རྒྱ་ནག་གཞུང་གིས་བོད་ཁུལ་གྱི་དགོན་སྡེ་དང་སློབ་གྲྭ་ཁག་གཅིག་པུ་ཙམ་མ་ཡིན་པར་བྱིས་པ་ཚོའི་ཕ་མ་དང་ས་གནས་མང་ཚོགས་ལའང་བསམ་བློ་བསྒྱུར་བཀོད་སློབ་གསོ་ཟེར་བའི་རྒྱ་སྒྱུར་ཚོགས་འདུ་བསྡུས་ཏེ་རྒྱ་ཡིག་རྒྱ་སྐད་སྦྱོང་བར་སྐུལ་འདེད་གཏོང་གི་འདུག
འདས་ལོའི་ཕྱི་ཟླ་ ༡༢ པའི་ནང་རྒྱ་ནག་གཞུང་གིས་ཕྱི་ལོ་ ༢༠༢༥ ལོར་རྒྱའི་སྐད་ཡིག་གི་ཁྱབ་ཚད་རྒྱལ་ཁོངས་སུ་བཅུག་པའི་གྲངས་ཉུང་མི་རིགས་ས་ཁུལ་བཅས་ཚུད་པའི་བརྒྱ་ཆ་ ༨༥ ཟིན་དགོས་པའི་བཀའ་ཁྱབ་བཏང་ཡོད་པ་ལྟར། བོད་དང་ལྷོ་སོག་སོགས་སོ་སོའི་སྐད་ཡིག་གཉིས་ལྡན་གྱི་གྲངས་ཉུང་མི་རིགས་ས་ཁུལ་དུ་ངའི་ཕ་སྐད་ནི་རྒྱ་སྐད་ཡིན་ཞེས་པའི་འབོད་ཚིག་སྦྱར་ཏེ་བྱིས་པ་ཚོ་ཆུང་བའི་དུས་ནས་རྒྱའི་སྐད་ཡིག་ལ་གོམས་ཤིང་། མི་རིགས་སོ་སོའི་ཕ་སྐད་རྣམས་རིམ་གྱིས་རྩ་མེད་དུ་གཏོང་བའི་ཐབས་ཇུས་གཏིང་ནག་པོ་ཞིག་ལག་བསྟར་བྱེད་མུས་ཡིན་པ་རེད།
དེ་ཡང་རྔ་བ་ཁུལ་གྱི་བྱིས་གཉོར་ཁང་ཞིག་ཏུ་དགེ་རྒན་བྱེད་བཞིན་པའི་བོད་རིགས་བུད་མེད་ཅིག་གིས་འདི་གའི་གསར་འགོད་པར། གོང་རིམ་གྱི་སྲིད་ཇུས་གཏན་འབེབ་ལྟར་དུ་བྱིས་གཉོར་ཁང་གི་དགེ་རྒན་དང་མ་ཚབ་ཚང་མས་རྒྱ་སྐད་ཤེས་དགོས་པ་མ་ཟད། རྒྱའི་སྤྱི་སྐད་མ་ཤེས་ན་ལས་ཀ་རག་ཁག་པོ་ཡིན་སྐོར་དང་། ཁོང་མོ་ས་གནས་ཀྱི་བོད་ཡིག་སློབ་འབྲིང་ཞིག་ནས་དམའ་འབྲིང་མཐར་ཕྱིན་རྗེས། རྒྱའི་སློབ་གྲྭ་ཞིག་ནས་སློབ་ཆེན་མཐར་ཕྱིན་པར་བརྟེན། རྒྱ་ཡིག་རྒྱ་སྐད་ཀྱི་ཐོག་ནས་དཀའ་ངལ་མེད་ཀྱང་ཉིན་ལྟར་བྱིས་པ་ཚོ་དང་ལྷན་དུ་རྒྱ་སྐད་མ་གཏོགས་བཤད་ཆོག་གི་མེད་པར་བརྟེན། བྱིས་པ་ཚོ་ཡིན་དང་ཡིན། དགེ་རྒན་དང་མ་ཚབ་རྣམས་ཀྱིས་ཀྱང་སློབ་གྲྭའི་ཕྱི་ནང་གང་སར་རྒྱ་སྐད་བཤད་ནས་འདུག་དགོས་པའི་གནས་སྟངས་ཆགས་ཡོད་སྐོར་བརྗོད་བྱུང་།
རྔ་བ་ཁུལ་དམའ་འབྲིང་སློབ་གྲྭའི་སྤྱི་སྟེགས་ཀྱི་གནས་ཚུལ་ལྟར་ན། སློབ་མའི་བདེ་འཇགས་སྲུང་སྐྱོབ་་སོགས་ལ་ཁ་གཡར་ནས་ཁུལ་དེའི་དམའ་འབྲིང་སློབ་གྲྭ་དང་བྱིས་གཉོར་ཁང་ཁག་ཏུ་ཉེན་རྟོག་མི་སྣ་ཆེད་གཏོང་གིས་བྱིས་པ་ཚོར་ཆབ་སྲིད་སློབ་གསོ་གཏོང་བ་དང་། ཉིན་ལྟར་ལྟ་སྲུང་བྱས་ཏེ་སྤྱོད་གཙང་འཛུགས་སྐྲུན་ཞེས་པའི་མིང་ཐོག་ནས་བྱིས་པ་ཚོའི་ཕྱི་ནང་ཚང་མ་རྒྱ་རིགས་དང་རྒྱ་ཡིག་ཅན་དུ་བསྒྱུར་བཞིན་ཡོད་འདུག
གཞན་ཡང་། ཟླ་འདིའི་ཟླ་མགོར་མགོ་ལོག་ཁུལ་ཐོག་ཏུ་སློབ་ཕྲུག་ཁག་ཅིག་གི་ཕ་མར་ཚོགས་འདུ་བསྡུས་ཏེ། རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་གསོའི་གསབ་སྦྱོང་ཟེར་བ་ཞིག་སྤྲད་པ་དང་། ཚོགས་འདུ་དེའི་སྟེང་ཕ་མ་དང་བུ་ཕྲུག་གི་བསམ་བློ་བསྒྱུར་བཀོད་བྱ་རྒྱུ་གལ་ཆེན་པོ་ཡིན་པ་མ་ཟད། སློབ་ཕྲུག་གི་བསམ་བློ་བསྒྱུར་བཀོད་བྱ་རྒྱུ་ནི་སློབ་གྲྭའི་དགེ་རྒན་དང་གྲོང་ཚོའི་ལས་བྱེད་པ་གཅིག་པུ་ཙམ་མིན་པར། སློབ་ཕྲུག་གི་ཕ་མས་འགན་ཁུར་དགོས་པ་དང་། ཕ་མ་ཚོ་རང་འགུལ་གྱིས་རྒྱལ་ཁབ་ཀྱི་སྤྱི་སྤྱོད་སྐད་ཡིག་སློབ་གསོའི་གསོ་སྦྱོང་ལ་ཞུགས་ཏེ། རྒྱ་ཡིག་རྒྱ་སྐད་ཀྱི་གནས་ཚད་ཡར་རྒྱས་བཏང་རྗེས། རང་གི་བུ་ཕྲུག་ལའང་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཡག་པོ་སྦྱང་བཅུག་ནས་རྒྱ་ཡིག་རྒྱ་སྐད་ཡག་པོ་བཤད་ཤེས་པ་དང་འབྲི་ཤེས་དགོས་པར་མ་ཟད། དེ་མཉམ་དུ་གོང་རིམ་གྱི་ཚོགས་འདུ་རིམ་པའི་ནང་དོན་དང་རྒྱལ་ཁབ་ཀྱི་འཐབ་ཇུས་གསར་པར་གོ་བ་ཡང་དག་བླངས་ནས། དུས་རབས་གསར་པའི་ཀྲུང་གོའི་ཕུགས་འདུན་མངོན་འགྱུར་བྱ་དགོས་ཚུལ་སོགས་བརྗོད་དེ། བུ་ཕྲུག་གི་ཕ་མ་རྣམས་ལ་ཟབ་སྦྱོང་བསྡུ་ཡི་ཡོད་པ་ལྟར། མགོ་ལོག་ཁུལ་མི་རིགས་སློབ་འབྲིང་དུ་ཕ་མ་རྣམས་ལ་སྔ་རྗེས་ཐེངས་༡༦ ཙམ་ལ་ཟབ་སྦྱོང་འཚོགས་ཏེ་སློབ་ཕྲུག་གི་ཕ་མ་དང་སྡེ་བའི་དམར་ཤོག་ཚོགས་མི་དང་ལས་བྱེད་པ་བཅས་ལ་སྐུལ་འདེད་བཏང་ཡོད་འདུག
དེ་བཞིན། རྒྱ་ནག་གཞུང་གིས་བོད་ཁུལ་གང་སར་རྒྱ་སྒྱུར་སློབ་གསོ་དངོས་ཤུགས་བརྒྱུད་གསུམ་ནས་སྤེལ་བཞིན་ཡོད་པ་ལྟར། ཟླ་འདིའི་ཕྱི་ཚེས་༡༢ ཉིན་རྒྱ་གཞུང་འབྲེལ་འཕྲིན་ཕྲན་སྤྱི་སྟེགས་སྟེང་ནག་ཆུ་ས་ཁུལ་ཉི་མ་རྫོང་གིས་གནས་ཚུལ་ཞིག་སྤེལ་བའི་ནང་། “རྒྱལ་ཁབ་ཀྱི་སྤྱི་སྤྱོད་སྐད་ཡིག་གསོ་སྦྱོང་དང་ཚོད་ལྟའི་ཡིག་རྒྱུག་གཏོང་བ་སོགས་ལས་ཉི་མ་རྫོང་གི་གྲོང་ཚོའི་ལས་བྱེད་དང་ཞིང་འབྲོག་པའི་ཏང་ཡོན་མང་ཚོགས་ཀྱིས་རང་ཉིད་ཀྱི་མི་འདང་བའི་ཆ་ཤེས་རྟོགས་ཁ་གསལ་ཐུབ་ཡོད་ལ། ཕྱིས་འབྱུང་གི་སློབ་སྦྱོང་དང་ལས་ཀའི་ཁྲོད་མི་འདང་བའི་ཆ་ཁ་གསབ་དང་ཤུགས་སྣོན་བརྒྱབ་ནས་གཞི་རིམ་གྱི་ལས་དོན་ཁག་དོན་འཁྱོལ་ཡང་དག་ཡོང་རྒྱུར་རྨང་གཞི་བརྟན་པོ་བཏང་ཡོད་” ཅེད་བཀོད་འདུག
གསར་འགོད་པ། དཔལ་ལྡན།
