ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་བོད་དང་ཡུ་གུར་སོགས་ལའང་རྒྱབ་སྐྱོར་བྱེད་དགོས་པ་ཞིག་རེད།

ཟླ་འདིའི་ཕྱི་ཚེས་ ༡༠ ཉིན་ཨ་རིའི་སི་ཨན་ཨན་གསར་ཁང་གི་བརྙན་འཕྲིན་ལས་རིམ་གྱིས་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊར་ལགས་སུ་རྒྱ་ནག་གཞུང་གིས་བོད་དང་ཡུ་གུར། ཐའེ་ཝན་སོགས་ལ་དྲག་གནོན་དང་མནར་གཅོད་གཏོང་མུས་ཡིན་པའི་སྐོར་ལ་བཅར་འདྲི་བྱས་ཡོད་པ་དང་བཅར་འདྲི་དེ་མགོ་འཛུགས་མ་བྱས་གོང་ལ་རྒྱ་ནག་གཞུང་གིས་སི་ཨན་ཨན་ལ་ཉེན་བརྡའི་བསྒྲགས་གཏམ་ཞིག་བཏང་ཡོད་འདུག

སི་ཨན་ཨན་གསར་ཁང་གི་གསར་འགོད་པ་དང་གཙོ་སྐྱོང་བ་ལྕམ་ཁུར་སི་ཊོན་ཨེ་མན་ཕུར་(Christine Amanpour) ལགས་ཀྱིས་ཨེ་ནེ་སི་ཀན་ཊར་ལགས་ལ་ཉེ་སྔོན་འགྲོ་བ་མིའི་ཐོབ་ཐང་དང་དྲང་བདེན་སྐོར་ལ་ཤུགས་ཆེན་བཤད་དེ་རྒྱ་ནག་མ་དགའ་བ་ཆགས་པའི་གནས་ཚུལ་དང་འབྲེལ་བའི་བཅར་འདྲི་ཞིག་བྱས་ཡོད་པ་དང་། སྐབས་དེར་གསར་འགོད་པ་ལྕམ་ཨེ་མན་ཕུར་ལགས་ཀྱིས། ཁྱེད་རང་གིས་དྲིལ་བསྒྲགས་སྤེལ་བའི་ནང་ཞི་ཅིན་ཕིང་དང་རྒྱ་ནག་དམར་ཤོག་ཚོགས་པ་ཁྱེད་ཚོར་སློབ་གསོ་སྤྲོད་དགོས་ཀྱི་འདུག ངས་སྐད་ཆ་དྲང་པོ་བཤད་ཀྱི་ཡོད་པས་དགོངས་སེལ་ནམ་ཡང་ཞུ་ཡི་མིན། ཁྱེད་ཀྱིས་ང་ཉོ་ཐུབ་ཀྱི་མ་རེད། ཁྱེད་ཀྱིས་ང་ལ་ཞེད་སྣང་ཡང་སློང་ཐུབ་ཀྱི་མ་རེད། དེ་བཞིན་ཁྱེད་ཀྱིས་ང་ཁ་བཙུམ་དུ་བཅུག་ཐུབ་ཀྱི་མ་རེད་ཅེས་བསྒྲགས་འདུག་ལ། བཅར་འདྲི་འདིའི་གོང་ལ་ལིན་ཊོན་གྱི་རྒྱ་ནག་གཞུང་ཚབ་ཁང་ནས་རྒྱལ་ཁབ་གཞན་གྱིས་རྒྱལ་ནང་གི་གནད་དོན་ལ་ཐེ་ཇུས་བྱེད་མི་ཆོག་པའི་བསྒྲགས་གཏམ་བཏང་འདུག ཁྱེད་རང་དེ་ལ་བསམ་འཆར་ག་རེ་ཡོད་ཅེས་དྲིས་པར་ཁོང་གིས། ཨེ་ནེ་སི་ཀན་ཊར་ལགས་ཀྱིས། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་རྩེད་འགྲན་པ་རྣམས་ལ་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་དང་། སྤྱི་ཚོགས་ནང་དྲང་བདེན་བྱུང་མེད་པའི་གནད་དོན་ཐད་ལ་རྒྱབ་སྐྱོར་བྱེད་ཀྱི་ཡོད་པ་དང་། ང་ལ་སིལ་སྤོལ་ལྷན་ཚོགས་ནས་འདི་འདྲ་གནང་བཅུག་པ་རེད། རྒྱུ་མཚན་ནི་དུས་རྒྱུན་དུ་ནས་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་སྐུ་ཚབ་དང་སྡེ་ཚན་སོགས་ཀྱི་སྐད་ཆ་ཤོད་སྐབས། ང་ཚོའི་རྩེད་འགྲན་པ་ཡོངས་ལ་རང་ངོས་ནས་གནད་དོན་ག་རེ་ཡིན་རུང་དེའི་ཐོག་སྐད་ཆ་བཤད་འདོད་ཡོད་ན་བཤད་ཆོག་གི་ཡོད་པ་དང་། ལྷག་པར་དུ་རྩེད་འགྲན་པ་སུ་འདྲ་ཞིག་ཡིན་རུང་འཛམ་གླིང་ཡོངས་ཀྱི་སྤྱི་ཚོགས་ནང་དུ་དྲང་བདེན་མེད་པ་དང་འགྲོ་བ་མིའི་ཐོབ་ཐང་བཙན་འཕྲོག་སོགས་ཀྱི་གནད་དོན་གང་འདྲ་ཞིག་བྱུང་རུང་དེའི་ཐོག་རྩེད་འགྲན་པ་ཡོངས་ལ་སྨྲ་བརྗོད་ཀྱི་རང་དབང་སྤྲད་པ་དང་། དེ་དག་ལ་རྒྱབ་སྐྱོར་བྱ་རྒྱུའི་རང་དབང་ཡང་སྤྲོད་ཀྱི་ཡོད། ཅེས་བརྗོད་ཀྱི་ཡོད་པར་བརྟེན། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ (NBA) ཀྱིས་ང་ལ་རང་དབང་སྤྲད་སོང་། ཅེས་བརྗོད་འདུག

གསར་འགོད་པས་ཁྱེད་རང་ལ་དངུལ་གྱིས་ཤུགས་རྐྱེན་གང་ཡང་བཟོ་ཡི་མེད་ནའང་། ཨ་རིའི་རྒྱལ་ཡོངས་སིལ་སྤོལ་རྩེད་འགྲན་ལ་དངུལ་དགོས་ཀྱི་ཡོད་སྲིད་པ་རེད། རྒྱུ་མཚན་ནི་ད་ལྟའི་ཆར་རྒྱ་ནག་གིས་སྤྱི་ཚོགས་དྲ་ལམ་ (Tencent) ནས་ (NBA) རྩེད་འགྲན་མེད་པར་བཟོས་པའི་ཤུགས་རྐྱེན་གྱིས་ཨ་སྒོར་ཐེར་འབུམ་ལྷག་གི་གྱོང་གུད་ཕོག་ཡོད་པ་རེད། དེ་ལ་ཁྱེད་རང་གི་ངོས་ནས་བསམ་ཚུལ་ག་རེ་ཡོད་ཅེས་དྲིས་པར་ཁོང་གིས། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ (NBA) ཀྱིས་མི་རིགས་ནག་པོ་རྣམས་ལ་རྒྱབ་སྐྱོར་བྱས་དང་བྱེད་མུས་ཡིན་པ་རེད། འོན་ཀྱང་རྒྱ་ནག་དང་འབྲེལ་བའི་གནད་དོན་ཐད་ལྷན་ཚོགས་ཀྱིས་གང་ཡང་མི་བཤད་པར་ཁུ་སིམ་མེར་སྡོད་ཀྱི་འདུག གལ་སྲིད་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་ང་ལ་རྒྱབ་སྐྱོར་བྱེད་ཀྱི་ཡོད་ན། ཁོང་ཚོས་བསྒྲགས་གཏམ་སོགས་སྤེལ་དགོས་རེད་དེ་ད་ལྟའང་བསྒྲགས་གཏམ་སོགས་ཅི་ཡང་སྤེལ་མི་འདུག མི་མང་པོས་ངས་སྲིད་དོན་གྱི་བྱ་བ་བྱེད་ཀྱི་ཡོད་རེད་བསམ་གྱི་འདུག  ངས་འགྲོ་བ་མིའི་ཐོབ་ཐང་ཐོག་ལ་རྩོད་ལེན་བྱས་པ་ལས་ཆབ་སྲིད་ཀྱི་ལས་དོན་བྱེད་ཀྱི་མེད་ཅེས་དང་། རྒྱ་ནག་གིས་གཞི་རྩའི་འགྲོ་བ་མིིའི་ཐོབ་ཐང་བཙན་འཕྲོག་བྱས་པ་སོགས་འགྲོ་བ་མིའི་ཐོབ་ཐང་དང་རང་དབང་མ་སྤྲད་པ་སོགས་དྲག་གནོན་གྱི་ལས་དོན་སྤེལ་བའི་གནད་དོན་ཐོག ཁོང་གིས་གོ་རྟོགས་གང་མང་སྤེལ་རྒྱུ་དང་བོད་དང་ཡུ་གུར་གཙོས་པའི་རྒྱལ་ཁབ་ཁག་ལ་རྒྱབ་སྐྱོར་མུ་མཐུད་གནང་རྒྱུ་ཡིན་སྐོར་བརྗོད་སོང་།  རྒྱལ་ཁབ་ཡོངས་ལ་རྩེད་འགྲན་པ་དང་གློག་བརྙན་འཁྲབ་སྟོན་པ། དེ་བཞིན་གཞས་པ་དང་གཞས་མ་སོགས་སྣ་མང་ཡོད་པ་དེ་དག་ལ་འཛམ་བུ་གླིང་སྤྱི་ཡོངས་ཀྱི་གནད་དོོན་དང་འབྲེལ་བའི་སྐད་ཆ་བཤད་ཆོག་པའི་སྡིངས་ཆ་མང་པོ་ཡོད་ཀྱང་། རྒྱ་ནག་གི་གནད་དོན་འདིའི་ཐོག་ལ་ཚང་མས་ཞེད་སྣང་བྱེད་ཀྱི་འདུག རྒྱུ་མཚན་ནི་ཁོང་ཚོས་དངུལ་དང་ཚོང་འབྲེལ་སོགས་ལ་དོ་སྣང་མང་བ་བྱེད་ཀྱི་ཡོད་པ་རེད། ང་རང་ལ་ཆ་བཞག་ན། འགྲོ་བ་མིའི་ཐོབ་ཐང་དང་མི་མང་གི་ཚེ་སྲོག་སྲུང་སྐྱོབ་བྱ་རྒྱུ་དེ་དང་པོ་ཆགས་ཀྱི་ཡོད། ཅེས་བརྗོད་སོང་།

བཅར་འདྲིའི་སྐབས་སུ་ཀན་ཊར་ལགས་ཀྱིས། ཉེ་ཆར་ཨ་རིའི་རྒྱལ་ཡོངས་སིལ་སྤོལ་རྩེད་འགྲན་སྐབས་ཁོང་གིས་བོད་དང་ཡུ་གུར་སོགས་ལ་རྒྱབ་སྐྱོར་མཚོན་པའི་རི་མོ་དང་ཡི་གེ་བྲིས་ཏེ། བོད་དོན་དང་ཐའེ་ཝན་སོགས་ཀྱི་སྐོར་ལ་དྲིལ་བསྒྲགས་བྱས་པའི་ལྷམ་གྱོན་ཏེ་རྩེད་འགྲན་ནང་ཞུགས་སྐབས། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་ཚོགས་མི་གཉིས་ཀྱིས་ལྷམ་འདི་མ་གྱོན་ལབ་བྱུང་། སྐབས་དེར་ངས་ལྷམ་འདི་གྱོན་ན་སྒྲིག་འཛུགས་འགལ་བ་རེད་དམ། ཞེས་དྲིས་པ་ཡིན། ཁོང་ཚོས་སྒྲིག་འཛུགས་དང་འགལ་མི་འདུག་ཅེས་བརྗོད་བྱུང་། ང་རང་ལྷན་ཚོགས་ཀྱི་སྒྲིག་འཛུགས་དང་འགལ་མེད་པས་ལྷམ་འདི་གྱོན་ནས་རྩེད་མོ་རྩེས་པ་ཡིན་ཞེས་སོགས་བརྗོད་སོང་།

ཁ་སང་སྤྱི་ཚོགས་བརྒྱུད་ལམ་ (Instagram) ནང་ཐའེ་ཝན་གྱི་སྲིད་འཛིན་ཚེ་ཡེན་ཝུན་(Tsai Ing Wen)མཆོག་གིས། ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་རྩེད་འགྲན་པ་ཨེ་ནེ་སི་ཀན་ཊར་ལགས། ང་ཚོས་ཁྱེད་ལ་བརྩི་བཀུར་ཞུ་ཡི་ཡོད་ལ། ཁྱེད་ཀྱི་ལྷམ་ཐོག་ #StandWithTaiwan བྲིས་ཏེ་ཐའེ་ཝན་མི་མང་ལ་རྒྱབ་སྐྱོར་གྱི་དྲིལ་བསྒྲགས་གནང་ཡོད་སྟབས། ཐའེ་ཝན་ལ་རྒྱབ་སྐྱོར་དང་འགྲོ་བ་མིའི་ཐོབ་ཐང་དང་དམངས་གཙོར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། མ་འོངས་པར་ཁྱེད་ཀྱིས་སིལ་སྤོལ་རྩེ་སྐབས་ང་ཚོས་དགའ་བསུའི་སྐད་འབོད་དང་རྒྱབ་སྐྱོར་ཞུ་རྒྱུ་ཡིན། ཞེས་གསུངས་འདུག

སི་ཨན་ཨན་གྱི་བཅར་འདྲིའི་ལས་རིམ་དེ་མགོ་མ་བཙུགས་གོང་རྒྱ་ནག་གིས་གསར་ཁང་ལ་ཉེན་བརྡའི་བསྒྲགས་གཏམ་ཞིག་བཏང་བའི་ནང་།  ཨེ་ནེ་སི་ཀན་ཊར་གྱིས་ཤིན་ཅང་ཁུལ་དུ་འགྲོ་བ་མིའི་ཐོབ་ཐང་དང་རང་དབང་སོགས་བཙན་འཕྲོག་དང་གདུག་རྩུབ་གཏོང་གི་ཡོད་སྐོར་དང་། བོད་ཀྱི་ཆོས་དང་རིག་གཞུང་རྣམས་རྩ་མེད་བཟོ་ཡི་ཡོད་པ། དེ་བཞིན་བྲན་གཡོག་གི་ལམ་ལུགས་སོགས་དྲག་གནོན་གྱི་སྲིད་ཇུས་བེད་སྤྱོད་བྱས་དང་བྱེད་མུས་ཡིན་སྐོར་བརྗོད་པ་དེ་དག་རྫུན་མ་རེད། རྒྱལ་ཁབ་གཅིག་གི་འགྲོ་བ་མིའི་ཐོབ་ཐང་གི་གནས་སྟངས་དེ་རྒྱལ་ཁབ་དེའི་མི་མང་གི་ལྟ་ཚུལ་(Judgement) ལ་གཞི་བཅོལ་དགོས་པ་ཞིག་ཡིན་ལ། བོད་དང་ཤིན་ཅང་གཉིས་ཀྱི་གནད་དོན་དེ་དག་ནི་རྒྱ་ནག་ནང་གི་གནད་དོན་ཡིན་པ་ལས་རྒྱལ་ཁབ་གཞན་གྱིས་ཐེ་བྱུས་བྱེད་ཆོག་གི་མེད་སྐོར་བརྗོད་འདུག

གསར་འགོད་པ། བསྟན་འཛིན་ཕུར་བུ།