ཛ་དྲག་ཏུ་གྱུར་བའི་ཡུ་ཨུ་དམག་འཁྲུག་དང་རྒྱ་ནག་གི་ལངས་ཕྱོགས།

འཛམ་གླིང་གི་སྟོབས་ལྡན་རྒྱལ་ཁབ་ཚོས་ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་ཏེ་དམག་འཁྲུག་རྒྱག་བཞིན་པར་སྐྱོན་བརྗོད་དང་དཔལ་འབྱོར་ཉེས་ཆད་གཅོད་བཞིན་ཡོད་ཀྱང་རྒྱ་ནག་གིས་བཙན་འཛུལ་ཞིག་ཏུ་ངོས་འཛིན་བྱེད་ཀྱི་མེད་ཅེས་ཨུ་རུ་སུའི་ཕྱོགས་སུ་ལངས་འདུག

དེ་རིང་ནི་ཨུ་རུ་སུའི་དམག་གིས་མི་འབོར་ས་ཡ་ ༤༤ ཙམ་ལས་མེད་པའི་ཡུ་ཀེ་རེན་ལ་ས་མཚོ་གནམ་གསུམ་ནས་དཔུང་འཇུག་བྱེད་པའི་ཉིན་གཉིས་པ་དེ་ཡིན་ལ། དེ་རིང་ཞོགས་པར་ཡུ་ཀེ་རེན་གྱི་རྒྱལ་ས་ཀིབ་ནང་མེ་སྒྱོགས་ཀྱི་སྒྲ་དང་ཉེན་ཡོལ་གྱི་ཅོང་བརྡ་སྔར་བཞིན་གྲགས་མུས་ཡིན་འདུག དེ་རིང་ཞོགས་པ་ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ (Volodymyr Zelensky) གྱིས་བརྙན་ལམ་བརྒྱུད་གསལ་བསྒྲགས་ཤིག་སྤེལ་བའི་ནང་། ད་བར་ཡུ་ཀེ་རེན་དང་ཨུ་རུ་སུའི་དམག་འཁྲུག་ཁྲོད་ཡུ་ཀེ་རེན་གྱི་མི་གྲངས་ ༡༣༧ རྐྱེན་འདས་སུ་ཕྱིན་ཡོད་པ་དང་། ད་ལྟའི་ཆར་ཨུ་རུ་སུའི་དམིགས་འབེན་ལྟེ་བ་དེ་ཁོང་རང་ཡིན་ནའང་། ཡུ་ཀེ་རེན་གཡུགས་ནས་འགྲོ་རྒྱུའི་འཆར་གཞི་མེད་པ་དང་། ནུབ་གླིང་རྒྱལ་ཁབ་རྣམས་ཀྱིས་ཨུ་རུ་སུར་དཔལ་འབྱོར་ཉེས་ཆད་བཅད་པ་ཙམ་གྱིས་འགྲིག་གི་མེད་པ་དང་། ཨུ་རུ་སུས་ཡུ་ཀེ་རེན་ལ་འཐབ་རྒོལ་མཚམས་འཇོག་མ་བྱེད་བར་དུ་རང་སྲུང་བྱ་ངེས་ཡིན་པས། རང་ལོ་ ༡༦ ནས་ ༦༠ བར་གྱི་སྐྱེས་པ་གང་མང་དམག་ནང་ཞུགས་དགོས་སྐོར་སོགས་བསྒྲགས་ཡོད་འདུག ད་ལྟའི་ཆར་ཡུ་ཀེ་རེན་དམག་གིས་རྒྱལ་ས་ཀིབ་ཀྱི་མཐའ་མཚམས་ཌི་མར་(Dymer)དང་ཨི་ཝན་ཀིབ་ (Ivankiv) ཁུལ་དུ་ཨུ་རུ་སུའི་དམག་ལ་ཕར་རྒོལ་བྱེད་བཞིན་ཡོད་པ་དང་། དབྱིན་ཡུལ་གྱི་རྒྱལ་སྲུང་དྲུང་ཆེས་བརྗོད་པ་ལྟར་ན། འདས་པའི་ཉིན་གྲངས་གཉིས་ནང་ཨུ་རུ་སུའི་དམག་ ༤༥༠ ལྷག་རྐྱེན་འདས་སོང་ཡོད་སྐོར་བརྗོད་འདུག

ཁ་སང་ཨུ་རུ་སུས་དངོས་སུ་ཡུ་ཀེ་རེན་ལ་དམག་དྲངས་རྗེས། ཨ་རིས་བསྐྱར་དུ་ཨུ་རུ་སུའི་ཐོག་ལ་དཔལ་འབྱོར་ཉེས་ཆད་སྔར་བས་ལྕི་བ་ཞིག་བཀལ་ཏེ། ཨུ་རུ་སུའི་དངུལ་ཁང་བརྒྱ་ཆ་ ༨༠ ཨ་རི་དང་འབྲེལ་བའི་ཚོང་དོན་བྱ་འགུལ་ནང་ཞུགས་མི་ཆོག་པ་དང་། ཨ་རིའི་མི་སེར་རྣམས་ཀྱིས་ཨུ་རུ་སུའི་དངུལ་ཁང་དེ་དག་ནང་ཚོང་གཉེར་དང་མ་རྐང་འཛུགས་རེས་མི་ཆོག་པ། ཨུ་རུ་སུའི་དཔོན་རིགས་དང་ཚོང་པ་ཆེ་གྲས་རྣམས་ལ་ཉེས་ཆད། ཨུ་རུ་སུའི་དམག་དང་རྒྱལ་སྲུང་ལྷན་ཁང་གིས་ཨ་རིའི་འཕྲུལ་རིག་ཕལ་ཆེ་བ་ཉོ་སྒྲུབ་མི་ཆོག་པ་སོགས་ཨུ་རུ་སུའི་དཔལ་འབྱོར་ཉམས་ཉེས་གཏོང་རྒྱུར་དམིགས་པའི་ཉེས་ཆད་བཀལ་ཡོད་ཅིང་། ཡུ་རོབ་མཐུན་ཚོགས་དང་། ཨོ་གླིང་། ཉི་ཧོང་། ཁེ་ན་ཌ། ནེའུ་ཛི་ལེན་ཌི། དབྱིན་ཡུལ་བཅས་ཀྱིས་ཀྱང་དེར་མཚུངས་ཀྱི་དཔལ་འབྱོར་ཉེས་ཆད་གཅོད་རྒྱུ་ཡིན་པ་གསལ་བསྒྲགས་བྱས་ཡོད་པ་རེད། གཞན་ཡང་དེ་རིང་ཉིན་རྒྱབ་ཙམ་ལ་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ནང་ཨུ་རུ་སུར་ངོ་རྒོལ་གྱི་གྲོས་ཆོད་ཅིག་འཇོག་གཏན་འཁེལ་ཡོད་ཅིང་། ཨུ་རུ་སུ་བདེ་འཇགས་ལྷན་ཚོགས་ཀྱི་གཏན་འཇགས་ཚོགས་མི་ཡིན་སྟབས། གྲོས་ཆོད་དེ་རྩིས་མེད་འགྲོ་ངེས་ཡིན་ནའང་། གྲོས་ཆོད་དེ་ཉིད་བསྐྱར་དུ་རྒྱལ་ཚོགས་ཀྱི་ཚོགས་མི་ཚང་འཛོམས་ཀྱི་ཚོགས་ཆེན་(General Assembly)ཐོག་འཁུར་རྒྱུ་ཡིན་པ་རེད་འདུག གྲོས་ཆོད་དེའི་ནང་ཨུ་རུ་སུས་ཆ་རྐྱེན་གང་ཡང་མེད་པའི་ཐོག་ནས་རང་གི་དམག་དཔུང་ཡོངས་རྫོགས་ཡུ་ཀེ་རེན་ནས་ཕྱིར་འཐེན་དང་། ཡུ་ཀེ་རེན་ཤར་མའི་ས་ཁུལ་གཉིས་ཀྱི་རང་བཙན་ཁྱབ་བསྒྲགས་དེ་རྩིས་མེད་གཏོང་དགོས་སྐོར་འཁོད་འདུག

ཁ་སང་ཉི་ཧོང་དུ་ཡོད་པའི་ཡུ་ཀེ་རེན་གྱི་གཞུང་ཚབ་པ་སར་ཇི་ཀོར་སུན་སི་ཀི་ (Sergiy Korsunsky) ཡིས་གསར་འགོད་གསལ་བསྒྲགས་ཤིག་གི་སྟེང་། རྒྱ་ནག་ངོས་ནས་ཨུ་རུ་སུ་དང་འབྲེལ་ལམ་དམིགས་བསལ་ཡོད་པ་དེ་བེད་སྤྱོད་བྱས་ཏེ། སྲིད་འཛིན་པུ་ཀྲིན་ལ་དུས་རབས་ཉེར་གཅིག་འདིར་ཡུ་རོབ་ནང་དམར་གསོད་འདི་འདྲ་བྱས་ན་རན་འཚམ་མིན་སྐོར་སྐད་ཆ་བཤད་རྒྱུའི་རེ་སྐུལ་ཞུ་ཡི་ཡོད་སྐོར་དང་། ད་ཐེངས་རྒྱ་ནག་ལ་དཀའ་རྙོག་འདི་ཉིད་སེལ་ཐབས་ཆེད་འགན་ལྷག་མ་འཁུར་ཐུབ་པའི་ནུས་པ་ཡོད་སྐོར་སོགས་བརྗོད་ཡོད་ཀྱང་། ཁ་སང་གསར་འགོད་པའི་གསལ་བསྒྲགས་ཤིག་གི་སྟེང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་མ་ཧྭ་ཁྲིན་ཡེན་ (Hua Chunying) ཟེར་བར་གསར་འགོད་པས་ཨུ་རུ་སུའི་བཙན་འཛུལ་སྐོར་འདྲི་སྐབས། ཁོ་མོས་ཨུ་རུ་སུའི་དམག་དོན་བྱ་འགུལ་དེ་བཙན་འཛུལ་ཞིག་ལ་ངོས་འཛིན་བྱས་མེད་པ་མ་ཟད། ད་ལྟའི་དཀའ་རྙོག་འདི་ཨ་རིས་ཡུ་ཀེ་རེན་ལ་གོ་མཚོན་མཁོ་སྤྲོད་བྱས་ཏེ་ཇེ་ཆེར་གཏོང་གི་ཡོད་སྐོར་བརྗོད་འདུག་ལ། ཡང་གསར་འགོད་པ་ཞིག་གིས་པུ་ཀྲིན་གྱིས་པེ་ཅིན་གྱི་དགུན་དུས་ཨོ་རྩེད་མཇུལ་བསྒྲིལ་བ་དང་ཡུ་ཀེ་རེན་ལ་དམག་དྲངས་ཡོད་སྟབས། རྒྱ་ནག་ལ་ཨུ་རུ་སུའི་དམག་དོན་འཆར་གཞི་དེར་རྒྱུས་མངའ་ཡོད་མེད་སོགས་འདྲི་སྐབས། རྒྱ་ནག་གི་མགྲིན་ཚབ་མ་དེས་གནད་དོན་དེ་སྲིད་འཛིན་པུ་ཀྲིན་ལ་འདྲི་དགོས་སྐོར་གྱི་ལན་འདེབས་བྱས་ཡོད་ལ། ཡུ་ཀེ་རེན་གྱི་དཀའ་རྙོག་འདིའི་ནང་རྒྱ་ནག་འབྲེལ་བ་མེད་སྐོར་ཡང་བརྗོད་ཡོད་འདུག

ཨུ་རུ་སུས་རང་བཙན་ལྡན་པའི་རྒྱལ་ཁབ་ཡུ་ཀེ་རེན་ལ་དམག་དྲངས་ཏེ་རྒྱལ་སྤྱིའི་ཁྲིམས་སྒྲིག་རྡོག་རོལ་ཚབས་ཆེན་བཏང་བ་དེར་འཛམ་གླིང་གི་མགོ་འཁྲིད་དང་མི་མང་སོགས་ནས་སྐྱོན་བརྗོད་དང་ཕར་རྒོལ་བྱེད་བཞིན་ཡོད་པ་ལྟར། རྒྱ་ནག་གིས་བཙན་རྒོལ་ཐེབས་བཞིན་པའི་ཐའེ་ཝན་གྱིས་ཀྱང་ཨུ་རུ་སུར་སྐྱོན་བརྗོད་དང་སྦྲགས། ཨ་རིས་གཙོས་པའི་དམངས་གཙོའི་རྒྱལ་ཁབ་རྣམས་ཀྱིས་ཨུ་རུ་སུའི་ཐོག་བཀལ་བའི་ཚོང་ཟོག་ཕྱིར་འདྲེན་ཐད་ཀྱི་ཉེས་ཆད་རྣམས་ལ་མོས་མཐུན་རྒྱབ་སྐྱོར་བྱ་རྒྱུ་ཡིན་སྐོར་བསྒྲགས་ཡོད། འོན་ཀྱང་། ཨུ་རུ་སུའི་དམར་ཤོག་འཐབ་གྲོགས་རྙིང་པ་དང་ཨུ་རུ་སུའི་ཚོང་འབྲེལ་རྒྱལ་ཁབ་ཆེ་ཤོས་རྒྱ་ནག་གིས་དེ་སྔ་ནས་དཔལ་འབྱོར་ཉེས་ཆད་ཀྱིས་གནད་དོན་སེལ་ཐབས་མེད་པ་དང་། ཨུ་རུ་སུར་དཔལ་འབྱོར་ཉེས་ཆད་གཅོད་རྒྱུ་དེར་དོན་སྙིང་གང་ཡང་མེད་སྐོར་བརྗོད་སོགས་བརྗོད་ཡོད་ལ། དོན་དངོས་ཐོག་ནས་ཀྱང་ཨ་རི་དང་ཡུ་རོབ་རྒྱལ་ཁབ་གཅིག་པུས་དཔལ་འབྱོར་ཉེས་ཆད་བཅད་པ་དེས་ཨུ་རུ་སུའི་དཔལ་འབྱོར་ལ་དོ་ཕོག་ཆེན་པོ་ཐེབས་ཀྱི་མེད་པ་རེད། འོན་ཀྱང་གལ་ཏེ་རྒྱ་ནག་ངོས་ནས་ཨུ་རུ་སུར་དཔལ་འབྱོར་ཉེས་ཆད་བཅད་ཚེ། དེས་ཨུ་རུ་རུའི་དཔལ་འབྱོར་ལ་གནོན་ཤུགས་ཆེན་པོ་ཐེབས་ངེས་ཡིན་པ་དཔྱད་བརྗོད་པས་རྗོད་ཀྱིན་འདུག

དེ་བཞིན་ཟླ་འདིའི་ཕྱི་ཚེས་ ༢༢ ཉིན་སྲིད་འཛིན་པུ་ཀྲིན་གྱིས་ཡུ་ཀེ་རེན་གྱི་ས་ཁུལ་གཉིས་རང་བཙན་དུ་ཁྱབ་བསྒྲགས་བྱས་ཏེ། ཡུ་ཀེ་རེན་ནང་“དམིགས་བསལ་དམག་དོན་བྱ་འགུལ་”སྤེལ་རྒྱུ་ཡིན་སྐོར་བསྒྲགས་རྗེས། མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་ཚོགས་འདུའི་སྟེང་རྒྱལ་ཁབ་ཕལ་ཆེ་བས་ཨུ་རུ་སུར་སྐྱོན་བརྗོད་བྱས་ཡོད་ནའང་། རྒྱ་ནག་གི་སྐུ་ཚབ་ཀྲོང་ཅུན་ (Zhang Jun) ཟེར་བ་དེས། ཕྱོགས་ཚང་མས་གྲོས་མོལ་དང་ཕན་ཚུན་ལ་བརྩི་བཀུར་ཡོད་པའི་ཐོག་ནས་ཡུ་ཀེ་རེན་གྱི་དཀའ་རྙོག་སེལ་དགོས་སྐོར་ཙམ་ལས། ཨུ་རུ་སུའི་བྱེད་སྟངས་དེར་རྒྱབ་སྐྱོར་དང་ངོ་རྒོལ་གྱི་རྣམ་པ་ཙམ་ཡང་བསྟན་མེད་ལ། ཐ་ན་ཨུ་རུ་སུ་མིང་འབོད་ཀྱང་བྱས་མེད་པ་རེད། དེ་བཞིན། མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཐོག་རྒྱ་གར་གྱི་སྐུ་ཚབ་ཊི་རོ་མོར་ཊི་ (Tirumurti)ཡིས་ཀྱང་ཨུ་རུ་སུ་དང་ཡུ་ཀེ་རེན་གཉིས་ཀྱི་གནས་སྟངས་ཉེན་ཁ་ཆེན་པོ་ཆགས་ཡོད་པར་བློ་ཕམ་ཡོད་ལ། གནད་དོན་དེར་ཡིད་གཟབ་མ་བྱས་ན་ས་གནས་ཀྱི་ཞི་བདེ་ལྷིང་འཇགས་ལ་གནོད་སྐྱོན་ཐེབས་སྲིད་སྐོར་ཙམ་ལས་ཨུ་རུ་སུའི་བཙན་འཛུལ་ལ་ཐེར་འདོན་དང་སྐྱོན་བརྗོད་གང་ཡང་བྱས་མེད་འདུག

རྒྱ་ནག་གི་སྲིད་འཛིན་ཞི་ཅིན་ཕིང་གིས་པུ་ཀྲིན་ནི་རང་གི་སྙིང་ཉེ་བའི་གྲོགས་པོ་ཞིག་ཡིན་པ་དང་། སྲིད་འཛིན་སྒེར་གཉིས་ཀྱི་འབྲེལ་ལམ་དེས་རྒྱལ་ཁབ་གཉིས་ཀྱི་འབྲེལ་ལམ་སྔར་བས་ཇེ་ཟབ་ཏུ་བཏང་ཡོད་སྐོར་སོགས་བསྒྲགས་ཡོད་ལ། ཉེ་ཆར་པེ་ཅིན་དུ་འཚོགས་པའི་དགུན་དུས་ཨོ་རྩེད་ཀྱི་མགོ་འབྱེད་མཛད་སྒོར་པུ་ཀྲིན་དམིགས་བསལ་སྐུ་མགྲོན་གྱི་ཚུལ་དུ་པེ་ཅིན་དུ་འབྱོར་ཡོད་ལ། སྔ་གཞུག་ཏུ་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་ལ་སྐྱོན་བརྗོད་ཅི་ཙམ་བྱས་ཀྱང་། པུ་ཀྲིན་གྱིས་རྒྱ་ནག་ལ་རྒྱབ་སྐྱོར་བྱས་པ་མ་ཟད། ད་ལན་པུ་ཀྲིན་གྱིས་ཡུ་ཀེ་རེན་གྱི་ཤར་བརྒྱུད་ཌོ་ནེ་སི་ཀི་མི་མང་སྤྱི་མཐུན་ (Donetsk People’s republic) དང་ལུ་ཧན་སི་ཀི་མི་མང་སྤྱི་མཐུན་ (Lugansk People’s Republic) གཉིས་རང་བཙན་གྱི་རྒྱལ་ཁབ་ཏུ་ངོས་འཛིན་བྱ་རྒྱུ་དང་། ཡུ་ཀེ་རེན་ནང་དམག་དྲང་རྒྱུ་དེ་ཡང་པེ་ཅིན་ཨོ་རྩེད་མཇུལ་བསྒྲིལ་མཚམས་ནས་མགོ་བརྩམས་པ་རེད། རྒྱ་ནག་གི་ཕྱོགས་ནས་བཤད་ན། རྒྱ་ནག་ནི་ཨུ་རུ་སུ་དང་ཡུ་ཀེ་རེན་གཉིས་ཀའི་ཚོང་འབྲེལ་རྒྱལ་ཁབ་ཆེ་ཤོས་དེ་ཡིན་ལ། ལྷག་པར་དུ་རྒྱ་ནག་དང་ཡུ་རོབ་གླིང་ཕྲན་དབར་ཚོང་དོན་འབྲེལ་ལམ་ཟབ་པོ་ཡིན་པར་བརྟེན། རྒྱ་ནག་གིས་རང་ཉིད་ཡུ་རོབ་ནང་གི་དམག་འཁྲུག་ལ་རྒྱབ་སྐྱོར་བྱེད་མཁན་ཞིག་ལ་མཐོང་འདོད་མེད་ཀྱང་། ཡང་ཕྱོགས་གཅིག་ནས་ཡུ་རོབ་ནང་དམག་འདྲེན་མཁན་གྱི་ཨུ་རུ་སུའི་རྒྱལ་ཁབ་དང་དམག་དོན་གྱི་ཐད་ནས་མཉམ་འབྲེལ་བྱ་འདོད་ཆེན་པོ་ཡོད་པ་རེད། དེར་བརྟེན་ད་ལན་རྒྱ་ནག་གཞུང་གིས་ཕྱོགས་གཉིས་ཀར་བསྟུན་མཁས་ཀྱིས་མངོན་གསལ་དོད་པོས་ཨུ་རུ་སུར་རྒྱབ་སྐྱོར་བྱ་འདོད་མེད་ནའང་། འཛམ་གླིང་གིས་རྒྱ་ནག་དེ་གོ་ལའི་སྒྲོམ་གཞི་དང་ཞི་བདེ་ལྷིང་འཇགས་གཏོར་མཁན་གྱི་རྒྱལ་ཁབ་ཨུ་རུ་སུའི་རྒྱབ་ལ་ལངས་ཡོད་པ་ཤེས་ཡོད།

དོན་དུ་ཐེངས་འདིའི་ཡུ་ཀེ་རེན་གྱི་དཀའ་རྙོག་མགོ་འབུད་བཞིན་པའི་སྐབས་ནས་རྒྱ་ནག་གིས་རང་གི་ལངས་ཕྱོགས་བརྟན་པོ་བསྟན་ཡོད་པ་རེད། དེ་ཡང་ཨུ་རུ་སུས་འདས་ལོའི་ཕྱི་ཟླ་ ༡༡ ཙམ་ནས་ཡུ་ཀེ་རེན་གྱི་མཐའ་མཚམས་སུ་དམག་དང་མཚོན་ན་ཕོན་ཆེན་འགྲེམས་འཇོགས་བྱས་ཏེ། ཨ་རིས་སྣེ་ཁྲིད་པའི་ནུབ་རྒྱ་མཚོའི་དམག་དོན་མནའ་འབྲེལ་རྒྱལ་ཁབ་ (Nato) ངོས་ནས་ཡུ་ཀེ་རེན་ཚོངས་ཁོངས་སུ་འཇུག་རྒྱུ་མེད་པ་དང་། པོ་ལེན་ཌིས་མཚོན་པའི་ཡུ་རོབ་ཤར་མའི་ཁུལ་དུ་འགྲེམས་འཇོག་བྱས་པའི་ནེ་ཊོའི་དམག་ཤུགས་ཉུང་འཕྲི་དགོས་སྐོར་གྱི་ཆ་རྐྱེན་བཏོན་ཡོད་ཅིང་། དེར་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ཟེར་བ་དེས། ཨུ་རུ་སུའི་བློ་འཚབ་བྱེད་བཞིན་པ་དེ་དག་ལུགས་མཐུན་ཡིན་པ་དང་། ནེ་ཊོ་ངོས་ནས་ཨུ་རུ་སུའི་བློ་འཚབ་ལ་སྣང་འཇོག་བྱ་དགོས་སྐོར་བཤད་ཡོད་པ་རེད། གཞན་ཡང་དུས་སྐབས་དེར་ཨ་རིའི་ཡུ་ཀེ་རེན་གྱི་གནད་དོན་དང་འབྲེལ་ནས་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་ཚོགས་འདུ་བསྐོང་འཚོག་བྱས་པར་སྐྱོན་བརྗོད་བྱས་ཡོད་པ་རེད།

དཔྱད་བརྗོད་པ་རྣམས་ཀྱིས་ཕྱི་ལོ་ ༢༠༡༤ ལོར་ཨུ་རུ་སུས་དམག་ཤུགས་སྤྱད་དེ་ཡུ་ཀེ་རེན་གྱི་ཤར་བརྒྱུད་ས་ཁུལ་ཁེ་རེ་མི་ཡ་ (Crimea) ལ་བཙན་འཛུལ་བྱས་པ་ནས་བཟུང་། རྒྱ་ནག་དང་ཨུ་རུ་སུའི་འབྲེལ་ལམ་དེ་སྔར་བས་ཇེ་ཟབ་ཏུ་ཕྱིན་ཡོད་པ་དང་། འགའ་ཤས་ཀྱིས་ད་ལྟའི་ཨུ་རུ་སུ་དང་རྒྱ་ནག་གི་འབྲེལ་ལམ་དེ་སྔར་གྱི་སི་ཊ་ལིན་དང་མའོ་སྐབས་ཀྱི་འབྲེལ་ལམ་ལས་བཟང་བར་གྱུར་ཡོད་སྐོར་རྗོད་ཀྱིན་འདུག དོན་དུའང་འདས་པའི་ལོ་ཤས་རིང་ནས་རྒྱ་ནག་ནི་ཨུ་རུ་སུའི་ཚོང་འབྲེལ་རྒྱལ་ཁབ་ཆེ་ཤོས་དེ་ཡིན་ཞིང་། འདས་ལོར་རྒྱལ་ཁབ་གཉིས་ཀྱི་ཚོང་འབྲེལ་རིན་འབབ་དེ་ཨ་སྒོར་ཐེར་འབུམ་ ༡༤༧ ལ་ཐོན་ཡོད། དེ་བཞིན་འདས་ལོར་ཨུ་རུ་སུ་དང་རྒྱ་ནག་གཉིས་ཀྱིས་དམག་དོན་མཉམ་ལས་གྱི་གན་རྒྱ་བཞག་པ་དང་། མཉམ་འབྲེལ་དམག་སྦྱོང་སྔར་བས་ཇེ་མང་དུ་བཏང་ཡོད་པ་རེད།

གསར་འགོད་པ། པ་སངས་ཚེ་རིང་།