ཉིན་གཉིས་རིང་གི་མདོ་དྲན་པ་ཉེར་བཞག་གི་བཀའ་ཆོས་ལེགས་པར་གྲུབ།

༧གོང་ས་སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ཨིན་ཌོ་ནི་ཤི་ཡ་དང་། མ་ལེ་ཤི་ཡ། འབར་མ། ཤྲི་ལངྒ་། ཐའེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་བ་རྣམས་ལ་སངས་རྒྱས་ཀྱི་ཆོས་ལ་དད་པ་བྱས་པ་ཁོ་ན་མ་ཡིན་པར་ངེས་པར་དུ་ཐོས་བསམ་སློབ་གཉེར་བྱ་དགོས་སྐོར་བཀའ་སློབ་སྩལ་སོང་།

 དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་གནས་བརྟན་སྡེ་པའི་རྗེས་འབྲངས་བ་རྣམས་ལ་དྲན་པ་ཉེར་བཞག་གི་བཀའ་ཆོས་ཉིན་གཉིས་པ་སྩལ་སྐབས། ༧གོང་ས་སྐྱབས་མགོན་ཆེན་པོ་མཆོག་གིས། ནང་ཆོས་དེ་རྒྱ་ཆེན་པོ་དང་གཏིང་ཟབ་པོ་ཡོད་དུས། ཆོས་དད་ཡོད་མེད་ལ་མ་ལྟོས་པར་དོ་སྣང་བྱེད་མཁན་ཡོང་གི་ཡོད། དེ་འདྲ་ཡིན་དུས་བཅོམ་ལྡན་འདས་ཀྱི་རྗེས་འབྲངས་བ་ཚོས། གང་ཐུབ་ཐུབ་ཀྱིས་ཕན་ཚུན་བར་འབྲེལ་བ་ཇེ་དམ་དུ་གཏང་དགོས། ནམ་རྒྱུན་པྰ་ལི་ཡི་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་ཟེར་གྱི་ཡོད་ཀྱང་། སྐབས་རེར་ཕན་ཚུན་འབྲེལ་བ་བྱ་རྒྱུ་ཉུང་དུ་འགྲོ་མུས་ཡིན་པའི་སྣང་བ་བྱུང་བས། ཕན་ཚུན་བགྲོ་གླེང་མང་ཙམ་བྱ་རྒྱུ་བྱུང་ན། ཕན་ཐོགས་གཏན་གཏན་ཡོད་ངེས་རེད། པྰ་ལི་ཡི་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་འཛིན་པ་རྣམས་ཕན་ཚུན་ཐུག་འཕྲད་བགྱིས་ནས། ཕན་ཚུན་འབྲེལ་བ་དམ་ཟབ་ཏུ་བཏང་སྟེ། བགྲོ་གླེང་སོགས་བྱ་ཐུབ་ན་ཕན་ཐོགས་ཆེན་པོ་ཡོད། ཅེས་གསུངས་སོང་།

༧གོང་ས་སྐྱབས་མགོན་ཆེན་པོ་མཆོག་གིས། སྔོན་ལ་ཉོན་མོངས་བ་མངོན་གྱུར་དེ་དག་གི་མགོ་མནན་ནས། ལུས་ངག་ཡིད་གསུམ་གྱི་ཉེར་སྤྱོད་རགས་པ་གཙོ་བོ་ཞིག་བསྡམས་ནས། གཙོ་བོ་སེམས་ལ་འགྱུར་བ་བཏང་སྟེ། ཏིང་ངེས་འཛིན་གྱི་བསླབ་པའི་གཞི་བྱས་ཏེ་བདག་མེད་རྟོགས་པའི་ཤེས་རབ་ཀྱི་བསླབ་པ་བསྒོམས་ནས། སེམས་ལ་འགྱུར་བ་གཏང་རྒྱུ་དང་། སྔོན་ལ་ལུས་ཀྱི་འདུག་ལུགས་དེ་དག་གིས་རྣམ་སྣང་གི་ཆོས་བདུན་ལྡན་བསྟན་གྱི་ཡོད།  དེ་ནས་གཙོ་བོ་ངག་གི་མདོ་གདོན་རྒྱུ་སོགས་ཡོད་ཀྱང་། གཙོ་བོ་ཡིད་ཀྱིས་བསམ་བློ་བཏང་། དྲན་ཤེས་བརྟན་སླད་བག་ཡོད་བསྟེན་དགོས་པ་དང་། ལུས་ཀྱི་སྤྱོད་ལམ་ལ་དོ་སྣང་གང་ཡང་མེད་པར་རྒྱ་གཡེང་དུ་མི་བཏང་བར་ལུས་ཀྱིས་སྤྱོད་ལམ་གང་བྱས་པ་དང་། ངག་གིས་སྨྲ་བརྗོད་གང་བྱས་པ། གཙོ་བོ་ཡིད་ཀྱི་རྣམ་རྟོག་གང་འགྱུར་བ་དེ་དག་དྲན་ཤེས་ཀྱི་སེམས་པར་འགྲོ་དགོས། ཞེས་གསུངས་སོང་།

༧གོང་ས་སྐྱབས་མགོན་ཆེན་པོ་མཆོག་གིས། སོ་སོ་ཐར་བའི་མདོ་དེ་གསོ་སྦྱོང་སྐབས་བྲེལ་བ་ཡོད་ན་གླིང་བཞི་ཙམ་གདོན་རྒྱུ་དང་། ལྷོད་ལྷོད་ཡོད་ན་ཚང་མ་གདོན།  སྐུ་གོང་མའི་སྐབས་སུ་དབྱར་གནས་ལ་སོ་སོ་ཐར་བའི་མདོ་རྒྱས་པ་རེ་རེ་གདོན་དགོས་གསུངས་ཡོད་པ་རེད། ངོས་རང་གིས་སོ་སོ་ཐར་བའི་མདོ་དེ་ཆ་ཚང་བློར་འཛིན་བྱས་ནས། མ་མཐའ་ཡང་དབྱར་གནས་ལ་མདོ་རྒྱས་པ་དེ་འདོན་གྱི་ཡོད་པ་དང་། སོ་སོ་ཐར་བའི་མདོ་དེ་གསོ་སྦྱོང་སྐབས་སུ་གདོན་དགོས་པའི་འགྲོ་སྟངས་ཞིག་ཡོད།   ངོས་རང་གིས་སོ་སོ་ཐར་བའི་མདོ་དེ་བློ་ལ་བཟུང་ནས་དེ་སྔ་བོད་དུ་ཚར་གཅིག་གཉིས་ཤིག་བཏོན་ཡོད་པ་དང་། སྐུ་གོང་མས་གདན་ས་ཚོས་དབྱར་གནས་ཁ་ཐུག་ལ་མདོ་རྒྱས་པ་དེ་ངེས་པར་དུ་གདོན་དགོས་པའི་གཏན་འབེབས་གནང་བ་རེད། དབྱར་གནས་སྐབས་སུ་གདན་ས་གསུམ་གྱིས་མཚོན་པའི་གདན་ས་ཆེ་ཁག་ཚོས་མདོ་རྒྱས་པ་དེ་ངག་ཐོག་ནས་འདོན་བསྡད་ཡོད་རེད། དེའི་ནང་དུ་དགེ་སློང་ཚོས་བྱེད་བསྡད་པ་དེ་དག་ཞིབ་ཚགས་པོར་གསུངས་ཡོད་པས། སོ་སོ་ཐར་བའི་མདོ་དེ་བློ་ལ་བཟུང་ནས་མ་མཐའ་ཡང་དབྱར་གནས་སྐབས་སུ་གདོན་རྒྱུ་གལ་ཆེན་པོ་ཡིན་པ་རེད། ཅེས་གསུངས་བྱུང་།

ཡང་༧གོང་ས་སྐྱབས་མགོན་ཆེན་པོ་མཆོག་གིས། ལུས་ཀྱི་དྲན་པ་ཉེར་བཞག་ཟེར་ན། ལུས་ཀྱི་ཐོག་ཏུ་བསམ་བློ་གཏོང་དུས་ལུས་ལ་ཞེན་ཆགས་ཤུགས་ཆུང་དུ་འགྲོ་བ་དང་། གལ་ཆེ་བ་དེ་ཚོར་བ་དྲན་པ་ཉེར་བཞག་རེད། ཚོར་བ་བདེ་བ་ལ་སྲེད་པ་དང་། ཚོར་བ་སྡུག་བསྔལ་ལ་མི་འདོད་པ་རྒྱབ་ཀྱིས་ཕྱོགས་པ། དེ་ལ་བརྟེན་ནས་སེམས་ལ་དངངས་སྐྲག་སྐྱེས་པ་དང་། གཞན་ལ་ཕྲག་དོག་སྐྱེས་ཀྱི་ཡོད་དུས། ཚོར་བ་དྲན་པ་ཉེར་བཞག་ལ་བསམ་བློ་གཏང་དགོས་པ་རེད། ཚོར་བ་བདེ་སྡུག་ལ་བསམ་བློ་གཏོང་དུས་ཚོར་བ་བདེ་བ་ལ་ཞེན་བསྡད་པ་དང་། མཐའ་གཅིག་ཏུ་ཚོར་བ་སྡུག་བསྔལ་ལ་མི་འདོད་པའི་བློ་སྐྱེས་པར་ཤུགས་ཆུང་དུ་གཏང་དགོས། དེ་བཞིན་ཚོར་བ་བདེ་སྡུག་དེ་དག་སེམས་ནང་ནས་ཡོང་གི་ཡོད་དུས། སེམས་དྲན་པ་ཉེར་བཞག་དེ་ཞིབ་ཚགས་སུ་བཏང་ནས་སེམས་ཀྱི་སྟེང་ནས་སྲེད་པའི་ཡུལ་དྭང་དུ་བླང་རྒྱུའི་ཆགས་པ་དང་། སྡུག་བསྔལ་ཡོང་རྒྱུའི་སྡང་བའི་བློ་དེ་དག་དབྱེ་འབྱེད་གཏང་དགོས་པ་དང་། ཆོས་དྲན་པ་ཉེར་བཞག་དེ་ཆགས་སྡང་སྐྱེས་སའི་ཡུལ་དེ་དག་ལ་བསམ་བློ་བཏང་བ་དང། སེམས་བདེ་སྡུག་དེ་དག་ཀྱང་ཞིབ་ཚགས་ཀྱིས་བསམ་བློ་གཏོང་དུས། མཐར་གཏུགས་དབུ་མ་པའི་གཞུང་ནས་གསུངས་པའི་མིང་ཙམ་བཏགས་ཙམ་ཞེས་པ་དེའི་སྒང་དུ་འགྲོ་བསྡད་ཡོད་པ་རེད། ཅེས་གསུངས་སོང་།

 མཇུག་ཏུ་༧གོང་ས་སྐྱབས་མགོན་ཆེན་པོ་མཆོག་གིས། སངས་རྒྱས་ཀྱི་ཆོས་ནི་དད་པ་གཅིག་པུ་མ་ཡིན་པར། དེའི་འགྲོ་སྟངས་དེ་དག་ལ་བསམ་བློ་གཏང་དགོས་དུས། སྔོན་ལ་སློབ་སྦྱོང་བྱ་རྒྱུ་གལ་ཆེན་པོ་ཞེ་དྲགས་རེད། ཚང་མས་ཐོས་བསམ་བྱ་རྒྱུ་ཧ་ཅང་གིས་གལ་ཆེན་ཡིན་པས། ཆོས་གྲོགས་ཚོས་པྰ་ལི་ཡི་གཞུང་དང་ལེགས་སྦྱར་གྱི་གཞུང་སོགས་ལ་སློབ་སྦྱོང་མང་ཙམ་གནང་རོགས་ཞུ་རྒྱུ་དང་། ཐོས་བསམ་མ་བྱས་ན། ཐོས་པ་མེད་པའི་སྒོམ་པ་ནི་ལག་རྡུམ་བྲག་ལ་འཛེགས་པ་འདྲ་ཟེར་སྲོལ་ཡོད་པས། ཚང་མས་ཐོས་བསམ་བྱ་དགོས་པའི་ལམ་སྟོན་གནང་སོང་།

སྐུ་སྒེར་དྲ་བའི་མཛད་འཆར་ལྟར་ན།  ཟླ་འདིའི་ཕྱི་ཚེས་ ༢༣ ཉིན་༧གོང་ས་སྐྱབས་མགོན་ཆེན་པོ་མཆོག་གིས། རྒྱ་གར་མངའ་སྡེ་ཧ་རི་ཡ་ནར་རྟེན་གཞི་བྱས་པའི་རྒྱ་གར་གྱི་འཛིན་སྐྱོང་མཐོ་རིམ་སློབ་གཉེར་ཁང་ ( the Indian Institute of

Management ) གི་དགེ་སློབ་རྣམས་ལ་བྱམས་པ་དང་བརྩེ་བས་དཀའ་ངལ་ལ་གདོང་ལེན་བྱེད་ཐབས་སྐོར་ལ་དྲ་ལམ་ནས་བཀའ་སློབ་དང་དྲི་བར་བཀའ་ལན་གནང་རྒྱུ་ཡིན་པ་དང་། དེ་བཞིན་ཟླ་འདིའི་ཕྱི་ཚེས་༢༩ ཉིན་དགའ་ལྡན་ཁྲི་ཐོག་ཁང་ནས་ཇི་ལྟར་གསོལ་བ་བཏབ་པ་ལྟར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠།༠༠ བར་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་། ལམ་རིམ་བསྡུས་དོན་གྱི་བཀའ་ཆོས་དང་དྲི་བར་བཀའ་ལན་སྩལ་རྒྱུ་ཡིན་པ་འདུག

                            གསར་འགོད་པ། དཔལ་ལྡན།