ཨོ་གླིང་དང་སི་ཁོ་ཊི་ལན་ཌི་གཉིས་ནས་རྒྱ་ནག་གི་ཨོ་རྩལ་འགྲན་ཚོགས་ལ་གཞུང་འབྲེལ་ངོ་རྒོལ།

ཁ་སང་ཨ་རིའི་ཕོ་བྲང་དཀར་པོས་རྒྱ་ནག་གཞུང་གིས་མི་རིགས་རྩ་མེད་གཏོང་ཐབས་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་མཚོན་ཆེད་ཨ་རིའི་གཞུང་འབྲེལ་མི་སྣ་པེ་ཅིན་དགུན་དུས་ཨོ་རྩེད་འགྲན་ཚོགས་ཐོག་མངག་གཏོང་གནང་རྒྱུ་མིན་པའི་ཐག་གཅོད་དང་འབྲེལ། ཨ་རིའི་མཐུན་གྲོགས་རྒྱལ་ཁབ་རྣམས་ཀྱིས་དེ་ལྟར་གནང་དགོས་པའི་འབོད་སྐུལ་ཞུས་པ་བཞིན། དེ་རིང་ཨོ་གླིང་གཞུང་གིས་རྒྱ་ནག་གཞུང་གི་ཉེན་བརྡ་ལ་མ་འཛེམས་པར་པེ་ཅིན་གྱི་ཨོ་རྩེད་འགྲན་ཚོགས་ནང་རང་གི་གཞུང་འབྲེལ་མི་སྣ་རྣམས་མངག་གཏོང་བྱ་རྒྱུ་མིན་པའི་གསལ་བསྒྲགས་བྱས་འདུག

Australian Prime Minister Scott Morrison / AP-Yonhap

དེ་རིང་ཨོ་གླིང་གི་སྲིད་བློན་སྐུ་ཞབས་སི་ཁོ་ཊི་མོ་རི་སོན་ (Scott Morrison) ལགས་ཀྱིས་གསར་འགོད་ལྷན་ཚོགས་ཤིག་གི་སྟེང་། ཨོ་གླིང་གཞུང་གི་ཐག་གཅོད་དེ་ནི་རྒྱ་ནག་གཞུང་གིས་ཤིན་ཅང་ཁུལ་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དང་། དུས་རྒྱུན་ཨོ་གླིང་ངོས་ནས་རྒྱ་ནག་གཞུང་ལ་གླེང་སློང་བྱེད་བཞིན་པའི་གནད་དོན་མང་པོ་ཞིག་ལ་བརྟེན་ནས་བྱུང་བ་ཞིག་ཡིན་སྐོར་དང་། འདས་པའི་ལོ་ཤས་ནང་ཨོ་གླིང་དང་རྒྱ་ནག་དབར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད་པར་བརྟེན། ད་ལན་གྱི་ཐག་གཅོད་དེར་ཧང་སང་དགོས་དོན་མེད་ལ། དེ་ནི་ཨོ་གླིང་རྒྱལ་ཁབ་ཀྱི་ཁེ་ཕན་གྱི་ཆེད་དུ་བླངས་པ་ཞིག་ཡིན་སྐོར་འགྲེལ་བརྗོད་བྱས་འདུག གཞན་ཡང་ཁོང་གིས། ཨོ་གླིང་ངོས་ནས་རྒྱ་ནག་གཞུང་ལ་གནད་དོན་མང་པོའི་ཐོག་ལ་གླེང་མོལ་ཞུ་ཐབས་བྱས་ཡོད་ཀྱང་། རྒྱ་ནག་གཞུང་ཕྱོགས་ནས་ད་བར་ཡ་ལན་ཚད་ལྡན་ཞིག་སྤྲད་མེད་པ་མ་ཟད། རྒྱ་ནག་གཞུང་གིས་ཨོ་གླིང་གི་རྒྱལ་སྲུང་སྟོབས་ཤུགས་མཐོར་འདེགས་ཐད་ལའང་སྐྱོན་བརྗོད་ཤུགས་ཆེན་བྱས་ཡོད་སྐོར་སོགས་བརྗོད་འདུག

འདས་ལོར་ཨོ་གླིང་གཞུང་གིས་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་དགོས་པའི་བསྒྲགས་གཏམ་སྤེལ་བ་མ་ཟད། རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཁྲིམས་ཡིག་ཟེར་བ་ལག་བསྟར་བྱས་པ་དེར་ཡོངས་ཁྱབ་ཀྱི་ཐོག་ནས་སྐྱོན་བརྗོད་བྱས་པ། གཞན་ཡང་རྒྱ་ནག་དེ་ཨོ་གླིང་གི་རྒྱལ་སྲུང་བདེ་འཇགས་ཀྱི་ཉེན་ཁ་ཆེ་ཤོས་ཤིག་ལ་ངོས་འཛིན་བྱས་པ། དེ་བཞིན་རྒྱ་ནག་གཞུང་གིས་ཨོ་གླིང་གི་ཆབ་སྲིད་དང་སྤྱི་ཚོགས་ནང་ཐེ་བྱུས་བྱེད་ཀྱི་ཡོད་པའི་སྐྱོན་བརྗོད་སོགས་བྱས་ཡོད་པ་རེད། རྒྱ་ནག་གཞུང་གིས་ཀྱང་དེར་ཡ་ལན་གྱི་ཚུལ་དུ་ཨོ་གླིང་ནས་རྒྱ་ནག་ཏུ་ནང་འདྲེན་བྱེད་བཞིན་པའི་བལ་དང་། ཆང་། གླང་ཤ་སོགས་ཀྱི་སྒོ་ཁྲལ་སྤར་ཡོད་ལ། རྒྱ་རིགས་སློབ་མ་རྣམས་ཨོ་གླིང་དུ་སློབ་ཆེན་འགྲིམ་རྒྱུ་མེད་པའི་ལམ་སྟོན་བྱས་ཡོད། དེ་ཙམ་དུ་མ་ཟད་ཉེ་ཆར་ཨོ་གླིང་གཞུང་གིས་ཨ་རིའི་ས་ནས་རྡུལ་ཕྲན་གྱི་ནུས་པ་ལྡན་པའི་མཚོ་འོག་གྲུ་གཟིགས་ཤིག་ཉོ་སྒྲུབ་བྱ་རྒྱུའི་གན་རྒྱ་བཞག་པ་དེར་སྐྱོན་བརྗོད་དྲག་པོ་བྱས་ཡོད་པ་སོགས་ལ་བརྟེན། འདས་པའི་ལོ་གཉིས་ནང་ཨོ་གླིང་དང་རྒྱ་ནག་གི་ཕྱི་སྲིད་འབྲེལ་ལམ་དེ་ཆེས་ཛ་དྲག་ཏུ་གྱུར་ཡོད་པ་རེད།

Foreign ministry spokesman Zhao Lijian said China would take “resolute counter-measures”. Photo: Chinese foreign ministry

ད་ལྟའི་ཆར་རྒྱ་ནག་དབུས་གཞུང་གིས་ཨོ་གླིང་གཞུང་གི་ཐག་གཅོད་དེར་སྐྱོན་བརྗོད་ཐད་ཀར་བྱས་མེད་ནའང་། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅིན་ (Zhao Lijian) ཟེར་བ་དེས་ཨ་རིའི་གཞུང་གིས་རང་གི་གཞུང་འབྲེལ་སྐུ་ཚབ་རྣམས་པེ་ཅིན་དགུན་དུས་ཨོ་རྩེད་ནང་མི་གཏོང་རྒྱུའི་ཐག་གཅོད་དེ་ནི་རྫུན་གཏམ་དང་དཀྲོག་གཏམ་ལ་བརྟེན་ནས་བྱུང་བ་ཞིག་ཡིན་པ་དང་། ཨ་རིའི་ངོས་ནས་རྩེད་འགྲན་ཆབ་སྲིད་ཀྱི་ངོ་བོར་བསྒྱུར་ཏེ་པེ་ཅིན་དགུན་དུས་ཨོ་རྩེད་འགྲན་ཚོགས་ལ་བར་ཆད་བཟོ་མི་ཉན་པ་དང་། གལ་ཏེ་དེ་ལྟར་བྱས་ཚེ་རྒྱལ་ཁབ་གཉིས་ཀྱི་གྲོས་མོལ་དང་རྒྱལ་སྤྱིའི་སྟེང་དུ་མཉམ་འབྲེལ་བྱ་འོས་པའི་གནད་དོན་གལ་ཆེན་གྱི་རིགས་ལ་ཤུགས་རྐྱེན་ངན་པ་ཐེབས་ངེས་ཡིན་སྐོར་སྐྱོན་བརྗོད་བྱས་ཡོད་པ་མ་ཟད། ཨ་རིའི་ཐག་གཅོད་དེར་རྒྱ་ནག་ངོས་ནས་ཡ་ལན་ཏན་ཏན་བྱ་རྒྱུ་ཡིན་སྐོར་བརྗོད་འདུག

གཞན་ཡང་སི་ཀོ་ཊི་མན་(The scotsman) ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་དབྱིན་ཇིའི་མངའ་ཁོངས་ཀྱི་རྒྱལ་ཁབ་སི་ཁོ་ཊི་ལན་ཌི་(Scotland) ངོས་ནས་ཀྱང་རང་གི་གཞུང་འབྲེལ་སྐུ་ཚབ་རྣམས་རྒྱ་ནག་གི་དགུན་དུས་ཨོ་རྩེད་ནང་མངག་གཏོང་བྱ་རྒྱུ་མིན་པའི་ཐག་གཅོད་བྱས་ཡོད་སྐོར་གསལ་བཤད་བྱས་ཡོད་འདུག དེ་ཡང་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རོ་སི་གྷེ་རིར་(Ross Greer) ལགས་ཀྱིས་སི་ཀོ་ཊི་ལན་ཌི་གཞུང་ལ་གནད་དོན་དེའི་ཐད་ཡིག་ཐོག་དྲི་བ་ཕུལ་བའི་ལན་དུ། ཡུལ་དེའི་རྩེད་རིགས་བློན་ཆེན་མ་རི་ཊོཌ་(Maree Todd) ལགས་ཀྱིས་རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་བློ་འཚབ་ཆེན་པོ་ཡོད་སྐོར་དང་། སི་ཁོ་ཊི་ལན་ཌི་ངོས་ནས་རང་གི་གཞུང་འབྲེལ་མི་སྣ་པེ་ཅིན་གྱི་ཨོ་རྩེད་ལ་གཏོང་རྒྱུ་མིན་སྐོར་བརྗོད་ཡོད་འདུག

Protesters have called for a boycott of the event. Photo: Reuters

ད་ལྟའི་ཆར་ཡོངས་ཁྱབ་ཐོག་ནས་རྒྱ་ནག་གི་ཨོ་རྩེད་ནང་གཞུང་འབྲེལ་མི་སྣ་མི་གཏོང་རྒྱུའི་ཐག་གཅོད་གསལ་བསྒྲགས་བྱེད་མཁན་གྲས་སུ་ཡུ་རོབ་ཀྱི་རྒྱལ་ཁབ་ལི་ཐུ་ནི་ཡ་དང་། ནེའུ་ཛི་ལན་ཌི། ཨ་རི། ཨོ་གླིང་། སི་ཀོ་ཊི་ལན་ཌི་བཅས་ཡོད་ཅིང་། ལི་ཐུ་ནི་ཡ་ལྟ་བུར་མཚོན་ན། ཟླ་སྔོན་མའི་ཕྱི་ཚེས་ ༢༡ ཉིན་ལི་ཐུ་ནི་ཡ་གཞུང་གིས་ཡུལ་དེའི་ནང་ཐའེ་ཝན་གྱི་དོན་གཅོད་ལས་ཁུངས་དངོས་སུ་སྒོ་ཕྱེས་པར་བརྟེན། ཕྱི་ཉིན་དེར་རྒྱ་ནག་གཞུང་གིས་ལི་ཐུ་ནི་ཡ་གཞུང་དང་ཕྱི་འབྲེལ་གོ་བབ་ཆུང་དུ་བཏང་ཡོད་པའི་གསལ་བསྒྲགས་བྱས་ཡོད་ཅིང། དེའི་རྗེས་ལི་ཐུ་ནི་ཡ་གཞུང་གིས་པེ་ཅིན་དགུན་དུས་ཨོ་རྩེད་ནང་རང་གི་གཞུང་འབྲེལ་མི་སྣ་མངག་གཏོང་བྱ་རྒྱུ་མིན་པའི་ཐག་གཅོད་གསལ་བསྒྲགས་བྱས་པ་རེད། དེར་བརྟེན་ལི་ཐུ་ནི་ཡ་ནི་རྒྱ་ནག་གི་དགུན་དུས་ཨོ་རྩེད་ལ་ངོ་རྒོལ་བྱེད་མཁན་རྒྱལ་ཁབ་ཐོག་མ་དེ་ཡིན་པ་རེད། ནེའུ་ཛི་ལན་ཌི་གཞུང་གིས་ཏོག་དབྱིབས་གཉན་རིམས་ཀྱི་རྐྱེན་པས་འགྲིམ་འགྲུལ་སྟབས་མ་བདེ་བ་བ་གཙོ་བོར་བྱས་པའི་རྒྱུ་མཚན་གཞན་མང་པོ་ཞིག་ལ་བརྟེན་ནས། ཡུལ་དེའི་རྩེད་འགྲན་པ་མ་གཏོགས་ཕྱི་འབྲེལ་མི་སྣ་དང་སྐུ་ཚབ་རྣམས་པེ་ཅིན་གྱི་ཨོ་རྩེད་ལ་བཅར་རྒྱུ་མིན་སྐོར་གསལ་བསྒྲགས་བྱས་ཡོད་པ་རེད།

གསར་འགོད་པ། པ་སངས་ཚེ་རིང་།