ཨ་རིའི་ཆེས་མཐོའི་ཁྲིམས་ཁང་གི་ལོ་རྒྱུས་ནང་མི་རིགས་ནག་པོའི་བུད་མེད་ཅིག་ཁྲིམས་དཔོན་དུ་བསྐོས་པ་ཐོག་མ་བྱུང་།

ཨ་རིའི་གྲོས་ཚོགས་གོང་མའི་ནང་མང་མོས་འོས་བསྡུ་བྱས་པ་བརྒྱུད་ཁྲིམས་ལུགས་རིག་པའི་མཁས་དབང་ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ལོ་རྒྱུས་ནང་མི་རིགས་ནག་པོའི་བུད་མེད་ཁྲིམས་དཔོན་ཆེས་ཐོག་མ་དེ་ཆགས།

ཁ་སང་ཨ་རིའི་གྲོས་ཚོགས་གོང་མའི་ནང་མི་རིགས་ནག་པོའི་རིགས་རྒྱུད་ཡིན་པའི་ལྕམ་ཀེ་ཊན་ཇེ་ཇཱག་སན་(Ketanji Brown Jackson)  ལགས་ཨ་རི་རྒྱལ་ཁབ་ཀྱི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་བྱ་མིན་ཐད། མང་མོས་འོས་བསྡུ་བྱེད་སྐབས། སྤྱི་མཐུན་ཚོགས་པའི་གྲོས་ཚོགས་འཐུས་མི་ ༤༧ གྱིས་རྒྱབ་སྐྱོར་བྱས་མེད་པ་དང་། མང་གཙོ་ཚོགས་པའི་འཐུས་མི་ ༥༠ དང་སྤྱི་མཐུན་འཐུས་མི་ ༣ བཅས་ཁྱོན་གྲོས་ཚོགས་འཐུས་མི་  ༥༣ གྱི་རྒྱབ་སྐྱོར་ཐོབ་པར་བརྟེན། མང་མོས་ཐོག་ནས་ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ལོ་རྒྱུས་ནང་ཆེས་མཐོའི་ཁྲིམས་ཁང་གི་མི་རིགས་ནག་པོའི་བུད་མེད་ཀྱི་ཁྲིམས་དཔོན་ཐོག་མ་དེ་ཆགས་ཀྱི་ཡོད་འདུག

དེ་འབྲེལ་ཐད་ཨ་རིའི་སྲིད་འཛིན་ཇོ་བྷའེ་ཌན་ལགས་ཀྱིས་རང་གི་ཊུ་ཝེ་ཊར་སྟེང་། ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་གཏན་འཁེལ་བྱུང་བ་ནི་ང་ཚོའི་ལོ་རྒྱུས་ནང་གི་ཉིན་མོ་ཞིག་ཆགས་ཀྱི་ཡོད་ལ། ང་ཚོས་མི་རིགས་སྣ་འདུས་ཀྱི་ཨ་རིའི་ཆེས་མཐོའི་ཁྲིམས་ཁང་དེ་ཉིད་གོམ་སྟབས་གསར་བ་ཞིག་གི་ཕྱོགས་སུ་བསྒྱུར་ཡོད། ཁོང་མོ་ནི་ཁྱད་དུ་འཕགས་པའི་ཁྲིམས་དཔོན་ཞིག་ཡིན་པ་དང་དུས་སྐལ་འདི་མོ་དང་ལྷན་དུ་རོལ་རྒྱུ་བྱུང་བར་དགའ་ཚོར་ཆེན་པོ་བྱུང་། ཅེས་བརྗོད་ཡོད་པ་དང་། ད་རེས་མི་རིགས་ནག་པོའི་བུད་མེད་ཅིག་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་བྱུང་བ་དེས། སྲིད་འཛིན་བྷའེ་ཌན་ལགས་ཀྱི་འོས་བསྡུའི་ཁས་ལེན་དམ་བཅའ་ཞིག་ཀྱང་མངོན་འགྱུར་བྱུང་བ་མཚོན་གྱི་ཡོད་འདུག་ལ། ཕྱི་ལོ་ ༢༠༢༠ ལོའི་འོས་བསྡུའི་དྲིལ་བསྒྲགས་སྐབས་ད་ལྟའི་སྲིད་འཛིན་ཇོ་བྷའེ་ཌན་ལགས་ཀྱིས་ཆེས་མཐོའི་ཁྲིམས་ཁང་དུ་མི་རིགས་ནག་པོའི་བུད་མེད་ཅིག་བསྐོ་གཞག་བྱ་རྒྱུའི་དམ་བཅའ་བཞག་ཡོད་པ་རེད།

ད་ལན་ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་བྱེད་སྐབས། གྲོས་ཚོགས་འཐུས་མིའི་གྲངས་འབོར་ཆ་མཉམ་ཡོད་པའི་ཨ་རིའི་གྲོས་ཚོགས་གོང་མའི་ནང་གི་རྒྱལ་ཡོངས་མང་གཙོ་ཚོགས་པའི་འཐུས་མི་ཡོངས་ཀྱིས་རྒྱབ་སྐྱོར་བྱས་པ་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་གསུམ་གྱིས་ཀྱང་རྒྱབ་སྐྱོར་བྱས་ཏེ།ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་བྱུང་བ་གཏན་འཁེལ་ཡོད་ཀྱང་། སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་ལྕམ་ཀེ་ཊན་ཇེ་ཇཱག་སན་ལགས་སུ་སྐྱོན་བརྗོད་དང་འབྲེལ། ཆེས་མཐོའི་ཁྲིམས་དཔོན་དུ་བསྐོས་པར་དགག་བྱ་ཤུགས་ཆེན་བཏོན་ཡོད་ཅིང་། ད་ལྟ་ཨ་རིའི་ཆེས་མཐོའི་ཁྲིམས་ཁང་དུ་ཁྲིམས་དཔོན་ཁྱོན་ ༩ ཡོད་པ་ལས་ ༣ བུད་མེད་ཡིན་པ་དང་། དེའི་ནང་ནས་ཀྱང་ཁྲིམས་དཔོན་དྲུག་སྤྱི་མཐུན་ཚོགས་པས་བསྐོ་གཞག་བྱས་པ་དང་ཁྲིམས་དཔོན་གསུམ་མང་གཙོ་ཚོགས་པས་བསྐོ་གཞག་གནང་ཡོད་འདུག་ལ། འདི་ལོའི་ཕྱི་ཟླ་ ༡ ནང་ཕྱི་ལོ་༡༩༩༤ སྲིད་འཛིན་བྷིལ་ཁུ་ལིན་ཊོན་ལགས་ཀྱིས་བསྐོ་གཞག་གནང་བའི་ཁྲིམས་དཔོན་ཆེན་མོ་ (Stephen G Breyer) ལགས་རྒས་ཡོལ་དུ་འགྲོ་རྒྱུའི་ཐག་གཅོད་བླངས་བར་བརྟེན། ད་ལྟ་ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་གྱི་གྲས་སུ་ཚུད་པ་ཡིན་འདུག

ལྕམ་ཀེ་ཊན་ཇེ་ཇཱག་སན་ལགས་ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་གཏན་འཁེལ་བྱུང་བར་ཨ་རིའི་སྲིད་འཛིན་ཟུར་པ་ཨོ་བྷ་མ་མཆོག་དང་སྐུ་ལྕམ་དང་པོ་ཟུར་པ་མཱ་ཁལ་ཨོ་བྷ་གཉིས་ཀྱི་གཙོས་ཆབ་སྲིད་པ་མང་པོས་འཚམས་འདྲི་ཞུས་ཡོད་པ་དང་། མཱ་ཁལ་ཨོ་བྷ་མ་ལགས་ཀྱིས། ཁྱེད་ཅག་ནང་བཞིན་ངས་ཀྱང་རོགས་རམ་གང་ཡང་བྱེད་ཐུབ་ཀྱི་མེད་ནའང་། མི་རིགས་ནག་པོའི་བུད་མེད་ཅིག་ས་འདིའི་ཆེས་མཐོ་བའི་ཁྲིམས་ཁང་གི་ཆ་ཤས་ཤིག་ཏུ་གྱུར་བར་འོས་ཤིང་འཚམ་པ་མ་ཟད། གཟི་བརྗིད་ཅིག་ཏུའང་ཚོར་བྱུང་། ཞེས་བརྗོད་ཡོད་པ་དང་། སྲིད་འཛིན་ཟུར་པ་ཨོ་བྷ་མ་མཆོག་གིས། དེ་རིང་ནི་ཨ་རིར་མཚོན་ན་རླབས་ཆེ་ཞིང་ལོ་རྒྱུས་ནང་སྤོབས་པ་སྐྱེས་འོས་པའི་ཉིན་མོ་ཞིག་ཡིན། ཞེས་བརྗོད་ཡོད་པ་རེད།

ཕྱི་ལོ་ ༡༩༧༠ ལོར་ཨ་རིའི་རྒྱལ་ས་ཝ་ཤིན་ཊོན་དུ་སྐྱེས་པའི་ལྕམ་ཀེ་ཊན་ཇེ་ཇཱག་སན་ལགས་ནི་ད་ལྟ་རང་ལོ་ ༥༡ ཡིན་པ་དང་། ཕྱི་ལོ་ ༢༠༡༣ ནས་ ༢༠༢༡ བར་རྒྱལ་ས་ཝ་ཤིན་ཊོན་ཁུལ་དུ་སྤྱི་དམངས་གཏུགས་བཤེར་གྱི་གྱོད་དོན་དང་འབྲེལ་བའི་ཁྲིམས་དཔོན་གྱི་ཕྱག་ལས་གནང་ཞིང་། ཕྱི་ལོ་ ༢༠༡༠ ནས་ ༢༠༡༤ བར་ཁྲིམས་ཆད་ཐག་གཅོད་ཀྱི་ལས་འཁུར་ཞུས། ཕྱི་ལོ་ ༡༩༩༢ ཙམ་ནས་ཁོ་མོ་འཛམ་གླིང་ནང་སྙན་གྲགས་ཆེ་བའི་ཧར་ཝ་ཌི་གཙུག་ལག་སློབ་གྲྭ་ཆེན་མོར་ཞུགས་ཏེ། ཁྲིམས་ལུགས་རིག་པའི་སློབ་གཉེར་བྱས་ཤིང་ཧར་ཝ་ཌའི་ཁྲིམས་ལུགས་དུས་དེབ་ཀྱི་རྩོམ་སྒྲིག་པ་སོགས་གནང་མྱོང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།