རྩ་བ་ཉིད་ནས་སྦྱངས་མྱོང་མེད་པར་བརྟེན་དཀའ་ངལ་ཡོང་གི་ཡོད་རེད། སྤྱིར་བཏང་ནས་ང་རང་ཚོའི་ནང་གི་བསམ་བློ་ཡར་རྒྱས་གཏོང་རྒྱུའི་ཆེད་དུ་རིག་པ་གྲུང་པོ་བཟོས་པའི་སློབ་ཚན་མ་གཏོགས་སེམས་པ་བཟང་པོ་བཟོ་བའི་སློབ་སྦྱོང་མེད་པ་རེད། དེར་བརྟེན་ཆོས་ལུགས་ལ་མ་ལྟོས་པར་ནང་གི་བསམ་པ་ཡར་རྒྱས་གཏོང་རྒྱུའི་སློབ་ཚན་ཞིག་སློབ་གྲྭའི་སློབ་ཚན་གྱི་སྡེ་ཚན་ནང་ངེས་པར་དུ་བཅུག་དགོས་ཞུ་དགོས་པའི་རྒྱུ་མཚན་དེ་རེད། དེ་ཡང་སེམས་པ་བཟང་པོ་བཟོ་བའི་སློབ་སྦྱོང་ཏོག་ཙམ་ཡོད་ན་ཁོང་ཁྲོར་གདོང་ལེན་བྱ་རྒྱུའི་གཉེན་པོ་བསྟེན་རྒྱུ་དང་དངངས་སྐྲག་མ་བྱས་པ་སོགས་ཀྱི་ཐབས་ལམ་ཤེས་ཡོང་གི་རེད། དེར་བརྟེན་གནས་སྟངས་དེ་འདྲའི་སྐབས་སུ་བྱམས་སྙིང་རྗེ་ཉམས་ལེན་བྱ་རྒྱུ་ནི་གལ་ཆེན་པོ་ཞེ་དྲགས་རེད། སྐྱེ་བ་ཕྱི་མའི་སྐོར་ཞུ་མི་དགོས་པར་ཚེ་འདི་ལའང་མི་འདི་སེམས་པ་བཟང་པོ་ཡོད་ན། རང་བཞིན་གྱིས་སྐྱིད་པོ་ཡོང་གི་རེད། རྒྱུ་མཚན་ནི་སོ་སོའི་རྒྱུད་ལ་བྱམས་སྙིང་རྗེའི་བསམ་པ་ཡོད་ན། རང་བཞིན་གྱིས་སེམས་ནང་ལ་ཞི་བདེ་ཡོང་གི་རེད་ལ། གཞན་ཕན་གྱི་བརྩེ་བ་དང་སྙིང་རྗེ་ཇི་ཙམ་གྱིས་ཆེ་བ་ཡོད་པ་དེའི་ཚོད་ཀྱིས་ནང་གི་སེམས་པའི་ཞི་བདེ་མང་བ་ཡོང་གི་ཡོད་པ་རེད། དེ་ཡང་གལ་སྲིད་གནས་སྟངས་ཛ་དྲག་དང་དཀའ་ངལ་ཆེན་པོ་ཡོད་ནའང་སོ་སོའི་ནང་སེམས་ཀྱི་ཞི་བདེ་མ་བརླགས་པར་གནས་ཐུབ་ཀྱི་ཡོད་སྐོར་དང་། དེང་སང་འཛམ་གླིང་ནང་རྙོག་དྲ་རྫོགས་རྒྱུ་མེད་པ་ཡོད་པ་དེ་ཡང་དཔལ་འབྱོར་གྱི་དཀའ་ངལ་དང་ཆབ་སྲིད་ཀྱི་དཀའ་ངལ། ད་དུང་ཁོར་ཡུག་དང་འབྲེལ་བའི་དཀའ་ངལ་སོགས་མང་པོ་ཡོད་པ་རེད། སྤྱིར་བཏང་སེམས་ཁྲལ་ཡོང་བར་རྒྱུ་རྐྱེན་སྣ་ཚོགས་ཡོད་པར་བརྟེན་སེམས་ཀྱི་ཞི་བདེ་དང་བསམ་བློ་གཏོང་ཕྱོགས་མ་འཁྲུག་པའི་སྒོ་ནས་སྡོད་ཐུབ་རྒྱུ་ནི་གལ་ཆེན་པོ་ཞེ་དྲགས་ཡིན་སྐོར་སོགས་བཀའ་ལན་གནང་སོང་།
ཡང་ཚོགས་ཞུགས་པ་ཞིག་གིས་ད་ལྟ་བར་དུ་འགྱོད་པ་ཆེ་ཤོས་ག་རེ་བྱུང་ཡོད་མེད་བཀའ་འདྲི་ཞུས་པར་༧གོང་ས་མཆོག་གིས། ངོས་རང་སྒེར་ལ་དམིགས་བསལ་གྱིས་མི་ཚེའི་ནང་འགྱོད་པ་འདི་བྱུང་སོང་དང་འགྲིག་མ་སོང་བསམ་པའི་འགྱོད་པ་མེད། མི་ཚེའི་ནང་དཀའ་ངལ་གང་འདྲ་ཞིག་འཕྲད་རུང་སོ་སོའི་སེམས་ཀྱི་བདེ་བ་མ་བརླགས་པའི་ཐོག འགྲོ་བ་མི་སྤྱིའི་བདེ་སྡུག་ལ་བསམ་བློ་བཏང་དང་གཏོང་བཞིན་ཡོད་པ་དང་འགྲོ་བ་མི་ཐེར་འབུམ་བདུན་ལྷག་ཡོད་པ་ཚང་མར་གཉེན་བཤེས་ཀྱི་འདུ་ཤེས་འཛིན་གྱི་ཡོད་པར་བརྟེན། ག་དུས་ཡིན་རུང་སོ་སོ་ཁེར་རྐྱང་གིས་ལྷག་སོང་བསམ་པའི་བསམ་བློ་རྩ་བ་ཉིད་ནས་སྐྱེ་ཡི་མེད། ང་ཚོ་ཚང་མ་གཉེན་བཤེས་རྐྱང་རྐྱང་རེད། དེར་བརྟེན་མི་ཚེའི་ནང་དམིགས་བསལ་གྱིས་འགྱོད་པ་མེད། ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
