དགུན་ཁའི་གསབ་ཁྲིད་གནང་མཁན་སློབ་མ་ཞིག་འཛིན་བཟུང་བྱས།

ལྷོ་ནུབ་མི་རིགས་སློབ་ཆེན་གྱི་ཞིབ་འཇུག་སློབ་མ་ཆོས་སྒྲོན་ལགས་ཀྱིས་དགུན་ཁའི་གུང་སེང་དང་བསྟུན་ཕ་ཡུལ་གྱི་བྱིས་པ་ཚོར་གསབ་འཁྲིད་གནང་བཞིན་ཡོད་ཀྱང་ཉིན་ལྔའི་གོང་དུ་རྒྱ་ནག་ཉེན་རྟོག་པས་ཁོང་མོ་བཙན་འཁྲིད་བྱས་ཏེ་གར་ཡོད་ཆ་མེད་དུ་གྱུར་འདུག

དེ་རིང་འདི་གའི་གསར་འགོད་པར་བོད་ནས་གནས་ཚུལ་ཁུངས་ལྡན་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་གྱི་ཕྱི་དྲོའི་ཆུ་ཚོད་ ༥ ཡས་མས་སུ། རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བའི་ཁོངས་གཏོགས་ཆབ་མདོ་རི་བོ་ཆེ་ཡམ་མདའ་སྡེ་བ་ནས་ཡིན་པའི་མཐོ་རིམ་སློབ་མ་ཆོས་སྒྲོན་ཞེས་པ་ཞིག་རྒྱ་ནག་ཉེན་རྟོག་པས་བཙན་འཁྲིད་བྱས་ཡོད་པ་མ་ཟད། ཉིན་གྲངས་ ༥ ལྷག་འགྲོ་བཞིན་ཡོད་ཀྱང་ད་དུང་ཁོང་མོ་གང་དུ་ཡོད་མེད་དང་གནས་སྟངས་གང་འདྲ་ཡིན་སོགས་གང་ཡང་ཤེས་རྟོགས་ཐུབ་ཀྱི་མེད་སྟབས། ཁོང་མོའི་ནང་མི་དང་འབྲེལ་ཡོད་ཚོས་སེམས་ཁྲལ་ཆེན་པོ་བྱེད་བཞིན་ཡོད་འདུག

གནས་ཚུལ་མཁོ་སྤྲོད་པས་བུ་མོ་དེ་འཛིན་བཟུང་བྱེད་དགོས་དོན་གཞན་གང་ཡང་མེད་ཀྱང་། ཁོང་མོ་ནི་བོད་སྐད་ཡིག་ལ་དོ་སྣང་ཆེན་པོ་ཡོད་མཁན་ཞིག་ཡིན་པས་རྒྱ་སྒྱུར་སློབ་གསོར་མོས་མཐུན་མེད་པའི་རྣམ་འགྱུར་མངོན་གསལ་དུ་བསྟན་ཡོད་པ་དང་། ཡམ་མདའ་སྡེ་བའི་སློབ་ཕྲུག་ཁག་ཅིག་ལ་དགུན་ཁའི་གུང་སེང་དང་བསྟུན་གསབ་འཁྲིད་བྱེད་བཞིན་ཡོད་པའི་རྐྱེན་གྱིས་འཛིན་བཟུང་བྱས་པ་ཡིན་སྲིད་པ་དང་། སྤྱིར་བཏང་མི་རིགས་རང་གི་སྐད་ཡིག་སྦྱོང་སྤྱོད་སྤེལ་གསུམ་བྱ་རྒྱུ་ནི་རྒྱལ་ཁབ་ཀྱི་རྩ་ཁྲིམས་དང་བཅའ་ཁྲིམས་ནང་གསལ་བའི་ཐོབ་ཐང་ཞིག་ཡིན་སྟབས། བུ་མོ་ཆོས་སྒྲོན་ལགས་ལ་ནག་ཉེས་གང་ཡང་མེད་སྐོར་བརྗོད་བྱུང་།

བུ་མོ་ཆོས་སྒྲོན་ལགས་ནི་ལྷོ་ནུབ་མི་རིགས་སློབ་ཆེན་གྱི་ཞིབ་འཇུག་སློབ་མ་ཞིག་ཡིན་ཞིང་། དགུན་ཁའི་གུང་སེང་དང་བསྟུན་ཕྱིར་ཕ་ཡུལ་དུ་ཡོང་སྟེ་བྱིས་པ་ཚོར་གསབ་འཁྲིད་སོགས་ཀྱི་སློབ་གསོའི་ལས་དོན་གཉེར་གྱི་ཡོད་འདུག་ལ། ཁོང་མོའི་པ་ལགས་སྔོན་ཆད་ནས་འདས་གྲོངས་སུ་ཕྱིན་ཡོད་པ་དང་། ཨ་མ་ལགས་ཀྱི་མིང་ལ་ཁངས་སྐྱིད་ཟེར་གྱི་ཡོད་འདུག ཆོས་སྒྲོན་ལགས་ལ་རང་ལོ་ ༡༤ ཅན་གྱི་གཅུང་མོ་ཞིག་དང་གཅུང་པོ་ལོ་ ༨ ཅན་ཞིག་ཡོད་འདུག

རྒྱ་ནག་གཞུང་གིས་དགོན་པ་དང་སྐྱ་སེར་མི་སྒེར་སུས་ཀྱང་དབྱར་དགུན་གྱི་གུང་སེང་དང་བསྟུན་སློབ་ཕྲུག་ཚོར་གསབ་འཁྲིད་ཟབ་སྦྱོང་རིགས་སྤྲོད་མི་ཆོག་པ་དང་། ཕ་མ་ཚོས་བྱིས་པ་རྣམས་དགོན་པ་དང་གསུང་ཆོས་ཞུ་ས་སོགས་སུ་འཁྲིད་མི་ཆོག་པའི་བཀའ་གཏོང་གི་ཡོད་པ་མ་ཟད། གལ་སྲིད་གསབ་འཁྲིད་བྱས་པ་དང་དགོན་པར་ཕྱིན་པ་སོགས་ཀྱི་གནས་ཚུལ་བྱུང་ན་ཁྱིམ་བདག་ཚོར་ཉེས་ཆད་གཅོད་རྒྱུ་ཡིན་པའི་ཉེན་བརྡ་ལོ་ལྟར་གཏོང་བཞིན་ཡོད་པ་རེད།

དུས་བབ་ཀྱི་ས་གནས་གསར་འགོད་པས་སྤེལ།