རྒྱ་ནག་གཞུང་གིས་སྐུ་ལུས་མེར་སྲེག་གནང་མཁན་བཀྲ་ཕུན་ལགས་ཀྱི་སྐུ་ཕུང་ད་ལྟའང་ཁྱིམ་མིར་རྩིས་སྤྲད་མེད་པ་མ་ཟད་ཁྱིམ་གྱི་གནས་ཚུལ་ཞིག་གི་རྐྱེན་གྱིས་རང་ལུས་མེར་སྲེག་བཏང་ཡོད་ལུགས་ཀྱི་འཁྱོག་བརྗོད་སྤེལ་བཞིན་ཡོད་འདུག
འདི་གར་འབྲེལ་ཡོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༣ ཚེས་ ༢༧ ཉིན་གྱི་ཞོགས་པར་དགུང་ལོ་ ༨༡ ཡིན་པའི་བོད་མི་བཀྲ་ཕུན་ལགས་ཀྱིས་སྐུ་ལུས་མེར་སྲེག་གནང་རྗེས། ཁོང་གི་སྐུ་ཕུང་བཙན་འཁྱེར་བྱས་ཏེ་ད་ལྟའང་ཁྱིམ་མིར་སྤྲད་མེད་པ་མ་ཟད། འདས་མཆོད་བསྒྲུབ་པར་དགེ་འདུན་པ་གདན་འདྲེན་ཞུས་བཅུག་མེད་པ་རེད། ཁྱིམ་མི་ཚོས་སྐུ་ཕུང་ལག་ཏུ་རག་མིན་ལ་མ་ལྟོས་པར་ཞུགས་འབུལ་གྱི་སྐར་མར་བལྟས་ཟིན་ཡོད་ནའང་། ཉིན་དེར་ལུགས་སྲོལ་ལྟར་ས་གནས་མི་མང་བརྒྱ་ཕྲག་མང་པོ་འདུ་འཛོམས་བྱས་ཏེ། མ་ཎི་གསུང་འདོན་བྱེད་པའི་མ་ཎི་ཚོགས་ཐུག་ཀྱང་བསྐོལ་བཅུག་མེད་འདུག
བོད་བསྟན་སྲིད་ཆེད་སྐུ་ལུས་མེར་སྲེག་གནང་མཁན་ཚང་མར་རྒྱ་ནག་གཞུང་གིས་རིག་འཚོ་མ་ཟིན་པ་ཡིན་ལུགས་དང་ཁྱིམ་གྱི་དཀའ་ངལ་ཡོད་ལུགས་ཀྱི་འཁྱོག་བརྗོད་དང་ཁ་བསྒྱུར་ཐབས་སྣ་ཚོགས་བྱས་དང་བྱེད་མུས་ཡིན་པ་ལྟར། གནས་ཚུལ་མཁོ་སྤྲོད་པས་འདི་གའི་གསར་འགོད་པར། ས་གནས་སྲིད་གཞུང་གིས་བཀྲ་ཕུན་ལགས་ཀྱིས་ཁྱིམ་གྱི་དཀའ་ངལ་ཞིག་གི་རྐྱེན་གྱིས་རང་ལུས་མེར་སྲེག་གནང་ཡོད་ཚུལ་དྲིལ་བསྒྲགས་བྱེད་ཀྱི་ཡོད་ཀྱང་། མང་ཚོགས་ཀྱིས་འཁྱོག་བརྗོད་དེ་ལ་ཡིད་ཆེས་གང་ཡང་བྱེད་ཀྱི་མེད་སྐོར་དང་། བཀྲ་ཕུན་ལགས་ཀྱི་བཟའ་ཟླ་ལོ་མང་གོང་ནས་འདས་གྲོངས་སུ་ཕྱིན་ཟིན་པ་དང་། བུ་ཕྲུག་རྣམས་ཀྱིས་རང་ཁ་རང་གསོ་བྱས་ཏེ་དཀའ་ངལ་དང་སྡུག་བསྔལ་གང་མེད་སྟབས། དགུང་ལོ་ ༨༡ ཡིན་པའི་རྒན་པོ་ཞིག་ལ་ཁྱིམ་གྱི་དཀའ་ངལ་གང་ཡང་མེད་སྐོར་བརྗོད་བྱུང་།
བཀྲ་ཕུན་ལགས་ནི་རྔ་པའི་འབྲོག་སྡེ་རྨེའུ་རུ་མའི་རུ་ཆེན་གསུམ་པའི་ཕུར་རྩ་ཚང་ནས་ཡིན་ཞིང་། གཉེན་ཉེ་དང་ཉེ་རྒྱུད་མང་པོ་ཡོད་པའི་ཁྲོད་ནས་ཁོང་ནི་རྒན་ཤོས་ཤིག་དང་ཚང་མས་གུས་བརྩི་བྱེད་ས་ཞིག་ཡིན་འདུག་ལ། དུས་རྟག་ཏུ་བོད་དོན་ལ་སེམས་ཁུར་དང་ལ་རྒྱ་ཡོད་མཁན་ཞིག་ཡིན་འདུག ཕྱི་ལོ་༢༠༢༡ ལོར་ཁོང་གི་བརྒྱད་ཅུའི་གྱ་སྟོན་སྐབས་སུ། བཀྲ་ཕུན་ལགས་ཀྱིས་“ ༸རྒྱལ་བ་རིན་པོ་ཆེའི་ཐུགས་རྗེ་བྱིན་རླབས་ཀྱིས། བོད་ལ་སྐྱིད་པའི་ཉི་མ་ཞིག་ཤར་རྒྱུ་ཡོད་པ་གཏན་འཁེལ་ཡིན་པས། ན་ཆུང་གཞོན་ནུ་ཚོའི་སེམས་ཤུགས་མ་ཆགས།’’ཞེས་ལམ་སྟོན་གནང་ཡོད་འདུག
གསར་འགོད་པ། དཔལ་ལྡན།
