རྒྱ་ནག་གིས་འཕྲུལ་རིག་བཟོ་སྐྲུན་ཁང་ཉེར་བདུན་ཙམ་ནས་ཨ་རིའི་དམག་དོན་དང་འབྲེལ་བའི་འཕྲུལ་རིག་དཔེ་བཤུ་བྱེད་ཀྱི་ཡོད་པར་བརྟེན། ཨ་རིས་རྒྱ་ནག་གི་འཕྲུལ་རིག་ཚན་རྩལ་ཁང་དེ་དག་ཁྲིམས་འགལ་ལ་ངོས་འཛིན་བྱས་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཨ་རིའི་ཚོང་ལས་སྡེ་ཚན་གྱིས་རྒྱལ་ཁབ་ཀྱི་བདེ་འཇགས་དང་ཕྱི་སྲིད་ཀྱི་ལས་དོན་དང་འབྲེལ་ནས་སེམས་འཚབ་སྐྱེ་ཡུལ་ཆགས་པའི་གནས་སྟངས་འོག སླར་ཡང་རྒྱ་ནག་གི་འཕྲུལ་རིགས་བཟོ་གྲྭ་ཁག་ ༢༧ ཨ་རིའི་ཚོང་འབྲེལ་གྱི་ཁྲིམས་འགལ་ཐོ་གཞུང་འོག་བཅུག་ཡོད་པ་རེད།
དེ་འབྲེལ་ཐད་ཨ་རིའི་ཚོང་ལས་སྡེ་ཚན་གྱི་དྲུང་ཡིག་ཆེན་མོ་ཇའེ་ནཱ་ (Gina Raimondo) ལགས་ཀྱིས་བསྒྲགས་གཏམ་སྤེལ་བའི་ནང་། ཁྲིམས་འགལ་ཐོ་གཞུང་གསར་པ་འདི་ཡིས་ཨ་རིའི་འཕྲུལ་ཆས་ཀྱི་རོགས་རམ་འོག་ནས་རྒྱ་ནག་དང་ཨུ་རུ་སུའི་དམག་ཤུགས་འཕེལ་རྒྱས་བཀག་འགོག་བྱེད་ཐུབ་པ་མ་ཟད། ཉེན་སྲུང་མེད་པའི་པ་ཀི་སི་ཐན་གྱི་རྡུལ་མཚོན་ལྟ་བུ་རྒྱལ་སྤྱིའི་རྡུལ་མཚོན་ཁྱབ་གདལ་ཚོད་འཛིན་ལས་བརྒལ་བར་བཀག་འགོག་བྱེད་ཐུབ་ཀྱི་ཡོད་སྐོར་བརྗོད་འདུག
བྷི་བྷི་སི་གསར་ཁང་གི་གནས་ཚུལ་ལྟར་ན། ཨ་རི་དང་རྒྱ་ནག་བར་ཐའེ་ཝན་གྱི་གནད་དོན་ཐད་འགལ་ཟླ་ཤུགས་ཆེན་བྱུང་བཞིན་པའི་སྐབས་འདིར། རྒྱ་ནག་གི་འཕྲལ་རིག་བཟོ་གྲྭ་དེ་དག་གིས་ཨ་རིའི་དམག་དོན་དང་འབྲེལ་བའི་འཕྲུལ་རིག་དག་རྒྱ་ནག་ནང་བཟོ་སྐྲུན་ཐུབ་ཐབས་བྱེད་ཀྱི་ཡོད་པར་བརྟེན། ཨ་རིས་རྒྱ་ནག་གི་འཕྲུལ་རིགས་བཟོ་གྲྭ་དེ་དག་བཀག་བསྡོམས་བྱས་པ་ཡིན་པ་དང་། བཀག་བསྡོམས་བྱས་པའི་བཟོ་གྲྭ་ ༢༧ ཁྲོད། རྒྱ་ནག་གི་བཟོ་གྲྭ་ ༨ དང་། རྒྱ་ནག་དང་པ་ཀི་སི་ཐན་ནང་ལས་དོན་གཉེར་བཞིན་པའི་མི་སྒེར་དང་ཚོགས་སྡེ་ཁག་ ༡༦ དང་། དེ་བཞིན་དུ་ཉི་ཧོང་དང་སིང་གྷ་པོར་བཅས་ཀྱི་ཚོགས་སྡེ་ཁག་ཡོད་འདུག་ལ། ཁྲིམས་འགལ་གྱི་ཐོ་གཞུང་འོག་བཅུག་པའི་ཚོགས་སྡེ་དེ་དག་ནས་ཨ་རི་ནས་ཅ་དངོས་ཉོ་ཚོང་དང་དེ་འབྲེལ་གྱི་མཉམ་ལས་དང་འབྲེལ་བའི་ལས་རིགས་ཡོངས་མཚམས་འཇོག་བྱས་ཡོད་འདུག
གཞན་ཡང་ཨུ་རུ་སུའི་རྒྱལ་ས་མོ་སི་ཁོ་དངོས་ཁམས་དང་འཕྲུལ་རིགས་མཐོ་རིམ་སློབ་གཉེར་ཁང་ (Moscow Institute of Physics and Technology) ཟེར་བ་དེ་ཡིས་དམག་གི་འཕྲུལ་རིག་རྒྱ་སྐྱེད་བཏང་བའི་ངོས་འཛིན་འོག ཨ་རིའི་ཁྲིམས་འགལ་གྱི་ཐོ་གཞུང་ནང་བཅུག་ཡོད་འདུག
ཐེངས་འདིར་ཨ་རིས་རྒྱ་ནག་གི་འཕྲུལ་རིག་བཟོ་ལས་ཁང་ཁྲིམས་འགལ་གྱི་ཐོ་གཞུང་ནང་གཡུགས་པ་ཐོག་དང་པོ་མིན་པར། ཕྱི་ལོ་ ༢༠༡༩ ཟླ་ ༤ པའི་ནང་རྒྱ་ནག་གི་འཕྲུལ་ལས་བཟོ་སྐྲུན་ཁང་ཆེ་ཤོས་ཧཱ་ཝེ་ཨ་རིའི་བདེ་འཇགས་གནད་དོན་དང་འབྲེལ་ནས་ཁྲིམས་འགལ་གྱི་ཐོ་གཞུང་ནང་བཅུག་ཡོད་པ་དང་། དེ་བཞིན་རྒྱ་ནག་གི་ཅ་དངོས་བཟོ་ལས་ཁང་ཁག་ཅིག་ཀྱང་བཀག་སྡོམ་འོག་བཞག་སྟེ། དེ་དག་གིས་ཨ་རི་དང་ཚོང་འབྲེལ་བྱེད་པར་ཨ་རིའི་གཞུང་ནས་ཆོག་མཆན་དགོས་པར་བཟོས་ཡོད་པ་མ་ཟད། ཕྱི་ལོ་ ༢༠༡༩ ཟླ་ ༡༠ ཚེས་ ༧ ཉིན་ཨ་རིའི་ཚོང་ལས་སྡེ་ཚན་གྱིས་གསལ་བསྒྲགས་སྤེལ་ཏེ། རྒྱ་ནག་གི་འཕྲུལ་ལས་བཟོ་གྲྭ་ཁག་དང་ཚོགས་པ་ཁག་ཅིག་གིས་རྒྱ་ནག་གཞུང་དང་མཉམ་འབྲེལ་གྱིས་ཤིན་ཅང་དང་ཡུ་གུར་ནང་དམ་དྲག་དང་། འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་སྐོར་བརྗོད་དེ། རྒྱ་ནག་གི་འཕྲུལ་ལས་བཟོ་གྲྭ་དང་ཚོགས་པ་ཁག་ ༢༨ མིང་ཐོ་ནག་པོའི་ནང་དུ་བཅུག་སྟེ། ཚོགས་པ་དེ་དག་གིས་ཨ་རི་ནས་ཅ་དངོས་རིགས་ཉོ་ཚོང་དང་མཉམ་ལས་རིགས་མེད་པར་བཟོས་ཡོད་འདུག
ད་དུང་ཉེ་ལམ་ཨ་རིའི་སྲིད་འཛིན་རྗོ་བྷའེ་ཌིན་མཆོག་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཀྱིས་དངོས་སུ་དྲ་ལམ་ནས་མཇལ་མོལ་ཐེངས་དང་པོ་གནང་སྐབས། ཨ་རིའི་སྲིད་འཛིན་གྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་བོད་དང་ཧོང་ཀོང་། ཡུ་གུར། དེ་བཞིན་ཐའེ་ཝན་སོགས་ཀྱི་གནད་དོན་ཐད་གླེང་སློང་བྱས་ཡོད་ཅིང་། ལྷག་པར་དུ་རྒྱ་གཞུང་གིས་ཐའེ་ཝན་རྒྱལ་ཁབ་ལ་དྲག་དམག་གིས་ལས་འགུལ་མང་པོ་སྤེལ་ནས་ཡུལ་དེའི་རྒྱལ་སྲུང་དང་ཞི་བདེར་རྡོག་རོལ་བཏང་བའི་གནད་དོན་ཐད་སེམས་འཚབ་ཡོད་སྐོར་སོགས་བརྗོད་ཡོད་འདུག
གསར་འགོད་པ། བསྟན་འཛིན་ཕུར་བུ།
