དེ་རིང་རྒྱ་གར་གྱི་གསར་ཁང་རི་པཱབ་ལིག་བརྙན་འཕྲིན་ཁང་(Republic TV)གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་བརྙན་ལམ་བརྒྱུད་བཅར་འདྲི་བྱེད་སྐབས། སྲིད་སྐྱོང་མཆོག་ནས་འབྱུང་འགྱུར་ཟླ་བ་གཅིག་གཉིས་ནང་གཞུང་འབྲེལ་བརྒྱུད་ལམ་ཐོག་ནས་རྒྱ་ནག་གཞུང་ལ་བོད་རྒྱ་འབྲེལ་མོལ་བསྐྱར་གསོའི་ཐད་ཡིག་ཆ་ཞིག་སྤྲོད་རྒྱུ་ཡིན་ལ། ཡིག་ཆ་དེར་བརྡ་ལན་སྤྲོད་མིན་ནི་རྒྱ་ནག་གཞུང་ལ་རག་ལས་ཡོད་སྐོར་གསུངས་འདུག
དེ་ཡང་གསར་ཁང་དེའི་གསར་འགོད་པས་ཉེ་ཆར་རྒྱ་ནག་གཞུང་ངོས་ནས་༧གོང་ས་མཆོག་ལ་མགོན་པོ་གང་ཉིད་སྐུ་རྐྱང་གི་སྐོར་ལ་གླེང་མོལ་ཞུ་རྒྱུའི་འདོད་པ་ཡོད་ཀྱང་། བོད་སྐོར་ལ་གྲོས་མོལ་བྱ་རྒྱུ་མིན་ཞེས་པའི་སྐད་ཆ་ཞིག་བཤད་པའི་སྐོར་ལ་དགོངས་ཚུལ་ཅི་ཡོད་ཞུས་པར་སྲིད་སྐྱོང་མཆོག་གིས། ༧གོང་ས་མཆོག་ནས་དུས་དང་དུས་སུ་འདི་ནི་ཁོང་རང་ཉིད་ཀྱི་གནད་དོན་ཙམ་ཞིག་མིན་པར་བོད་ནང་ཡོད་པའི་བོད་མི་ས་ཡ་ ༦ གི་གནད་དོན་ཞིག་ཡིན་སྐོར་ཡང་ཡང་གསུངས་ཡོད་ལ། དུས་རྒྱུན་དུ་རྒྱ་ནག་གི་བཤད་སྟངས་དེ་རང་ཡིན་པ་རེད། འདི་ནི་རྒྱ་ནག་གཞུང་གིས་འཛམ་གླིང་མི་མང་ལ་ཁོ་ཚོས་༧གོང་ས་མཆོག་མ་གཏོགས་བོད་མིའི་སྐོར་གླེང་སློང་བྱ་འདོད་མེད་པའི་ཕྱིའི་རྣམ་པ་ཙམ་ཞིག་བསྟན་པ་རེད། ང་ཚོ་གནད་དོན་དེར་ཧང་སངས་དགོས་པ་དེ་འདྲ་བྱུང་མ་སོང་ཡང་། ང་ཚོས་མུ་མཐུད་ནས་རྒྱ་ནག་གཞུང་ལ་མཐུད་ཐབས་བྱ་རྒྱུ་ཡིན། ཞེས་གསུངས་འདུག
ཡང་བོད་རྒྱ་འབྲེལ་མོལ་བསྐྱར་མཐུད་ཡོང་མིན་ཐད་ལ་སྲིད་སྐྱོང་མཆོག་གིས། ང་ཚོས་འབྱུང་འགྱུར་ཟླ་བ་གཅིག་གཉིས་ནང་རྒྱ་ནག་གཞུང་ལ་ཡིག་ཆ་ཞིག་སྤྲོད་རྒྱུ་ཡིན་ལ། དེའི་མཉམ་དུ་བོད་ནང་གི་གནས་སྟངས་ལ་ཞིབ་འཇུག་བྱས་ཏེ་བང་རིམ་ལྡན་པའི་ཐོག་ནས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་སྲིད་ཇུས་དང་ལས་འཆར་དག་གིས་བོད་མིའི་ངོ་བོ་རྒྱུན་གནས་ལ་གནོད་པ་ཙམ་དུ་མ་ཟད། རྒྱ་ནག་རྒྱལ་ཁབ་རང་ལའང་གནོད་གཞིར་འགྱུར་ཚུལ་གྱི་ཡིག་ཆ་ཞིག་སྤྲད་རྒྱུ་ཡིན་པ་དེར་རྒྱ་ནག་གཞུང་ངོས་ནས་བརྡ་ལན་ཅི་འདྲ་སྤྲད་མིན་ལ་རག་ལས་པ་ཞིག་རེད། ཡིག་ཆ་དེ་ཉིད་གཞུང་འབྲེལ་གྱི་བརྒྱུད་ལམ་རང་ཐོག་ནས་རྒྱ་ནག་གཞུང་ལ་སྤྲོད་རྒྱུ་ཡིན་ནའང་། རྒྱ་ནག་གཞུང་ངོས་ནས་དེར་བརྡ་ལན་སྤྲོད་མིན་ནི་རྒྱ་ནག་ལ་རག་ལས་པ་ལས་ང་ཚོའི་ལག་ཏུ་མེད་པ་རེད། ཅེས་གསུངས་འདུག
ཡང་གསར་འགོད་པས་སྲིད་སྐྱོང་མཆོག་གིས་རྒྱ་གར་གཞུང་ངོས་ནས་བོད་མིའི་འཐབ་རྩོད་ལ་ཤུགས་སྣོན་བརྒྱབ་དགོས་པའི་དགོངས་ཚུལ་ཡོང་གི་ཡོད་མེད་བཀའ་འདྲི་ཞུས་པར་ཁོང་གིས། རྒྱ་གར་གཞུང་ངོས་ནས་ག་རེ་གནང་དགོས་མིན་གསལ་པོ་ཤེས་ཀྱི་ཡོད་པས། སྲིད་སྐྱོང་ངོས་ནས་དེར་ལམ་སྟོན་ལྟ་བུ་གནང་དགོས་པ་མེད་སྐོར་དང་། བོད་མིའི་སྒྲིག་འཛུགས་དང་རྒྱ་གར་གཞུང་གི་འབྲེལ་ཡོད་ལས་ཁུངས་དབར་དུས་རྒྱུན་དུ་འབྲེལ་བ་ཡོད་མུས་ཡིན་ནའང་། འདི་ལོའི་ཕྱི་ཟླ་ ༧ པའི་རྗེས་སུ་རྒྱ་ནག་ཕྱོགས་ནས་གཞུང་འབྲེལ་གྱི་བརྡ་ལན་དམིགས་བསལ་མེད་པའི་རྒྱུ་མཚན་གྱིས་རྒྱ་གར་གཞུང་ལ་སྙན་གསེང་ཞུ་རྒྱུའི་གནས་ཚུལ་གསར་པ་བྱུང་མེད་སྐོར་དང་། བོད་མིའི་སྒྲིག་འཛུགས་ངོས་ནས་བོད་མི་དང་རྒྱ་གར་གྱི་ཁེ་ཕན་དང་འབྲེལ་བའི་གནས་ཚུལ་རིགས་རྒྱ་གར་གཞུང་དང་ཕྱི་གསལ་ནང་གསལ་བྱ་རྒྱུའི་སྲིད་ཇུས་བརྟན་པོ་འཛིན་བཞིན་ཡོད་སྐོར་གསུངས་ཡོད་འདུག
ཨ་རི་དང་རྒྱ་གར་སོགས་ཀྱིས་བོད་དོན་ཐད་གྲུབ་འབྲས་ལྡན་པའི་རྒྱབ་སྐྱོར་གནང་ཐུབ་མིན་སྐོར་བཀའ་འདྲི་ཞུས་པར་སྲིང་སྐྱོང་སྤེན་པ་ཚེ་རིང་མཆོག་གིས། ངའི་བསམ་ཚུལ་ལ་འཛམ་གླིང་མི་མང་གིས་རྒྱ་ནག་རྒྱལ་སྤྱིའི་ཚོགས་སྡེ་ཁག་ནང་མཉམ་ཞུགས་བྱས་ཏེ་འགན་འཁྲི་ལེན་སྲིད་པའི་རེ་བ་བྱས་ཡོད་ལ། ང་ཚོས་ཀྱང་དེ་ལྟར་རེ་བ་བཅངས་ཏེ་༧གོང་ས་སྐྱབས་མགོན་ཆེན་པོ་མཆོག་གིས། རྒྱ་ནག་གཞུང་གིས་ཨོ་ལིམ་ཕིག་རྩེད་འགྲན་གོ་སྒྲིག་བྱ་རྒྱུ་དང་། འཛམ་གླིང་ཚོང་འབྲེལ་སྒྲིག་འཛུགས་(WTO) སུ་མཉམ་ཞུགས་བྱ་རྒྱུར་རྒྱབ་སྐྱོར་གནང་ཡོད་པ་རེད། འོན་ཀྱང་ད་ལྟའི་གནས་སྟངས་ལ་བལྟས་ན། རྒྱ་ནག་གཞུང་ལ་ངོ་དགའ་ཅི་འདྲ་བྱས་ནའང་ཁོ་ཚོས་སྟོབས་ཆེན་ལ་མ་གཏོགས་ཉམ་ཆུང་ལ་བརྩི་བཀུར་བྱེད་ཀྱི་མེད་པའི་ངེས་ཤེས་ཚང་མར་རྙེད་ཟིན་པ་རེད། ཅེས་དང་། ཉེ་ལམ་ས་མཚམས་ཁུལ་དུ་བྱུང་བའི་དོན་རྐྱེན་ལ་བརྟེན་ནས། རྒྱ་གར་གཞུང་ངོས་ནས་ཀྱང་སྲིད་ཇུས་མཁྲེགས་པོ་འཛིན་མགོ་བརྩམས་ཡོད་པ་རེད། ད་ལྟ་ཡུ་རོབ་དང་འཛམ་གླིང་ཁྱོན་ཡོངས་ཀྱིས་རིམ་པས་རྒྱ་ནག་གཞུང་གི་ཁ་ཞེ་མི་མཐུན་པའི་བྱ་སྤྱོད་རྣམས་མཐོང་ཡོང་གི་ཡོད་པ་རེད། ཅེས་གསུངས་འདུག
དེ་བཞིན་བཅར་འདྲིའི་སྐབས་བོད་མིའི་སྒྲིག་འཛུགས་ངོས་ནས་རྒྱལ་སྤྱིའི་སྟེང་བོད་དོན་དྲིལ་བསྒྲགས་ཀྱི་ལས་འགུལ་ཤུགས་ཆེ་རུ་གཏང་རྒྱུ་ཡིན་པ་དང་། སྲིད་སྐྱོང་མཆོག་སང་ལོའི་ལོ་འགོར་ཨ་རིར་ཆེད་ཕེབས་ཀྱིས་མགོ་འཁྲིད་རྣམས་དང་ཐུག་འཕྲད་གནང་འཆར་ཡོད་སྐོར་སོགས་གསུངས་འདུག
གསར་འགོད་པ། པ་སངས་ཚེ་རིང་། དཔལ་ལྡན།
དཔེ་ཡག་རེད།