སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ནས་སྐབས་བཅུ་བདུན་པའི་སྤྱི་གསར་རྣམས་ལ་ཟབ་སྦྱོང་སྤྲོད་ཀྱི་འདུག
དེ་རིང་ཕྱི་ཚེས་ ༢༣ ཉིན་ནས་གསར་དུ་འོས་འདེམས་བྱུང་བའི་སྐབས་བཅུ་བདུན་པའི་བོད་མི་མང་སྤྱི་འཐུས་གསར་བ་རྣམས་ལ་བོད་མི་མང་སྤྱི་འཐུས་ལྷན་ཚོགས་ཀྱི་གོ་སྒྲིག་འོག དྷ་ཤོད་བོད་ཁྱིམ་གྱི་ཉེ་འཁྲིས་ (Angels Inn) གསོལ་མགྲོན་ཁང་དུ། བཙན་བྱོལ་བོད་མིའི་བཅའ་ཁྲིམས་ཀྱི་གཙོས་བོད་མིའི་སྒྲིག་འཛུགས་ཀྱི་སྲིད་ཇུས་ལངས་ཕྱོགས་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་དེ་འབྲེལ་གྱི་གཞུང་དངུལ་འདུ་འགོད་དང་ལོ་འཁོར་སྔོན་རྩིས་སོགས་ཀྱི་སྐོར་ལ་ཟབ་སྦྱོང་དབུ་འཛུགས་ཞུས་ཡོད་པ་རེད།
དེ་ཡང་སྐབས་བཅུ་བདུན་པའི་སྤྱི་འཐུས་གསར་བ་རྣམས་ཀྱི་ཟབ་སྦྱོང་གི་དུས་ཡུན་ནི་ཉིན་ལྔའི་རིང་ཡིན་ཞིང་། ཟབ་སྦྱོང་ནང་བོད་མི་མང་སྤྱི་འཐུས་གསར་རྙིང་གཉིས་ཀྱི་མཉམ་ཞུགས་མཁན་བྱུང་ཡོད་པ་དང་། ཟབ་འཁྲིད་གནང་མཁན་ནི་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ཡིན་པ་རེད།
ཟབ་སྦྱོང་གི་ལས་རིམ་ལྟར་ན། དེ་རིང་ཕྱི་ཚེས་ ༢༣ དང་ཟབ་སྦྱོང་གི་ཉིན་མཐའ་མ་སྟེ་ཕྱི་ཚེས་ ༢༧ ཉིན་མཁན་པོ་བསོད་ནམས་བསྟན་འཕེལ་མཆོག་ནས་སྤྱི་གསར་རྣམས་ལ། གཙོ་བོ་བཙན་བྱོལ་བོད་མིའི་བཅའ་ཁྲིམས་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་སོགས་ཀྱི་སྐོར་ལ་ཟབ་སྦྱོང་ཕུལ་གནང་གི་ཡོད་པ་རེད།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སང་ཉིན་ཕྱི་ཚེས་ ༢༤ ཉིན་ནས་ཉིན་གསུམ་རིང་གཙོ་བོ་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་དང་། བོད་རྒྱ་འབྲེལ་མོལ་སྐོར། དེ་བཞིན་བཙན་བྱོལ་བོད་མིའི་དཔལ་འབྱོར་འདུ་འགོད་དང་ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི་དང་། སྔོན་རྩིས་འགྲོ་སྟངས་སྐོར། བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་རང་དབང་ཅན་གྱི་སྡེ་ཚན་ཁག་གི་སྐོར་ནས་ཟབ་འཁྲིད་གནང་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
བོང་རྒན་འདི་ཚོའི་རྣ་བར་གསེར་བླུགས་ནས་ཕན་པ་ཅི་ཞིག་ཡོད་རེད།