ཨ་རིའི་གློག་ནུས་རླངས་འཁོར་བཟོ་ཚོང་གིས་ཤིན་ཅང་ཁུལ་དུ་ཚོང་ཁང་ཞིག་སྒོ་ཕྱེས་པར་སྐྱོན་བརྗོད།

ཨ་རིའི་གློག་ནུས་རླངས་འཁོར་བཟོ་ཚོང་ཁང་གིས་ཤིན་ཅང་ནང་ཚོང་ཁང་ཞིག་སྒོ་འབྱེད་བྱས་པར་ཨ་རི་གཙོ་བྱས་པའི་ཚོགས་སྡེ་ཁག་མང་པོས་སྐྱོན་བརྗོད་དང་འབྲེལ། ཚོང་ཁང་དེ་སྒོ་རྒྱག་དགོས་པའི་སྐུལ་མ་གཏོང་གི་འདུག

ད་ལྟའི་ཆར་ཨ་རིའི་གཞུང་གིས་རྒྱ་ནག་གིས་ཤིན་ཅང་ཁུལ་གྱི་ཡུ་གུར་མི་མང་གི་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་སྐྱོན་བརྗོད་འོག ཨ་རིའི་བཟོ་ཚོང་ཁང་དག་གིས་ཤིན་ཅང་དང་འབྲེལ་བའི་ཚོང་འབྲེལ་དང་ཚོང་ཟོག་བཀག་སྡོམ་བྱེད་དགོས་པའི་བཀའ་ཁྱབ་བཏང་ཡོད་ཀྱང་། ཕྱི་ལོ་གསར་ཚེས་དང་བསྟུན། ཨ་རིའི་གློག་ནུས་རླངས་འཁོར་བཟོ་ཚོང་ཁང་ (Electric car maker Tesla) གིས་ཤིན་ཅང་ཁུལ་དུ་ཚོང་ཁང་ཞིག་སྒོ་ཕྱེས་ཡོད་པའི་ཐད། ད་ལྟ་ཡུ་གུར་བའི་ཐོབ་ཐང་རྩོད་ལེན་དང་འབྲེལ་བའི་ཨ་རིའི་ཚོགས་སྡེ་ཁག་དང་ལས་འགུལ་བ་མང་པོས་ཊའེ་སི་ལཱ་(Tesla) དང་དེའི་སྦྱིན་བདག་ཨི་ལོན་མའོ་སི་ཁུ་གཉིས་ལ་སྐྱོན་བརྗོད་དང་སྦྲགས། ཤིན་ཅང་ཁུལ་གྱི་ཚོང་ཁང་དེ་ཉིད་སྒོ་བརྒྱག་དགོས་པའི་སྐད་འབོད་རྒྱག་གི་ཡོད་འདུག

ཁ་སང་ཕྱི་ཚེས་ ༤ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་གོང་མའི་འཐུས་མི་མཱར་ཁོ་རུ་བྷི་ཡོ་ (Marco Rubio) ལགས་ཀྱིས་རང་ཉིད་ཀྱི་ཊུ་ཝི་ཊར་སྟེང་། སྲིད་འཛིན་བྷའེ་ཌན་མཆོག་གིས་ཡུ་གུར་མི་མང་སྲུང་སྐྱོབ་ཀྱི་ཁྲིམས་འཆར་ལ་མཚན་རྟགས་བསྐྱོན་ཏེ་དངོས་སུ་ཁྲིམས་ཆགས་མ་ཐག་ཊའེ་སི་ལཱ་རླངས་འཁོར་བཟོ་ཚོང་ཁང་གིས་ཤིན་ཅང་ནང་ཡན་ལག་ཚོང་ཁང་ཞིག་སྒོ་ཕྱེས་སོང་།  རྒྱལ་ཁབ་མེད་པའི་མཉམ་འབྲེལ་ཁག་གིས་རྒྱ་ནག་དམར་ཤོག་ཚོགས་པར་རོགས་འདེགས་བྱས་ཏེ། རྒྱ་ནག་གིས་གྲངས་ཉུང་མི་རིགས་རྩ་གཏོར་དང་བྲན་གཡོག་ལྟར་ངལ་རྩོལ་བྱེད་དུ་འཇུག་གི་ཡོད་པ་སྦས་སྐུང་བྱེད་ཀྱི་ཡོད། ཅེས་ཊའེ་སི་ལཱ་(Tesla) རླངས་འཁོར་བཟོ་ཚོང་ཁང་ལ་ཟུར་ཟ་དང་སྐྱོན་བརྗོད་བྱས་ཡོད་པ་རེད་ལ། ཨ་རིའི་ཕོ་བྲང་དཀར་པོའི་གསར་འགོད་དྲུང་ཆེ་ལྕམ་ཇན་སཱ་ཀི་ (Jen Psaki) ལགས་ཀྱིས། ངས་ཚོགས་པ་བྱེ་བྲག་པར་འགྲེལ་བརྗོད་བྱེད་ཀྱི་མེད། འོན་ཀྱང་། སྒེར་གཉེར་བཟོ་ཚོང་སྡེ་ཁག་གིས་ཤིན་ཅང་ནང་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་རྩ་གཏོར་གཏོང་བཞིན་པར་ཁ་གཏད་བྱེད་དགོས་ཀྱི་ཡོད། ཅེས་བརྗོད་ཡོད་འདུག

ཡང་ཨ་རིའི་མནའ་འབྲེལ་བཟོ་བསྐྲུན་ཚོགས་པའི་(President of the Alliance of American Manufacturing industry) ཚོགས་གཙོ་སི་ཁོ་ཊི་པལ་ (Scott Paul) ལགས་ཀྱིས། ངས་སྐད་ཆ་དྲང་པོ་བཤད་ཀྱི་ཡིན། བཟོ་ཚོང་ཁང་སུ་འདྲ་ཞིག་གིས་ཤིན་ཅང་ཁུལ་དུ་ཚོང་འབྲེལ་བྱེད་པ་ནི་ཁུལ་དེའི་རིགས་རྒྱུད་རྩ་གཏོར་དང་འབྲེལ་བ་ཆགས་ཀྱི་ཡོད་པ་རེད། དེར་བརྟེན། ཊའེ་སི་ལཱ་དམིགས་བསལ་གྱིས་སྐྱོན་བརྗོད་དེ་འོས་པ་རེད། ཅེས་བརྗོད་ཡོད་པ་དང་། དེ་བཞིན་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་ཁ་ཆེ་དང་ཨ་རིའི་འབྲེལ་ལམ་སྐོར་གྱི་ཚོགས་པ་(The Council on American-Islamic Relations) ཞེས་པས། ཊའེ་སི་ལཱ་དང་དེའི་སྦྱིན་བདག་གཉིས་ལ་སྐྱོན་བརྗོད་དང་སྦྲགས། ཤིན་ཅང་ཁུལ་གྱི་བཟོ་ཚོང་ཁང་དེ་སྒོ་བརྒྱག་དགོས་པ་དང་། མི་རིགས་རྩ་གཏོར་གཏོང་གི་ཡོད་པར་དཔལ་འབྱོར་གྱིས་རྒྱབ་སྐྱོར་བྱ་རྒྱུ་མཚམས་འཇོག་དགོས་པ་ནན་སྐུལ་བྱས་ཡོད་འདུག་ལ། ད་ལྟ་ཊའེ་སི་ལཱ (Tesla) ངོས་ནས་གནད་དོན་འདིའི་ཐད་ལན་འདེབས་གང་ཡང་བྱས་མི་འདུག

གཞན་ཡང་། ཤིན་ཅང་གི་རྒྱལ་ས་ཡཱོ་རོམ་ཆི་ (Urumqi) ནང་ཨ་རིའི་གློག་ནུས་རླངས་འཁོར་བཟོ་ཚོང་ཁང་གིས་ཚོང་ཁང་ཞིག་སྒོ་འབྱེད་བྱས་པར། རྒྱ་ནག་གི་ཝི་པོད་དྲ་ཚིགས་སྟེང་རྒྱ་རིགས་མང་པོས་དགའ་བསུ་དང་དགའ་མོལ་བྱེད་ཀྱི་ཡོད་ཅིང་། ཊའེ་སི་ལཱ་ནི་བཟོ་ཚོང་ཁང་གཞན་དང་མི་འདྲ་བར་ཤིན་ཅང་གི་འཕེལ་རྒྱས་དང་བཟོ་སྐྲུན་ཐད་རམ་འདེགས་བྱེད་ཀྱི་ཡོད་སྐོར་གྱི་མཆན་འབྲི་མཁན་ཡང་ཡོད་འདུག

འདས་ལོའི་ཕྱི་ཟླ་ ༡༢ ཚེས་ ༡༧ ཉིན་ཨ་རིའི་གྲོས་ཚོགས་ཀྱིས། རྒྱ་ནག་གི་བཙན་དབང་འོག་ཡུ་གུར་མི་མང་གིས་ངལ་རྩོལ་བྱས་ཏེ་རྒྱ་ནག་གཞུང་ལ་ཐོན་རྫས་བསྐྲུན་བཞིན་པ་མཚམས་འཇོག་ཡོང་སླད། རྒྱལ་སྤྱིའི་བཟོ་ཚོང་ཁང་དག་གིས་ཡུ་གུར་བའི་ངལ་རྩོལ་དང་འབྲེལ་བའི་ཐོན་རྫས་ཉོ་ཚོང་བྱས་མི་ཆོག་པའི་གྲོས་ཆོད་ཅིག་གཏན་འབེབས་གནང་ཡོད་པ་དང་། ཟླ་དེའི་ཕྱི་ཚེས་ ༢༣ ཉིན་སྲིད་འཛིན་བྷའེ་ཌན་མཆོག་གིས་མཚན་རྟགས་བསྐྱོན་ཏེ་དངོས་སུ་ཨ་རིའི་གཞུང་འབྲེལ་གྱི་ཁྲིམས་ཆགས་ཡོད་པ་རེད།

རྒྱ་ནག་ནི་ཨ་རིའི་རླངས་འཁོར་བཟོ་ཚོང་ཁང་དེའི་ཁྲོམ་ར་ཆེ་ཤོས་གཉིས་པ་དེ་ཆགས་ཡོད་ཀྱང་། ཨ་རྒྱ་གཉིས་བར་ཚོང་དོན་གསང་བ་རྐུ་འཁྱེར་བྱས་ཡོད་པའི་སྐྱོན་འཛུགས་དང་བཀག་སྡོམ་རིགས་རིམ་པར་བྱུང་ཡོད་པ་ལྟར། འདས་ལོའི་ཕྱི་ཟླ་ ༣ ཚེས་ ༢༠ ཉིན་རྒྱ་ནག་གི་དམག་སྡེ་འགའ་ཤས་ནང་བཟོ་ཚོང་ཁང་དེས་བཟོས་པའི་པར་ཆས་ཅན་གྱི་རླངས་འཁོར་དེ་བེད་སྤྱོད་ལོག་པར་བཏང་སྟེ། རྒྱལ་ཁབ་ཀྱི་བདེ་འཇགས་དང་སྲུང་སྐྱོབ་ལ་གནོད་སྐྱོན་བཟོ་ཉེན་ཡོད་པའི་དོགས་གཞིའི་འོག་བཀག་སྡོམ་བྱས་ཡོད་པ་མ་ཟད། འདས་ལོའི་ཕྱི་ཟླ་ ༥ ཚེས་ ༢༡ ཉིན་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། པེ་ཅིན་དང་ཧྲང་ཧེ་སོགས་ཀྱི་གཞུང་ཞབས་པ་ཚོས་ཨ་རིའི་རླངས་འཁོར་དེ་སྲིད་གཞུང་གི་ས་ཁོངས་སུ་འཇོག་མི་ཆོག་པའི་བཀའ་བཏང་ཡོད་འདུག

གསར་འགོད་པ། བསྟན་འཛིན་ཕུར་བུ།