དོ་སྤྲུལ་ཆོས་དབྱིངས་ཡེ་ཤེས་སམ་ཀླུ་སྨྱོན་ཧེ་རུ་ཀ
སྟོན་དང་བསྟན་པ་བསྟན་འཛིན་གསུམ་ལ་ཕྱག་འཚལ་ལོ།།
ཡོངས་གྲགས་སུ་ལོ་ངོ་ཉིས་སྟོང་དྲུག་བརྒྱའི་སྔོན་དུ་སྟོན་པ་ཐུགས་རྗེ་ཅན་མཉམ་མེད་ཤྰཀྱའི་རྒྱལ་སྲས་དེ་ཉིད་འཇིག་རྟེན་འདིར་བྱོན་ཏེ། ལྟ་བ་རྟེན་འབྱུང་དང་སྒོམ་པ་འོད་གསལ། སྤྱོད་པ་འཚེ་མེད་བཅས་ཡིན་པའི་ནང་པའི་བསྟན་པ་འདི་ཉིད་གསར་བཏོད་མཛད། རྒྱལ་བུ་གཞོན་ནུ་དོན་གྲུབ་ཀྱིས་དགུང་ལོ་སོ་ལྔའི་སྟེང་མངོན་པར་རྫོགས་པར་སངས་རྒྱས་ཏེ། དགུང་གྲངས་བརྒྱད་ཅུ་པར་སྐུ་མྱ་ངན་ལས་མ་འདས་བར་དུ། མི་ལོ་བཞི་བཅུ་ཞེ་ལྔའི་རིང་མདོ་དང་སྔགས་ཀྱི་ཆོས་ཀྱི་འཁོར་ལོ་བསྐོར་ཏེ། མི་དང་ལྷ་དང་ཀླུ་སོགས་འགྲོ་བ་རིགས་མི་འདྲ་བ་དུ་མ་ཞིག་དགྲ་བཅོམ་པ་ནས་རྒྱུན་ཞུགས་ཀྱི་བར་གྱི་ས་ལམ་ལ་བཀོད། བསྐལ་བཟང་གི་སངས་རྒྱས་རེ་རེའི་བསྟན་པ་འཇིག་རྟེན་འདིར་གནས་པའི་དུས་ཡུན་ལ་མི་འདྲ་བའི་ཁྱད་པར་ཆེན་པོ་ཡོད་ཅིང་། སངས་རྒྱས་ལ་ལའི་བསྟན་པ་འཇིག་རྟེན་དུ་མི་ལོ་དུང་ཕྱུར་མང་པོར་གནས་པ་དང་། སངས་རྒྱས་ལ་ལའི་བསྟན་པ་ལོ་སྟོང་ཕྲག་རེ་ཟུང་ལ་གནས་ཀྱི་ཡོད། སངས་རྒྱས་གཞན་གྱི་བསྟན་པའི་གནས་ཚད་དང་བསྡུར་ན། སངས་རྒྱས་ཤྰཀྱ་ཐུབ་པའི་བསྟན་པ་ནི་འཇིག་རྟེན་དུ་གནས་ཡུན་ཆེས་ཐུང་ངུ་དེ་ཡིན། ཁོང་གི་བསྟན་པ་འདི་འཇིག་རྟེན་འདི་ལོ་སྟོང་ཕྲག་ཅི་ཙམ་གྱི་རིང་གནས་པའི་སྐོར་ལ། སངས་རྒྱས་རང་ཉིད་ཀྱིས་གསུངས་པར་གྲགས་པའི་མདོ་སྡེ་དག་གི་བཞེད་ལུགས་ཀྱང་མི་འདྲ་ཞིང་།
འཛམ་བུ་གླིང་འདིར་སངས་རྒྱས་བསྟན་པ་དུས་ཡུན་རིང་ཐུང་ཇི་ཙམ་གནས་པའི་གནས་ཚད་ལ་བཀའ་དང་བསྟན་བཅོས་རྣམས་ནས་མང་ཉུང་སྣ་ཚོགས་ཤིག་གསུངས་ཡོད་པ་སྟེ། 《མདོ་སྡེ་བསྐལ་བཟང》དང《འདུལ་བ་ལུང་ཕྲན་ཚེགས》སོགས་མང་པོ་ཞིག་ལས་བསྟན་པ་ལོ་སྟོང་དུ་གནས་པར་གསུངས། 《སྙིང་རྗེ་པད་མ་དཀར་པོའི་མདོ》ལས་བསྟན་པའི་གཟུགས་བརྙན་དང་བཅས་པ་བསྡོམས་པའི་ལོ་སྟོང་ལྔ་བརྒྱར་གནས་པར་གསུངས། 《ཟླ་བ་སྙིང་པོས་ཞུས་པའི་མདོ》ལས་བསྟན་པའི་གཟུགས་བརྙན་ལོ་ཉིས་སྟོང་གནས་པར་གསུངས། 《ཆོས་ཉིད་རང་གི་ངོ་བོ་ལས་མི་གཡོ་བར་ཐ་དད་སྣང་བའི་མདོ》ལས་བསྟན་པ་ལོ་ཉིས་སྟོང་ལྔ་བརྒྱའི་བར་དུ་གནས་པར་གསུངས། 《དགྲ་བཅོམ་པ་དགའ་བའི་བཤེས་གཉེན་གྱི་རྟོགས་བརྗོད》ལས་མི་རྣམས་ཀྱི་ཚེ་ལོ་ཡར་འཕེལ་གྱི་ཚེ་ལོ་དྲུག་བརྒྱ（མི་རྣམས་ཀྱི་ཆ་སྙོམས་ཚེ་ཚད་ལོ་དྲུག་བརྒྱ་བར་སྡོད་པ）ཐམ་པའི་བར་དུ་གནས་པར་གསུངས་པ་བཅས་ནི་དོན་གཞན་ལ་དགོངས་ནས་གསུངས་པའི་དྲང་དོན་ཡིན་པ་དང་། དོན་ལ་གནས་པའི་ཕྱོགས་ནི་སློབ་དཔོན་ སེ་ནས་མཛད་པའི《འབུམ་ཊིཀ》དང་མཛད་པ་པོ་སུ་ཡིན་ལ་རྩོད་པ་ཡོད་པའི《ཡུམ་གསུམ་གནོད་འཇོམས་ཀྱི་འགྲེལ་པ》སོགས་ལས་སངས་རྒྱས་ཀྱི་བསྟན་པ་ལོ་ལྔ་སྟོང་གི་བར་དུ་གནས་པར་བཞེད་པ་འདི་ཡིན་ཅིང་། དེ་ཡང་ལོ་ལྔ་སྟོང་ཕྱེད་ཕྱེད་དུ་བགོས་པའི་ལྔ་བརྒྱ་པ་ཕྲག་བཅུ་ཡོད་པ་ལས། གཉིས་པར་ཕྱིར་མི་འོང་དང་། གསུམ་པར་རྒྱུན་ཞུགས་ཀྱི་འབྲས་བུ་བཅས་ཐོབ་པ་མང་བས་འབྲས་བུའི་ལེའུ་གསུམ་ཟེར། དེ་ནས་ལྔ་བརྒྱ་ཕྲག་བཞི་པ་དང་། ལྔ་པ། དྲུག་པ་བཅས་ཀྱི་རིང་། ཤེས་རབ་ཀྱི་བསླབ་པ་དང་ཏིང་ངེ་འཛིན་གྱི་བསླབ་པ། ཚུལ་ཁྲིམས་ཀྱི་བསླབ་པ་ལྡན་པ་མང་དུ་བྱུང་བའི་དབང་གིས་སྒྲུབ་པའི་ལེའུ་གསུམ་ཟེར། དེ་ནས་ལྔ་བརྒྱ་ཕྲག་བདུན་པ་དང་། བརྒྱད་པ། དགུ་པ་བཅས་ཀྱི་རིང་ལ། མངོན་པའི་སྡེ་སྣོད་དང་། མདོ་སྡེའི་སྡེ་སྣོད། འདུལ་བའི་སྡེ་སྣོད་གསུམ་སྟོན་པ་མང་དུ་འབྱུང་བའི་དབང་གིས་ལུང་གི་ལེའུ་གསུམ་ཟེར། དེ་ནས་ལྔ་བརྒྱ་ཕྲག་བཅུ་པའམ་ལྔ་བརྒྱ་ཐ་མའི་རིང་རབ་བྱུང་གི་རྟགས་འཆང་བ་ཙམ་མ་གཏོགས་སངས་རྒྱས་ཆོས་ལུགས་ཀྱི་ལྟ་སྤྱོད་གཙང་མ་དང་ལྡན་པ་གཏན་ནས་མེད་པའི་དབང་གིས་རྟགས་ཙམ་འཛིན་པའི་ལེའུ་ཞེས་ཟེར་བ་ཡིན།
གོང་གི་སངས་རྒྱས་བཅོམ་ལྡན་འདས་ཀྱི་གསུང་པོད་འདི་དག་ཚང་མ་མདོ་ཡི་ཁོངས་སུ་གཏོགས་པའི་སྡེ་སྣོད་རྐྱང་རྐྱང་ཡིན་པ་མ་གཏོགས། གསང་སྔགས་ཀྱི་ཕྱོགས་གཏོགས་གང་ཡང་མིན་པ་ང་ཚོས་ཤེས་གསལ་བཞིན་དང་། སྐབས་འདིར་བསྟན་པ་ཞེས་པ་དེ་ཡང་རབ་ཏུ་བྱུང་བའི་འདུལ་སྡོམ་མམ་རང་ཉིད་གཅིག་བུའམ་སོ་སོ་ཁོ་ན་ཐར་པར་བགྲོད་བྱེད་ཀྱི་ལམ་མམ་བསྟན་པ་སྟེ། སོ་སོར་ཐར་པ་ཐེག་དམན་འདུལ་བའི་ལུགས་ཀྱི་རབ་བྱུང་ཕོ་མོའི་སྡོམ་པ་ཙམ་ཞིག་ལ་ངོས་འཛིན་པ་ཡོངས་གྲགས་རེད། དེས་ན་ཐེག་ཆེན་གྱི་བྱམས་སྙིང་རྗེ་བྱང་ཆུབ་སེམས་དཔའི་སྡོམ་པ་དང་། གསང་སྔགས་ཀྱི་བསྐྱེད་རྫོགས་རིམ་པ་གཉིས་ཀྱི་དམ་ཚིག་རྣམས་གོང་གི་སྡེ་སྣོད་དེ་དག་ལས་བསྟན་པའི་བསྟན་པ་ཞེས་པ་དེའི་ཁོངས་སུ་མི་འདུ་བ་ཡང་ང་ཚོས་ཤེས་དགོས་ཏེ། བསྟན་པ་ལོ་ལྔ་སྟོང་གི་རིང་གནས་པའི་མཇུག་ཤོས་ལྔ་བརྒྱ་ཐ་མ་དེའི་སྐབས་སུ། རབ་བྱུང་ཕོ་མོའི་གོས་ཀྱི་ཁ་དོག་སྟེ། མདོག་དམར་པོ་དང་སེར་པོ་ཡང་འཇིག་རྟེན་དུ་རྙེད་དཀའ་ཚུལ་གསུངས་པས་ཤེས་ནུས་སོ།།
ནང་བསྟན་ལོ་རྒྱུས་དཔེ་ཆ་མང་པོའི་ནང་དུ་སངས་རྒྱས་ཀྱི་བསྟན་པའི་མཇུག་བསྡུ་ས་དེ་ལི་ཡུལ་ཡིན་ཚུལ་གསུངས་ཡོད་ཅིང་། བུ་སྟོན་ཆོས་འབྱུང་གི་ནང་དུ་དེའི་སྐོར་ཅུང་ཟད་ཞིབ་ཅིང་ཕྲ་ལ་ཡིད་སྐྱོ་དགོས་པ་ཞིག་བཀོད་ཡོད་པ་སྟེ། ཆོས་འབྱུང་དེའི་ནང་དུ་ཟླ་བ་སྙིང་པོས་ཞུས་པའི་མདོའི་ལུང་དྲངས་པ་ལས། ཟླ་བ་སྙིང་པོས་ཞུས་པ། བཅོམ་ལྡན་འདས། དམ་པའི་ཆོས་འདི་ཐ་མར་ཇི་ལྟར་ནུབ་པར་འགྱུར། རྒྱུ་ཅི་ལས་ཉམས། སུས་མ་མཆིས་པར་བགྱིད། ཅེས་ཞུས་པ་ན། ང་འདས་པའི་འོག་ཏུ་ལོ་ལྔ་བརྒྱའི་བར་དུ། ངའི་བསྟན་པ་ལ་སྤྱོད་པའི་སེམས་ཅན་རྣམ་པར་གྲོལ་བ་མང་དུ་འབྱུང་། དེ་ནས་ལོ་ལྔ་བརྒྱའི་བར་དུ་ཏིང་ངེ་འཛིན་ལ་སྤྱོད་པ་མང་དུ་འབྱུང་། རྒྱལ་པོ་དང་སེམས་ཅན་ཕལ་ཆེར་ཆོས་ལ་དད་ཅིང་སྤྱོད་པ་ནི། ཕྱིར་ཞིང་ཉུང་བར་འགྱུར་རོ།། དེ་ནས་ལྔ་བརྒྱའི་བར་དུ་དམ་པའི་ཆོས་སྟོན་ཅིང་། སེམས་ཅན་འདྲེན་པ་དང་ཐར་བར་བྱེད་པའི་སློབ་དཔོན་མང་དུ་འབྱུང་ལ། ཉན་ཐོས་ཀྱི་དགྲ་བཅོམ་པ་ཉིད་དུ་ཉུང་བར་འགྱུར་རོ།། རྒྱལ་པོ་དང་སེམས་ཅན་ཕལ་ཡང་ཉན་པ་ཙམ་དུ་ཟད་ཀྱི། ཉམས་སུ་ལེན་ཅིང་སྤྱོད་པའམ་བརྩོན་འགྲུས་མི་བྱེད་ལ་དད་པ་འབྲི་བར་འགྱུར་རོ།། དམ་པའི་ཆོས་ཀྱི་སྲུང་མ་རྣམས་ཀྱང་མི་དགའ་བར་འགྱུར་ཏེ། དམ་པའི་ཆོས་ལ་མི་དད་པ་རྣམས་ནི་སྔོན་པས་མཐུ་སྟོབས་སྐྱེའོ།། འཛམ་བུའི་གླིང་གི་རྒྱལ་པོ་རྣམས་ཀྱང་ཕན་ཚུན་གཅིག་ལ་གཅིག་དམག་འདྲེན་ཅིང་འཁྲུག་པར་འགྱུར་རོ།། དེ་ལ་ལོ་ལྔ་བརྒྱའི་སུམ་བརྒྱར་ནི། དམ་པའི་ཆོས་སྤྱོད་པའི་ལྷ་ཀླུ་ལ་སོགས་པ་རྣམས་མི་གནས་ཤིང་། སེམས་ཅན་རྣམས་ཆོས་ལ་མི་དད་པར་འགྱུར། ཆོས་སྤྱོད་པ་རྣམས་ཀྱང་ཆོས་ཀྱི་གཞུང་བཞིན་མི་སྤྱོད་པ་དང་། བརྩོན་འགྲུས་ཆུང་བས་གྲུབ་པའང་ཉུང་ངུར་འགྱུར ཁ་དོག་བཞི་དང་བཞི་ལས་གྱུར་པའང་དྲི་རོ་ལ་སོགས་པའང་ཆུང་བར་འགྱུར་རོ།། མི་ནད་དང་ཕྱུགས་ནད་དང་མུ་གེའང་འབྱུང་ངོ་།། ལོ་ཉིས་བརྒྱ་ལ་དགེ་སློང་ཡང་ཆོས་བཞིན་མི་སྤྱོད། འཇིག་རྟེན་གྱི་ཁེ་དང་གྲགས་པ་འཚོལ། སྙིང་རྗེ་ཆུང་། ཚུལ་ཁྲིམས་ལ་མི་གནས། དམ་པའི་ཆོས་མ་ནོར་བར་སྤྱོད་པ་ལ་སྐུར་བ་འདེབས། ལོ་སྤྱོད་དང་ཡོ་བྱད་འཕྲོག འཇིག་རྟེན་གྱི་རྒྱལ་པོའི་གསུང་ལ་བརྟེན་ཅིང་རྒྱལ་སྲིད་འཛིན། རྒྱལ་པོའི་འཕྲིན་པར་འགྲོ་ཞིང་ངོ་འཕྲད་འཚོལ། རྒྱལ་པོ་དང་འབངས་འབྱེད་པའི་དབྱེན་བྱེད། ཉོ་ཚོང་དང་ཁེ་སྤོགས་བྱེད་ཐབས་འཚོལ། དམ་པའི་ཆོས་སྤྱོད་པའང་སྙིང་ནས་ཉམས་སུ་བླངས་ཏེ་མི་སྤྱོད་ཀྱི། ཕལ་ཆེར་ཁ་གསག་དང་ཚུལ་འཆོས་བྱེད་དོ།། སོགས་ནས། མཇུག་མཐར་དགེ་སློང་དེ་དག་གི་བར་དུ་འདུམ་ཐབས་བྲལ་བའི་འགལ་ཟླ་བྱུང་སྟེ། ལག་ཏུ་མཚོན་ཆ་ཐོགས་ནས་ཕན་ཚུན་ཡ་ང་བའི་དམར་འཛིང་བྱས་ཏེ། རབ་བྱུང་བའི་སྡེ་ཞེས་པ་དེ་རྩ་མེད་དུ་སོང་བའི་ཚུལ་ཡིད་སྐྱོ་བ་ཞིག་བྲིས་འདུག
ལོ་རྒྱུས་དངོས་ཡོད་རིག་པ་དང་རྒྱུ་འབྲས་ལྟ་གྲུབ་རིག་པའི་ངོས་ནས་བརྗོད་ན། སྐྱབས་འགྲོའི་སྡོམ་པ་གཞིར་བཞག་གིས་སོ་ཐར་གྱི་སྡོམ་པ་རྒྱུད་ལྡན་གྱི་རབ་བྱུང་ཕོ་མོ་གཉིས་ནི་ཐེག་དམན་པའམ་གནས་བརྟན་སྡེ་བའི་བསྟན་པའི་གཞི་འཛིན་མཁན་ཡིན་ཏེ། ཐེག་དམན་ཆོས་བརྒྱུད་ཀྱི་སྡོམ་པ་ཐམས་ཅད་ཀྱི་མཆོག་དང་རབ་དེ་རབ་བྱུང་དགེ་ཚུལ་སློང་གི་སྡོམ་པ་དེ་ཡིན། སྐྱབས་འགྲོའི་སྡོམ་པ་གཞིར་བཞག་གིས་བྱང་ཆུབ་སེམས་དཔའི་སྡོམ་པ་རྒྱུད་ལྡན་གྱི་གང་ཟག་དེ་རབ་བྱུང་བའམ་ཁྱིམ་པའི་སྐྱེ་བོ་གང་ཡིན་ཡང་། གང་ཟག་དེ་དག་ཐེག་ཆེན་པའི་བསྟན་པའི་གཞི་འཛིན་མཁན་ཡིན། སྐྱབས་འགྲོའི་སྡོམ་པ་དང་བྱང་སྡོམ་གཞིར་བཞག་གིས། གསང་སྔགས་ཀྱི་དབང་སྐུར་ཞུས་ཏེ་བསྐྱེད་རྫོགས་གཉིས་ཉམས་སུ་ལེན་མཁན་གྱི་གང་ཟག་དེ་རབ་བྱུང་བའམ། སྔགས་པ་སྔགས་མའམ་སེར་ཁྱིམ་སུ་ཞིག་ཡིན་ཡང་གསང་སྔགས་ཀྱི་བསྟན་པའི་གཞི་འཛིན་མཁན་ཡིན།
སྟོན་པ་བཅོམ་ལྡན་འདས་ཀྱིས་ཆོས་གསུང་བའི་དབུ་བཙུགས་ནས་དུས་ཡུན་རིང་པོ་ཞིག་ལ། གལ་སྲིད་མི་ཞིག་གིས་ཁོང་ལ་ཐར་པའི་ལམ་བསྟན་དུ་གསོལ་ཞེས་གསོལ་བ་བཏབ་ཚེ། ཁོང་གིས་མི་དེར་ཁྱོད་རང་ཐར་པ་ཐོབ་པར་མཐའ་གཅིག་ཏུ་ཁྱིམ་སྤངས་ཏེ་རབ་ཏུ་བྱུང་དགོས་ཞེས་གསུང་བཞིན་ཡོད་ན་ཡང་། ཁོང་གི་སྐུ་ཚེའི་སྨད་ཙམ་ཞིག་ལ་གསུང་སྟངས་དེར་འགྱུར་བ་མངོན་གསལ་དུ་ཕྱིན་ཏེ། ཐར་པའི་གོ་འཕང་འཐོབ་པར་བྱེད་པ་ལ། མཐའ་གཅིག་ཏུ་ཁྱིམ་སྤངས་ནས་རབ་ཏུ་བྱུང་མི་དགོས་པར། སྐྱབས་འགྲོའི་སྡོམ་པ་དང་བྱང་ཆུབ་སེམས་དཔའི་སྡོམ་པའི་རྨང་གཞི་བྱས་ཏེ་ས་བཅུ་ལམ་ལྔ་ཚང་མ་བགྲོད་ཆོག་པ་དང་། སྐུ་ཚེའི་མཇུག་ཙམ་ཞིག་ཏུ་དེ་ལས་ཀྱང་གསུང་སྟངས་ལ་འགྱུར་བ་ཕྱིན་ཏེ། སྐྱབས་འགྲོ་དང་བྱང་ཆུབ་སེམས་དཔའི་སྡོམ་པའི་སྟེང་དུ་གསང་སྔགས་ཀྱི་དམ་ཚིག་བསྲུང་ནུས་ན། འདོད་ཡོན་ལྔ་ལ་ལོངས་སྤྱོད་བཞིན་དུ་ཟུང་འཇུག་རྡོ་རྗེ་འཆང་གི་གོ་འཕང་འཐོབ་ནུས་པའི་ལམ་བསྟན་གནང་མཛད་པ་རེད།
རྒྱ་གར་དུ་སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ནས་ལོ་གཅིག་སྟོང་བདུན་བརྒྱ་ཙམ་གྱི་རྗེས་སུ། རྒྱ་གར་ནུབ་བྱང་ནས་ཁ་ཆེའི་འདྲེ་དམག་བསླེབས་ཏེ་བསྟན་པའི་གནས་གཞི་ཆེན་པོ་དུ་མ་ཞིག་ལ་གཏོར་བཤིག་དང་། རབ་བྱུང་ཕོ་མོ་སྟོང་ཕྲག་མང་པོ་གསོད་རྡུང་གི་ལས་ལ་སྦྱར་ཏེ་བསྟན་པ་ཡོངས་སུ་བསྣུབས་པ་རེད། ལོ་རྒྱུས་སྨྲ་བ་ཚང་མ་ཁ་གཅིག་གྲགས་ཀྱིས་ཁ་ཆེ་འདྲེ་དམག་གིས་རྒྱ་གར་དུ་ནང་བསྟན་དང་ཧིན་བསྟན་གཉིས་ཀར་དུས་མཉམ་དུ་གནོད་འཚེ་བཏང་ན་ཡང་། ཧིན་བསྟན་སྔར་བཞིན་དར་ཞིང་རྒྱས་པར་གྱུར་པ་ནི། ཧིན་བསྟན་གྱི་གཞི་འཛིན་པ་རྨང་མཐུག་ས་དེ་གཞི་རིམ་མི་སྐྱའི་སྤྱི་ཚོགས་ཡིན་པའི་དབང་གིས་ཡིན་ཞིང་། ནང་བསྟན་རྩ་མེད་དུ་ཕྱིན་ཏེ་སྐྱར་གསོ་མ་ཐུབ་པ་ནི་ཐེག་ཆེན་དང་ཐེག་དམན་གྱི་སྡེ་གཉིས་ཀས་རབ་བྱུང་ཕོ་མོ་ལ་གཙིགས་སུ་བཟུང་སྟེ། རབ་བྱུང་བའི་སྤྱི་ཚོགས་ཡར་རྒྱས་ལ་དམིགས་པ་གཏད་པ་མ་གཏོགས། གཞི་རིམ་མང་ཚོགས་ཀྱི་ཁྲོད་དུ་ནང་བསྟན་གྱི་སྤྱི་དང་བྱེ་བྲག་གི་ཤེས་ཡོན་སློབ་སྦྱོང་དང་སྒྲུབ་པ་ཉམས་ལེན་གྱི་རིམ་པ་དར་སྤེལ་གཏོང་རྒྱུར་འཐུས་ཤོར་ཆེན་པོ་ཞིག་ཕྱིན་པའི་དབང་གིས་ཡིན་པ་ཡོངས་གྲགས་རེད།
སྤྱི་ཚོགས་ཀྱི་གོམས་སྲོལ་དང་ཉིན་རེའི་འཚོ་བའི་ཁྲོད་ཀྱི་ལག་ལེན་ཁྲོད་ནས། སྔགས་པའི་སྡེ་དང་བསྡུར་ན་རབ་བྱུང་གི་སྡེ་ལ་སངས་རྒྱས་ཀྱི་བསྟན་པར་ཐོས་བསམ་སྒོམ་གསུམ་བྱེད་རྒྱུའི་དུས་ཚོད་དང་ཁོར་ཡུག་བཟང་པོ་ཞིག་ཡོད་པ་ནི་དངོས་ཡོད་གནས་ཚུལ་ཡིན་པས། རང་རེ་བོད་ཡུལ་དུ་ཡང་འདས་པའི་ལོ་གཅིག་སྟོང་ལྷག་གི་རིང་ལ། རབ་སྔགས་གཉིས་ཀྱི་སྡེ་ཡི་བསྟན་འཛིན་གྱི་སྐྱེས་བུ་ཐོས་བསམ་སྒོམ་གསུམ་ལ་ཕྱག་རྗེས་ཆེ་བའི་གྲངས་འབོར་བསྡུར་ཚེ། ཕྱེད་ཀ་ཕྱེད་ཀའམ་ཡང་ན་ཚད་ངེས་ཅན་ཞིག་གི་སྟེང་ནས་བལྟས་པ་ཡིན་ན། སྔགས་པའི་སྡེ་ལས་རབ་བྱུང་གི་སྡེ་རུ་འཆད་རྩོད་རྩོམ་གསུམ་གྱི་ཕྱག་རྗེས་ཆེ་བའི་བསྟན་འཛིན་གྱི་སྐྱེས་བུ་དམ་པ་མང་པོ་ཞིག་བྱུང་ཡོད་པ་རེད། ཡིན་ན་ཡང་། མི་ཟློག་དུས་ཀྱི་འཁོར་ལོའི་འགྲོས་ནས་བསྟུན་ནས། གཟི་འོད་ཕྱོགས་བརྒྱར་འབར་བའི་སྔོན་ཆད་ཀྱིས་ད་ལྟའི་ཚབ་བྱེད་མི་རུང་ལ། མེས་པོ་གོང་མ་ཚོའི་བླ་ན་མེད་པའི་ཕྱག་རྗེས་ཁོ་ནར་འཐམས་ཏེ་མ་འོངས་པའི་ཆེད་དུ་གྲ་སྒྲིག་མི་བྱེད་པ་ནི་བླུན་པོ་མིག་རྒྱང་ཐུང་བའི་ལུགས་ཁོ་ནའོ།།
ལོ་རབས་བརྒྱད་ཅུ་བའི་དུས་མགོ་ནས་བརྩམས་ཏེ། བོད་ནང་དུ་བསྟན་པ་ཡང་དར་གྱི་དབུ་བརྙེས་ཤིང་། སྐབས་དེ་དུས་ནས་རབ་བྱུང་བ་དགོན་པར་བསྡུ་བའི་ལོ་ཚོད་དེ་ལོ་བཅོ་བརྒྱད་ངེས་པར་དུ་ལོན་དགོས་པའི་གཏན་ཁེལ་གྱི་སྒྲིག་གཞི་ཞིག་ཡོད་མོད། ས་གནས་ཀྱི་ལས་བྱེད་བཟང་པོ་དེ་དག་གི་བཀའ་དྲིན་ལ་བརྟེན་ནས། མ་ཚོར་མ་རིག་པའི་ཁུལ་དུ་དགོན་པ་སོ་སོས་ལོ་ན་ཆུང་བའི་གྲྭ་བཙུན་གྲངས་འབོར་གཞི་རྒྱ་ཆེན་པོ་ཞིག་དགོན་པར་བསྡུས་ཏེ། དགོན་པར་རང་རང་གི་མ་འོངས་པའི་སོན་རྩའི་དཔུང་སྡེ་ཆེན་པོ་ཞིག་བཏབ་སྟེ་གསོ་སྐྱོང་བྱས་ཡོད་པ་རེད་ལ། དེ་ཚོའི་ཁྲོད་ཀྱི་བརྒྱ་ཆའི་ཚད་གཞི་ངེས་ཅན་ཞིག་ཕྱིར་འཇིག་རྟེན་མི་སྐྱའི་འཚོ་བའི་ཁྲོད་དུ་ལོག་ཟིན་ན་ཡང་། ཤུལ་ལུས་གྲྭ་བཙུན་མི་རབས་གསར་པའི་གྲངས་འབོར་དེ་ཡང་ལྟོས་བཅས་ཀྱིས་ཅུང་ཟད་མང་པའི་རྐྱེན་གྱིས། སྤྱི་ལོ་ཉིས་སྟོང་གི་བར་དུ་མདོ་དབུས་ཁམས་གསུམ་གང་སའི་དགོན་པར་ཚོ་ལ། མ་འོངས་རྒྱུན་འཛིན་གྲྭ་བཙུན་གྱི་མུ་གེ་དེ་ཙམ་ཆེན་པོ་ཞིག་མ་བྱུང་བ་རེད།
ཡིན་ན་ཡང་། སྟོང་ལོ་གསར་པ་མགོ་ཚུགས་ཏེ་འཛམ་གླིང་སྤྱིའི་རིག་གཞུང་གི་ཁ་ཕྱོགས་ལ་འགྱུར་ལྡོག་ཆེན་པོ་ཞིག་འགྲོ་མགོ་ཚུགས་པ་དང་། བོད་ནང་གི་བོད་མའི་འཚོ་བའི་ཡང་འགྱུར་ལྡོག་ཆེན་པོ་ཞིག་བྱུང་བ་མ་ཟད། ལྷག་པར་དུ་བོད་མི་ན་གཞོན་པའི་སྤྱི་ཚོགས་ཁྲོད་དུ་དེང་རབས་ཅན་གྱི་རིག་གཞུང་སྣ་ཚོགས་ཤིག་རྒྱ་མཚོའི་རྦ་རླབས་ལྟར་འཕྱུར་འོངས་པས། བོད་ཀྱི་ས་ཁུལ་གང་སར་དེང་རབས་ཀྱི་སློབ་གྲྭ་དང་སློབ་གསོའི་ལམ་ལུགས་ཀྱི་སྒྲོམ་གཞི་ཆེན་པོ་ཞིག་རྩ་བ་རྒྱས་ཤིག་ཡལ་འདབ་གང་སར་བརྐྱངས། དེ་དང་བསྟུན་ནས་བོད་རིགས་མི་སྐྱའི་འཚོ་བའི་ཁ་ཕྱོགས་དང་སྒྲོམ་གཞིར་ཡང་འགྱུར་བ་རབ་དང་རིམ་པ་ཞིག་འགྲོ་མགོ་བརྩམས་པ་སྟེ། སྔོན་ཆད་ཞིང་ལས་དང་ཕྱུགས་ལས་ཁོ་ནས་འཚོ་བ་དོན་དུ་གཉེར་བའི་འཚོ་བའི་སྤྱི་འགྲོས་དེ་འཐོར་ཞིག་ཏུ་འགྲོ་བའི་མགོ་ཚུགས་ཤིང་། སྔོན་ཆད་བྱིས་པ་ལྔ་དྲུག་སྐྱེས་ཀྱང་འགན་ཁུར་དེ་ཙམ་ཆེན་པོ་ཞིག་མེད་པའི་རོང་འབྲོག་གི་འཚོ་བ་སྐྱེལ་སྟངས་ལས་ལྡོག་སྟེ། བྱིས་པ་གཉིས་སྐྱེས་ཀྱང་དེ་གཉིས་གསོ་སྐྱོང་གི་འགན་ཁུར་ཧ་ཅང་ལྕི་མོར་གྱུར་པའི་དངོས་ཡོད་གནས་སྟངས་ཤིག་གི་རྐྱེན་གྱིས། བཟའ་ཚང་གསར་བ་འདི་དག་གི་མང་ཤོས་ཀྱིས་བྱིས་པ་གཉིས་དང་གསུམ་ཙམ་མ་གཏོགས་སྐྱེ་རུ་འཇུག་གི་མེད་པ་དང་། བྱིས་པ་འདི་དག་གི་ཕ་མའི་ཁྲོད་ནས་མང་ཤོས་ཀྱིས་རང་རང་གི་བྱིས་པ་དགོན་པར་སྐྱེལ་འདོད་བྱེད་ཀྱི་མེད།
བྱིས་པ་དགོན་པར་སྐྱེལ་རྒྱུའི་ལམ་དང་ལུགས་སྲོལ་ལ་འགྱུར་ལྡོག་ཆེན་པོ་ཞིག་བྱུང་བ་འདི་ནི། རང་རང་གི་ཆོས་བརྒྱུད་དེ་དགོན་པ་དང་རབ་བྱུང་ཁོ་ནས་འཛིན་སྐྱོང་སྤེལ་གསུམ་བྱེད་དགོས་པའི་གྲུབ་མཐའ་དེའི་འཇིགས་སུ་རུང་བའི་གོད་ཆགས་ཆེན་པོ་ཞིག་རེད་ཨང་། དེ་ནི་ངོ་མ་བོད་ཀྱི་གཏམ་དཔེ། ལྟག་ཆུ་ཆད་པའི་རྫིང་བུ་ཞེས་པ་དེའི་དཔེ་མཚོན་གསོན་པོ་ཞིག་ཅི་ལ་མིན་ཏེ། གལ་སྲིད་དགོན་པ་དེ་རྫིང་བུ་ཞིག་ཡིན་ན། དེའི་རྒྱུན་འཛིན་གྲྭ་བཙུན་རྣམས་ནི་དེ་འཕེལ་རྒྱས་ཀྱི་འབྱུང་ཁུངས་སུ་གྱུར་པའི་ལྟག་ཆུ་དེ་མ་ཡིན་ནམ། གལ་སྲིད་གྲྭ་བཙུན་གསར་ཞུགས་ཀྱི་ལྟག་ཆུ་དེ་ཆད་སོང་བ་ཡིན་ན། དགོན་པའི་རྫིང་བུ་དུས་ཡུན་རིང་པོ་ཞིག་མ་འགོར་བར་སྐམ་པར་མི་འགྱུར་རམ། དེའི་ཕྱིར། འདི་ནི། འདས་པའི་ལོ་རྒྱུས་ཁྲོད་དུ་གྲྭ་བཙུན་ཁོ་ནས་བསྐྱངས་ཤིང་། ད་ལྟ་ཡང་གྲྭ་བཙུན་ཁོ་ནས་སྐྱོང་བཞིན་པ། མ་འོངས་པར་ཡང་གྲྭ་བཙུན་ཁོ་ནས་སྐྱོང་དགོས་པར་འདོད་པའི་བོད་ཀྱི་ཆོས་བརྒྱུད་དེ་ལ་མཚོན་ན། ཆེས་འཇིགས་སུ་རུང་བའི་གནད་དོན་ཞིག་མ་ཡིན་ནམ། ཆེས་གཡོལ་ཐབས་བྲལ་བའི་གོད་ཆག་ཅིག་མ་ཡིན་ནམ། ཚེ་སྲོག་གི་འགག་རྩ་མ་ཡིན་ནམ། ཤི་གསོན་གྱི་ལ་ཁ་མ་ཡིན་ནམ། ལོ་ལྔ་བཅུའི་རྗེས་སུ་ལོ་རྒྱུས་ཀྱི་ཤུལ་བཞག་ཙམ་ཞིག་ཏུ་འགྱུར་རྒྱུ་མ་ཡིན་ནམ། ལོ་ལྔ་བཅུའི་རྗེས་སུ་ད་ལྟའི་གསེར་གྱི་རྒྱ་ཕིབས་ཅན་གྱི་འདུ་ཁང་དེ་དག་འགྲེམ་སྟོན་ཁང་རེ་རེར་འགྱུར་རྒྱུ་མ་ཡིན་ནམ། ད་ལྟའི་གྲྭ་བཙུན་བརྒྱ་སྟོང་ཅན་གྱི་དགོན་པ་འདི་དག ལོ་ལྔ་བཅུའི་རྗེས་སུ་མི་མེད་འདྲེ་གྲོང་དུ་འགྱུར་རྒྱུ་མ་ཡིན་ནམ།
སྐྱེ་འགྲོ་ཐམས་ཅད་གཅིག་ལ་གཅིག་བརྟེན་གྱིས་འཚོ་ཞིང་གཞེས་པའི་ཆོས་ཉིད་འདིའི་ཀློང་དུ། རང་རེ་བོད་ཀྱི་གྲྭ་བཙུན་སྔགས་གསུམ་སུ་ཡིན་ཡང་། ཆུང་མ་ལས་སྐྱེས་པ་ནས་བཟུང་སྟེ་མཐར་རྒས་ཤིང་འཆི་བའི་བར་གྱི་མི་ཚེའི་བརྒྱུད་རིམ་ཁྲོད་དུ། གཞན་གྱི་བྱམས་སྐྱོང་དང་གཞོག་འདེགས་མེད་པར་ཉིན་གཅིག་ལ་ཡང་འཚོ་ཐབས་མེད་ཅིང་། ལྷག་པར་དུ་བོད་ཀྱི་དགོན་སྡེའི་གྲྭ་བཙུན་སྔགས་གསུམ་རྒན་རྒོན་གྱི་རིགས་ལ་མཚོན་ན། རང་ཉིད་ལས་གཞོན་པའི་མི་ཞིག་གིས་ཟ་མ་གཡོ་སྐོལ་དང་གོན་ཆས་བཀྲུ་བ། གནས་མལ་ལ་གཙང་སྦྲ་བྱེད་པ་སོགས་གང་ཅིའི་ཐད་དུ་མི་གཞན་ཞིག་གི་རོགས་སྐྱོར་དེ་ནི་ཇི་འདྲའི་གལ་ཆེན་པོ་ཞིག་རེད་ཨང་། གོང་བརྗོད་ལྟར། སྤྱི་ལོ་ ༢༠༠༠ལོ་ནས་བཟུང་བོད་རིགས་བྱིས་པའི་ཁྲོད་དུ་དགོན་པར་བསྐྱོད་མཁན་ཧ་ཅང་ཉུང་བའི་དབང་གིས། གྲྭ་བཙུན་སྔགས་གསུམ་ལོ་ན་རྒན་པའི་རིགས་ལ་གཉོར་སྐྱོང་བྱེད་མཁན་མེད་པའི་དཀའ་ངལ་རབ་དང་རིམ་པ་ཞིག་བྱུང་དང་འབྱུང་བཞིན་ཡོད་པས། གཟའ་འཁོར་འདིའི་ནང་ཁོ་བོས་སྐད་འཕྲིན་ལས། མདོ་སྨད་མཚོ་ལྷོ་ཁུལ་ཁྲིི་ཀ་རྫོང་དུ་བསྐྲུན་པའི་གྲྭ་བཙུན་རྒན་རྒོན་གྱི་ཆེད་དུ་ཡིན་པའི་རྒན་གསོ་ཁང་མིང་ལ། མཚོ་ལྷོ་ཁུལ་སྤྱོད་བཟང་མེ་ཏོག་རྒན་གསོའི་ལྟེ་གནས་ཞེས་པ་ཞིག་གི་གསལ་བསྒྲགས་ཤིག་མཐོང་ཞིང་། དེའི་ཐོག་མའི་ཡིག་འབྲུ་འགའ་ནི་འདི་ལྟར། “བོད་ཁུལ་ས་མཐོ་བ་དང་། ཁོར་ཡུག་དམིགས་བསལ་ཡིན་པ། དགེ་འདུན་པ་མང་པོ་ཡོད་པ། ལོ་ན་མཐོ་བའི་དགེ་འདུན་པ་ཚོ་ལ་དཔལ་འབྱོར་གྱི་ཡོངས་ཁུངས་མེད་པ། སྙིང་ནད་དང་ཁྲག་ཤེད་མཐོ་བའི་ནད། ས་མཐོའི་ནད་སོགས་ཡུལ་ནད་ཀྱིས་ཁེངས་པ། དགོན་སྡེ་ལ་དགེ་འདུན་པ་རྒན་གྲས་ལ་དམིགས་པའི་ཆེད་དོན་ཞབས་ཞུའི་སྒྲིག་ཆས་མེད་པ་བཅས་ཀྱི་ངོས་ནས་བརྗོད་ན། ཚེ་མཇུག་གི་འཚོ་བའི་དཀའ་ཁག་ཧ་ཅང་ཆེ་བ་དང་། ཅི་བྱ་གཏོལ་མེད་དུ་གྱུར་ཡོད།” ཅེས་པ་འདི་ཀློག་ཐེངས་རེ་རེར། འདི་ནི་རང་རེའི་སྤྱི་ཚོགས་འཚོ་བའི་ཁྲོད་ཀྱི་ཁ་ཚ་དགོས་གཏུགས་དོན་དག་ཆེན་པོ་ཞིག་རེད་ཨང་སྙམ་པའི་ཚོར་བ་ཞིག་ངང་གིས་སྐྱེ་ཡོང་།
གོང་གི་གྲྭ་བཙུན་རྒན་གསོ་ཁང་གི་གསལ་བསྒྲགས་འདི་ལས་མཐོང་ཐུབ་པ་ཞིག་ནི། ང་ཚོའི་སྤྱི་ཚོགས་ཁྲོད་དུ་རྒས་མནར་ནད་གཅོང་དབུལ་ཕོངས་ཡིན་པའི་གྲྭ་བཙུན་རྒན་པ་ཧ་ཅང་མང་པོ་ཞིག་གིས། རང་རང་གི་ཚེ་མཇུག་ནི་འཚོ་བ་དེ་ཧ་ཅང་ཐ་ཤལ་ཉམ་ཞན་ངང་བསྐྱལ་དང་སྐྱེལ་བཞིན་ཡོད་པ་དེ་གསལ་བོ་ཡིན་ལ། དེང་རང་གི་ལོ་ཆུང་བྱིས་པ་དང་དར་མ་སུ་ཞིག་ཡིན་ཡང་། རང་རང་རྒས་ཤིང་འཁོགས་པའི་སྐབས་སུ་འདི་ལྟ་བུའི་བདག་མེད་ཐབས་སྡུག་གི་འཚོ་བ་ཞིག་རོལ་འདོད་མེད་པས། ཐོག་མ་ཉིད་ནས་དགོན་པའི་གྲྭ་བཙུན་གྱི་འཚོ་བ་འདི་ལ་རོལ་འདོད་ཀྱི་ཡི་ག་སེམས་གཏིང་ནས་ཆད་དང་འཆད་བཞིན་ཡོད་པ་ནི་ནམ་ལངས་ཉི་ཤར་མ་རེད་དམ། ཟླ་ཤས་སྔོན་ཕ་ཡུལ་གཅིག་པ་དང་དགོན་པ་གཅིག་པའི་ཆོས་གྲོགས་ཕར་ཕྱིན་རབ་འབྱམས་པའི་དམ་བཅའ་བཞག་རྗེས་སྐྱ་སར་བབས་ཏེ། ཆུང་མ་བླངས་ཤིང་བུ་ཕྲུག་གི་ཨ་ཕར་གྱུར་ཏེ་ལྷ་སར་ཚོང་ལས་གཉེར་མཁན་ཞིག་དང་ལྷན་དུ་གླེང་མོལ་བྱེད་སྐབས། ཁོང་གིས། དེང་སང་དགོན་པའི་གྲྭ་པ་སྐྱ་སར་འབབ་མཁན་མང་པོ་ཞིག་གིས་ཉུང་མཐར་ཡང་སྒོར་ཁྲི་ཉི་ཤུ་སུམ་ཅུ་ཙམ་བསགས་རྗེས་གཞི་ནས་སྐྱ་སར་འབབ་ཀི་ཡོད་པ་རེད། ང་ནི་དཔལ་འབྱོར་གྱི་གྲ་སྒྲིག་ཅི་ཡང་མེད་པར་སྐྱ་སར་བབས་པས། དེང་ཐོག་ཧ་ལས་པའི་དཀའ་ངལ་ལ་འཕྲད་སོང་། ཞེས་བརྗོད་པ་ཡང་འདིར་སེམས་སུ་དྲན་ཡོང་ཞིང་། མི་རྣམས་ཀྱི་སེམས་པ་འཇིག་རྟེན་གྱི་ཁྲ་ཁྲ་ཟིང་ཟིང་གིས་དབང་སྒྱུར་ཤུགས་ཆེན་བྱེད་བཞིན་པའི་དུས་རབས་འདིར། ནང་བསྟན་རིག་གཞུང་འདིས་བོད་མི་ཅི་ཙམ་ཞིག་དམར་སེར་ངུར་སྨྲིག་གི་འཇིག་རྟེན་དུ་འཁྲིད་ནུས་སམ།
ནང་བསྟན་འདི་ཐར་པར་འཛེག་པའི་སྐས་གདངས་རིང་པོ་ཞིག་ཡིན་ཞིང་། སྐད་འཛེག་འདིའི་སྟེང་ནས་ཐར་པའི་ཁང་བཟང་དང་མར་འཁོར་བའི་གྲོང་ཁྱེར་དུ་བགྲོད་དཔའི་ཐེམ་པ་མི་འདྲ་བ་དུ་མ་ཞིག་ཡོད་ཅིང་། བོད་བརྒྱུད་ནང་བསྟན་འདི་མི་ལུས་ཤིག་ལ་ཡིན་པའི་དབང་དུ་བྱས་ན། དེ་ལ་སྐྱེ་བའི་གནས་སྐབས་དང་འཚར་བའི་གནས་སྐབས། དར་མའི་དུས་སྐབས་དང་རྒ་བའི་དུས་སྐབས། ན་བའི་དུས་སྐབས་དང་འཆི་བའི་དུས་སྐབས་བཅས་བརྒྱུད་རིམ་མི་འདྲ་བ་མང་པོ་ཞིག་ངེས་པར་དུ་བརྒྱུད་དགོས་ཤིང་། བོད་བརྒྱུད་ནང་བསྟན་གྱི་དར་རྒུད་ལ་མཚོན་ན་ཡང་གོང་གསལ་མི་ལུས་ཀྱི་འཕེལ་རིམ་འདིར་དྲངས་ནས་བལྟས་ན། བསྟན་པའི་གནས་ཚད་མི་འདྲ་བ་བཅུ་ཡོད་པའི་གོ་རིམ་ལས་གཞིགས་ཏེ། མགོ་མཇུག་བར་གསུམ་ཚང་མར་རབ་བྱུང་ངུར་སྨྲིག་སྡོམ་བརྩོན་རྐྱང་རྐྱང་གིས་འཛིན་དགོས་པའི་བསམ་བློ་མཁྲེགས་པོའམ་གུ་དོག་དེའི་རིགས་ཀྱིས་ཁུངས་འཁྱོལ་ཐབས་ཡེ་ནས་མེད་པ་དེ་ལོང་བས་བལྟས་ཀྱང་ཁམས་གསུམ་རེད།
དེའི་ཕྱིར་བོད་བརྒྱུད་ནང་བསྟན་འདིའི་འཚོ་གནས་ལ་བསམ་བློ་བཏང་ན། བསྟན་པ་རབ་བྱུང་བ་གཅིག་པོས་འཛིན་པའི་དུས་སྐབས་ནས་གནའ་ནས་ད་བར་བྱུང་མ་མྱོང་ལ། དེང་སྐབས་རབ་བྱུང་བའི་གྲངས་འབོར་དང་སྤུས་ཀ་སྣང་བརྙན་གསུམ་ལ་གས་ཆག་ཧ་ཅང་ཆེན་པོ་ཞིག་བྱུང་དང་འབྱུང་བཞིན་པའི་སྐབས་འདིར། སྔགས་པའི་སྡེ་དང་སེར་ཁྱིམ་པའི་སྡེ། ཁྱིམ་པ་དཀྱུས་མའི་སྡེ་གསུམ་གྱིས་བསྟན་པ་འཛིན་སྐྱོང་སྤེལ་གསུམ་དང་ཐོས་བསམ་སྒོམ་གསུམ། བཤད་སྒྲུབ་ལས་གསུམ་སོགས་ལ་འབད་བརྩོན་དང་ཇུས་གཏོགས་ཆེན་པོ་ཞིག་མ་བྱས་རང་བྱས་རེད། འདི་ནི་གངས་ཅན་མགོན་པོ་༧བླ་མ་བདག་ཉིད་ཆེན་པོ་སོགས་ཆོས་བརྒྱུད་ཁག་གི་སྐྱེས་ཆེན་དམ་པ་དང་རབ་སྔགས་གཉིས་ཀའི་སྡེ་ཡི་བསྟན་པའི་འཕེལ་རིམ་དང་བསྟན་པའི་ཆག་འཇིག་ལ་ཐུགས་ཁུར་ཆེན་པོ་ཞིག་བཞེས་པ་རྣམས་ཀྱི་ཐུགས་ལ་བརྣགས་པའི་བྱ་གཞག་རླབས་ཆེན་ཞིག་ལགས།
མཐའ་སྡོམ་བོད་བརྒྱུད་ནང་བསྟན་གྲུབ་མཐའ་གང་ཞིག་ལ་སེར་མོ་བའི་སྡེ་གཅིག་པོ་མ་གཏོགས་བསྟན་པ་འཛིན་སྐྱོང་སྤེལ་གསུམ་བྱེད་མཁན་མེད་པ་དེ་ཆོས་བརྒྱུད་གཞན་དག་གི་སྔོན་ལ་འཛམ་གླིང་འདིའི་སྟེང་ནས་རྩ་ཡལ་དུ་འགྲོ་བའི་ཆོས་ཉིད་འདིར་ལྡོག་ཐབས་ཅི་ཡང་མེད་ལ། རབ་སྔགས་སེར་ཁྱིམ་པ་གསུམ་གྱི་སྡེ་ཡིས་འཛིན་སྐྱོང་སྤེལ་གསུམ་བྱེད་པའི་ཆོས་བརྒྱུད་གྲུབ་མཐའ་དེ་ཆེས་མཐའ་མཇུག་བར་དུ་གནས་རྒྱུ་ཡིན་པ་ཡང་ཕྱི་ནང་གི་ཆོས་ལུགས་ཚང་མའི་ལོ་རྒྱུས་ལ་བལྟས་ན་ཁས་མ་བླངས་རང་བླངས་རེད་དོ།།
