སྐྱེ་རྒུ་མདོ་ཁྲི་འདུ་རྫོང་སྡོམ་མདའ་ཡུལ་ཚོ་ནས་ཡིན་པའི་མཐོ་རིམ་སློབ་མ་སངས་རྒྱས་མཚོ་ལགས་ཟླ་བཅུ་ལྷག་བཀག་ཉར་བྱས་རྗེས་ཀློད་གྲོལ་བཏང་ཡོད་ཀྱང་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་པ་མ་ཟད་འགྲོ་སྐྱོད་ལའང་དཀའ་ངལ་ཡོད་སྟབས་སྨན་ཁང་དུ་སྨན་བཅོས་བྱེད་བཞིན་འདུག
འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་ ༡༥ ཉིན་སྐྱེ་རྒུ་མདོ་ཁུལ་ཉེན་རྟོག་པས་སངས་རྒྱས་མཚོ་ལགས་ཀྱི་པ་ལགས་ལ་ཁ་པར་བསླེབས་ཏེ། བུ་མོ་ལེན་དུ་ཡོང་དགོས་པའི་བརྡ་ལན་འབྱོར་བ་ལྟར་སྤུན་མཆེད་ཚོ་ལེན་དུ་ཕྱིན་སྐབས། བུ་མོ་སངས་རྒྱས་མཚོ་སྐྱེ་རྒུ་ཞེན་ཟུང་མགྲོན་ཁང་ཟེར་བའི་ནང་དུ་མོ་རང་གཅིག་པོར་བསྡད་ཡོད་པ་དང་། སྔར་དང་མི་འདྲ་བར་ཁོང་མོའི་གཟུགས་པོ་ཧ་ཅང་སྐྱོ་བོ་ཆགས་ཡོད་པ་མ་ཟད། འགྲོ་སྐྱོད་ཀྱི་གོམ་པའང་ལས་སླ་བོར་སྤོ་མི་ཐུབ་པའི་ནད་པ་ཞིག་ཏུ་ཡོད་སྟབས། དེ་མ་ཐག་བུ་མོ་སྐྱེ་རྒུ་མདོ་མི་མང་སྨན་ཁང་དུ་བསྐྱལ་ནས་སྨན་བཅོས་བྱེད་བཞིན་ཡོད་འདུག
འདི་ལོའི་ཕྱི་ཟླ་ ༢ ཚེས་ ༡༧ ཉིན་གྱི་དགོང་དྲོའི་ཆུ་ཚོད་ ༡༠ ཙམ་ཞིག་ལ་སྐྱེ་རྒུ་མདོ་ཁྲི་འདུ་རྫོང་སྡོམ་མདའ་ཡུལ་ཚོའི་ནང་གི་ཉེན་རྟོག་ལས་ཁུངས་གཉིས་མཉམ་འབྲེལ་ཐོག རྫ་རི་དཀར་མོའི་དགོང་ཚོགས་ཟེར་བ་ཞིག་གི་སྐད་འཕྲིན་ཚོགས་གཙོ་ཀན་སྲི་དང་མཐོ་རིམ་སློབ་མ་སངས་རྒྱས་མཚོ། དགྲ་འདུལ་བཅས་བོད་རིགས་གཞོན་ནུ་གསུམ་འཛིན་བཟུང་བྱས་ཏེ་སྐྱེ་རྒུ་མདོའི་སྐྱེས་པ་དང་སྐྱེས་མའི་བཀག་ཉར་ཁང་གཉིས་སུ་བཅུག་ཡོད་པ་དང་། གཞོན་ནུ་ཀན་སྲི་ལགས་ཀྱི་གནས་སྟངས་ད་ལྟའང་ཤེས་རྟོགས་མེད་ཀྱང་། འདི་ལོའི་ཕྱི་ཟླ་ ༣ པའི་ནང་དགྲ་འདུལ་ལགས་ཀྱི་ཁྱིམ་མིར་ཁ་པར་འབྱོར་ཏེ། དགྲ་འདུལ་ལགས་ལ་གཤག་བཅོས་ཤིག་བྱེད་དགོས་པས་མི་གཉིས་ལས་མི་མང་བ་ཞིག་ནས་རྒྱ་སྒོར་ཁྲི་ ༤ འཁུར་ནས་ཟི་ལིང་གི་སྨན་ཁང་གཉིས་པའི་ནང་ཡོང་དགོས་པ་དང་། གནས་ཚུལ་དེ་སུ་གཅིག་ལའང་བཤད་མི་ཆོག་པའི་བཀའ་རྒྱ་ཡང་བཏང་ཡོད་པ་རེད། ཁྱིམ་མི་རྣམས་སྨན་ཁང་དུ་འབྱོར་སྐབས་དགྲ་འདུལ་ལགས་ཀྱི་རྐང་པ་གཉི་ག་བཅག་སྟེ་ཛ་དྲག་སྨན་བཅོས་བྱེད་བཞིན་ཡོད་པའི་གནས་ཚུལ་ཤེས་རྟོགས་བྱུང་ཡོད་པ་རེད།
བུ་མོ་སངས་རྒྱས་མཚོ་ལགས་རྒྱ་ནག་ཀང་ཏུང་ཞིང་ཆེན་གྱི་མཐོ་སློབ་ཅིག་གི་སློབ་མ་ཡིན་ལ། ཀན་སྲི་དང་དགྲ་འདུལ། ཁོང་མོ་བཅས་སྐྱེ་རྒུ་མདོ་ཁུལ་ཁྲི་འདུ་རྫོང་རྫ་དམར་རུ་ཁག་དྲུག་པ་ནས་ཡིན་འདུག
འབྲེལ་ཡོད་གནས་ཚུལ།
བོད་མི་གསུམ་འཛིན་བཟུང་བྱས་ཏེ་གར་སོང་ཆ་མེད་དུ་གྱུར།
བོད་རིགས་སློབ་ཕྲུག་ཅིག་ལ་གཅར་རྡུང་བཏང་སྟེ་རྐང་པ་གཉི་ག་བཅག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
