ལྕམ་ཨང་སན་སུའུ་སྐྱིད་ལ་སླར་ཡང་ལོ་བཞིའི་བཙོན་འཇུག་ཁྲིམས་ཐག་བཅད།

འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་སུ་སླར་ཡང་ལོ་བཞིའི་བཙོན་འཇུག་ཁྲིམས་ཐག་བཅད་པ་དང་བསྟུན། ལྕམ་ཨང་སན་སུའུ་སྐྱིད་ལགས་སུ་ཉེས་འཛུགས་བྱས་པ་ཚང་མ་ར་སྤྲོད་བྱུང་ཚེ་ཚེ་བཙོན་བྱེད་སྲིད་ཀྱི་ཡོད་འདུག

དེ་རིང་ཕྱི་ཚེས་ ༡༠ ཉིན་འབར་མའི་ཁྲིམས་ཁང་ཞིག་གིས། ནོ་སྦེལ་ཞི་བདེ་གཟེངས་རྟགས་བཞེས་མཁན་ལྕམ་ཨང་སན་སུའུ་སྐྱིད་ལགས་ཀྱིས། ཁྲིམས་འགལ་གྱི་ཅ་དངོས་དང་ལྐོག་འབྲེལ་ཁ་པར་སོགས་ཉར་ཚགས་དང་། ཏོག་དབྱིབས་གཉན་རིམས་ཀྱི་སྒྲིག་ཁྲིམས་ལས་བརྒལ་བ་སོགས་ཀྱི་ནག་ཉེས་བསགས་ཡོད་པའི་ངོས་འཛིན་འོག ཁོང་མོར་སླར་ཡང་ལོ་བཞིའི་བཙོན་འཇུག་ཁྲིམས་ཐག་བཅད་ཡོད་པ་ཡོངས་བསྒྲགས་བྱས་འདུག་ལ། ད་ལྟ་རང་ལོ་ ༧༦ ཡིན་པའི་ལྕམ་ཨང་སན་སུའུ་སྐྱིད་ལགས་ཀྱིས་ཁྱོན་ལོ་ངོ་དྲུག་གི་བཙོན་འཇུག་ཁྲིམས་ཆད་འཁུར་དགོས་ཀྱི་ཡོད་འདུག

འབར་མའི་དྲག་དམག་སྲིད་གཞུང་གིས། འདས་ལོའི་ཕྱི་ཟླ་ ༢ པའི་ནང་ལྕམ་ཨང་སན་སུའུ་སྐྱིད་ལགས་རྒྱལ་ཁབ་ཀྱི་སློབ་སྟོན་པའི་གོ་གནས་ནས་ཕྱི་ཕུད་བཏང་རྗེས་རང་ཁྱིམ་དུ་བཟང་བཙོན་འོག་བཅུག་ཡོད་པ་དང་། འདས་ལོའི་ཕྱི་ཟླ་ ༡༢ ཚེས་ ༦ ཉིན་འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་དང་སྲིད་འཛིན་ཟུར་བ་ཝིན་མེན་ཊི་གཉིས་ནས་ནག་ཉེས་བཅུ་གཅིག་བསགས་ཡོད་པར་བརྙད་ནས་མི་རེར་ལོ་བཞི་རེའི་བཙོན་འཇུག་ཁྲིམས་ཐག་བཅད་ཡོད་ཀྱང་། ཕྱིས་སུ་ལྕམ་ཨང་སན་སུའུ་སྐྱིད་ལགས་ཀྱི་བཙོན་འཇུག་ཁྲིམས་ཆད་ལོ་ ༤ ནས་ ༢ ལ་མར་ཆག་ཡངས་དང་སྲིད་འཛིན་ཟུར་བ་ཝིན་མེན་ཊི་ལགས་ཀྱི་ཁྲིམས་ཆད་མེད་པ་བཟོས་ཡོད་འདུག

ལྕམ་ཨང་སན་སུའུ་སྐྱིད་ལགས་སུ་སླར་ཡང་བཙོན་འཇུག་ཁྲིམས་ཐག་བཅད་པའི་ཐད། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། ད་རེས་འབར་མའི་ཁྲིམས་ཁང་ཞིག་གིས་མངོན་གསལ་མེད་པ་དང་གསང་བའི་སྒོ་ནས་བཙོན་འཇུག་གི་ཁྲིམས་ཐག་བཅད་པ་ནི་ལྕམ་ཨང་སན་སུའུ་སྐྱིད་ལགས་དུས་ཡུན་ངེས་མེད་རིང་བཙོན་ཁང་དུ་བཅུག་འདོད་ཡོད་པ་རེད། ཅེས་དམག་མིའི་གཞུང་ལ་སྐྱོན་བརྗོད་བྱས་ཡོད་པ་དང་། ད་ལན་གྱི་ཁྲིམས་རའི་ཞིབ་དཔྱོད་སྐབས། ལྕམ་ཨང་སན་སུའུ་སྐྱིད་ལགས་ཀྱི་ཁྲིམས་རྩོད་པས་གསར་འགོད་པ་དང་མི་དམངས་ལ་སྐད་ཆ་བཤད་མི་ཆོག་པ་བཟོས་ཡོད་པ་མ་ཟད། འབར་མའི་རྒྱལ་ས་ (Nay Pyi Taw) ཁུལ་གྱི་གསར་ཁང་གཅིག་ཀྱང་ཉན་ཞིབ་ལ་ཞུགས་བཅུག་མེད་པ་རེད།

ལྕམ་ཨང་སན་སུའུ་སྐྱིད་ལགས་སུ་བཙོན་འཇུག་ཁྲིམས་ཐག་གཅོད་དོན་ནི། ཕྱི་ལོ་ ༢༠༢༠ ལོའི་འབར་མའི་རྒྱལ་ཡོངས་འོས་བསྡུའི་ཁྲོད་ལྕམ་ཨང་སན་སུའུ་སྐྱིད་ཀྱི་དམངས་གཙོ་ཡར་ཐོན་ཚོགས་པར་རྒྱལ་ཁ་ཐོབ་ཡོད་པས་ཡིན་ཡང་།  སྐབས་དེར་འབར་མའི་དྲག་དམག་སྲིད་གཞུང་གིས་དམངས་གཙོ་ཡར་ཐོན་ཚོགས་པས་འོས་བསྡུའི་གྲུབ་འབྲས་རྫུན་བཟོ་བྱས་ཚུལ་བརྗོད་དེ། ཨང་སན་སུའུ་སྐྱིད་ལགས་ཀྱིས་སྣེ་འཁྲིད་འབར་མའི་དམངས་གཙོ་ཡར་ཐོན་ཚོགས་པའི་དབང་ཆ་རྩ་མེད་གཏོང་ཐབས་དང་། དམིགས་བསལ་འདས་ལོའི་ཕྱི་ཟླ་ ༢ ནང་ཨང་སན་སུའུ་སྐྱིད་འཛིན་བཟུང་བྱས་པ་ནས་བཟུང་། འབར་མའི་ནང་རང་དབང་ལ་དགའ་ཞིང་མང་གཙོའི་གཞུང་ལ་རྒྱབ་སྐྱོར་གནང་མཁན་གྱི་མི་སེར་ཚོས་དྲག་དམག་སྲིད་གཞུང་ལ་ངོ་རྒོལ་རིམ་པ་བྱས་སྟབས། དྲག་དམག་སྲིད་གཞུང་གིས་ད་བར་མི་གྲངས་ ༡༠༦༠༠ ལྷག་འཛིན་བཟུང་དང་མི་གྲངས་ ༡༣༠༣ ཙམ་གྲོངས་ཡོད་འདུག

ཉེ་ལམ་ལྕམ་ཨང་སན་སུའུ་སྐྱིད་ལགས་སུ་བཙོན་འཇུག་ཁྲིམས་ཐག་བཅད་པའི་ཐད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྤྱི་ཁྱབ་འགན་འཛིན་སྐུ་ལྕམ་མ་ཁེལ་བྷ་ཆིས་ལེ་ཊི་ (Michelle Bachelet) ལགས་ཀྱིས་གཙོས་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་དོན་གཉེར་བའི་ཚོགས་སྡེ་དང་མི་སྒེར་སོགས་ཀྱིས་འབར་མའི་དྲག་དམག་སྲིད་གཞུང་ལ་སྐྱོན་བརྗོད་ཤུགས་ཆེན་བྱས་ཡོད་ལ། ཕྱི་ཟླ་ ༡༢ ཚེས་ ༣༠ ཉིན་འབར་མའི་དྲག་དམག་གཞུང་གིས། ལྕམ་ཨང་སན་སུའུ་སྐྱིད་ལགས་ཀྱི་སྐུ་སྲུང་བ་(Cherry Htet) ལགས་སུ་ལོ་གསུམ་གྱི་བཙོན་འཇུག་ཁྲིམས་ཐག་བཅད་དེ། འབར་མའི་ཡ་མེ་ཐིན་རྫོང་གི་བཙོན་ཁང་(Yamethin Prison) དུ་བཅུག་ཡོད་འདུག་ལ། དབྱེ་ཞིབ་པས་འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་སུ་ཉེས་འཛུགས་བྱས་པ་ཚང་མ་ར་སྤྲོད་བྱུང་ཚེ། ཨང་སན་སུའུ་སྐྱིད་ལགས་སུ་ཚེ་བཙོན་གྱི་ཁྲིམས་ཐག་གཅོད་སྲིད་སྐོར་བརྗོད་འདུག

གསར་འགོད་པ། སྐལ་བཟང་སྦྱིན་པ།