འཇར་མན་ཕྱི་སྲིད་བློན་ཆེན་ཨན་ན་ལེ་ན་ལགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། རང་ཉིད་རྒྱ་ནག་གི་ཨོ་ལིམ་ཕིག་སྟེང་མཉམ་ཞུགས་བྱ་རྒྱུ་མིན་པ་དང་འཇར་མན་དང་ཡུ་རོབ་མཐུན་ཚོགས་ཞུགས་རྒྱུ་ཡིན་མིན་ད་དུང་གྲོས་བསྡུར་བྱས་མེད་སྐོར་བརྗོད་འདུག
ཁ་སང་ཕྱི་ཚེས་ ༢༩ ཉིན་འཇར་མན་ཕྱི་སྲིད་བློན་ཆེན་ཨན་ན་ལེ་ན་ (Annalena Baerbock) ལགས་ཀྱིས། གསར་འགོད་ལྷན་ཚོགས་ཤིག་བསྐངས་ཏེ། ཕྱི་ལོ་ ༢༠༢༢ ལོའི་རྒྱ་ནག་གི་ཨོ་རྩལ་འགྲན་ཚོགས་སྟེང་མཉམ་ཞུགས་གནང་རྒྱུ་མིན་པའི་གསལ་བསྒྲགས་སྤེལ་ཡོད་པ་དང་། སྐབས་དེར་གསར་འགོད་པ་ཚོས་ཕྱི་སྲིད་བློན་ཆེན་ལྕམ་ཨན་ན་ལེ་ན་ལགས་སུ། རྒྱ་ནག་གི་ཨོ་རྩལ་འགྲན་ཚོགས་སྟེང་འཇར་མན་རྒྱལ་ཁབ་ཞུགས་རྒྱུ་མིན་པ་འམ་ཡང་ན་ཕྱི་སྲིད་བློན་ཆེན་རང་ཉིད་མཉམ་ཞུགས་གནང་རྒྱུ་མིན་སྐོར་དོགས་འདྲི་བྱས་པར་ཁོང་གིས། ང་རྩེད་རིགས་ལ་དགའ་པོ་ཡོད་ཀྱང་། ད་ཐེངས་རྒྱ་ནག་གི་ཨོ་རྩལ་འགྲན་ཚོགས་སྟེང་ཞུགས་རྒྱུ་མིན་ཞེས་རང་ཉིད་ཀྱི་སྒེར་གྱི་ཐག་གཅོད་ཅིག་ཡིན་པ་ཡོངས་བསྒྲགས་གནང་ཡོད་འདུག
ཡང་འཇར་མན་སྲིད་བློན་ཞིག་རྒྱ་ནག་གི་ཨོ་རྩལ་འགྲན་སྟེང་མཉམ་ཞུགས་གནང་རྒྱུ་མིན་སྐོར་བསྒྲགས་པ་དེས། ཡུ་རོབ་མཉམ་འབྲེལ་མཐུན་ཚོགས་ལ་བརྡ་ལན་ག་འདྲ་ཞིག་སྟོན་གྱི་ཡོད་མེད་དྲིས་སྐབས་མོས། འཇར་མན་གྱིས་གཞུང་འབྲེལ་ཐོག་ནས་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་གནང་མིན་ནི། ཡུ་རོབ་མཐུན་ཚོགས་ཀྱི་མཉམ་འབྲེལ་རྒྱལ་ཁབ་ཁག་དང་གྲོས་བསྡུར་གྱིས་ཏེ་ཐག་གཅོད་རྒྱུའི་གནད་དོན་ཞིག་ཆགས་ཡོད་པའི་ལན་འདེབས་གནང་ཡོད་འདུག
སྤྱིར་ད་རེས་ལྕམ་ཨན་ན་ལེ་ན་ལགས་ཀྱིས་རྒྱ་ནག་གི་ཨོ་རྩལ་འགྲན་ཚོགས་སྟེང་ཞུགས་རྒྱུ་མིན་སྐོར་བརྗོད་པ་དེ་ནི། ད་བར་འཇར་མན་གྱི་ཕྱི་སྲིད་བློན་ཆེན་གཅིག་གིས་ཀྱང་གནང་མྱོང་མེད་པ་ཞིག་ཆགས་ཀྱི་ཡོད་འདུག་ལ། ཉེ་ལམ་ཕྱི་ཚེས་ ༦ ཉིན་ཨ་རི་དང་དེ་ནས་དབྱིན་ཇི། ཁེ་ན་ཌ་དང་ཨོ་གླིང་བཅས་ཀྱིས་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་སྐྱོན་བརྗོད་འོག སྔ་གཞུག་ཏུ་རྒྱ་ནག་གི་ཨོ་རྩལ་འགྲན་ཚོགས་ལ་གཞུང་འབྲེལ་ངོ་རྒོལ་གནང་ཡོད་ཀྱང་། ཧྥ་རན་སིའི་སྲིད་འཛིན་མཱ་ཁུ་རོན་ལགས་ཀྱིས། གཞུང་འབྲེལ་ངོ་རྒོལ་བྱེད་པ་ནི་མཚོན་དོན་ཙམ་ཡིན་པས། ཧྥ་རན་སིའི་ངོས་ནས་རྒྱ་ནག་གི་ཨོ་རྩལ་འགྲན་ཚོགས་ལ་གཞུང་འབྲེལ་ངོ་རྒོལ་བྱ་རྒྱུ་མིན་པའི་གསལ་བསྒྲགས་སྤེལ་ཡོད།
ཡང་འདི་ལོའི་ཕྱི་ཟླ་ ༢ ནང་འཛམ་གླིང་རྒྱལ་ཁབ་ཁག་གི་གྲོས་ཚོགས་འཐུས་མི་དང་གཞུང་འབྲེལ་དང་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ ༡༨༠ ལྷག་གིས། རྒྱ་ནག་གཞུང་གིས་བོད་དང་ཡུ་གུར། དེ་བཞིན་ཧོང་ཀོང་བཅས་ཀྱི་ནང་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་སྐྱོན་བརྗོད་དང་སྦྲགས། འཛམ་གླིང་རྒྱལ་ཁབ་ཁག་དང་ལུས་རྩལ་བ་མི་སྒེར་སོགས་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ནང་མཉམ་ཞུགས་མི་གནང་བའི་འབོད་སྐུལ་དང་ངོ་རྒོལ་ལས་འགུལ་སྤེལ་ཡོད་ལ། ལས་འགུལ་དེའི་ནང་རང་རེའི་བཙན་བྱོལ་གྱི་གཞུང་འབྲེལ་མིན་པའི་ཚོགས་སྡེ་ལྔ་ཡིས་ཀྱང་ཆ་ཤས་བླངས་ཏེ་རྒྱ་ནག་གཞུང་ལ་ངོ་རྒོལ་གནང་ཡོད།
རྒྱལ་སྤྱིའི་ངོ་རྒོལ་ལས་འགུལ་དེའི་ཐད། རྒྱ་ནག་གཞུང་གིས་ལན་འདེབས་རིམ་པ་བྱས་ཏེ། འཛམ་གླིང་རྒྱལ་ཁབ་གང་ཞིག་ཨོ་རྩལ་འགྲན་ཚོགས་ལ་ཞུགས་རྒྱུ་མིན་ཚེ། རྒྱ་ནག་གིས་རྒྱལ་ཁབ་དེ་དག་ལ་དཔལ་འབྱོར་གྱི་ཉེས་ཆད་གཅོད་རྒྱུའི་ཉེན་བརྡ་བཏང་བ་མ་ཟད། ཟླ་འདིའི་ཕྱི་ཚེས་ ༢༧ ཉིན་ཨ་རིའི་གཞུང་འབྲེལ་མི་སྣ་ ༡༨ རྒྱ་ནག་གི་ཨོ་རྩལ་འགྲན་ཚོགས་སྟེང་ཞུགས་རྒྱུ་ཡིན་པའི་ཐོངས་མཆན་ཞུས་ཡོད་སྐོར་བརྗོད་ཡོད་ལ། ཨ་རིའི་ཕྱོགས་ནས་དེ་འབྲེལ་གནས་ཚུལ་གྱི་ཐད་གཞུང་འབྲེལ་ལན་འདེབས་གང་ཡང་གནང་མེད་པ་རེད།
གསར་འགོད་པ། སྐལ་བཟང་སྦྱིན་པ།
