ཆབ་མདོ་ངག་ཕུན།
དེ་རིང་ངས་བཤད་འདོད་པ་ནི། དེང་སྐབས་རྒྱ་དམར་སྲིད་གཞུང་གིས་བོད་ནང་དུ་རིག་གནས་གསར་བརྗེའི་བསྐྱར་ལོག་རྒྱག་པ་ནང་བཞིན་ལས་འགུལ་གདུག་རྩུབ་ཅན་སྤེལ་བཞིན་ཡོད་ཅིང་། དེ་ཡང་ཉེར་འཆར་ཁམས་བྲག་མགོ་རྫོང་དུ་མཐོ་ཚད་སྨིད་ ༩༩ ལྷག་ཅན་གྱི་ཐུབ་དབང་གི་སྐུ་བརྙན་བྱིན་ཅན་ཡོད་པ་དེ་གཏོར་བཤིག་བཏང་ཡོད་པ་དང་། མ་ཎི་དར་ལྕོག་དང་སྒོ་དར་སོགས་བཙན་གྱིས་ཕབ་བཅུག་ནས་མེར་སྲེག་གཏོང་གི་བཅུག་ཡོད་ཚུལ་སོགས་གནས་ཚུལ་བརྒྱུད་ལམ་ཁག་ནས་མཐོང་ཐོས་བྱུང་བ་དང་། རྒྱ་དམར་གྱིས་འཛམ་གླིང་མི་རྣམས་ལ་བོད་ནང་དུ་ཆོས་དད་རང་དབང་ཡོད་ཚུལ་འུར་སྒྲོག་བྱེད་ཀྱི་ཡོད་རུང་དོན་དངོས་གོང་གི་གནས་ཚུལ་ངོ་མ་འདི་འདྲ་ཞིག་རེད། སོ་སོའི་རྩ་བའི་བླ་མའི་མཚན་ཙམ་དང་། སྐུ་པར་ཡན་ཆད་དད་རྟེན་དུ་ཉར་མི་ཆོག་པ་དང་། གལ་སྲིད་རྩ་བའི་བླ་མའི་སྐུ་པར་དད་རྟེན་དུ་ཉར་ཡོད་པ་རྒྱ་ནག་སྲིད་གཞུང་གི་འབྲེལ་ཡོད་ལས་བྱེད་ཚོས་མཐོང་ཚེ། བཙོན་འཇུག་དང་ཉེས་ཆད་གཅོད་ཀྱི་ཡོད། རྒྱ་དམར་སྲིད་གཞུང་ཁ་ཞེ་མི་མཚུངས་པའི་ལས་དོན་བོད་ཆོས་ལྡན་གྱི་ཞིང་ཁམས་སུ་སྤེལ་བཞིན་ཡོད། གཞིས་ལུས་བོད་མི་རྣམས་བྱིའུ་ལྕགས་ཁྲ་ནང་བཅུག་པ་ནང་བཞིན་རྒྱ་ནག་དམར་པོའི་སྲིད་གཞུང་གིས་གདུག་རྩུབ་མནར་གཅོད་འོག་མི་འདོད་བཞིན་གནས་དགོས་ཐུག་གི་ཡོད་པ་དེ་རེད། བོད་ཆོས་ལྡན་གྱི་ཞིང་ཁམས་སུ་རྒྱ་དམར་བཙན་འཛུལ་བྱས་པ་ནས་བཟུང་སྟེ་བོད་རྒྱ་ཆེ་མི་མང་ལ་ཉིན་གཅིག་ཀྱང་བདེ་སྐྱིད་ཡོང་གི་མེད་ལ། ཁྲག་དང་མིག་ཆུའི་འོག་ཏུ་འཚོ་བ་རོལ་དགོས་ཐུག་གི་ཡོད། ཡིན་ནང་གཞིས་བཞུགས་སྤུན་ཟླ་རྣམས་སྙིང་སྟོབས་ཞུམ་མེད་དང་། ཆོད་སེམས་བརྟན་པོའི་ཐོག་ནས་གནས་ཡོད། དྲང་བདེན་གྱིས་བདེན་དོན་རྩོད་ལེན་གནང་གི་ཡོད་ཅིང་། རྒྱ་དམར་སྲིད་གཞུང་གིས་དྲག་གནོད་དང་གདུག་རྩུབ་ཀྱིས་མནར་གཅོད་ག་ཚད་བཏང་རུང་། བོད་མི་རིགས་དུས་ནམ་ཡང་ཤུལ་མེད་བཟོ་མི་ཐུབ། མི་ལོ་དོན་གཉིས་ལྷག་གི་རིང་དུ་རྒྱ་དམར་སྲིད་གཞུང་གིས་འཇམ་རྩུབ་ཀྱི་བོད་མི་རིགས་བློ་སྣ་བཀུག་ཐབས་ཀྱིས་ཐབས་ཤེས་རིམ་པར་བྱས་ཡོད་རུང་། དམར་གཞུང་གིས་གཡོ་སྒྱུ་ཅན་གྱི་ཆབ་སྲིད་དེ་ལམ་ལྷོང་བྱུང་མེད།
ལྷག་པར་དེང་སྐབས་བོད་ནང་གི་ཤེས་ལྡན་མི་སྣ་ཁག་ལ་ཉེས་མིང་སྣ་ཚོགས་ཤིག་བཏགས་ནས་བཙོན་འཇུག་བྱེད་བཞིན་ཡོད་ཅིང་། དེ་ཡང་བོད་ཀྱི་དུས་བབ་ལས། བོད་ནང་གི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་སུ་ཁ་བྲལ་གྱི་ཁྲིམས་འགལ་ལས་ཀ་བྱས་ཡོད་པའི་ཉེས་མིང་འོག །ལོ་བཅུའི་བཙོན་འཇུག་ཁྲིམས་ཐག་བཅད་དེ་ལྷ་སའི་འཁྲིས་ཀྱི་བཙོན་ཁང་ཞིག་ཏུ་བཅུག་ཡོད་འདུག་ཅེས་གསལ་དོན་ལྟར། བོད་ནང་གི་ཤེས་ཡོན་པ་དང་། བོད་མི་རིགས་ཀྱི་རྩ་ཆེན་སྐད་ཡིག་མེད་པ་བཟོ་ཆེད་བོད་ཀྱི་སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་ཁྲིད་བྱེད་མི་ཆོག་པ་དང་། རྒྱ་ཡིག་སློབ་ཁྲིད་བྱེད་དགོས་པ་བཙན་བཀའ་བཏང་ནས་དངོས་སུ་ལས་འགུལ་སྤེལ་བཞིན་ཡོད་ཅིང་། བོད་ནི་ལོ་རྒྱུས་ཡུན་རིང་ལྡན་ཞིང་། སྐད་ཡིག་ཕུན་སུམ་ཚོགས་པའི་མི་རིགས་ཤིག་ཡིན། འོན་ཀྱང་བོད་ནང་དུ་རྒྱ་ནག་གུང་ཁྲན་ཏང་བཙན་འཛུལ་གྱིས་ལོ་རྒྱུས་ཡུན་རིང་ལྡན་པའི་བོད་ཀྱི་དགོན་རྙིང་བྱིན་ཅན་དུ་མ་ཞིག་རྩ་གཏོར་བཏང་བ་དང་། སྐུ་གསུང་ཐུགས་རྟེན་མེར་སྲེག་པ་སོགས་ཆེས་གདུག་རྩུབ་ཅན་གྱི་ལས་འགུལ་སྤེལ་ནས་བོད་ཀྱི་ཆོས་རིག་ལ་ཉམས་ཆག་ཚད་མེད་བཟོས་ཡོད།
མདོ་དབུས་ཁམས་གསུམ་དུ་རྒྱ་ནག་གུང་ཁྲན་ཏང་གིས་རིག་གནས་གསར་བརྗེ་ཟེར་བའི་ཆེས་གདུག་རྩུབ་ཅན་གྱི་ལས་འགུལ་ཐབས་སྡུག་སྤེལ་བ་དང་། ཀུན་གཟིགས་པཎ་ཆེན་རིན་པོ་ཆེས་གཟིགས་ནས་རྒྱ་ནག་མི་མང་སྤྱི་འཐུས་རྒྱལ་ཁབ་ལ་བོད་ནང་གི་དངོས་ཡོད་ཀྱི་གནས་ཚུལ་ཡིག་འབྲུ་ཁྲི་བདུན་གྱི་སྙན་ཞུ་འབུལ་ཡོད། ཡིན་ནའང་གུང་ཁྲན་ཏང་གི་དཔོན་ངན་ཚོས་དངོས་ཡོད་ཀྱི་གནས་ཚུལ་ལ་བསམ་ཤེས་བྱ་རྒྱུ་ལས་ལྡོག་སྟེ་ཀུན་གཟིགས་པཎ་ཆེན་རིན་པོ་མཆོག་ལ་མ་ཉེས་ཁག་གཡོགས་ཀྱིས་བཙོན་ཁང་དུ་བཅུགས་ནས་དཀའ་སྡུག་ཚད་བཞེས་དགོས་བྱུང་ཡོད། ཡིན་ནའང་ཀུན་གཟིགས་པཎ་ཆེན་རིན་པོ་ཆེ་མཆོག་གིས། ལས་ལ་བརྩོན་ཞིང་དཔའ་ངར་ལྡན་པའི་བོད་མི་རིགས་ཀྱི་མཚན་སྙན་ལ་གནོད་པའི་ཤུལ་རྗེས་ཕྲ་མོ་ཙམ་ཡང་ངའི་ལོ་རྒྱུས་ནང་མི་འཇོག་པའི་དམ་བཞག་ཡོད་ཅེས་གསུང་ནས་བཙོན་གྲོལ་ཐུབ་པ་དང་། བོད་ཀྱི་ཞིང་འབྲོག་ས་ཁུལ་གང་སར་ཕེབས་ནས་བོད་ཀྱི་ཆོས་རིག་མི་ཉམས་གོང་འཕེལ་ཡོང་བའི་ལས་དོན་རླབས་ཆེན་གནང་ཡོད། བོད་མི་རིགས་མཚོ་སྔོན་མི་རིགས་དགེ་འོས་ཆེད་སྦྱོང་སྐབས་བཀའ་སློབ་ལས། མི་རིགས་དགེ་ཆེད་ཞིག་ཡིན་ན། ངེས་པར་དུ་མི་རིགས་སྐད་ཡིག་གིས་སློབ་ཁྲིད་བྱེད་དགོས་པ་གཙོ་བོར་བཞག་ནས། ངེས་པར་དུ་མི་རིགས་སྐད་ཡིག་གི་སློབ་ཁྲིད་ལེགས་པོ་བྱེད་དགོས། བོད་ཡིག་ལ་ལོ་ངོ་ཆིག་སྟོང་སུམ་བརྒྱའི་ལོ་རྒྱུས་ཡོད་ཅིང་། ཤེས་བྱ་ཕུན་སུམ་ཚོགས་པ་སྟེ། ཚད་མ་རིག་པ་དང་། ལོ་རྒྱུས། སྐར་རྩིས། གསོ་རིག རིག་རྩལ། ཆོས་ལུགས་བཅས་ཡོད་པས། ཞེས་དེ་འདྲའི་བཀའ་སློབ་རིན་ཐང་བྲལ་བ་རབ་དང་རིམ་པ་གནང་ཡོད་ཅིང་། ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་གིས་སྐུ་ངལ་ཚད་མེད་སྐྱོན་གནང་མཛད་ནས་བོད་ཀྱི་ཆོས་དང་རིག་གཞུང་ཉམས་པ་སླར་གསོ་ལ་བྱས་རྗེས་རླབས་ཆེན་འཇོག་གནང་མཛད་ཡོད། དེ་བཞིན་གཞིས་བཞུགས་ཤེས་ལྡན་པ་ཚོས་ནུས་པ་གཅིག་ཏུ་སྤུངས་ནས་བོད་ཀྱི་སྐད་ཡིག་ཉམས་པ་སླར་གསོ་ཡོང་ཆེད་ལ་བྱས་རྗེས་བླ་ཆེན་བཞག་ཡོད་ན། ཁོང་རྣམ་པར་ངེས་པར་བཀའ་དྲིན་རྗེས་དྲན་ཞུ་བཞིན་ཡོད།
རིམ་གྱིས་བོད་ནང་གི་གནད་ཡོད་རྣམ་གཅིག་རྗེས་གཉིས་མཐུད་ཀྱི་ཞིང་དུ་ཕེབས་རྗེས། ད་སྐབས་བོད་ཀྱི་ཆོས་དང་རིག་གཞུང་མེད་པ་བཟོ་ཐབས་ཀྱི་རྒྱ་གཞུང་གིས་ལས་འགུལ་རབ་དང་རིམ་པ་སྤེལ་ནས་ཧ་ཅང་ཛ་དྲག་ཅན་དུ་འགྱུར་བཞིན་ཡོད་པས། སྐུ་ཞབས་བཀྲ་ཤིས་དབྱང་ཕྱུག་ལགས་ཀྱིས་སེམས་ཀྱི་མ་བཟོད་དེ་བོད་ཀྱི་སྐད་ཡིག་ཐོབ་ཐང་རྩོད་ལེན་གནང་བར་བརྟེན་ནས་རྒྱ་ནག་སྲིད་གཞུང་གིས་ཉེས་མིང་སྣ་ཚོགས་ཤིག་བཏགས་ནས་མི་ལོ་ལྔ་རིང་བཙོན་ཁང་དུ་བཅུག་ཡོད་པ་དང་། དཀའ་སྡུག་ཚད་མེད་མྱོང་དགོས་བྱུང་ཡོད་ལ། བོད་མི་གྲངས་ ༡༥༥ ལྷག་གིས་གཅེས་པའི་ལུས་སྲོག་བློས་བཏང་གིས་རྒྱ་ནག་གི་དྲག་གནོན་ཅན་གྱི་སྲིད་ཇུས་ལ་ངོ་རྒོལ་དང་། བོད་ཀྱི་སྐད་ཡིག་མི་ཉམས་རྒྱུན་འཛིན་ཆེད་རང་ལུས་མེར་སྲེག་བཏང་ཡོད། ད་དུང་རྒྱ་ནག་སྲིད་གཞུང་གིས་བསམ་ཤེས་མེད་པའི་ཐོག་ནས་བོད་མི་རིགས་དང་། བོད་ཀྱི་ཆོས་དང་རིག་གཞུང་མེད་པ་བཟོ་རྒྱུའི་དམིགས་ཡུལ་ངན་པ་འཛིན་ནས་ལས་འགུལ་ཐབས་སྡུག་ཅན་སྤེལ་དང་སྤེལ་བཞིན་ཡོད། དེ་ཡང་དུས་བབ་ལས། ཕྱི་ལོ་ ༢༠༡༤ ཙམ་ནས་རྒྱ་ནག་གཞུང་གིས་བོད་ཁུལ་གྱི་བྱིས་གཉོར་ཁང་ནས་བཟུང་རྒྱ་ཡིག་རྒྱ་སྐད་གཙོ་གཉེར་གྱི་སྲིད་ཇུས་ལག་བསྟར་བྱས་ཡོད་པ་མ་ཟད། རྒྱའི་སྐད་ཡིག་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་ཕ་སྐད་མ་ཡིག་ཡིན་ཚུལ་གྱི་དྲིལ་བསྒྲགས་བྱས་ཏེ། སློབ་འཁྲིད་ཐབས་ལམ་གཉིས་པ་ཞེས་རྒྱ་ཡིག་རྒྱ་སྐད་ཀྱི་ཐོག་ནས་སློབ་འཁྲིད་བྱེད་པའི་རྒྱ་སྒྱུར་སློབ་གསོའི་སྲིད་ཇུས་བོད་ཁུལ་གང་སར་བཙན་འགེལ་བྱེད་ཀྱི་ཡོད་པ་དང་བསྟུན། བོད་ཡིག་ཆེད་གཉེར་གྱི་སྒེར་བཙུགས་སློབ་གྲྭ་དང་དགོན་པའི་རིག་གནས་སློབ་གླིང་སོགས་ཀྱང་སྒོ་རྒྱག་ཏུ་འཇུག་གི་ཡོད་འདུག །ཅེས་གསལ་དོན་ལྟར་རྒྱ་གཞུང་གིས་དམིགས་ཡུལ་ངེས་པ་ཞིག་བཟུང་ནས་ལས་དོན་བྱེད་ཀྱི་ཡོད། སྙིང་སྟོབས་ཞུམ་མེད་ཀྱིས་བོད་ཀྱི་སྐད་ཡིག་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་ཀྱིས་སླར་ཡང་སྐད་ཡིག་ཞུ་འབོད་གནང་ཡོད་ཅིང་། སྙིང་སྟོབས་ཞུམ་མེད་དེ་འདྲའི་དྲང་བདེན་གྱི་བོད་ཀྱི་སྐད་ཡིག་ཐོབ་ཐང་རྩོད་ལེན་གནང་བར་རྗེས་སུ་ཡི་རངས་ཞུ་བཞིན་ཡོད། སྐད་ཡིག་ནི་མི་རིགས་ཀྱི་བླ་སྲོག་ཡིན་ཚུལ་བསམ་བློ་བ་ཚོས་གསུང་དོན་ལྟར་ང་ཚོ་གཞིས་བྱེས་ཚང་མའི་བོད་མི་རིགས་ཀྱི་སྐད་ཡིག་བདག་གཅེས་དང་། སློབ་སྦྱོང་བྱེད་དགོས་པ་རེད། བདག་གཅེས་ཟེར་དུས་མཆོད་བཤམས་ནང་དུ་བཞག་ནས་མཆོད་པ་འབུལ་ཡུལ་ཞིག་ཏུ་ངོས་འཛིན་མི་རུང་ཞིང་། ངེས་པར་ཚང་མའི་བོད་ཀྱི་སྐད་ཡིག་ནམ་ཞགས་རྒྱུན་དུ་བཀོལ་སྤྱོད་བྱེད་དགོས་པ་དེ་རེད་སྙམ།
ད་ནི་བོད་རིགས་སྤུན་ཟླ་ཚང་མ་ཆིག་སྒྲིལ་གྱིས་ཕ་རོལ་པོ་ལ་གདོང་ལེན་གནང་དགོས་པའི་དུས་སྐབས་ཤིག་སླེབས་འདུག་སྙམ་པ་ལས། དེ་མིན་ང་ཚོའི་ནང་ཁུལ་གྱི་གནས་ཚུལ་ཆུང་རིགས་ལ་མགོ་བོ་འཁོར་ནས་ང་དང་ཁྱོད་ཅེས་རྩོད་གླེང་བྱེད་པའི་དུས་སྐབས་ཤིག་མ་རེད་སྙམ། ངས་དེ་འདྲའི་གནང་གི་འདུག་བརྗོད་ཀྱི་མེད། འོན་ཀྱང་ཡིད་གཟབ་མ་གནང་ཚེ་དེ་འདྲ་འགྱུར་བའི་ཉེན་ཁ་མེད་པ་ཞིག་ཀྱང་མ་རེད་སྙམ།
རྒྱ་གཞུང་གིས་དེང་སྐབས་བོད་ནང་དུ་ཡར་རྒྱས་གནམ་ས་ཨ་ལོག་རྒྱག་པ་ལྟ་བུ་འཕེལ་རྒྱས་བཏང་ཡོད་ཚུལ་བརྗོད་ཀྱི་ཡོད། མཐོང་སྣང་ལ་སྔ་མོ་དང་མི་འདྲ་བ་དེང་སྐབས་བོད་ནང་འགྲོ་འོང་སྟབས་བདེ་རུ་ཕྱིན་པ་དངོས་ཡོད་འདྲ་མཐོང་སྲིད་མོད། དོན་ངོ་མ་བོད་ནང་གི་བོད་མི་རྣམས་རང་དབང་གི་ཐོག་ནས་འགྲོ་སྡོད་བྱེད་པའི་ཐོབ་ཐང་མེད་པ་དང་། རང་དབང་གི་སོ་སོའི་བསམ་ཚུལ་བཤད་པའི་ཐོབ་ཐང་མེད་པ། སོ་སོའི་མི་རིགས་ཀྱི་སྐད་ཡིག་སློབ་སྦྱོང་བྱེད་པའི་གོ་སྐབས་འཕྲོག་བཞིན་ཡོད། ཉིན་མཚན་དྲུག་ཏུ་རྒྱ་གཞུང་གི་བཙན་བཀའ་གང་ཞིག་བཏང་ཡོང་ན་སྙམ་ནས་འཇིག་སྐྲག་ངང་ནས་འཚོ་གནས་བྱེད་དགོས་ཐུག་གི་ཡོད། བོད་ནང་དུ་འགྲོ་འོང་སྟབས་བདེ་ཕྱིན་ཡོད་རུང་དེ་དག་ནི་རྒྱ་དམར་སྲིད་གཞུང་ལ་ཁེ་ཕན་ལས་བོད་མི་རིགས་ཉམས་ཆུང་ལ་ཕན་ཐོགས་ཡོང་གི་མེད།
རྒྱ་གཞུང་གི་སྲིད་ཇུས་ལ་མ་འདོད་པའི་རྣམ་འགྱུར་ཕྲན་བུ་སྟོན་པ་ཙམ་གྱིས་ཉེས་མིང་སྣ་ཚོགས་ཤིག་བཏགས་ཏེ་ཉེས་རྡུང་གཏོང་བ། མཐའ་ན་བཙོན་བཅུག་སྟེ་མནར་གཅོད་སྣ་ཚོགས་བཏང་ནས་རིགས་འཚོ་མ་ཟིན་པ་བཟོ་བཞིན་ཡོད། རྒྱ་དམར་འགོ་བྱེད་ཚོས་ཁ་ནས་སྤུན་ཟླ་ཞེས་སྒྲོག་གི་ཡོད་རུང་། དོན་དུ་བོད་མི་རིགས་དགྲ་བོ་ངོ་མ་ཞིག་ཏུ་ངོས་འཛིན་གྱིས་ལག་བསྟར་བྱེད་བཞིན་ཡོད།
ལྷག་པར་དེང་སྐབས་རྒྱ་དམར་གྱིས་བོད་རིགས་ན་གཞོན་དུ་མ་དམག་མི་བསྡུ་རུབ་ཀྱིས་དམག་སྦྱོང་སྤྲོད་ཀྱི་ཚུལ་གསར་ལམ་ཁག་ཏུ་གསལ་བ་ལྟར། དེ་ནི་བོད་ཀྱི་ས་མཚམས་ཁག་ཏུ་རྒྱ་དཀར་ནག་གཉིས་རྩོད་གླེང་ཡང་ཡང་ཡོང་གི་ཡོད་ཅིང་། བོད་ནི་ས་ཆའི་ཁ་མཐོ་བ་དང་གནམ་གཤིས་གྲང་ངར་ཆེ་བ་སོགས་རྒྱ་མི་དམག་ལ་དཀའ་ངལ་རིམ་པ་འཕྲད་ནས་ཐབས་ཟད་འུ་ཐུག་གི་ངང་ནས་བོད་ཀྱི་ཞིང་འབྲོག་ཁུལ་ནས་ན་གཞོན་རྣམས་དམག་མིར་བསྡུ་རུབ་བྱ་དགོས་བྱ་ཐུག་པ་ཞིག་ཡིན་པ་ནི་འབྲེལ་བརྗོད་མ་དགོས། མི་ལོ་དྲུག་ཅུ་ཙམ་གྱི་རིང་དུ་བོད་པའི་ན་གཞོན་ལ་དམག་སྦྱོང་མ་སྤྲད་ནས་ད་ལྟ་གཉིད་སད་པ་ནང་བཞིན་བོད་མིའི་ན་གཞོན་བསྡུ་རུབ་ཀྱི་དམག་སྦྱོང་སྤྲད་དགོས་པ་གང་ཞིག་ཏུ་ཐུག་པ་ཡིན་ནམ། དེ་ཡང་བོད་ཀྱི་དུས་བབ་ལས། གནས་ཚུལ་ནང་རྒྱ་གར་དབུས་འབྲེལ་ཡོད་ལས་བྱེད་ཅིག་གིས། ང་ཚོར་གསང་བའི་གནས་ཚུལ་འབྱོར་ཏེ་རྒྱ་ནག་གིས་བོད་པའི་ཁྱིམ་ཚང་རེ་ནས་ངེས་པར་དུ་མི་གཅིག་དམག་མིར་ཞུགས་བཅུག་སྟེ། ལ་དྭགས་དང་ཨ་རུ་ན་ཅལ་ཁུལ་གྱི་རྒྱ་དཀར་ནག་བར་རྩོད་རྙོག་ཏུ་གྱུར་བའི་ས་མཚམས་སུ་བཏང་ནས་རྒྱ་གར་དམག་མིར་ཁ་གཏད་གཅོག་འཆར་འདུག ཅེས་བརྗོད་ཡོད་པ་དང་། བོད་མི་ཁྱིམ་ཚང་རེ་ནས་བཅིངས་གྲོལ་དམག་མིར་ཞུགས་མཁན་རེ་དགོས་པའི་གནས་ཚུལ་དེ་རྒྱ་གར་གསང་བའི་ལས་ཁུངས་ནས་ཐོག་མར་ཤེས་རྟོགས་བྱུང་ཡོད་འདུག་ཅེས་བཀོད་དོན་ལྟར། རྒྱ་དམར་གྱི་སྲིད་ཇུས་བཟང་ནས་བོད་མི་རྣམས་ལ་དམག་སྦྱོང་སྤྲད་པ་མ་ཡིན་པ་བོད་མི་རྣམས་བདེ་སྤྱོད་ལོག་པ་གཏོང་ཆེད་ཡིན་པ་གོང་གསལ་གསར་འགྱུར་དེ་ལས་གསལ་པོ་རྟོགས་ཐུབ་པ་ཞིག་རེད། རྒྱ་དམར་གྱི་སྲིད་ཇུས་ནག་པོ་གང་འདྲ་ཞིག་སྤེལ་གྱི་ཡོད་པ་རྟོགས་ཐུབ་པ་ཞིག་རེད།
དེ་བཞིན་དེང་སྐབས་བོད་ཁུལ་ཡུལ་སྐོར་སྤྲོ་འཁྱམ་ཡོང་མཁན་ཇེ་མང་གྱུར་བ་དང་བསྟུན་ཏེ་བཅོས་ཐབས་མེད་པའི་འགོས་ནད་མང་པོ་དར་ཁྱབ་ཀྱིས་ཕྱིན་པ་དང་། འཕྲོད་བསྟེན་ཐོག་ཏུ་ཧ་ཅང་ཐབས་སྐྱོ་པོ་ཡོད་པའི་སྐོར་ལ་བུད་མེད་གཅིག་གིས་གཏམ་བཤད་གྱི་བརྙན་ཐུང་མཐོང་སོང་། དེ་དག་མཐོང་བ་དང་སེམས་ནང་ན་ཟུགས་གཏོང་ཡོང་གི་འདུག་རུང་བྱ་ཐབས་བྲལ། ཁོ་མོས་བརྗོད་དོན་ལས། ཨ་མ་ཟེར་བ་དེ་བཀའ་དྲིན་ཆེན་པོ་ཡིན་རབས་མདོ་དབུས་ཁམས་གསུམ་གྱི་སྐྱེས་ཆེན་དུ་མ་ཞིག་གསུངས་ཟིན་པ་རེད་ལ། གསུང་བཞིན་པ་རེད། ཡིན་ནའང་ཨ་མའི་ལུས་སེམས་ཀྱི་དཀའ་ངལ་དེ་དག་གང་འདྲ་ཞིག་བྱས་ནས་སེལ་ཐབས་སྐོར་ལ་གསུང་མཁན་དཀོན་ཙམ་སྣང་། དེ་དག་ཐོག་ཏུ་ངེས་པར་ཡིད་གཟབ་གནང་དགོས་སྐོར་དང་། དེང་སྐབས་མདོ་དབུས་ཁམས་གསུམ་དུ་ཨེ་ཙི་ན་ཚ་འགོས་ཁྱབ་ཀྱིས་ཛ་དྲག་ཡིན་པས། དེ་དག་སྣང་ཆུང་གཏན་ནས་བཏང་མི་རུང་ཞིང་། གཉན་ནད་རེག་དུག་འགོས་ཁྱབ་མི་འགྲོ་བའི་ཆེད་དུ་རྒྱ་ཆེ་མང་ཚོགས་ཀྱིས་ཡིད་གཟབ་གནང་དགོས་རབས་དང་། ཁོ་མོ་བོད་ཀྱི་ས་ཁུལ་མང་པོ་ཞིག་ཏུ་ཕྱིན་སྐབས། དྭ་ཕྲུག་གི་སློབ་གྲྭ་མང་པོ་འདུག་པས། བུ་ཕྲུག་དེ་དག་གང་འདྲ་བྱས་ནས་དྭ་ཕྲུག་ཏུ་གྱུར་པ་རེད་ཟེར་ནས་དྲིས་དུས། ཕ་མར་གཉན་ནད་རེག་དུག་གི་ན་ཚ་འགོས་ནས་འདས་གྲོངས་ཀྱིས་དྭ་ཕྲུག་ཏུ་གྱུར་རབས་ཟེར། དེ་དག་མཐོང་ཡོང་དུས་སེམས་ནང་དུ་ན་ཟུགས་གཏོང་ཡོང་གི་འདུག །སྡེ་པ་འགའ་ཤས་ཀྱིས་དེ་དག་ཐོག་ཏུ་དེ་ཙམ་དོ་སྣང་མེད་པས་སྣང་ཆུང་བྱེད་ཀྱི་འདུག་ཅིང་། གཉན་ནད་རེག་དུག་དེ་ཧ་ཅང་ཉེན་ཁ་ཆེན་པོ་ཡིན་པར་ངོས་འཛིན་གནང་གི་མི་འདུག་པས། །དེའི་ཐོག་ཏུ་ངེས་པར་དུ་འབྲེལ་ཡོད་ཚོས་སློབ་གསོ་སྤྲད་དགོས་ཚུལ་དང་། ས་གནས་འགའ་ཤས་སུ་གཉན་ནད་རེག་དུག་འགོས་ཡོད་པ་ཤེས་དུས་བུད་མེད་རྣམས་སེམས་སྡུག་གིས་རང་སྲོག་བཅད་མཁན་མདོ་དབུས་ཁམས་གསུམ་དུ་ཉུང་ཉུང་ཞིག་གཏན་ནས་མིན་པ་དང་། བློ་ཚབ་སྐྱེ་དགོས་པ་དེ་འདྲ་ཞིག་ཏུ་གྱུར་འདུག་ཚུལ་སོགས་ཀྱི་སྐོར་སེམས་ནང་གི་སྐད་ཆ་མང་པོ་བཤད་ཀྱི་འདུག །དེ་དག་ཐོག་ཏུ་ངེས་པར་དུ་རང་དོན་གཅེས་ཀྱིས་ཡིད་གཟབ་གནང་དགོས་པའི་གནད་དོན་ཞིག་ཡིན་པ་རེད། རྒྱ་གཞུང་གིས་བོད་ཀྱི་འཕྲོད་བསྟེན་ཐོག་ཏུ་སྔ་ལས་ཡར་རྒྱས་ཕྱིན་ཡོད་རབས་བཤད་ཀྱི་རུང་དོན་དུ་གནས་ཚུལ་དེ་འདྲ་ཞིག་རེད་དོ། །
