ཡོ་ཁུ་རེན་ལ་དམག་འཁྲུག་ཁྲོད་རྒྱལ་ཁ་ཐོབ་བཞིན་པའི་སྐབས་འདིར། ཨུ་རུ་སུས་ཨ་རི་གཙོ་བྱས་པའི་ནུབ་ཕྱོགས་རྒྱལ་ཁག་དག་གིས། ཡོ་ཁུ་རེན་ལ་མཚོན་ཆ་མཁོ་སྤྲོད་བྱ་རྒྱུ་མཚམས་འཇོག་དགོས་པའི་ཉེན་བརྡ་བཏང་བ་དང་འབྲེལ། ཨུ་རུ་སུས་ཡོ་ཁུ་རེན་སྟེང་རྡུལ་ཕྲན་མཚོན་ཆ་བཀོལ་སྲིད་པའི་ཉེན་བརྡ་བཏང་འདུག
ད་ལྟ་ཡུ་ཁུ་རེན་དང་ཨུ་རུ་སུའི་བར་དམག་འཁྲུག་བྱུང་སྟེ་ཉིན་གྲངས་ ༥༤ ཙམ་འགྲོ་བཞིན་ཡོད་པ་དང་། ཟླ་འདིའི་ཕྱི་ཚེས་ ༡༤ ཉིན་ཡོ་ཁུ་རེན་གྱིས་མེ་ཤུགས་འཕུར་མདའ་འཕངས་ནས་ཨུ་རུ་སུའི་མཚོ་དམག་གི་ཆེས་གལ་འགངས་ཆེ་བའི་འཐབ་འཁྲུག་གྲུ་གཟིངས་ཤིག་ལ་གཏོར་སྐྱོན་བཏང་རྗེས། གྲུ་གཟིངས་དེ་ཨེ་ཤ་ཡ་དང་ཡུ་རོབ་བར་གྱི་ཐིག་མཚམས་ལྟ་བུའི་མཚོ་ནག་(Black Sea) གི་ནང་དུ་འཐིམས་ཡོད་པ་དང་། ད་ལྟ་ནུབ་ཕྱོགས་རྒྱལ་ཁབ་ཁག་གི་རྒྱབ་སྐྱོར་དང་སྙིང་སྟོབས་ཞིམ་པ་མེད་པའི་ཡོ་ཁུ་རེན་གྱི་མི་མང་གི་དམག་འཁྲུག་ལ་རྒྱལ་ཁ་ཅུང་ཙམ་ཐོབ་བཞིན་ཡོད་ཀྱང་། དེ་རིང་ཕྱི་ཚེས་ ༡༦ ཉིན་ཨུ་རུ་སུའི་སྲིད་འཛིན་པོ་ཊིན་གྱིས་གཞུང་འབྲེལ་ཐོག་ནས། ཨ་རི་གཙོ་བྱས་པའི་ནུབ་ཕྱོགས་རྒྱལ་ཁབ་དག་གིས་ཡོ་ཁུ་རེན་ལ་མུ་མཐུད་མཚོན་ཆ་མཁོ་སྤྲོད་བྱས་ཚེ་མཇུག་འབྲས་ངན་པ་ཡོང་སྲིད་པའི་ཉེན་བརྡ་བཏང་ཡོད་པ་རེད་ལ། ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ (Zelensky) ལགས་ཀྱིས་ཀྱང་སི་ཨན་ཨན་གསར་ཁང་གི་བཅར་འདྲི་ཞིག་གི་སྐབས། ཨུ་རུ་སུས་ཡོ་ཁུ་རེན་གྱི་སྟེང་རྡུལ་ཕྲན་མཚོན་ཆ་བེད་སྦྱོད་གཏོང་སྲིད་པས། འཛམ་གླིང་རྒྱལ་ཁབ་ཁག་གིས་གྲ་སྒྲིག་བྱ་དགོས་སྐོར་གྱི་ཉེན་བརྡ་བཏང་འདུག
ཨ་རི་གཙོ་བྱས་པའི་མཐུན་གྲོགས་རྒྱལ་ཁབ་དག་ལ་གཞུང་འབྲེལ་ཐོག་ནས་ཉེན་བརྡ་བཏང་བའི་ཤོག་ངོས་གཉིས་ཅན་གྱི་ཨུ་རུ་སུའི་ཡི་གེ་དེ་ཡི་ནང་། ཨ་རི་དང་ནུབ་གླིང་མནའ་འབྲེལ་རྒྱལ་ཁབ་དག་གིས་ཡོ་ཁུ་རེན་ལ་མཚོན་ཆ་མཁོ་སྤྲོད་བྱེད་བཞིན་པ་དེས། ཡོ་ཁུ་རེན་གྱི་དམག་འཁྲུག་ཐོག་མེ་ཐོག་སྣུམ་ལྡུག་དང་རྣག་ཐོག་ཁབ་བརྩེགས་ཀྱི་གཞི་ལས་མ་གྱུར་བས། ང་ཚོས་རྒྱལ་སྤྱིའི་དང་ས་གནས་ས་ཁུལ་གྱི་བདེ་འཇགས་ལ་ཚོད་དཔག་དཀའ་བའི་མཇུག་འབྲས་ངན་པ་ཡོང་གཞིར་གྱུར་བའི་ཨ་རི་དང་ནུབ་གླིང་མནའ་འབྲེལ་རྒྱལ་ཁབ་ཁག་ནས་ཡོ་ཁུ་རེན་ལ་གོ་མཚོན་མཁོ་སྤྲོད་བྱ་རྒྱུ་མཚམས་འཇོག་དགོས་པའི་སྐུལ་མ་གཏོང་གི་ཡོད། ཅེས་བརྗོད་ཡོད་པ་དང་། ཨུ་རུ་སུའི་ཉེན་བརྡའི་ཡི་གེ་དེ་ནི་ཟླ་འདིའི་ཕྱི་ཚེས་ ༡༣ ཉིན་ཨུ་རུ་སུའི་ཨ་རིའི་གཞུང་ཚབ་ཁང་བརྒྱུད་ཨ་རིའི་རྒྱལ་སྲིད་ལས་ཁུངས་ལ་སྤྲད་ཀྱང་། ཁ་སང་དེ་རིང་གཞི་ནས་གསར་འགྱུར་བརྒྱུད་ལམ་ཁག་ཏུ་ཐོན་པ་ཞིག་ཆགས་ཀྱི་འདུག
ཨུ་རུ་སུའི་ཉེན་བརྡའི་ཡི་གེ་དེ་ནི། ཨ་རིས་ཡོ་ཁུ་རེན་ལ་གོ་མཚོན་གསར་པ་མཁོ་སྤྲོད་བྱ་རྒྱུའི་གནས་ཚུལ་ཞིག་ཕྱིར་གྱར་བ་བརྟེན་ནས་བྱུང་བ་ཞིག་ཡིན་པ་དང་། ཨ་རིའི་ངོས་ནས་བདུན་ཕྲག་འདིའི་ནང་ཨུ་རུ་སུའི་དམག་ཤུགས་དང་འདྲ་མཚུངས་ཀྱི་ནུས་པའི་ལྡན་པའི་རྒྱང་འཕེན་མཚོན་ཆ་(howitzers) སོགས་ཨ་སྒོར་ས་ཡ་ ༨༠༠ ལྷག་གི་གོ་མཚོན་ཡོ་ཁུ་རེན་ལ་མཁོ་སྤྲོད་བྱ་རྒྱུ་ཡིན་ཞིང་། ཨ་རིའི་གཞུང་གི་ལས་བྱེད་རྒན་པ་ཞིག་གིས། ཨུ་རུ་སུས་ཉེན་བརྡ་གཏོང་གི་ཡོད་པ་དེས། ཨ་རི་དང་ནུབ་གླིང་མནའ་འབྲེལ་རྒྱལ་ཁབ་དག་གིས་ཡོ་ཁུ་རེན་ལ་དམག་ཤུགས་ཀྱི་རོགས་སྐྱོར་བྱེད་བཞིན་པར་གྲུབ་འབྲས་ཐོན་གྱི་ཡོད་པ་བསྟན་ཡོད། ཅེས་བརྗོད་འདུག་ལ། དམག་འཁྲུག་བྱུང་བ་ནས་ད་བར་ཨ་རི་ཁོ་ནས་ཡོ་ཁུ་རེན་ལ་ཨ་སྒོར་ཐེར་འབུམ་གསུམ་ལྷག་གིས་དམག་ཤུགས་ཐོག་རོགས་རམ་བྱས་ཡོད་འདུག
ཡང་གནད་དོན་དེ་དང་འབྲེལ་ནས། ཁ་སང་ཡོ་ཁུ་རེན་གྱི་སྲིད་རྫི་ལན་སི་ཀེ་ལགས་ཀྱིས་སི་ཨན་ཨན་གསར་ཁང་གི་དམིགས་བསལ་བཅར་འདྲི་ཞིག་གི་སྐབས་བརྗོད་དོན། པོ་ཊིན་གྱིས་ཡོ་ཁུ་རེན་གྱི་མི་མང་གི་ཚེ་སྲོག་དང་མིའི་ཚེ་སྲོག་ལ་རིན་ཐང་དང་བརྩི་མཐོང་འཇོག་གི་མེད་སྟབས། ཁོས་ཡོ་ཁུ་རེན་སྟེང་རྡུལ་ཕྲན་མཚོན་ཆའམ་ཡང་ན་དུག་མཚོན་བེད་སྤྱོད་གཏོང་སྲིད་པ་དང་། གལ་སྲིད་ཨུ་རུ་སུས་རྡུལ་མཚོན་ཆ་བཀོལ་བ་ཡིན་ན། ཡོ་ཁུ་རེན་ལ་ཞེད་སྣང་དང་འཇིགས་སྣང་སྤུ་ཙམ་མེད་པ་མ་ཟད། རྡུལ་ཕྲན་མཚོན་ཆ་བཀོལ་སྲིད་པའི་གནད་དོན་དེ་ནི་ཡོ་ཁུ་རེན་ཙམ་མ་ཟད་འཛམ་གླིང་ཡོངས་ནས་སེམས་འཚབ་སྐྱེས་དགོས་པའི་གནད་དོན་ཞིག་ཆགས་ཀྱི་ཡོད་སྐོར་སོགས་བརྗོད་འདུག་ལ། ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ལགས་ཀྱིས་རྒྱལ་ཁབ་ཀྱི་ཆག་འཇིགས་སྐབས་མགོ་བོ་སྨད་མ་མྱོང་ཞིང་སྤོབས་པ་དང་ལ་རྒྱ་གཟེངས་སུ་གཏད་ནས་དམག་འཁྲུག་བྱུང་བ་ནས་ད་བར་ཕྱིར་མ་བྲོས་བར་ཨུ་རུ་སུའི་བཙན་འཛུལ་འཐབ་འཁྲུག་ལ་སྙིང་སྟོབས་ཆེན་པོས་རྒོལ་ལན་སློག་ནས་བསྡད་ཡོད་པ་རེད།
ཁ་སང་དགོང་དྲོར་ཡོ་ཁུ་རེན་གྱི་སྲིད་རྫི་ལན་སི་ཀེ་ལགས་ཀྱིས། ཡོ་ཁུ་རེན་མི་མང་ལ་གཏམ་བཤད་སྤེལ་སྐབས། ཁོས་དམག་འཁྲུག་ག་དུས་མཚམས་འཇོག་ཐུབ་མིན་བཤད་ཚོད་དཀའ་ནའང་། ཨུ་རུ་སུའི་དམིགས་འབེན་དང་དམག་གི་སྟོབས་ཤུགས་ཅི་འདྲ་ཡོད་མེད་གསར་ཁང་ཁག་ཁ་ཤས་ལས་ཁོ་རང་གིས་རྒྱས་པ་ཤེས་ཀྱི་ཡོད་པ་དང་། དམག་འཁྲུག་མཚམས་འཇོག་གི་གནས་བབ་ལ་རྒྱུ་རྐྱེན་གཉིས་པ་ལས། ད་ལྟ་ཡོ་ཁུ་རེན་གྱིས་ཨུ་རུ་སུའི་དམག་མི་རྦད་དེ་ཡོ་ཁུ་རེན་ནས་ཕྱིར་འཕུད་ཐུབ་མེད་ནའང་། ཉེ་ལམ་ནས་ཡོ་ཁུ་རེན་གྱི་མི་མང་ལ་དམག་འཁྲུག་ཁྲོད་རྒྱལ་ཁ་ཐོབ་བཞིན་པ་དེ་གཅིག་ཡིན་ཞིང་། གཉིས་ནི་ཉེ་ལམ་ཨ་རི་དང་མཐུན་གྲོགས་རྒྱལ་ཁབ་དག་གིས་ཨུ་རུ་སུར་དངོས་ཤུགས་བརྒྱུད་གསུམ་ཐོག་ནས་ཉེས་ཆད་བཅད་པ་དེས་ཕན་ཐོགས་བྱུང་ཡོད་ཀྱང་། ཨུ་རུ་སུའི་དམག་ཤུགས་ལ་དེ་ཙམ་གྱིས་ཁྱད་པར་བཟོ་ཡི་མེད་སྟབས། ཡོ་ཁུ་རེན་ལ་ཨུ་རུ་སུར་ཁ་གཏད་གཅོག་ཐུབ་པའི་གོ་མཚོན་གང་མྱུར་རག་པ་ཡིན་ན། དེ་ཙམ་གྱིས་དམག་འཁྲུག་མཚམས་འཇོག་དང་ཞི་བདེ་ཡོང་གི་ཡོད་སྐོར་སོགས་བརྗོད་འདུག
ད་ལྟ་ཡོ་ཁུ་རེན་གྱི་དམག་ཤུགས་ཀྱིས། འཛམ་གླིང་གི་དམག་ཤུགས་ཆེ་ཤོས་ཨང་གཉིས་པ་ཡིན་པའི་ཨུ་རུ་སུའི་དམག་མི་རྣམས་རྒྱལ་ས་(Kyiv) དང་རྒྱང་ཐག་མེ་ལི་ ༡༢ ཀྱི་སར་ནས། ད་ལྟ་ཤར་ཕྱོགས་ཀྱི་ས་ཁུལ་བར་ཕྱིར་འདེད་གཏོང་ཐུབ་ཡོད་ཅིང་། ད་ལྟ་ཨུ་རུ་སུའི་ངོས་ནས་ཡོ་ཁུ་རེན་གྱི་ཤར་ཕྱོགས་ཀྱི་ས་མཚམས་ལྔ་སྟེ། ཁར་ཀེ་ཝི་་(Kharkiv) དང་ (Luhansk)། ཌོ་ནེ་སི་ཀེ་(Donetsk)དང་མཱ་རའོ་པོལ་(Mariupol)། དེ་བཞིན་ཁཱེར་སན་(Kherson) བཅས་ལ་བཙན་འཛུལ་གྱིས་ཡོ་ཁུ་རེན་ལ་རྒོལ་ཤུགས་ཆེ་རུ་བཏང་སྟེ། རྒྱལ་ཁབ་གཉིས་བར་ས་ཁུལ་དེ་དག་གི་ཁུལ་དུ་དམག་འཁྲུག་རྒྱག་བཞིན་ཡོད་པ་དང་། འདི་ལོའི་ཕྱི་ཟླ་ ༢ ཚེས་ ༢༤ ཉིན་ནས་མགོ་འཛུགས་ཀྱིས་ད་སྔ་རྒྱལ་ཁབ་གཉིས་ཀྱི་མི་ཤུགས་རྒྱུ་གསུམ་ལ་གྱོང་གུད་ཚབས་ཆེན་ཐེབས་ཡོད་པ་ལས། དེ་རིང་ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ལགས་ཀྱིས་དམག་འཁྲུག་བྱུང་བ་ད་བར་ཡོ་ཁུ་རེན་གྱི་དམག་མི་ ༣༠༠༠ ལྷག་འདས་གྲོངས་སུ་ཕྱིན་པ་དང་དམག་མི་ ༡༠༠༠༠ ལྷག་ལ་རྨས་སྐྱོན་ཐེབས་ཡོད་སྐོར་བསྒྲགས་འདུག་པ་དང་། ཁོས་ད་དུང་ཡོ་ཁུ་རེན་གྱི་ཤི་རྨས་ཐེབས་པའི་དམག་མིའི་གྲངས་འབོར་ལས་ཨུ་རུ་སུའི་དམག་མི་ཤི་རྨས་ཐེབས་པ་མང་བ་ཡོད་སྐོར་བརྗོད་འདུག་ཀྱང་། བྷི་བྷི་སི་གསར་ཁང་གིས། གྲངས་འབོར་དེ་དག་ཁ་གསལ་དང་མི་མང་ཇི་ཙམ་ཤི་རྨས་ཐེབས་ཡོད་མེད་སོགས་ཀྱི་ཐད་ཞིབ་འཇུག་བྱ་ཐབས་བྲལ་ནའང་། ཕྱོགས་གཉིས་ཀྱི་ངོས་ནས་རང་གི་དགྲ་ཟླར་རང་ཉིད་ལས་ཀྱང་གྱོང་གུད་ཆེ་བ་ཕོག་ཡོད་པ་འགྲེལ་བརྗོད་བྱེད་ཀྱི་ཡོད་སྐོར་བརྗོད་འདུག
གསར་འགོད་པ། སྐལ་བཟང་སྦྱིན་པ།
བྱང་ཕྱོགས་མཐུན་འབྲེལ་རྒྱལ་ཁབ་ཚོའི་ཁ་དམག་འོག་ཡུ་ཀི་རན་ནི་རྒྱ་མིའི་བོད་ལ་བཙན་འཛུལ་བྱེད་པ་དང་འདྲ་བས་རྩ་མེད་བཟོ་རྒྱུ་ཡིན་པ་ནས་ཨུ་རུ་སུའི་ཉེན་བརྡ་ལ་འགན་འཁུར་ནས་འཛམ་གླིང་རྒྱལ་ཁབ་སུའི་ལག་སྔ་ཐུབ་པ་དེར་རྒྱལ་ཁ་ཐོབ་རྒྱུ་ནི་ཐག་གཅོད་ཐུབ་པ་ཞིག་མ་རེད་དམ་། ཧཧཧ འཛམ་གླིང་དམག་ཆེན་གསུམ་པ་ཨེ་ཧཧཧ་། མི་ཆུའི་ནང་དབྱུགས་པ་ལ་རང་ཡང་ཆུའི་ནང་འཛུལ་དགོས་པ་མ་རེད་དམ་།