དབུས་བོད་ཀྱི་བུད་མེད་ལྷན་ཚོགས་ཀྱིས་ཟས་བཅད་ངོ་རྒོལ་གྱི་ལས་འགུལ་སྤེལ།

འཛམ་གླིང་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་(Michelle Bachelet)ལགས་ཟླ་འདིའི་ནང་རྒྱ་ནག་གི་དབང་བསྒྱུར་འོག་གནས་ཡོད་པའི་ས་ཁུལ་ཁག་ཅིག་ཏུ་འཚམས་གཟིགས་སུ་ཕེབས་རྒྱུའི་གསལ་བསྒྲགས་གནང་བ་ལྟར། བོད་ནང་ངེས་པར་དུ་ཕེབས་ཐབས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་གཟིགས་ཞིབ་གནང་དགོས་པའི་རེ་འདུན་བཏོན།

དེ་རིང་ནི་༧གོང་ས་རྒྱལ་བ་རིན་པོ་ཆེ་མཆོག་གིས་ངོས་འཛིན་མཛད་པའི་༧པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་རྒྱ་ནག་གིས་འཛིན་བཟུང་བཀག་ཉར་བྱས་ཏེ་མི་ལོ་ ༢༧ ཕྱིན་པའི་ཉིན་མོ་དང་བསྟུན། དབུས་བོད་ཀྱི་བུད་མེད་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པས་རྒྱ་ནག་གཞུང་གིས་༧པཎ་ཆེན་རིན་པོ་ཆེ་སྐུ་འཁོར་དང་བཅས་འཕྲལ་དུ་ཀློད་གྲོལ་གཏང་དགོས་པའི་རེ་འདུན་འདོན་གྱི་འདུག་ལ། དབུས་བུད་མེད་ལྷན་ཚོགས་ནས་མེག་གྷན་བཞི་མདོ་རུ་དེ་རིང་ཕྱི་དྲོའི་ཆུ་ཚོད་ ༥ བར་དུ་ཟས་བཅད་ངོ་རྒོལ་གནང་བཞིན་འདུག

 བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་ཚོགས་གཞོན་ཚེ་རིང་སྒྲོལ་མ་ལགས་ཀྱིས་བསྒྲགས་གཏམ་སྒྲོག་སྦྱངས་བྱས་པའི་ནང་། ཟླ་༥ ཚེས་༡༧ ཉིན་མོ་ནི་ྋཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་དང་། ཁོང་གི་སྐུ་འཁོར་ནང་མི་རྣམས་དང་། གདན་ས་ཆེན་པོ་བཀྲ་ཤིས་ལྷུན་པོའི་དབུ་འཛིན་དང་ཡང་སྲིད་འཚོལ་ཞིབ་ཚོགས་ཆུང་གི་འགན་འཛིན་གཙོ་བོ་བྱ་བྲལ་རིན་པོ་ཆེ་བྱམས་པ་འཕྲིན་ལས་མཆོག་དང་བྱང་པ་ཅུང་ལགས་བཅས་རྒྱ་གཞུང་གིས་བཙན་འཁྲིད་འོག་གར་སོང་ཆ་མེད་དུ་གྱུར་ནས་ལོ་ངོ་ཧྲིལ་པོ་ཉི་ཤུ་རྩ་བདུན་འཁོར་བའི་དུས་ཚིགས་གལ་ཆེ་ཞིག་ཡིན་པའི་བོད་ཀྱི་བུད་མེད་ལྷན་ཚོགས་ནས་ལོ་ལྟར་དུས་དྲན་སྲུང་བརྩིས་ཞུ་ཡི་ཡོད།བོད་ཀྱི་སྔར་སྲོལ་ལྟར་ན་ྋརྒྱལ་བ་ཡབ་སྲས་རྣམ་གཉིས་པན་ཚུན་ཡང་སྲིད་ངོས་འཛིན་གནང་རེས་ཀྱི་ཐུན་མོང་མ་ཡིན་པའི་ལམ་ལུགས་ཤིག་ཡོད། རྒྱལ་བ་ཡབ་སྲས་རྣམ་གཉིས་ནི་བོད་དང་བོད་མི་རིགས་སྤྱི་དང་ཐུན་མོང་མིན་པའི་ལས་འབྲེལ་ཁྱད་དུ་འཕགས་པའི་རྣམ་ཐར་མདོ་དང་བསྟན་བཅོས་ཁུངས་ལྡན་མང་པོའི་ནང་གསུངས་ཡོད་པ་མ་ཟད་ལྷག་པར་༧གོང་ས་༧རྒྱལ་དབང་རིམ་བྱོན་དང་། ༧ཀུན་གཟིགས་པཎ་ཆེན་རིམ་བྱོན་དབར་ལ་ཕན་ཚུན་ཐུན་མིན་བླ་སློབ་ཀྱི་འབྲེལ་བ་དམ་ཟབ་དང་ཐུགས་བསྐྱེད་དམ་ཚིག་འོ་ཆུ་གཅིག་འདྲེས་ཀྱིས་གངས་ཅན་ལྗོངས་ཀྱི་ཆོས་སྲིད་ཀྱི་ལོ་རྒྱུས་ཆུ་རྒྱུན་རིང་པོའི་ནང་རྒྱལ་བ་ཡབ་སྲས་ཉི་ཟླའི་རླབས་ཆེན་མཛད་འཕྲིན་འབུམ་གྱི་གཟི་བྱིན་འོད་སྣང་གིས་བཀྲིན་བསྐྱངས་པའི་བསམ་གྱི་མི་ཁྱབ་པའི་ངོ་མཚར་ལོ་རྒྱུས་ལྡན་ཡོད། ༧པཎ་ཆེན་རིན་པོ་ཆེ་མཆོག་གི་གནད་དོན་ད་ཆ་རྒྱལ་སྤྱིའི་གནད་དོན་ཆགས་སྟབས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པ་དང་། དེ་བཞིན་རྒྱལ་ཚོགས་ཀྱི་བཙན་དབང་དང་དབང་མེད་དུ་བཙན་ཁྲིད་ཀྱིས་གར་སོང་ཆ་མེད་དུ་གྱུར་པའི་གནད་དོན་ཐོག་ཉམས་ཞིབ་ཚན་པ་དང་། གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་ྋཔཎ་ཆེན་རིན་པོ་ཆེ་མཆོག་གི་གནས་ཚུལ་གསལ་ཁ་དགོས་པའི་དགོས་འདུན་སྟོན་པར། རྒྱ་གཞུང་གིས་ཞིབ་ཆའི་དོན་དངོས་དང་མཐུན་པའི་འགྲེལ་བརྗོད་སྣ་གཅིག་ཀྱང་མེད་ཁར་འཛམ་གླིང་མི་མང་རྣམས་ལ་མགོ་འཁོར་གཏོང་ཐབས་སུ་༧པཎ་ཆེན་རིན་པོ་ཆེ་མཆོག་དང་སྐུ་འཁོར་རྣམས་སྐུ་གཟུགས་བདེ་ཐང་ཡོད་པ་དང་། ཁོང་རྣམ་པས་གཞན་གྱིས་བསུན་ བཙིར་ལ་དགའ་པོ་མེད་ཚུལ་སོགས་འགྲེལ་བཤད་མི་བདེན་བརྫུན་སྒྲིག་གི་གཏམ་བཤད་ལོ་ཤས་སྔོན་གསར་འགྱུར་བརྒྱུད་ལམ་ཁག་ནང་ཐོན་ཡོད། དེ་དག་ནི་ཉི་ཤར་སྦར་མོས་མི་ཁེབས་པའི་དཔེ་ལྟར་ད་བར་རྒྱལ་སྤྱི་མི་མང་ལ་མགོ་འཁོར་བཏང་གི་ཡོད་པའི་དངོས་འཛིན་དགོས་པ་གསལ་པོ་རེད། སྤྱིར་རྒྱ་ནག་གི་བཅའ་ཁྲིམས་ནང་འཁོད་ལྟར་ན་སྤྱི་འབངས་སུ་ཞིག་ཡིན་རུང་ལོ་༡༨ མ་ལོན་བར་ཁྲིམས་ཀྱི་འགན་དབང་གང་ཡང་མེད་ཅེས་བཤད་ཡོད་ནའང་ནག་ཉེས་གང་ཡང་མེད་ཅིང་དགུང་གྲངས་དྲུག་ལས་མ་སོན་པའི་༧ཀུན་གཟིགས་པན་ཆེན་རིན་པོ་མཆོག་བཙན་འཁྲིད་བཙོན་བཅུག་བྱས་པ་འདི་ནི་རྒྱ་ནག་དམར་གཞུང་རང་གི་རྩ་ཁྲིམས་རང་གིས་རྡོག་བརྫིས་བཏང་བ་ཞིག་ཆགས་ཡོད་པ་མ་ཟད་མིང་གྲགས་ཅན་གྱི་རྒྱ་ནག་གཞུང་གིས་བྱིས་པ་བཙན་འཁྲིད་རྐུ་འཁྱེར་གྱིས་ད་བར་མི་ལོ་ཉེར་བདུན་རིང་མི་སུ་གཅིག་ཀྱང་མཇལ་འཕྲད་ཞུར་མི་བཅུག་པའི་བྱེད་སྟངས་འདི་ནི་ཧ་ཅང་སྡུག་རྩུབ་ཆེ་ཞིང་སྐྱི་གཡའ་བ་དང་ངོ་ཚ་ཁ་སྐྱེངས་དང་མི་སྤྱོད་ལས་འདས་པའི་དྲག་སྤྱོད་ཞིག་ཆགས་ཡོད། རྒྱ་གཞུང་ནས་རྟག་པར་བོད་ནང་རང་དབང་དང་བདེ་སྐྱིད་ཡོད་གནས་ཁྱབ་བསྒྲགས་སྤེལ་བཞིན་པ་ལྟར་ན་༧པཎ་ཆེན་རིན་པོ་ཆེ་མཆོག་འདི་ལོ་དགུང་ལོ་༣༣ལ་ཕེབས་པའི་བར་རྒྱ་ནག་གིས་དམ་བསྒྲགས་འོག་བཞུགས་དོན་མེད་སྟབས་རྒྱ་ནག་གི་རྩ་ཁྲིམས་ནང་འཁོད་བཞིན་མི་མང་ལ་རང་དབང་ཡོད་པ་ལྟར་ན་སྤྱི་མཚུངས་ཀྱིས་ཁོང་ལའང་རང་ཐག་རང་གཅོད་ཀྱི་སྨྲ་བརྗོད་ཐོབ་ཐང་ཡོད་དགོས་པ་རེད། རྒྱལ་སྤྱིའི་ནང་གི་གཞུང་འབྲེལ་གཟིགས་སྐོར་སྐབས་༧པཎ་ཆེན་རིན་པོ་ཆེར་མཇལ་འཕྲད་ཡོང་བའི་ཐབས་ཤེས་གང་མང་གནང་ཡོད་ན་ཡང་། འཛམ་གླིང་སྟེང་དངོས་འབྲེལ་ཐོག་ཞལ་མཇལ་དང་སྐུ་ན་སོན་པའི་སྐུ་དཔར་ཞིག་ཀྱང་མཇལ་རྒྱུ་མེད་པ་དེ་ཧ་ཅང་བློ་ཕམ་དང༌། རྒྱལ་སྤྱིའི་མི་སྣ་གྲགས་ཅན་སུ་གཅིག་དང་མཇལ་འཕྲད་ཞུས་བཅུག་གི་མེད་པ་དེ་ནི་རྒྱ་ནག་དམར་གཞུང་གིས་རྒྱལ་སྤྱིའི་དཔོན་རིགས་ཁག་ལ་སྣང་མེད་དང་མཐོང་ཆུང་ལས་བརྩིས་འཇོགས་རྩ་བ་ནས་ཞུ་གི་མེད་པ་ཞིག་ལ་ངོས་འཛིན་བྱེད་ཀྱི་ཡོད། ཅེས་འཁོད་འདུག

ཡང་བསྒྲགས་གཏམ་ནང་། རྒྱ་ནག་དམར་གཞུང་གིས་ྋགོང་ས་ྋསྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་༧ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་བཙན་འཁྲིད་བྱས་པ་དེ་རྒྱ་གཞུང་གིས་བོད་ཀྱི་ནང་ཆོས་ལ་ཁྱད་གསོད་དང་།མཐོང་ཆུང། བརྩི་མེད་རྡོག་རོལ་དུ་བཏང་བ་གསལ་པོ་མཚོན་གྱི་ཡོད། ཆོས་དད་བྱེད་རྒྱུ་དེ་འཁྲབ་སྟོན་ཞིག་མ་ཡིན་པར་བོད་མིའི་སེམས་ཁམས་ནང་འདུ་ཤེས་ཟབ་མོ་ལྡན་ཡོད། བོད་མི་རིགས་དང་རིག་གཞུང་ལ་བརྩི་འཇོག་དང་ཤེས་རྟོགས་ཐུབ་པ་དགོས་ན་སངས་རྒྱས་ཀྱི་བསྟན་པ་དང་བོད་ཀྱི་རིག་གཞུང་གཉིས་ཁ་བྲལ་ཐབས་མེད་པ་དེ་ངེས་པར་ཤེས་དགོས། ༧ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་ཡང་སྲིད་ྋཔཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་ལོ་ངོ་ཉི་ཤུ་རྩ་བདུན་རིང་གར་སོང་ཆ་མེད་དུ་གྱུར་བའི་གནས་ཚུལ་ཡོང་རྐྱེན་ལ་བོད་མི་ཙམ་མ་ཟད་འཛམ་གླིང་ནང་གི་མི་མང་ཡོངས་ནས་སེམས་ཚབས་ཆེན་པོ་གནང་གི་ཡོད། རྒྱ་དམར་གཞུང་གིས་བོད་ཐོག་ལག་བསྟར་བྱེད་བཞིན་པའི་མི་རིགས་རྩ་གཏོང་གྱི་ངན་བྱུས་དག་མུ་མཐུད་ངོས་ལེན་རྩ་བ་ཉིད་ནས་བྱེད་ཐབས་བྲལ་ཏེ། བོད་ནང་གཙོ་བོར་གྱུར་བའི་བོད་མི་དཔའ་བོ་དཔའ་མོ་༡༦༩ བརྒལ་བས་ཐོབ་དཀའི་མི་ལུས་རིན་ཆེན་མེར་བསྒྲོན་ཏེ། རྒྱ་ནག་དམར་གཞུང་གི་དབང་བསྒྱུར་འོག་བཟོད་དཀའ་བའི་དཀའ་ངལ་དེ་རྒྱལ་སྤྱིའི་ཐོག་གསལ་སྟོན་གནང་ཡོད་ན། དེ་དག་གི་བྱུང་རྐྱེན་ལ་ངོས་ལེན་གྱིས་འཕྲལ་དུ་ངན་བྱུས་སྲིད་བྱུས་མཚམས་འཇོག་དགོས་པ་རྒྱ་ནག་དམར་གཞུང་ལ་ཞུ་ཡི་ཡོད། དེ་བཞིན་ྋཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་མཆོག་ཕྱི་ལོ་༡༩༩༥ ལོར་བཙན་ཁྲིད་བྱས་པ་ནས་བཟུང་ད་བར་༧ཀུན་གཟིགས་པཎ་ཆེན་རིན་པོ་ཆེ་མཆོག་གློད་གྲོལ་ཐོབ་ནས་ྋརྒྱལ་དབང་ཡབ་སྲས་གཉིས་གསེར་ཞལ་ལྷན་འཛོམས་ཐོག་གདན་ས་བཀྲིས་ལྷུན་པོར་ཞབས་སོར་མ་འཁོད་བར་དུ་མུ་མཐུད་འཚོལ་ཞིབ་རྩད་གཅོད་ཀྱི་ལས་འགུལ་བློས་གཏོང་བྱེད་མི་སྲིད་ཅེས་བརྗོད་རྒྱུ་དང་སྦྲགས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་ནས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། དེ་རིང་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་དང། ཁོང་གི་སྐུ་འཁོར་ནང་མི་རྣམས་དང་།བཙན་ཁྲིད་འོག་གར་སོང་ཆ་མེད་དུ་གྱུར་ནས་ལོ་ངོ་ཧྲིལ་པོ་ཉི་ཤུ་རྩ་བདུན་འཁོར་བའི་ཉིན་མོར་བོད་ཀྱི་བུད་མེད་ལྷན་ཚོགས་དབུས་ས་གཉིས་ནས་དེ་རིང་གིས་ཉིན་མོར་བོད་ཀྱི་བུད་མེད་ལྷན་ཚོགས་ནས་རྒྱལ་སྤྱིའི་མཉམ་འབྲེལ་རྒྱལ་ཚོགས་དབུས་ས་གཉིས་ཀྱི་ཉིན་བརྒྱ་དུས་གཅིག་ལ་ཟས་བཅད་ངོ་རྒོལ་གྱི་ལས་འགུལ་ས་གནས་ས་ཐོག་ཏུ་སྤེལ་གྱི་ཡོད་པའི་སྐབས་འདིར། འགྲོ་བ་མིའི་ཐོབ་ཐང་ཚན་པ། བྱིས་པའི་ཐོབ་ཐང་ཚོགས་ཆུང་། བཙན་དབང་འོག་གར་སོང་ཆ་མེད་དུ་གྱུར་པའི་ལས་དོན་རྟོག་ཞིབ་ཚོགས་ཆུང་། ༧སྤྱིའི་དབུ་འཁྲིད་རྣམ་པ། རྒྱལ་སྤྱིའི་ནང་ཡོད་པའི་བོད་དོན་རྒྱབ་སྐྱོར་ཚོགས་པ་བཅས་ལ་གཤམ་འཁོད་དགོས་འདུན་ཁག་ལ་རྒྱབ་སྐྱོར་ཡོང་བའི་རེ་སྐུལ་ཞུ་རྒྱུ་ཡིན། ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་ཁོང་གི་སྐུ་འཁོར་ནང་མི་རྣམས་དང་། གདན་ས་བཀྲིས་ལྷུན་པོའི་དབུ་འཛིན་དང་ཡང་སྲིད་འཚོལ་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་མཆོག་དང་བྱང་པ་གཅུང་ལགས་གཙོས་ཉེས་མེད་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པ་རྒྱ་གཞུང་ལ་གནོན་ཤུགས་སྤྲོད་བྱ་དགོས་པ་དང་། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་(Michelle Bacheleb) མཆོག་ལ་དམིགས་གསལ་གྱི་ འདི་ལོ་ཟླ་བ་༥ པའི་ནང་རྒྱ་ནག་དང་རྒྱ་ནག་གི་དབང་བསྒྱུར་འོག་གནས་ཡོད་པའི་ས་ཁུལ་ཁག་ལ་མཚམས་གཟིགས་ཕེབས་རྒྱུའི་གསལ་བསྒྲགས་གནང་བ་བཞིན་བོད་ནང་ངེས་པར་དུ་ཕེབས་ཐབས་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་གཟིགས་ཞིབ་མཐིལ་ཕྱིན་ཡོང་བའི་འབོད་སྐུལ་ཤུགས་དྲགས་ཞུ་ཡི་ཡོད་སོགས་འཁོད་འདུག

དེའི་རྗེས་ཧི་མ་ཅལ་མངའ་སྡེའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་ ( Ajay Singh mankotia) ལགས་ཀྱིས། རྒྱ་ནག་གཞུང་གིས་སྐུ་གཟིགས་༧པཎ་ཆེན་རིན་པོ་མཆོག་འཛིན་བཟུང་བཙོན་འཇུག་བྱས་སྟེ། མི་ལོ་ཧྲིལ་པོ་ ༢༧ འགྲོ་ཡི་ཡོད་ཀྱང་། ད་ལྟའང་བོད་མི་ཚོས་ཁོང་གི་སྐོར་ལ་ཤེས་རྟོགས་མ་བྱུང་བར་ལུས་པ་དེར་བློ་ཕམ་དང་གདུང་སེམས་མཉམ་སྐྱེད་ཞུ་ཡི་ཡོདལ། རྒྱ་ནག་གཞུང་གིས་བོད་ཀྱི་བླ་ཆེན་ཞིག་གང་བྱུང་འཛིན་བཟུང་བཙོན་འཇུག་བྱས་པ་དེ་ནི་ཧ་ཅང་ཐབས་སྐྱོ་བོ་ཞིག་ཡིན་སྟབས། རྒྱ་ནག་གཞུང་ལ་བྱ་སྤྱོད་དེར་གྲུབ་འབྲས་ངན་པ་ཞིག་འཐོན་རྒྱུ་ཡིན་པ་གསལ་པོ་རེད། བོད་ཀྱི་བུད་མེད་ལྷན་ཚོགས་ཀྱིས་དེ་རིང་ལས་འགུལ་འདི་འདྲ་ཞིག་སྤེལ་བར་ཧིན་བོད་མཛའ་འབྲེལ་ཚོགས་པས་རྒྱབ་སྐྱོར་ཞུ་བཞིན་ཡོད་ལ། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་སྨོན་གྱི་འོག་ནས་བོད་མི་ཚོས་མུ་མཐུད་དུ་ལས་འགུལ་འདིའི་རིགས་སྤེལ་གལ་ཆེན་པོ་ཡིན་ཞིང་། ཧིན་བོད་མཛའ་འབྲེལ་ཚོགས་པས་བོད་དོན་ཐད་ལས་འགུལ་སྤེལ་བར་མུ་མཐུད་དུ་རྒྱབ་སྐྱོར་བྱ་རྒྱུ་ཡིན་སྐོར་སོགས་གསུངས་སོང་།

ཟས་བཅད་ངོ་རྒོལ་གྱི་ལས་འགུལ་དེ་དེ་རིང་ཞོགས་པ་ཆུ་ཚོད་ ༡༠ ནས་ཕྱི་དྲོའི་ཆུ་ཚོད་ ༥ བར་གནང་གི་ཡོད་པ་དང་། དེ་བཞིན་དེ་རིང་དབུས་བོད་བུད་མེད་ལྷན་ཚོགས་ཀྱིས་ས་གནས་ཁག་ ༥༨ ལྷག་གི་ནང་དུ་ངོ་རྒོལ་ལས་འགུལ་སྣ་མང་སྤེལ་མུས་ཡིན་འདུག་ལ། དབུས་བོད་རང་བཙན་སློབ་ཕྲུག་ཚོགས་པས་ཀྱང་དྷ་ས་མེག་རྒན་ཁྲོམ་གཞུང་དུ་༧པཎ་ཆེན་རིན་པོ་དང་འབྲེལ་བའི་ཡིག་ཆ་འགྲེམས་སྤེལ་གྱིས། རྒྱ་ནག་གཞུང་གིས་ཁོང་ཉིད་ཀློད་གྲོལ་གཏང་དགོས་པའི་རེ་འདུན་འདོན་གྱི་འདུག

གསར་འགོད་པ། དཔལ་ལྡན།