ཕྱི་ལོ་ ༢༠༢༢ ལོའི་ཟླ་ ༣ ཚེས་ ༡ ཉིན་ནས་བཟུང་རྒྱ་ནག་གཞུང་གིས་དྲ་ལམ་གྱི་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་དོན་ཚན་ཆེན་པོ་ལྔ་ཡོད་པའི་བཀག་སྡོམ་ཁྲིམས་ཡིག་ཅིག་དངོས་སུ་ལག་བསྟར་བྱ་རྒྱུ་ཡིན་འདུག
རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བ་ཞེས་པའི་སྲིད་བྱུས་ཤུགས་ཆེན་སྤེལ་ཏེ་ཆོས་ལུགས་བྱེད་སྒོར་བཀག་སྡོམ་བྱེད་བཞིན་ཡོད་པ་མ་ཟད། འདི་ལོར་ཉུང་མཐར་བོད་ཁུལ་གྱི་དགོན་པ་ཁག་བཞི་ལ་གཏོར་བཤིག་གཏོང་གི་ཡོད་པའི་གནས་ཚུལ་ཐོན་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཙམ་ལ་རྒྱ་ནག་ཆོས་ལུགས་ལས་དོན་ཁང་ཟེར་བས་དྲ་ལམ་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་ཁྲིམས་ཡིག་ཅིག་གཏན་འབེབ་ཟིན་ཡོད་པ་དང་། ཁྲིམས་ཡིག་གསར་པ་དེ་ཕྱི་ལོ་ ༢༠༢༢ ཟླ་ ༣ ཚེས་ ༡ ཉིན་དངོས་སུ་ལག་བསྟར་བྱ་རྒྱུ་ཡིན་པའི་ཡོངས་ཁྱབ་གསལ་བསྒྲགས་བཏང་འདུག
དོན་ཚན་ཆེན་པོ་ལྔ་རུ་ཕྱེས་པའི་གཉིས་པ་དྲ་ལམ་ཆོས་ལུགས་ཆ་འཕྲིན་ཞབས་ཞུའི་ཆོག་མཆན་ཟེར་བའི་ནང་དུ། འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང་སྒྲ་སྒམ། པར་དང་ཡི་གེ། བརྙན་སོགས་ཀྱི་ཐབས་ལམ་བརྒྱུད་དེ་སྤྱི་ཚོགས་ཁྲོད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གྱི་སྐུ་ཚབ་བམ་ཡང་ན་གཙོ་གཉེར་བ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཆོས་ལུགས་ཁྲིམས་ཡིག་ཁག་ལ་རྒྱུས་མངའ་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་དང་། ཆོས་ལུགས་ཁྲིམས་སྒྲིག་ལ་འགལ་བ་མ་ཡིན་པ་དགོས་འདུག དེ་བཞིན་ཆོག་མཆན་ཡི་གེ་དེ་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱོད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་སོགས་བཀོད་འདུགཉེ་སྔོན་རྒྱ་ནག་གཞུང་གི་མཚོ་སྔོན་ཞིང་ཆེན་ཁོངས་ཀྱི་དྷཱི་ཚ་དགོན་དང་བྱ་ཁྱུང་དགོན། བྲག་མགོ་དགོན་སོགས་ཀྱི་དགེ་འདུན་པ་རྣམས་ཕྱིར་འབུད་བཏང་བ་དང་གྲྭ་ཤག་གཏོར་བཤིག་གཏོང་གི་ཡོད་པའི་གནས་ཚུལ་རིམ་པར་ཐོན་ཡོད་པ་ལྟར། ཟླ་འདིའི་ཕྱི་ཚེས ༢༣ ཉིན་བྱེས་ཀྱི་འབྲས་སྤུངས་བློ་གསལ་གླིང་གི་ཏྲེ་ཧོར་བྲག་འགོ་ཐོས་བསམ་དགའ་ཚལ་གྱིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། ཉེ་ལམ་རྒྱ་ནག་གཞུང་གིས་ས་གནས་བོད་མི་རྣམས་ཀྱིས་རྒྱུན་དུ་ཕྱག་སྐོར་ར་དང་། ཁ་འདོན་དགེ་སྒྲུབ་བྱེད་སའི་དགོན་པའི་ཉེ་འདབས་ཀྱི་མ་ཎི་ལག་འཁོར་མང་པོ་ཞིག་ཡོད་པ་དེ་རྒྱ་ནག་གཞུང་གིས་གཏོར་བཤིག་བཏང་ཡོད་པ་མ་ཟད། ས་གནས་སུ་མཐོ་ཚད་སྨིད་༩༩ ལྷག་ཅན་གྱི་ཐུབ་དབང་གི་སྐུ་བརྙན་ཞིག་ཡོད་པ་དེ་གཏོར་བཤིག་བཏང་བ་དང་། མ་ཎི་དར་ལྕོག་དང་སྒོ་དར་སོགས་བཙན་གྱིས་ཕབ་བཅུག་ནས་མེར་སྲེག་བཏང་དུ་བཅུག་ཡོད་འདུག
རྒྱ་ནག་གཞུང་གིས་གཏོར་བཤིག་བཏང་བའི་ཐུབ་དབང་གི་སྐུ་བརྙན་དེ་ནི། ཕྱི་ལོ ༢༠༡༥ ཟླ ༡༠ ཚེས་ ༥ ཉིན་བྲག་འགོའི་མི་མང་གིས་རྒྱ་སྒོར་ཁྲི་བཞི་སྟོང་ལྷག་གི་འགྲོ་གྲོན་བཏང་སྟེ་གསར་བཞེངས་གནང་ཡོད་པ་དང་། སྐུ་བརྙན་བཞེངས་པར་སྲིད་གཞུང་གི་ཆོག་མཆན་ཡིག་ཆ་ཚད་ལྡན་ཡོད་འདུག
འདི་ལོའི་ཕྱི་ཟླ་༡༡ ནང་རྒྱ་ནག་གཞུང་གི་དྲག་གནོན་དང་བཙན་བཀའ་བཏང་ནས་བྲག་འགོ་དགོན་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་ཏུ་བཅུག་ཡོད་པ་མ་ཟད། སློབ་གྲྭའི་འཛིན་ཁང་དང་ཉལ་ཁང་སོགས་རྩ་གཏོར་གྱིས་སློབ་མ་ཁག་ཅིག་ཕྱིར་རང་ཁྱིམ་དུ་ལོག་དགོས་བྱུང་ཡོད་པ་རེད་འདུག
གསར་འགོད་པ། དཔལ་ལྡན།
