ཧྥི་ལི་པེན་གྱི་སྲིད་འཛིན་འོས་བསྡུ་ནི་ཨ་རྒྱ་གཉིས་ལ་འབྲེལ་ལམ་གསར་པ་བསྐྲུན་པའི་གོ་སྐབས་ཞིག་ཏུ་རྩི་ཡི་ཡོད་ཀྱང་མཱག་ཁོ་སིར་སྲིད་འཛིན་གྱི་རྒྱལ་ཁ་ཐོབ་པ་དེས་རྒྱལ་ཁབ་ཀྱི་དམངས་གཙོའི་ལམ་ལུགས་ལ་དོ་ཕོག་འགྲོ་ཉེན་ཡོད་པའི་སེམས་འཚབ་བྱེད་ཀྱི་ཡོད་འདུག
ཁ་སང་ཧྥི་ལི་པེན་གྱི་ཕྱི་ལོ ༢༠༢༢ ལོའི་སྲིད་འཛིན་གྱི་དངོས་གཞིའི་འོས་བསྡུ་བྱས་ཡོད་པ་ལྟར། ད་ལྟའི་ཆར་འོས་གྲངས་ཞིབ་བཤེར་ཡོངས་སུ་ཚར་མེད་ཀྱང་། ཡུལ་དེའི་སྲིད་འཛིན་གཞོན་པ་ལྕམ་ལི་ནི་རོ་བྷེ་ཌོ་( leni Rebredo ) ལགས་སུ་འོས་གྲངས་ཀྱི་བརྒྱ་ཆ་ ༢༨ ལྷག་དང་། ཡུལ་དེའི་སྒེར་སྤྱོར་རིང་ལུགས་པ་ཧྥི་ཌན་ཌི་མཱག་ཁོ་སི་ཡི་བུ་ཧྥི་ཌན་ཌི་མཱག་ཁོ་སི་ཆུང་བ་(Ferdinand Marcos Jr ) ལ་འོས་གྲངས་ཀྱི་བརྒྱ་ཆ ༥༥།༨ ལྷག་ཐོབ་སྟེ། ཁོ་ལ་སྲིད་འཛིན་གྱི་རྒྱལ་ཁ་ཆེན་པོ་ཐོབ་ཀྱི་ཡོད་འདུག་ལ། དེ་ནི་མི་ལོ་སོ་དྲུག་གི་རྗེས་སུ་མཱག་ཁོ་སི་ཁྱིམ་རྒྱུད་ཀྱིས་སླར་ཡང་ཧྥི་ལི་པེན་གྱི་སྲིད་འཛིན་གྱི་དབང་ཆ་རྩོད་ལེན་བྱས་པའི་རྦ་རླབས་གསར་པ་ཞིག་ཏུ་རྩི་ཡི་འདུག
མཱག་ཁོ་སི་ཡིས་མི་མང་ནང་ཁུལ་དུ་ཆིག་སྒྲིལ་གྱི་ནུས་པ་གོང་སྤེལ་དང་། མི་མང་ལ་ལས་ཀ་མཁོ་སྤྲོད། ཞིང་ལས་དང་འཛུགས་སྐྲུན་གྱི་ལས་གཞི་ཁག་ལ་དངུལ་བུན་གཏང་རྒྱུ་དང་དཔལ་འབྱོར་བསྐྱར་གསོའི་ལས་འགུལ་སྤེལ་རྒྱུར་ཁས་ལེན་རྒྱུ་བྱས་ཡོད་སྟབས། ཁོ་ལ་སྲིད་འཛིན་གྱི་རྒྱལ་ཁ་ཐོབ་པའི་ཚོད་དཔག་བྱེད་ཀྱི་ཡོད་ཀྱང་། ཧྥི་ལི་པེན་ནང་དུ་ཕྱོགས་ཞེན་དང་ལྐོག་ཟ་རུལ་སུངས་ཀྱི་གནད་དོན་སྔར་ལས་ལྷག་ཡོང་རྒྱུའི་སེམས་འཚབ་བྱེད་ཀྱིན་ཡོད་འདུག་ལ། སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། སྒེར་སྤྱོད་རིང་ལུགས་པ་ཧྥི་ཌི་ནེ་ཌི་མྰག་ཁོ་སི་ཡི་བུ་མཱག་ཁོ་སི་ལ་འོས་གྲངས་ས་ཡ་ ༣༠ ལྷག་དང་། ཁ་གཏད་ཚོགས་པའི་འོས་མི་ཧྥི་ལི་པེན་གྱི་སྲིད་འཛིན་གཞོན་པ་ལྕམ་ལི་ནི་ལ་འོས་གྲངས་ས་ཡ་ ༡༤ ལྷག་བྱུང་བ་བཅས་འདི་ལོའི་སྲིད་འཛིན་འོས་བསྡུའི་ནང་མི་གྲངས་ས་ཡ་ ༤༥ ལྷག་གིས་ཆ་ཤས་བླངས་ཡོད་འདུག
གནད་དོན་དབྱེ་ཞིབ་པ་ཁག་ཅིག་གིས། ད་ལྟ་མི་ལོ ༢༡ རིང་ཧྥི་ལི་པེན་གྱི་སྲིད་འཛིན་གྱི་དབང་ཆ་སྒེར་སྤྱོད་བྱེད་མཁན་ཧྥི་ཌན་ཌི་ཡི་བུར་སྲིད་འཛིན་གྱི་རྒྱལ་ཁ་ཐོབ་ཀྱི་ཡོད་པ་ནི། ལྷོ་ཤར་ཨེ་ཤ་ཡའི་མི་འབོར་མང་ཤོས་གྲས་སུ་གཏོགས་པའི་ཧྥི་ལི་པེན་གྱི་དམངས་གཙོའི་ལམ་ལུགས་ལ་དོ་ཕོག་འགྲོ་སྲིད་པའི་སེམས་འཚབ་བྱེད་ཀྱིན་ཡོད་ཀྱང་། ད་ལན་གྱི་འོས་བསྡུའི་ཁྲོད་ནས་ཧྥི་ལི་པེན་རྒྱལ་ཁབ་ཀྱིས་ཨེ་ཤ་ཡའི་ནང་སྟོབས་ཤུགས་གོང་མཐོར་གཏོང་ཆེད། ཨ་རི་དང་རྒྱ་ནག་གཉིས་ལ་འབྲེལ་ལམ་བསྐྲུན་པའི་གོ་སྐབས་གསར་པ་ཞིག་ཡིན་སྐོར་རྗོད་ཀྱི་ཡོད་འདུག
ཧྥི་ལི་པེན་གྱི་སྲིད་འཛིན་འོས་བསྡུ་དེ་ནི་ཨ་རི་དང་རྒྱ་ནག་གཉིས་ཀས་དོ་སྣང་བྱ་ཡུལ་ཞིག་དང་། ཨ་རྒྱ་གཉིས་ཀར་གལ་གནད་ཆེ་བའི་ས་ཚིགས་ཤིག་ཏུ་གྱུར་འདུག རྒྱལ་ཁབ་དེ་ནི་ཤར་རྒྱ་ནག་རྒྱ་མཚོའི་མདུན་ཕྱོགས་སུ་ཆགས་ཡོད་སྟབས། རྒྱ་ནག་ལ་དཔལ་འབྱོར་དང་། ཚོང་ལས་སོགས་ཀྱིས་འབྲེལ་བ་དམ་ཟབ་ཡོད་པ་མ་ཟད། ད་ལྟ་བདམས་ཐོན་བྱུང་བའི་མཱག་ཁོ་སི་ནི་ཁ་གཏད་ཀྱི་འོས་མི་ལི་ནི་ལས་རྒྱ་ནག་ལ་འབྲེལ་ལམ་ཤུགས་ཆེ་བ་ཡོད་འདུག ཨ་རིས་ཧྥི་ལི་པེན་གྱི་མཐའ་མཚམས་སྲུང་བར་དམག་མི་འགྲེམས་འཇོག་བྱས་ཏེ། རྒྱལ་ཁབ་ཀྱི་མཐའ་མཚམས་སྲུང་སྐྱོབ་དང་། རྒྱ་ནག་གཞུང་གི་གནོན་ཤུགས་ལ་རྒོལ་ལན་སློག་རོགས་བྱེད་ཀྱི་ཡོད་ཀྱང་། རྒྱ་ནག་གཞུང་གིས་འདས་པའི་ལོ་ཤས་གོང་ནས་ཧྥི་ལི་པེན་གྱི་རྒྱལ་ས་མ་ནི་ལ་ ( Manila ) ཁུལ་དུ་སྐྱེད་ལྡན་བུན་གཡར་གྱི་ཐོག་ནས་འཛུགས་སྐྲུན་གྱི་ལས་གཞི་རྒྱ་ཆེན་སྤེལ་བཞིན་ཡོད་འདུག
ད་ལྟ་རང་ལོ་ ༦༤ ཡིན་པའི་མཱག་ཁོ་སོ་ནི་སྒེར་སྤྱོད་རིང་ལུགས་པ་ཧྥི་ཌན་ཌི་ཡི་བུ་ཡིན་ཞིང་། ཁོ་ཕྱི་ལོ ༢༠༡༠ ནས་ ༢༠༡༦ བར་ཧྥི་ལི་པེན་གྱི་གྲོས་ཚོགས་གོང་མའི་འཐུས་མི་ཡིན་འདུག དེ་སྔོན་ཧྥི་ལི་པེན་གྱི་ཆབ་སྲིད་ཚོགས་པ་རྙིང་གྲས་(Nacionalista Party ) དང་ ( Kilusang Bagong Lipunan ) གཉིས་ཀྱི་ཚོགས་མི་རྙིང་གྲས་ཤིག་ཡིན་ཡང་། འདས་ལོ་ནས་ (Partido Federal ng Pilipinas)ནང་མཉམ་ཞུགས་བྱས་ཡོད་འདུག འདས་པའི་མི་ལོ་ ༡༠ ཙམ་གྱི་རིང་ཁྱོན་ཡོངས་ནས་མཱག་ཁོ་སི་ཁྱིམ་བརྒྱུད་ཀྱི་ཆེ་མཐོང་ཇེ་མཐོར་ཕྱིན་པ་དང་བསྟུན། ཁོ་ལ་སྤྱི་སྒེར་གྱི་ཚོགས་པ་མང་པོ་ཞིག་གིས་རྒྱབ་སྐྱོར་ཐོབ་པ་བརྒྱུད། འདི་ལོའི་སྲིད་འཛིན་འོས་མི་ ༡༠ ཡི་ཁྲོད་ནས་དངོས་གཞིའི་འོས་མི་གཉིས་ཀྱི་གྲས་སུ་ཚུད་པ་མ་ཟད། མཐའ་མར་མང་མོས་ཤུགས་ཆེན་པོའི་ཐོག་ནས་སྲིད་འཛིན་དུ་བདམས་ཐོན་འབྱུང་གི་ཡོད་པ་རེད་འདུག
གསར་འགོད་པ། དཔལ་ལྡན།
