གནས་བརྟན་ལུགས་ཀྱི་ས་ག་ཟླ་བའི་ཚེས་ ༡༥ ཉིན་སྲིད་བློན་མུ་དྷི་མཆོག་ལུམ་བི་ནི་ཚལ་དུ་ཕེབས།

དེ་རིང་གནས་བརྟན་སྡེ་པའི་ལུགས་ཀྱི་ས་ག་ཟླ་བའི་ཚེས་བཅོ་ལྔ་ཉིན་སངས་རྒྱས་བཅོམ་ལྡན་འདས་སྐུ་བལྟམས་པའི་གནས་ལུམ་བི་ནི་ཚལ་དུ། རྒྱ་གར་གྱི་སྲིད་བློན་མུ་དྷི་མཆོག་དང་བལ་ཡུལ་གྱི་སྲིད་བློན་ཤར་བྷ་ཧ་ཌོར་མཆོག་རྣམ་གཉིས་མཇལ་འཕྲད་གནང་སྟེ། ལུམ་བི་ནི་ཚལ་དུ་ནང་པའི་རིག་གཞུང་དང་ཤུལ་དངོས་ (Buddhist Culture and Heritage) ཀྱི་ལྟེ་གནས་ཁང་ཆེན་པོ་ཞིག་འཛུགས་འཆར་ཡོད་པ་དེའི་རྨང་རྡོ་བཞག་གནང་ཡོད་འདུག

སྲིད་འཛིན་མུ་དྷི་མཆོག་གི་སྒེར་གྱི་ཊི་ཝེ་ཊར་དུ། གནས་བརྟན་སྡེ་བའི་ལུགས་ཀྱི་ས་ག་ཟླ་བའི་ཚེས་ ༡༥ ཉིན་ང་ཚོས་སྟོན་པ་བཅོམ་ལྡན་འདས་ཀྱི་ལྟ་གྲུབ་རྣམས་ལ་ཕྱིར་དྲན་ཞིག་བྱ་དགོས་པ་དང་། ཁོང་གི་ཐུགས་མགུ་བར་ང་ཚོས་ཁས་ལེན་བྱ་རྒྱུར་ནན་སྐུལ་བྱ་དགོས། སྟོན་པ་བཅོམ་ལྡན་འདས་ཀྱི་དགོངས་གཞི་དེ་དག་གིས་ང་ཚོའི་འཇིག་རྟེན་འདིར་སྔར་ལས་ལྷག་པའི་ཞི་བདེ་དང་། མཐུན་སྒྲིལ། རྒྱུན་གནས་ཡོང་བར་བྱ་ཐུབ། ཅེས་གསུངས་ཡོད་འདུག

ད་ལན་གྱི་སྲིད་བློན་མུ་དྷི་མཆོག་གི་རྒྱལ་འབྲེལ་འཚམས་གཟིགས་དེ་ནི། རྒྱལ་ཁབ་གཉིས་ཀྱི་གློག་འདོན་ལས་གཞི་ཚུད་པའི། ཕྱོགས་གཉིས་ཀྱིས་གཞུང་ལམ་འཛུགས་སྐྲུན་སོགས་ཀྱི་ཐད་ལ་མཉམ་ལས་བྱ་རྒྱུ་སོགས་ཀྱི་སྐོར་ལ་གླེང་སློང་གནང་ཡོད་ཅིང་།  སེངྒ་ལ་གཙོས་བལ་ཡུལ་དང་པ་ཀི་སི་ཐན་སོགས་ཀྱི་དཔལ་འབྱོར་ཉམས་རྒུད་དུ་འགྲོ་བཞིན་པའི་སྐབས་ཤིག་ཡིན་ཞིང་། བལ་ཡུལ་ནི་རྒྱ་ནག་གཞུང་གི་རྒྱུད་གཅིག་ལམ་གཅིག་གི་འཛུགས་སྐྲུན་གྱི་ཁོངས་སུ་ཚུད་པའི་རྒྱལ་ཁབ་ཅིག་ཡིན་སྟབས། རྒྱ་གར་གཞུང་ནས་བལ་ཡུལ་གྱི་དཔལ་འབྱོར་གནས་བབ་ཐད་སེམས་འཚབ་སྐྱེ་ཡི་ཡོད་པའི་བརྡ་ལན་ཞིག་ཆགས་ཀྱི་ཡོད་ཀྱང་། བལ་ཡུལ་ནང་གཞུང་འཛིན་གསར་པ་བསླེབས་པ་ནས་བཟུང་། སྲིད་བློན་ཤར་བྷ་ཧ་ཌོར་ལགས་ཀྱིས་སྣེ་འཁྲིད་པའི་བལ་གཞུང་གིས། རྒྱ་ནག་གི་རོགས་དངུལ་བླང་རྒྱུ་ཡིན་པ་ལས་འཛུགས་སྐྲུན་དང་འབྲེལ་བའི་བུ་ལོན་གང་ཡང་བླང་རྒྱུ་མིན་པ་རྒྱ་ནག་གཞུང་ལ་བརྡ་ལན་གསལ་བོ་སྤྲད་ཡོད་པ་རེད།

བལ་གཞུང་གསར་བས་དེ་སྔའི་གཞུང་དང་མི་འདྲ་བར། ཟླ་སྔོན་མའི་ཕྱི་ཚེས་ ༢༢ ཉིན་ཨ་རིའི་གྲོས་ཚོགས་གོང་འོག་གཉིས་ཀྱི་མི་སྣས་འདུས་པའི་སྐུ་ཚབ་ཚོགས་ཆུང་ཞིག་བལ་ཡུལ་དུ་གཞུང་འབྲེལ་འཚམས་གཟིགས་སུ་བསུས་ཡོད་པ་མ་ཟད། ཟླ་དེའི་ཕྱི་ཚེས་ ༢༤ ཉིན་བལ་ཡུལ་གཞུང་གིས་ཨ་རིའི་རོགས་ཚོགས་བརྒྱུད་ཨ་སྒོར་ས་ཡ་ ༦༥༩ ཡི་རོགས་དངུལ་ལེན་རྒྱུ་གཏན་འཁེལ་བྱས་ཡོད་པ་རེད་ལ། སྐབས་དེར་ཨ་རིའི་སྐུ་ཆབ་ཚོགས་ཆུང་གིས་བལ་ཡུལ་དུ་གནས་སྡོད་སྐྱབས་བཅོལ་བོད་མི་རྣམས་ལ་ཡིག་ཆའི་དཀའ་ངལ་ཡོད་པ་སེལ་དགོས་སྐོར་བལ་ཡུལ་གཞུང་ལ་ཞུ་སྐུལ་ཡང་བྱས་ཡོད་འདུག

འདས་ལོའི་ཕྱི་ཟླ་ ༧ ཚེས་ ༡༣ ཉིན་བལ་ཡུལ་གྱི་རྒྱལ་ཡོངས་འོས་བསྡུ་ཆེན་མོའི་སྐབས་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དང་ད་ལྟའི་སྲིད་བློན་ཤར་བྷ་ཧ་ཌོར་ལགས་སུ་གཞུང་འཛིན་གྱི་འོས་བསྡུའི་རྒྱལ་ཁ་ཐོབ་པ་དང་གཞུང་འཛིན་གསར་བ་ནས། ཕྱི་འབྲེལ་སྲིད་ཇུས་ལ་གུ་ཡངས་འགྱུར་བཅོས་བཏང་སྟེ། དམིགས་བསལ་ཨ་རི་དང་རྒྱ་གར་སོགས་ངམངས་གཙོའི་རྒྱལ་ཁབ་ཁག་དང་འབྲེལ་འདྲིས་ཤུགས་ཆེ་རུ་གཏོང་གི་ཡོད་པའི་ངོས་འཛིན་བྱེད་ཀྱི་ཡོད་འདུག

གསར་འགོད་པ། དཔལ་ལྡན།