བཙོན་དུ་བཅུག་པའི་བོད་མི།
འདི་ལོའི་ཕྱི་ཟླ་ ༡༢ ནང་ལྷ་སའི་འབྲིང་རིམ་མི་མང་ཁྲིམས་ཁང་ཟེར་བས་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་སུ་ཁ་བྲལ་གྱི་ཁྲིམས་འགལ་ལས་ཀ་བྱས་ཡོད་པའི་ཉེས་མིང་འོག ལོ་བཅུའི་བཙོན་འཇུག་ཁྲིམས་ཐག་བཅད་དེ་ལྷ་སའི་ཉེ་འཁྲིས་ཀྱི་བཙོན་ཁང་ཞིག་ཏུ་བཅུག་ཡོད་འདུག ཕྱི་ལོ་༡༩༩༨ ལོར་བོད་རྔ་བའི་ཁུལ་དུ་རྒྱལ་གཅེས་ཆོས་གཅེས་ཟེར་བའི་ཆབ་སྲིད་ལས་འགུལ་སྤེལ་སྐབས་དང་། ཕྱི་ལོ་༢༠༠༨ལོའི་ས་བྱི་ཞི་རྒོལ་ཆེན་མོ། དེ་བཞིན་ཕྱི་ལོ་༢༠༡༡ བཅས་སུའང་རྩོམ་པ་པོ་ཁོང་ལ་ཆབ་སྲིད་ཀྱི་ཉེས་མིང་སྣ་ཚོགས་གཡོགས་ཏེ་ཐེངས་གསུམ་ལ་འཛིན་བཟུང་བཙོན་འཇུག་བྱས་མྱོང་ཡོད་འདུག ཕྱི་ལོ་ ༢༠༢༠ ཟླ་ ༡༠ ཚེས་ ༢༦ ཉིན་ཁོང་འཛིན་བཟུང་བྱས་ཏེ་ལོ་གཅིག་དང་ཟླ་གཅིག་ལྷག་འགོར་རྗེས་གཞི་ནས་ཁྲིམས་ཐག་བཅད་ཟིན་པའི་གནས་ཚུལ་ཐོན། དེ་བཞིན་འདི་ལོའི་ཕྱི་ཟླ་ ༣ ཚེས་ ༢༦ ཉིན་ཁྲིན་ཏུན་གྲོང་ཁྱེར་གྱི་ཁྲིམས་ཁང་ཞིག་གིས་རྔ་བའི་བོན་དགོན་ཆེ་ཤོས་སྣང་ཞིག་དགོན་པའི་བོད་སྐད་ཡིག་ཐོབ་ཐང་སྲུང་སྐྱོབ་པ་གྲྭ་རིན་ཆེན་ཚུལ་ཁྲིམས་ལགས་སུ་ལོ་ ༤ དང་ཟླ་ ༦ ཁྲིམས་ཐག་བཅད། ཁོང་ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་འཛིན་བཟུང་བྱས་རྗེས་ལོ་གཅིག་དང་ཟླ་ ༨ ཙམ་རིང་གོ་ཐོས་མེད་པར་གྱུར་ཡོད་པ་རེད། གཞན་ཡང་། འདི་ལོའི་ཕྱི་ཟླ་ ༧ པའི་ནང་དུ། ཕྱི་ལོ་ ༢༠༢༠ ཟླ་ ༩ པའི་ནང་གཞིས་ཀ་རྩེ་མི་དམངས་འབྲིང་རིམ་ཁྲིམས་ཁང་ཟེར་བས། གྲྭ་ཆོས་རྒྱལ་དབང་པོ་ལགས་སུ་ལོ་ ༢༠ དང་གྲྭ་བློ་བཟང་སྦྱིན་པ་ལགས་སུ་ལོ་ ༡༩། དེ་བཞིན་ནོར་བུ་དོན་འགྲུབ་ལགས་སུ་ ༡༥། གྲྭ་ངག་དབང་ཡེ་ཤེས་ལགས་སུ་ལོ་ ༥ བཅས་ཀྱི་ཁྲིམས་ཐག་བཅད་ཡོད་པའི་གནས་ཚུལ་ཕྱིར་ཐོན། ཡང་འདི་ལོའི་ཕྱི་ཟླ ༡༢ ནང་ཁྲིམས་ཁང་གིས་གསང་བའི་ཐོག་ནས་རྔ་བ་ཀིརྟི་དགོན་གྱི་རང་ལོ་ ༢༠ ཙམ་ཡིན་པའི་གྲྭ་འཕྲིན་ལས་ལགས་སུ་༧གོང་ས་མཆོག་གི་བཀའ་སློབ་འགྲེམས་སྤེལ་བྱས་པའི་ཉེས་མིང་འོག་ལོ་ ༥ བཙོན་འཇུག་ཁྲིམས་ཐག་བཅད་དེ་མེན་ཡཱང་བཙོན་ཁང་དུ་བཅུག ཡང་འདི་ལོའི་ཕྱི་ཟླ་ ༡༠ ནང་ས་བྱི་ཞི་རྒོལ་སྐོར་གྱི་དཔེ་དེབ་གལ་ཆེན་ཚེ་སྲོག་གིས་བསྐྲུན་པའི་སྐད་ཆ་ཞེས་པའི་རྩོམ་པ་པོ་བློ་བཟང་ལྷུན་གྲུབ་བམ་སྨྱུག་མིང་ལ་དྷཱི་ལྷ་ལྡན་ལགས་ཀྱི་ཁྱིམ་མི་ཚོར་རྩོམ་པ་པོ་ཁོང་ལ་ལོ་བཞི་ཡི་བཙོན་འཇུག་ཁྲིམས་ཐག་བཅད་ཟིན་པའི་བརྡ་ཐོ་འབྱོར་ཡོད་པའི་གནས་ཚུལ་ཐོན་ཡོད་པ་དང་། ཁོང་ཕྱི་ལོ་ ༢༠༡༩ ཟླ་ ༦ ནང་འཛིན་བཟུང་བྱས་ཡོད་པ་རེད། གཞན་ཡང་འདི་ལོའི་ཟླ་ ༣ ནང་ འདས་ལོའི་ཕྱི་ཟླ་ ༡༠ ཚེས་ ༡༣ ཉིན་རྒྱ་ནག་གཞུང་གིས། བོད་མི་བཀྲ་ཤིས་རྒྱལ་ཞུ་བ་ཞིག་གིས། སྐད་འཕྲིན་གྱི་རྒྱབ་ལྗོངས་སུ་༧གོང་ས་མཆོག་གི་སྐུ་པར་དང་སྲིད་སྐྱོང་བློ་བཟང་སེང་གེ་མཆོག་གི་པར། དེ་བཞིན། ཆབ་སྲིད་ཀྱི་ཚོར་ཤུགས་སྐྱེན་པའི་པར་རིས་དང་༧གོང་ས་མཆོག་གི་བཀའ་སློབ་སོགས་དྲ་ལམ་ནས་ཕབ་ལེན་གྱིས་སྐད་འཕྲིན་གྱི་ཚོམས་ནང་བརྒྱུད་སྤེལ་བྱས་བར་བརྟེན། རྒྱལ་ཁབ་ཀྱི་བདེ་འཇགས་དང་བདག་དབང་། ས་ཁོངས་མཐུན་སྒྲིལ་བཅས་ལ་ཉེན་ཁ་བསྐྲུན་པའི་ཉེས་མིང་འོག ལོ་གཅིག་རིང་བཙོན་འཇུག་ཁྲིམས་ཐག་བཅད་ཡོད་འདུག
བཀག་ཉར་མནར་གཅོད་འོག་གི་བོད་མི།
འདི་ལོའི་ཕྱི་ཟླ་ ༣ ཚེས་ ༢༣ ཉིན་རྩོམ་པ་པོ་གངས་མེ་སྟག་གམ་གངས་སྐྱེས་སྒྲུབ་པ་སྐྱབས་ལགས་དང་། རྩོམ་པ་པོ་བོད་རུས་པའམ་སྲས་རྣམ་ལགས་གཉིས་སྔ་གཞུག་ཏུ་འཛིན་བཟུང་བྱས། ཡང་ཕྱི་ཟླ་ ༤ བའི་ནང་འབྲི་རུ་རྫོང་ཁོངས་ནས་བོད་མི་བརྒྱ་བྱིན་ལགས་གཙོས་པའི་བོད་མི་གཞན་ཁག་ཅིག་བཙན་འཁྲིད་བྱས། ཕྱི་ཟླ་ ༧ ཚེས་ ༢༠ ཡས་མས་ཤིག་ལ། རྔ་བ་རྫོང་སྤྲོ་ཚིགས་དགོན་པའི་དགུང་ལོ་ ༤༥ ཙམ་ཡིན་པའི་དགེ་བསྐོས་དཀོན་མེ་ལགས་འཛིན་བཟུང་བྱས། དེ་བཞིན་ཕྱི་ཟླ་ ༨ ཚེས་༡ ཉིན་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་དང་། ཕྱི་ཟླ་ ༨ ཚེས་ ༡༤ ཉིན་རྔ་བ་རྫོང་སྤྲོ་ཚིགས་ཡུལ་ཚོ་རུ་རྒྱ་ནག་གཞུང་གིས་བོད་རིགས་ན་གཞོན་ཚོར་ཏང་ལ་དགའ་ཞེན་དང་བདེ་འཇགས་ལས་འགན་སློབ་གསོ་ཟེར་བའི་ཆབ་སྲིད་དྲིལ་བསྒྲགས་ཀྱི་ཚོགས་འདུར་མ་ཡོང་བའི་སློབ་མ་ཤེས་རབ་རྡོ་རྗེ་ལགས། ཕྱི་ཟླ་ ༨ ཚེས་ ༢༤ ཉིན་མགོ་ལོག་ཁུལ་དར་ལག་རྫོང་ཁོངས་ནས་བོད་མི་གཞོན་སྐྱེས་གཉིས་ཀྱིས། ས་གནས་དེར་འདི་ལོའི་སློབ་མགོ་ཚུགས་པ་དང་བསྟུན། སློབ་ཚན་ཚང་མ་རྒྱ་ཡིག་ནང་འཁྲིད་རྒྱུ་ཡིན་པའི་བཀོད་ཁྱབ་ལ་མི་ཉན་པར་སྐད་ཆ་བཤད་པའི་ཉེས་མིང་གཡོགས་ཏེ་ཁོང་ཚོ་ཚང་མ་སྔ་གཞུག་ཏུ་འཛིན་བཟུང་བྱས། ཡང་ཕྱི་ཟླ་ ༡༠ ཚེས་ཤར་ཙམ་ལ་རང་ལོ་ ༣༤ ཡིན་པའི་རྔ་བ་ཀིརྟི་དགོན་པའི་གྲྭ་བློ་བཟང་ཆོས་འཕེལ་ལགས་དང་། ཕྱི་ཟླ་ ༡ ཚེས ༢༥ ཉིན་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་སྲིད་གཞུང་གིས་ཚེ་མིང་ཅན་གྱི་བོད་མི་ཞིག་གིས་ཏོག་དབྱིབས་གཉན་རིམས་སྐོར་གྱི་གནས་ཚུལ་རྫུན་བསྒྲགས་བྱས་ཏེ། སྤྱི་ཚོགས་ཟང་ཟིང་བཟོས་ཡོད་པའི་ཉེས་མིང་འོག་འཛིན་བཟུང་བྱས་རྗེས་ཁོང་ཚོའི་གནས་སྟངས་ཅི་ཆགས་ཤེས་རྟོགས་ཐུབ་ཀྱི་མི་འདུག གང་ལྟར་འདི་ལོར་གཅིག་པུར་རྒྱ་ནག་གཞུང་གིས་ཉུང་མཐར་བོད་མི་ ༡༦༠ ལྷག་འཛིན་བཟུང་བཀག་ཉར་བྱས་ཡོད་པ་ཤེས་རྟོགས་བྱུང་།
སྡུག་སྦྱོང་མནར་གཅོད་མྱངས་བའི་ཆབ་སྲིད་བཙོན་པ།
ཕྱི་ལོ ༢༠༡༩ ཟླ ༡༢ ཚེས་ ༡ ཉིན་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་པའི་རྫ་དབོན་པོ་དགོན་གྱི་གྲྭ་གཞོན་བསྟན་འཛིན་ཉི་མ་ལགས་འདི་ལོའི་ཕྱི་ཟླ་ ༡ ནང་སྡུག་སྦྱོང་ནད་མནར་འོག་འདས་གྲོངས་སུ་ཕྱིན། དེ་བཞིན་ཕྱི་ཟླ་ ༢ ཚེས་ ༦ ཉིན་བོད་ཀྱི་ཆབ་སྲིད་བཙོན་པ་དང་ཡུལ་སྐོར་སྣེ་ཤན་པ་དཀོན་མཆོག་སྦྱིན་པ་ལགས་དང་། ཕྱི་ཟླ་ ༥ ནང་ཁམས་ཤག་རོང་པོ་གེ་སོ་སྲ་བྷ་གྲོང་གི་བོད་མི་ནོར་བཟང་ལགས་གཉིས་ཀྱང་བཙོན་ཁང་གི་མནར་གཅོད་འོག་སྔ་གཞུག་ཏུ་འདས་གྲོངས་སུ་ཕྱིན། ཉེ་སྔོན་རྒྱའི་བཙོན་ཁང་དུ་ཡོད་པའི་བོད་རིགས་ཚོང་པ་ཆེན་པོ་བཀྲ་ཤིས་རྡོ་རྗེ་ལགས་དང་ཁོར་ཡུག་སྲུང་སྐྱོབ་པ་དོན་རྒྱལ་ལགས་གཉིས་ཀྱི་སྐུ་གཟུགས་གནས་སྟངས་ཛ་དྲག་ཆགས་ཡོད་པའི་གནས་ཚུལ་ཐོན། འདི་ལོར་བོད་ཀྱི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་སོགས་ཆབ་སྲིད་བཙོན་པ་ ༨ ཙམ་ཀློད་གྲོལ་བཏང་ཡོད་ཀྱང་། མང་ཆེ་བའི་སྐུ་གཟུགས་གནས་སྟངས་སྐྱོ་བོ་ཆགས་ཡོད་པ་མ་ཟད། ཕྱི་ཟླ་ ༡༢ ཚེས་ ༡༥ ཉིན་ཀློད་གྲོལ་བཏང་བའི་སློབ་ཆེན་སློབ་མ་སངས་རྒྱས་མཚོ་ལགས་དང་། ཕྱི་ལོ་ ༢༠༢༠ ཟླ་ ༨ ཚེས་ ༡༥ ཉིན་ཀློད་གྲོལ་ཐོབ་པའི་བོད་རིགས་བུད་མེད་སྒྲོལ་དཀར་ལགས་གཉིས་ཀྱང་དཔྱི་མགོ་དང་རྐང་པ་གཉིས་ནད་པར་གྱུར་ཏེ་སྨན་བཅོས་བྱེད་བཞིན་ཡོད་པའི་གནས་ཚུལ་ཐོན།
རྒྱ་བསྒྱུར་སློབ་གསོ་ཤུགས་ཆེ་རུ་བཏང་།
འདི་ལོའི་ཟླ་ ༡༢ ཚེས་ ༩ ཉིན་རྒྱ་ནག་ཤེས་རིག་ལྷན་ཁང་གིས་སྤྱི་ཡོངས་ནས་དུས་རབས་གསར་བའི་སྐད་ཡིག་ལས་དོན་གྱི་བསམ་འཆར་ཟེར་བའི་སྲིད་ཇུས་ཤིག་ཡོངས་ཁྱབ་གསལ་བསྒྲགས་བྱས་ཏེ། ཕྱི་ལོ་ ༢༠༢༥ ལོར་རྒྱའི་སྤྱི་སྐད་ཁྱབ་ཚད་རྒྱལ་ཡོངས་ཀྱི་བརྒྱ་ཆ་ ༨༥ ཟིན་དགོས་ཡོད་སྐོར་བསྒྲགས་ཡོད་པ་ལྟར། ཕྱི་ལོ་ ༢༠༡༤ ཙམ་ནས་རྒྱ་ནག་གཞུང་གིས་བོད་ཁུལ་གྱི་བྱིས་གཉོར་ཁང་ནས་བཟུང་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་ལག་བསྟར་བྱས་ཡོད་པ་མ་ཟད། རྒྱའི་སྐད་ཡིག་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་ཕ་སྐད་མ་ཡིག་ཡིན་ཚུལ་གྱི་དྲིལ་བསྒྲགས་བྱས་ཏེ། སློབ་འཁྲིད་ཐབས་ལམ་གཉིས་པ་ཞེས་རྒྱ་ཡིག་རྒྱ་སྐད་ཀྱི་ཐོག་ནས་སློབ་འཁྲིད་བྱེད་པའི་རྒྱ་སྒྱུར་སློབ་གསོའི་སྲིད་ཇུས་བོད་ཁུལ་གང་སར་བཙན་འགེལ་བྱེད་ཀྱི་ཡོད་པ་དང་བསྟུན། བོད་ཡིག་ཆེད་གཉེར་གྱི་སྒེར་བཙུགས་སློབ་གྲྭ་དང་དགོན་པའི་རིག་གནས་སློབ་གླིང་སོགས་ཀྱང་སྒོ་རྒྱག་ཏུ་འཇུག་གི་ཡོད་འདུག དེ་ཡང་འདི་ལོའི་ཕྱི་ཟླ ༧ ཚེས་༨ ཉིན་རྒྱ་ནག་གཞུང་གིས་སེང་འབྲུག་སྟག་རྩེའི་བཅའ་སྡོད་སློབ་གྲྭ་དངོས་སུ་སྒོ་བརྒྱབ་བཅུག་ཡོད་པ་དང་། མཚོ་སྔོན་ཞིང་ཆེན་སྲིད་གཞུང་གི་དེ་འབྲེལ་བཀའ་རྒྱའི་ནང་། མགོ་ལོག་རྨ་ཆེན་རྫོང་ནས་སློབ་གྲྭ་གསུམ་དང་། དགའ་བདེ་ནས་སློབ་གྲྭ་གཅིག གཅིག་སྒྲིལ་གྱི་སློབ་གྲྭ་གཉིས་བཅས་ཁྱོན་བོད་མི་རང་གི་སྒེར་གཉེར་སློབ་གྲྭ་ ༧ སྒོ་བརྒྱག་དགོས་པའི་ཐོ་གཞུང་ནང་བཅུག་འདུག
བོད་མཐའ་མཚམས་ཀྱི་དམག་རྩལ་སྦྱོང་བརྡར།
འདི་ལོའི་ཕྱི་ཟླ་ ༨ པའི་ཟླ་མཇུག་ཏུ། རྒྱ་ནག་མི་མང་བཅིངས་གྲོལ་དམག་ཟེར་བའི་ཁོངས་གཏོགས་བོད་ཀྱི་དམག་ཁུལ་ཁང་གི་དམག་སྡེ་མི་འདྲ་བ་ ༡༠ ལྷག་མཉམ་བསྡུས་ཀྱི་ཐོག་ནས་གཞི་རྒྱ་ཆེ་བའི་དངོས་གཞིའི་དམག་སྦྱོང་བསྡུས་ཏེ། རྒྱ་ནག་གི་དམག་དོན་འཕྲུལ་ཆས་དང་གོ་མཚོན་གསར་པ་སྐོར་ཞིག་ཚོད་ལྟ་བྱས་ཡོད་པ་མ་ཟད། བོད་ཁུལ་ནས་དམངས་ཚོགས་རང་བཞིན་གྱི་དམག་མི་བསྡུས་ཏེ་སྦྱོང་བརྡར་སྤྲོད་ཀྱི་ཡོད་འདུག ཕྱི་ཟླ་ ༧ ཚེས་ ༢༦ ཉིན་བོད་ཉིང་ཁྲི་ས་ཁུལ་བྲག་གསུམ་མཚོ་ཁུལ་དུ་གངས་ལྗོངས་ཁྲ་ཕྲུག་དམག་དོན་དབྱར་སྒར་ཞེས་པ་བཙུགས་ཏེ། ལྷ་ས་གྲོང་ཁྱེར་གྱི་སློབ་ཆུང་རྣམས་གཙོ་བོར་གྱུར་བའི་རང་ལོ་ ༨ ནས་ ༡༦ བར་གྱི་སློབ་ཕྲུག་གྲངས་ ༡༠༠ ལྷག་བསྡུས་ཏེ་བདུན་ཕྲག་གཅིག་ལྷག་ཙམ་རིང་དམག་སྦྱོང་སྤྲད་ཡོད་འདུག་ལ། དམག་སྦྱོང་དེ་ས་བབ་གནམ་གཤིས་ལ་དཔག་པའི་འཆར་ཅན་གྱི་དབྱར་དགུན་སྦྱོང་བརྡར་ཞིག་ཆགས་ཀྱི་ཡོད་འདུག དེ་བཞིན་འདི་ལོའི་ཕྱི་ཟླ་ ༣ པའི་ནང་རྒྱ་ནག་གཞུང་གིས་མཚོ་སྔོན་ཞིང་ཆེན་མགོ་ལོག་ཁུལ་རྨ་ཆེན་རྫོང་ཁུངས་སུ་ཡོད་ཅིང་ས་བབ་མཐོ་ཚད་རྒྱ་མཚོའི་ངོས་ལས་རྨིད་ ༦༢༨༢ ཙམ་ཡོད་པའི་གནས་ཆེན་གྲགས་ཅན་ཨ་མྱེ་རྨ་ཆེན་ནམ་རྨ་རྒྱལ་སྤོམ་རའི་མདུན་དུ། ཉིན་རྒྱུན་སྔ་དགོང་གཉིས་སུ་དམག་སྦྱོང་བྱེད་ཀྱི་ཡོད་པ་མ་ཟད། དབྱིག་གཞུང་སྡེ་བ་དང་དང་། དང་ལག་སོགས་ནས་བུད་མེད་མཐོ་རིམ་སློབ་མ་འཛུལ་ཞུགས་བྱས་ཚེ་དམིགས་བསལ་གྱི་ས་མིག་སྤྲོད་ཀྱི་ཡོད་སྟབས། ས་གནས་ཀྱི་ན་གཞོན་བུད་མེད་གང་ཙམ་ཞིག་དམག་ཁོངས་སུ་ཞུགས་ཡོད་འདུག་ལ། མི་མང་གིས་མོས་མཐུན་མེད་པའི་རྣམ་འགྱུར་རིགས་རྩ་བ་ནས་ཡོང་མི་ཆོག་པ་དང་། གལ་སྲིད་དེ་རིགས་བྱུང་ན་ས་གནས་མགོ་འཁྲིད་ཚོས་འགན་ལེན་དགོས་པ་སོགས་བརྗོད་ནས་སྡིགས་ར་སྐུལ་ཡོད་འདུག
དགོན་པར་བཙན་གནོན་དང་གྲྭ་བཙུན་ཕྱིར་འབུད།
ཕྱི་ཟླ་ ༡༠ ཚེས་ ༢༡ དང་ ༢༢ ཉིན་རྒྱ་ནག་གཞུང་གིས་རང་ལོ་༡༨ མ་ལོན་པའི་བྱིས་པ་ཚོ་གྲྭ་པ་བྱེད་མི་ཆོག་ཟེར་ནས། བོད་ཤར་ཕྱོགས་ཀྱི་བྱང་གི་དགོན་ཆེན་བཞི་ཡི་ཡ་གྱལ་བྱ་ཁྱུང་དགོན་པ་དང་། དྷི་ཚ་དགོན་གཉིས་ཀྱི་གྲྭ་པ་ཁྱོན་ ༨༠ ལྷག་དགོན་པ་ནས་ཕྱིར་འབུད་བཏང་ཡོད་པ་རེད། གཞན་ཡང་། འདི་ལོའི་ཕྱི་ཟླ་ ༨ ནང་རྒྱ་ནག་གཞུང་གིས་བོད་ཀན་སུའུ་ཞིང་ཆེན་གྱི་ཁོངས་སུ་ཡོད་པའི་མཁར་དམར་དགོན་སྒོ་བརྒྱབ་ཏུ་བཅུག་པའི་གནས་ཚུལ་ཐོན་ཡོད་པ་མ་ཟད། སྤྱི་ཚོགས་དྲ་ལམ་དུ་ཐོན་པའི་ཡུལ་དངོས་ཀྱི་བརྙན་ཐུང་ཁག་ཅིག་ནང་ས་གནས་ཀྱི་མགོ་འཁྲིད་དང་དམག་མི་མང་པོ་དགོན་པར་བསླེབས་ཡོད་པ་དང་། བཙུན་མ་མང་པོ་ཞིག་དགོན་པའི་འདུ་ཁང་མདུན་དུ་འཛོམས་ཏེ་ངུ་ངག་འདོན་བཞིན་ཐང་ལ་འགྱེལ་བ་དང་། གྲྭ་བཙུན་རེ་ཟུང་གིས་འདུ་ཁང་ཐོག་ནས་མར་མཆོང་གྲབས་བྱེད་ཀྱི་ཡོད་པ་སོགས་མཐོང་རྒྱུ་འདུག དེ་འབྲེལ་གྱི་གནས་ཚུལ་ནང་དགོན་པ་དེའི་བླ་མ་ཀུན་བཟང་འཕྲིན་ལས་ཆོས་ཀྱི་རྒྱལ་མཚན་ལགས་ནས་བྱམས་བརྩེའི་རོགས་རམ་ཆེད་སློབ་ཚོགས་ནས་ཁྱོན་རྒྱ་སྒོར་ཁྲི་ ༣༠ ལྷག་ཞལ་འདེབས་སུ་བསྡུས་པ་དེ་ཁྲིམས་འགལ་ཡིན་ལུགས་དང་། ལོ་རེའི་དགོན་པའི་ཡོང་འབབ་དང་ས་ཁང་ཕྱེད་ཀ་ས་གནས་སྲིད་གཞུང་ལ་སྤྲོད་དགོས་པའི་བཀའ་བཏང་བ་དེ་དྭང་ལེན་གནང་མེད་སྟབས། ས་གནས་སྲིད་གཞུང་ནས་དགོན་པ་སྒོ་བརྒྱག་དགོས་པ་དང་གྲྭ་བཙུན་རྣམས་ཕྱིར་འབུད་གཏོང་དགོས་པའི་བཙན་བཀའ་བཏང་ཡོད་ཀྱང་། འདི་ག་གསར་ཁང་ནས་སྔ་གཞུག་ཏུ་འབྲེལ་བ་བྱས་ཏེ་རྒྱུས་ལོན་བྱས་ཀྱང་ད་ལྟའི་གནས་སྟངས་སོགས་གང་ཡང་ཤེས་རྟོགས་ཐུབ་ཀྱི་མི་འདུག
དགེ་ལྡན་ནང་བསྟན་སློབ་གླིང་སྒོ་བརྒྱབ།
འདི་ལོའི་ཕྱི་ཟླ་༡༠ ནང་རྒྱ་ནག་གཞུང་གི་དྲག་གནོན་བཙན་བཀའ་འོག་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་སྟེ། སློབ་གྲྭའི་འཛིན་ཁང་དང་ཉལ་ཁང་སོགས་རྩ་གཏོར་དུ་བཏང་ནས་སློབ་མ་རྣམས་སྲིད་གཞུང་གི་སློབ་གྲྭར་འགྲོ་དགོས་པའི་བཀའ་བཏང་ཡོད་པ་དང་། ཁག་ཅིག་ཕྱིར་རང་ཁྱིམ་དུ་ལོག་དགོས་བྱུང་ཡོད་པ་རེད། གཞན་ཡང་། ཕྱི་ཟླ་ ༨ པའི་ཚེས་མགོར་ས་གནས་སྲིད་གཞུང་གིས་མདོ་ཁམས་ཏྲེ་ཧོར་དར་རྒྱས་ཡུལ་གྱི་རྒྱལ་བསྟན་དགེ་རྩ་སློབ་གྲྭའི་བསླབ་གཞི་དང་ཁྲིད་གཞི་ཚང་མ་རྒྱ་ཡིག་རྒྱ་སྐད་ནང་བསྒྱུར་དགོས་པ་མ་ཟད། ལོ་འཁོར་ཡིག་རྒྱུགས་ཀྱང་རྒྱ་ཡིག་ནང་གཏོང་དགོས། དེ་ལྟར་མ་བྱས་ཚེ་སློབ་གྲྭ་སྒོ་བརྒྱག་རྒྱུ་ཡིན་པའི་བཙན་བཀའ་བཏང་ཡོད་པ་རེད།
ཆོས་ལུགས་བྱེད་སྒོར་སྔར་ལྷག་བཀག་སྡོམ།
ཕྱི་ཟླ་ ༡༢ ཚེས་ ༢༠ ཙམ་ལ་རྒྱ་ནག་ཆོས་ལུགས་ལས་དོན་ཁང་ཟེར་བས་དྲ་ལམ་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་དོན་ཚན་ཆེན་པོ་ལྔ་ཅན་གྱི་ཁྲིམས་ཡིག་ཅིག་གཏན་འབེབ་ཟིན་ཏེ། ཕྱི་ལོ་ ༢༠༢༢ ཟླ་ ༣ ཚེས་ ༡ ཉིན་དངོས་སུ་ལག་བསྟར་བྱ་རྒྱུ་ཡིན་འདུག་ལ། ཁྲིམས་ཡིག་དེའི་ནང་འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང། པར་དང་ཡི་གེ བརྙན་སོགས་ཀྱི་ཐབས་ལམ་བརྒྱུད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གཙོ་གཉེར་བ་དེ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་ཞིག་ཡིན་དགོས་ཀྱི་འདུག་ལ། ཆོས་ལུགས་བྱེད་སྒོ་སྤེལ་ཆོག་པའི་ཡི་གེ་དེར་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་སོགས་བཀོད་ཡོད་པ་རེད། ཡང་འདི་ལོའི་ཕྱི་ཟླ་ ༡༠ ནང་མགོ་ལོག་ཁུལ་དར་ལག་རྫོང་ཁོངས་ཀྱི་བོད་རིགས་ལས་བྱེད་རྣམས་ཀྱིས། ལག་ཏུ་འཕྲེང་བ་འཛིན་མི་ཆོག་པ་དང་། ཕྱག་འཚལ་བ། ཆོས་ཞུ་བ་སོགས་སུ་འགྲོ་མི་ཆོག་པ་མ་ཟད། ཁུལ་དེའི་བོད་རིགས་ལས་བྱེད་རྣམས་ཀྱི་ཁྱིམ་སོགས་ལ་སྔོག་བཤེར་ནན་མོ་བྱས་ཡོད་པ་མ་ཟད། ལྐོག་ཏུ་སོ་ཉུལ་བ་བཏང་སྟེ་ལས་བྱེད་ཚོའི་འགྲོ་འདུག་སྤྱོད་གསུམ་ལ་ལྟ་རྟོག་དང་ཉུལ་ཞིབ་བྱེད་ཀྱི་ཡོད་པའི་གནས་ཚུལ་ཐོན་ཡོད་པ་རེད།
བོད་ནང་དུ་རྒྱ་རིགས་དཔོན་པོ་བསྐོ་བཞག
ཕྱི་ཟླ་ ༡༠ ཚེས་ ༡༩ ཉིན་རྒྱ་ནག་གཞུང་གིས་དེ་སྔོན་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་གཞོན་པ་རྒྱ་མི་ཝང་ཅིན་ཀྲིན་ཟེར་བ་ཞིག་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་རུ་བསྐོ་བཞག་བྱས་འདུག་ལ། རྒྱ་ནག་གཞུང་གིས་སྔར་ནས་ཆབ་སྲིད་ཀྱི་བཙན་གནོན་ཤུགས་ཆེ་ཤོས་བོད་དང་ཡུ་གུར་གཉིས་ཀྱི་མགོ་འཁྲིད་ཚོ་ཕན་ཚུན་བརྗེ་རེས་ལྟ་བུ་བྱེད་སྲོལ་ཡོད་པ་རེད། གཞན་ཡང་། རྒྱ་དཀར་ནག་བར་ས་མཚམས་རྩོད་རྙོག་ཤུགས་ཆེན་པོ་ཡོང་གི་ཡོད་པ་དང་བོད་ཁུལ་གྱི་མཐའ་མཚམས་སྲུང་སྐྱོབ་བྱ་རྒྱུ་ནི་མེས་རྒྱལ་གོང་བུ་གཅིག་གྱུར་སླད་མེད་དུ་མི་རུང་བ་ཞིག་ཡིན་ཟེར་གྱི་ཡོད་པ་ལྟར། ཕྱི་ཟླ ༤ ཚེས་ ༢༩ ཉིན་རྒྱ་ནག་གཞུང་གིས་བོད་ཁུལ་དུ་ཝང་ཁེ་ (Wang Kai) ཟེར་བའི་དམག་དཔོན་གསར་པ་ཞིག་བསྐོ་བཞག་བྱས་ཡོད་པ་རེད།
འཛམ་གླིང་ནང་སྡུག་ཤོས་སུ་གྱུར་བའི་བོད་ཀྱི་འགྲོ་བ་མིའི་ཐོབ་ཐང་།
འདི་ལོའི་ཕྱི་ཟླ་ ༣ ཚེས་ ༣ ཉིན་ཨ་རིའི་རང་དབང་ཁང་པས་ཕྱི་ལོ་ ༢༠༢༡ ལོའི་འཛམ་གླིང་གི་རྒྱལ་ཁབ་དང་ས་ཁུལ་ ༢༠༠ ལྷག་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་ཀྱི་ལོ་འཁོར་སྙན་ཐོ་ཞིག་བཏོན་པའི་ནང་། བོད་དང་སི་རི་ཡ་གཉིས་ཀྱི་ནང་སྤྱི་ཡོངས་ཀྱི་རང་དབང་གི་གནས་བབ་སྡུག་ཤོས་ཡིན་པ་གཅིག་མཚུངས་ཡིན་པ་དང་། བོད་ནང་ཆབ་སྲིད་ཀྱི་རང་དབང་གནས་བབ་ནི་ཚད་དེ་ ༤༠ ནས་གོར་ཐིག་མན་གྱི་གཉིས་དང་། སྤྱི་དམངས་ཀྱི་རང་དབང་གནས་བབ་ཀྱི་ཚད་ནི་ ༦༠ ནས་གསུམ་ཙམ་ཡིན་འདུག འདས་པའི་ལོ་གསུམ་བསྟུད་མར་བོད་ནི་འཛམ་གླིང་ནང་གི་འགྲོ་བ་མིའི་ཐོབ་ཐང་སྡུག་ཤོས་ཀྱི་གྲས་སུ་ཚུད་ཡོད་པ་རེད། ཕྱི་ལོ་ ༢༠༢༠ ལོའི་སྙན་ཐོའི་ནང་དུའང་བོད་ནང་དང་བལ་ཡུལ་བོད་མིའི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་བཙན་གནོན་བྱས་ཡོད་པ་མ་ཟད། བོད་སྐད་ཡིག་གི་བསླབ་གཞི་ཉེན་ཁའི་གནས་སུ་ལྷུང་ཡོད་པའི་སྐོར་གྱི་སྙན་ཐོ་ཤོག་གྲངས་ ༩༡ ཅན་ཞིག་བཏོན་ཡོད་པ་དང་། ཕྱི་ལོ ༢༠༢༠ ནི་ཕྱི་ལོ ༡༩༨༩ རྗེས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྡུག་ཤོས་ཀྱི་ལོ་ཞིག་ཆགས་ཡོད་པ་རེད།
གསར་འགོད་པ་དཔལ་ལྡན་གྱིས་ཕྱོགས་སྒྲིག་བྱས།
